SERIAN, 15 Mei — Sebuah ruang bilik di Kampung Tesu Kura, Tebedu betapi enggau situasyen ti ngirauka ati lebuh stor nyimpan barang sida runtuh ketegal tanah tusur ti nyadi malam ensanus berindik ari ujan enda ngengetu ba kandang menua nya.

Penusah nya ngujungka struktur tanah ba mua rumah mansa tusur sereta meri risiko ngagai pengelikun sida ke ngempu rumah.

Palan Operasyen Opis Bomba enggau Penyah Penusah Malaysia (JBPM) Sarawak nengah siti penerang madahka sida nerima kangau ngenyit bekaul enggau penusah nya urung pukul 8.28 malam sebedau ngatur seraban ari Balai Bomba enggau Penyah Penusah (BBP) Serian ngelawa endur nya.

Komander Operasyen, Pemesai Bomba Kanan I (PBK I) Rosnani Malong madah, raban sida datai ba endur nya urung pukul 9.18 malam lalu nemu tanah tusur nyadi urung satu meter ari rumah mansa.

Nitihka penerang iya, penusah runtuh nya ngerusak abis stor nyimpan barang enggi sida sebilik.

“Asil pansik keterubah tetemuka kandang endur nya agi bedau entap ketegal retak ba parit enggau struktur rumah ti bisi potensial ngasuh runtuh udah nya enti ujan majak nyadi,” ku iya.

Ku iya, ketegal pekara pengelikun, orang ke nguan rumah nya udah dilalau mindah enggau lengkas dikena nyeliahka sebarang penusah ke enda manah nyadi.

Berebak enggau nya,
penerang bekaul enggau penusah nya deka dikenatai ngagai Komiti Mutarka Penusah Ngenyit Nengeri (SDMC) ngambika ulih dipatau sereta dipejalaika enggau silik agi ba kandang endur ke kena penusah nya.

Mensia mayuh kelebih agi peranak ke diau besemak enggau kandang endur lereng mega dilalau ngambika seruran bejejaga enggau tanda tumu tanah mindah baka retak ba dinding, lantai enggau atas tanah, kelebih agi maya musin ujan ke majak nyadi. — RBI

KUCHING, 15 Mei — Opis Kereja Raya Sarawak terus bejalaika tanggungpengawa ti beguna dalam nyukung agenda pemansang nengeri tu lebuh nyereta sesi libat urus dikena nyerenih sereta ngaluska simpul pejurai Sapit Premier Sarawak, Datuk Amar Douglas Uggah Embas beserimbai enggau Aum Keterubah Ungkup Penggal Kelima Kunsil Nengeri (DUN) Sarawak Ke-19.

Sesi nya digulu Direktor Kereja Raya Sarawak, YBhg. Datu Adj. Prof. Ir. Ts. Gs. Br. PMr. Dr. Cassidy anak Morris dikena nyendiaka diri napi simpul pejurai ke diperambu deka dikenataika Datuk Amar Douglas Uggah kena 19 Mei 2026.

Datuk Amar Douglas Uggah ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Sarawak dikearapka ulih negu bemacham sukut bekaul enggau pemansang infrastruktur nengeri tu nyengkaum pengawa bejalaika projek strategik, pemujur ke diatu, pemar bejalaika pemansang di Sarawak’.

Sesi libat urus nya ngemeratka pengawa meresa baru, ngatur koordinasyen enggau nyerenih isi simpul jaku dikena nentuka tetiap fakta, pemansang projek enggau polisi perintah ulih dikenataika enggau komprehensif, betul sereta setipak enggau aspirasyen pemansang Sarawak.

Kelimpah ari nya, sesi nya mega nyadi pelasar ke beguna dalam ngenegapka koordinasyen entara opis menteri enggau ejensi teknikal dikena nentuka agenda pemansang infrastruktur nengeri tu terus dipejalaika enggau efektif ungkup pengelantang rayat.

Pengawa ngaul diri enggau chakah Opis Kereja Raya Sarawak dalam sesi nya mandangka komitmen opis nya terus nyukung pengawa Perintah Sarawak ngenegapka pemansang infrastruktur moden, meruan sereta tan seriris enggau agenda transformasyen pemansang nengeri. — RBI

KUCHING, 15 Mei – Gerija St.Peter Padungan ke bepalan ba mengeri tu ngembuan penyelai kediri empu nyadi palan pesaka asal ke ulih matak penatai temuai domestik enggau antarabansa.

Berebak enggau nya, Menteri Dagang Temuai, Seni enggau Main Asal (MOTAC), Datuk Seri Tiong King Sing mantaika langgur ambika gerija tu digaga nyadi sebengkah produk dagang temuai.

“Gerija St.Peter Padungan bisi penau dipandangka nyadi siti ari produk dagang temuai pesaka enggau jalai pengarap di nengeri tu beserimbai enggau Taun Nemuai Ke Malaysia (TMM) 2026,” ku Tiong dalam penerang dikenataika Gerija St.Peter Padungan.

Nitihka penerang ari Gerija St.Peter Padungan mega, pekara nya dipadahka Tiong rambau penemuai rasmi ngagai gerija nya kemari.

“Maya penemuai nya, iya mantaika pengerindu deka ngelakuka Gerija St.Peter Padungan nyadi siti ari palan dagang temuai beserimbai enggau TMM 2026.

“Pengangkun nya ngayanka pemesai guna gerija tu ukai semina ari sukut pengarap, tang mega sejarah, budaya enggau pangku pengawa iya dalam komuniti setempat,” ku iya nengah siti penerang ba Facebook sehari tu.

Berindik enggau nya, komuniti gerija mega meri pengaga ati ngagai penemuai rasmi nya lalu madahka nya siti basa ke besai ngagai sida.

Sida mega mantaika komitmen diri deka terus nerima penatai temuai ari dalam enggau luar menua.

“Tu dikena ngasaika kediri empu pesaka, pengarap enggau penyiru komuniti di Gerija St.Peter Padungan Peter Padungan,” ku iya nambah. -RBI

SAMARAHAN, 15 Mei – Tim Charlie ari Raban Penyaga Orang Periman Malaysia (APM) Samarahan nerima kangau ngenyit bekaul enggau penusah aksiden jalai alun ti ngaul sebuah mutosikal di Jalai Belakang The Summer Shopping Mall, Kota Samarahan, sehari tu tadi.

Lebuh datai ba palan penusah nyadi, raban nya tetemuka dua iku lelaki ke bisi bakal ketegal aksiden.

Peresa tumu tetemuka siku ari seduai nya bakal ba kaki kiba enggau punggung, lalu siku patah jari kiba.

Tim Charlie enggau lengkas meri bantu tumu ngagai seduai nya sebedau dibai ngagai Palan Tungkul Ati Sepital Besai Sarawak ngambika diperubat enggau silik agi.

Lebuh datai ba sepital, seduai iya udah diserah ngagai sepital ngambi pansik ulih dipejalaika enggau silik agi sereta diperubat.

Mensia mayuh ke betapi enggau sebarang penusah ngenyit tau ngenataika ngagai APM Samarahan nengah lumur 082-672999 tauka talipaun penusah ngenyit 999. -RBI

BINTULU, 15 Mei — Penyedar senentang sukut pengelikun ari penusah angus majak ditegapka lebuh Balai Bomba enggau Penyah Penusah (BBP) Kidurong ngatur program randau mindah ari begunan enggau demonstrasyen ngena perengka pengerara api ba premis Corewell, sehari tu.

Program ke diatur ari pukul 9.00 pagi nyentuk 11.00 pagi nya ngaul 22 iku penyereta ti mungkur 17 iku lelaki enggau lima iku indu.

Entara batang isi program nya iya nya randau mindah dalam begunan, penerang pengelikun penusah angus enggau latih praktikal ngena perengka pengerara api dikena nyendiaka diri napi penusah ngenyit.

Nengah sesi meri penerang nya, bala penyereta dipadahka enggau kebuah penusah angus nyadi, chara nagang tumu sereta pengawa ke patut dipejalaika enti sema penusah angus nyadi ba palan endur gawa tauka ba kandang endur ke ngelingi.

Demonstrasyen ngena perengka pengerara api mega meri awak ngagai penyereta meretika teknik ngena ti betul dikena nagang api mit sebedau nyadi balat agi.

Program nya dipejalaika Tim Bravo BBP Kidurong betuaika Team Supervisor, PBK I Fabian Andy Jesi begulai enggau kaban bukai nyengkaum PB Mohd Syahrul bin Rudin enggau beberapa iku kaban operasyen BBP Kidurong.

Sama bisi datai ngemujurka program nya Pemesai Kanan PBT II Rary Anak Binjie.

Pengawa ngatur program tu ukai semina nambahka tikas penyedar bala penyereta nuju penusah angus, tang mega ngenegapka agi pengawa nyikap diri sereta jampat bejalaika pengawa lebuh napi gaya penusah ngenyit.

Inisiatif ti benung dipejalai JBPM tu setipak enggau komitmen piak iya ti deka nanam chara pengelikun ari penusah angus ba komuniti nengah chara “Prestasi Tinggi, Cepat dan Mesra”. -RBI

MUKAH, 15 Mei — Polis Pelilih Mukah mujur ngetan dua iku lelaki peranak menua luar ti dipelabaka bisi kaul enggau kes enchuri kereban ngaga rumah di Kampung Tellian Tengah, Mukah, nengah operasyen bebida kena 14 Mei tu tadi.

Ketuai Polis Pelilih Mukah, DSP Muhamad Rizal Alias ​​madahka, pengawa ngetan nya digaga tim kaban Bagi Pansik Jenayah IPD Mukah bepelasarka penerang enggau pemansik bekaul enggau kes enchuri ti ngaul perengka ngaga jematan.

Nitihka penerang iya, ripot pengelenyau perengka nya digaga kena 3 Mei 2026 ulih siku menijar kompeni menua tu ke beumur 40 taun pengudah tetemuka sekeda perengka kereja lenyau lalu nyangka dua iku pengereja pengawa iya enchuri perengka nya.

“Penyampau pengerugi ketegal penusah nya dipelabaka urung RM5,000,” ku iya nengah penerang media.

Pengawa datai ngenyit keterubah dipejalaika urung pukul 12 tengahari ba sebuah langkau kayu di Kampung Sesok, Mukah lalu saspek keterubah beumur 34 taun udah mujur ditan.

Sejam udah nya, polis bejalaika pengawa ngenyit kedua kali ba sebuah rumah kunsi di Jalai Desa Tanjung, Mukah lalu mujur ngetan saspek kedua beumur 33 taun.

Nitihka penerang DSP Muhamad Rizal, kedua-dua saspek ngereja pengawa enggau agresif sereta nguji ngelarika diri lebuh sedarka penatai polis.

“Pansik silik tetemuka saspek kedua udah mandangka palan endur nyimpan barang ke dichuri nya,” ku iya.

Entara perengka ke ditemu iya nya sebuah unit bor, dua unit gerain enggau sebuah unit tinsa. Polis mega ngerampas telefon binching enggi saspek dikena mantu tasat.

Kedua-dua saspek begulai enggau barang ke dirampas udah dibai ngagai IPD Mukah ngambika atur silik agi dipejalaika.

Peresa tisih ai kemi tetemuka kedua-dua saspek positif amphetamine enggau methamphetamine.

Kes tu dipansik ari baruh Seksyen 379 Kanun Keseksaan enggau Seksyen 15(1)(a) Akta Dadah Berbahaya 1952.

Kedua-dua saspek diatu diriman pengelama tiga hari nyentuk 18 Mei 2026 dikena mantu pansik silik agi. -RBI

KUALA LUMPUR, 15 Mei — Kaban Parlimen Asia bekaul enggau Penduduk enggau Pemansang Global (AFPPD Global) udah nerima enggau rasmi status Kaban Pengatur ari Tabung Penduduk Pertubuhan Bangsa-Bangsa Bersatu, lalu enggau nya ngenegapka pengawa gerempung nya dalam ngetanka isu penyampau tubuh enggau pemansang di pelilih menua Asia enggau Pasifik.

Presiden AFPPD Malaysia, Dato Sri Alexander Nanta Linggi madah, pengangkun nya diberi nengah sempekat ke disain kena 12 Mei ari baruh Program Global enggau Wilayah UNFPA 2026–2029.

Nitihku iya, status nya ngemuntangka AFPPD Global bejalaika pelin kereja ti dipelanja UNFPA dikena ngenegapka kerejasama entara kaban parlimen dalam mutarka bemacham isu bekaul enggau penyampau tubuh enggau pemansang.

Iya mega ngenataika pengaga ati ngagai Howard Lee Chuan How ke mangku pengawa nyadi Sekretari Besai AFPPD Global enggau Sapit Presiden AFPPD Malaysia laban udah nyadi ketuai dalam nentuka pemujur ke beguna tu mujur dikeamatka.

Ku iya, pemujur nya mega besai reti ngagai Malaysia nyadi tuai rumah Sekretariat Global AFPPD, lalu enggau nya ngengkahka menua tu ba penuduk ke tegap agi nyadi palan pelilih menua ungkup pengawa ngaul kaban parlimen ba isu daya pengetan demografi, pengerai reproduktif, penyemaka lelaki enggau indu, meri kuasa ngagai raban nembiak enggau pemansang ke meruan.

Ku iya nambah, pemansang nya ngayanka pangku pengawa Malaysia ti majak nambah nyadi bakih ti dikearapka dalam kerejasama antarabansa ti ngaul kaban parlimen enggau ejensi ti bekaul enggau Pertubuhan Bangsa-Bangsa Bersatu.

AFPPD Malaysia ku iya, ngarapka ulih terus nyukung AFPPD Global ba pengawa ngalihka pengangkun nya ngagai pengawa bejalaika program ti meri pemaik ngagai rayat di pelilih menua Asia enggau Pasifik. – RBI

KUCHING, 14 Mei — Sapit Premier Sarawak, Datuk Amar Douglas Uggah Embas nerima penemuai basa ari seraban Ketuai Komuniti enggau Ketuai Kaum (KMKK) ari DUN N.77 Telang Usan beserimbai enggau penemuai sida ngagai Sesi Dewan Undangan Negeri (DUN) Sarawak 2026, ditu kemari.

Raban nya mungkur 15 KMKK ari kandang menua Lemeting enggau Tinjar betuaika Penghulu Dennis Madang.

Penemuai basa nya nyadika pelasar endur berandauka bemacham pekara bekaul enggau pemansang menua pesisir, kelebih agi pengawa ngenegapka pemansang sosio-ekonomi komuniti di kandang menua Telang Usan.

Entara pekara ti dikerandau iya nya guna infrastruktur pemun, pengawa bejalaika projek pemansang genturung pendiau enggau inisiatif ekonomi genturung pendiau ti ulih nyungkak tikas pengidup peranak menua nya.

Aum nya mega mandangka komitmen perintah Sarawak ti terus nentuka pemansang menua pesisir terus ditegapka nengah chara partisipatif enggau bala ketuai renggat baruh sereta komuniti setempat.

Sama bisi ngulu sesi penemuai nya Sapit Menteri Pemansang Nembiak, Lumba enggau Orang Dagang Sarawak, Datuk Gerald Rentap Jabu. — RBI

SARIKEI, 15 Mei — Raban Penyaga Orang Periman Malaysia (APM) Pelilih Sarikei deka ngatur program meri darah kena 16 Mei 2026 (pagila) ba Palan Kawalan Operasyen Pelilih Sarikei berengkah ari pukul 9 pagi nyentuk tembu.

Program tu diatur dikena meransang mensia mayuh datai ke mua meri darah lalu enggau nya mantu nambahka bekal darah ngambika bisi dikena pesakit ti begunaka bantu ba sepital.

Nitihka infografik ke dikunsi, seiti pemeri darah bisi potensial nyelamatka nyentuk tiga nyawa kelimpah ari meri bemacham pemaik pengerai ngagai orang ke meri darah nya.

Entara pemanah meri darah nyengkaum mantu ngangkatka pengerai tungkul ati, betunuka kalori, beperesa pengerai enggau enda bebayar sereta meransang pengawa ngasilka sel darah baru.

Berindik enggau nya, mensia mayuh kelebih agi peranak ngelingi Sarikei diperansang datai ngemujurka kimpin kelai sukung ngagai pengawa kemanusiaan enggau penyedar pengerai komuniti. -RBI

KUCHING, 15 Mei — Aktivis Sarawak ke mega pemungkal Saya Anak Sarawak (SAS), Peter John Jaban, nyambut manah penerang ti dibantaika Hamzah Ibrahim ba aum Dewan Undangan Negeri bekaul enggau pematut mulaika kuasa ngagai Sarawak, kelebih agi dalam sektor pelajar, pengerai enggau pemansang.

Nitih ku iya, isu tu ke udah kelalu lama dikemeranka Perintah Besai ngujungka mayuh utai ke diguna rayat Sarawak kelebih agi di menua pesisir enggau menua ulu enda mujur diputarka enggau efektif.

Ku iya, sistem nya suah enda mujur mutarka bida infrastruktur, suntuk pengajar enggau raban perubat, pemansang ke enda seimbang sereta guna pelajar enggau pengerai di Sarawak.

Peter nyemetak madahka iya udah lama ngemeranka pengawa ‘desentralisasyen’ sistem pengerai Sarawak dikena nentuka komuniti menua pesisir bisi akses ngagai chara berubat ti lebih efisyen sereta efektif.

“Pengatur kandang menua ngemendarka chara mutarka penanggul ke lebih spesifik, praktikal ke lebih setipak enggau gaya ke bendar di Sarawak enti dibandingka enggau chara dikemeranka ari Persekutuan,” ku iya.

Ari sukut pelajar, iya pechaya reformasyen ti bisi reti enda ulih dipejalaika nengah sistem “one-size-fits-all” ti enda ngira realiti nengeri-nengeri Borneo.

Iya majak ngansak Perintah Besai mulaika kuasa ke besai agi dalam polisi pelajar ngagai Sarawak enggau Sabah setipak enggau semengat sereta penetap ari baruh Sempekat Malaysia 1963 (MA63).

Peter mega ngemeratka pengawa mulaika penuh hak Sarawak, nyengkaum nguasa enggau besai agi pengeraja asal minyak enggau gis, autonomi fiskal enggau perambu pemansang nengeri.

Nitih ku iya, Sarawak patut diberi kuasa ke lebih luas ngatur sistem pelajar kediri empu ngambika polisi ke ditumbuhka lebih manah ngayanka sejarah, budaya, pengelain jaku enggau pemerat ekonomi nengeri tu.

Iya mega ngarapka mayuh agi agih belanja deka disalurka dikena ngemansangka kolej teknikal enggau institusyen pematih pengelandik di serata Sarawak, ukai betumpu ba kandang menua Kuching ngagai Lundu aja.

Ku iya, mayuh agi institusyen teknikal patut ditumbuhka berengkah ari Kuching nyentuk ke Lawas nyengkaum di Bagi Menua Limbang ngambika mayuh agi nembiak ke lepas sekula deka bisi peluang latih pengelandik sereta nambahka penau sida gawa.

“Sarawak begunaka sistem pelajar enggau latih pengelandik ti tegap sereta komprehensif agi, ukai semina bepanggai ba agih belanja ninting taun ti nadai perambu struktural timpuh panjai,” ku iya.

Iya mega ngemeratka pemesai guna latih dalam servis enggau pemansang profesional pengajar ti seruran dipejalaika dikena ngangkatka kualiti pelajar menua.

Berebak enggau nya, Peter nyemetak madahka peminta satu per tiga penuduk parlimen ungkup Sabah enggau Sarawak ukai pekara ti tau ngasuh penyarut nyadi, tang nyadi isu konstitusyen enggau sejarah ti bekaul rat enggau penumbuh Malaysia.

Ku iya, Sarawak enggau Sabah nyadi kaban pemungkal Persekutuan Malaysia lalu ukai semina nengeri biasa dalam struktur pentadbiran Malaya.

“Pengari ke adil beguna amat dikena nentuka sada nyawa nengeri Borneo terus ditan dalam proses ngaga pemutus ba renggat nasional,” ku iya.

Iya mega minta semua ketuai, gerempung rama enggau pengaga polisi terus ngatur randau ke nyengala bekaul enggau pengawa mulaika hak Sarawak ari baruh MA63, nyengkaum aspek ‘desentralisasyen’, autonomi fiskal, ngatur sumber, pelajar, pengerai enggau pengari parlimen ke lurus.

“Pengidup Sarawak jemah ila enda tau enda ditempa nengah polisi ke semak agi enggau realiti rayat sereta bebasaka semaya ke udah digaga maya numbuhka Malaysia,” ku iya. – RBI