BINTULU, 5 Mei – Pengawa graduet Bumiputera Sarawak milih bidang bekaul “kemanusiaan” aja deka meri empas ngagai pemasar sida ba makit kereja ke diatu

Berebak enggau nya Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri ( ADUN) Kemena, Dato Sri Dr.Stephen Rundi anak Utom ngarapka sida ngembuan minat lalu ngenuluka bidang teknikal enggau sains dalam milih pelajar ba tikas universiti

“Tu kelebih agi ba baruh Skim Pelajar Tinggi Enda Bebayar (Free Tertiary Education Scheme, FTES) ti digaga Perintah Sarawak.

“Injiniring aeroangkasa, aritmetik, fizik, kimia, sains, semua nya beguna amat. Jaku English mega meseti bisi. Padah ngagai bala anak kitai fokus ngagai subjek tu,” ku iya

Iya mansutka jaku nya lebuh bejaku ba Pengerami Mantar Gawai Sebauh 2026 di Dinner World, Bintulu, empai lama.

“Pengujung iya, kitai patut ulih dijual pengelandik.Kitai patut muntang dipilih sereta muntang bulih pengawa,” ku iya nyemetak.

Kelimpah ari bidang pelajar, Dr.Rundi mega nerangka pengelemi pengelandik komunikasyen ba raban graduet ke diatu, lalu ngansak sekula enggau apai indai ngambika nembiak nelebaka bejaku ba mua mensia mayuh berengkah ari pun.

“Nilai akademik ke tinggi enda chukup enti enda disempulang enggau pemintar runding sereta pechayaka diri empu,” ku iya.

Bisi nyadi temuai dipenbasa ba pengerami tu iya nya Sapit Premier Sarawak ke mega Menteri Wang enggau Ekonomi Baru Kedua sereta Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas. -RBI

MERADONG, 5 Mei — Polis mujur ngetan dua iku lelaki peranak menua nya dipelaba bisi kaul enggau kes nyerungkai rumah kebun di Jalai Sungai Kekijang, Bintangor, dalam operasyen Indu Opis Polis Pelilih (IPD) Meradong, lemai kemari.

Ketuai Polis Pelilih Meradong, DSP Tansli Mering madah, dua iku saspek ke beumur 27 taun nya ditan urung pukul 3.00 lemai kena 4 Mei 2026 dikena mantu pansik bekaul enggau ripot kes Bintangor Rpt: 945/2026.

“Peresa nisih ai kemi ti dipejalaika tetemuka kedua-duai saspek positif amphetamine enggau methamphetamine,” ku iya nengah penerang berita sehari tu tadi.

Nitihku iya, pansik silik tetemuka siku ari saspek ngembuan rikod ke udah bekaul enggau penyalah dadah, lalu siku agi nadai rikod jenayah.

Kes tu dipansik ari baruh Seksyen 15(1)(a) Akta Dadah Berbahaya 1952. Enti dikenuku salah, saspek ulih diukum enda ngelui ari RM5,000 tauka dijil nyentuk dua taun.

Berebak enggau nya, piak polis mega benung bejalaika pansik silik agi bekaul enggau kaul dua iku saspek dalam kes nyerungkai rumah ba ladang ke dikerandau nya.

Tansli nyemetak madahka polis beratika pengawa salah guna dadah ba genturung pendiau enggau berat lalu enda deka belembut enggau sebarang pengawa jenayah baka nya.

Berindik enggau nya, mensia mayuh ke bisi penerang bekaul enggau aktiviti dadah di pelilih Meradong dipinta datai ke mua mantu tasat nengah chara betelefon ngagai Balai Polis Bintangor nengah lumur 084-693222. -RBI

BINTULU, 5 Mei — Pengerami Gawai Mangkung Tiang di Rumah Kedi Anak Asam, Sungai Mawang, Batu 35, Jalai Bintulu–Miri diatur enggau penuh adat enggau main asal, kelai pemungkal baru dalam pengawa ngaga rumah panjai ke nyadi pelasar pengidup, identiti enggau pesaka asal komuniti menua tu.

Sungai Mawang ke bepalan ba sepemanjai Jalai Bintulu–Miri nyadi palan endur ngatur pengerami nya ti mandangka penegap nilai budaya, semengat kerejasama enggau penyerakup komuniti.

Pengerami bejadika rumah panjai nya dipenyadika Kaban Kunsil Nengeri (ADUN) Samalaju Datuk Majang Renggi, kena Hari Lima apin lama ti udah.

Datuk Majang nyemetak madahka rumah panjai ukai semina struktur fizikal aja, tang nyadi kelai penyerakup komuniti ti ngempuruka mayuh macham ruang bilik ba baruh siti perabung enggau semengat begulai sereta tuju ke sama.

“Rumah panjai nyadi kelai pengidup komuniti ke nyelai, ke alai tetiap ruang bilik diau begulai dalam pengelantang, bekunsika ruang, semengat enggau tanggungpengawa. Tu meh penegap ke bendar komuniti kitai,” ku iya.

Iya mega meri pengaga ati ngagai komitmen enggau semengat kerejasama ti tinggi ti dipandangka peranak menua nya dalam proses ngaga rumah panjai nya.

Nilai begulai sereta program beripai ti dikemeranka terang ngayanka penyerakup ti rapit enda ngira ari ni penatai.

Kenu ku iya, pengawa adat baka Gawai Mangkung Tiang ukai semina pesaka budaya ke patut dijaga, tang mega ngajar komuniti senentang pemanah basa, kelebih agi ngagai adat, ketuai enggau kaban komuniti.

“Pekara tu nyadi pelasar ti beguna dalam nentuka pengelantang pengidup komuniti terus dijaga sereta ditampung ngagai rebak dudi hari,” ku iya nerang.

Berebak enggau nya, iya nyemetak madahka pengawa ngetanka adat enggau main asal meseti setipak enggau arus pemansang kemaya hari.

Komuniti ku iya, patut nyikap diri napi ubah enggau enda ngelengkaka identiti enggau pesaka ke nyadi teras pengidup.

“Pemansang, pelajar enggau penyulut ekonomi meseti nyingkang setipak enggau pengawa ngintu budaya kitai ngambika sebela ulih dijapai,” ku iya nambah.

Iya ngarapka rumah panjai ke benung digaga nya ukai semina nyadi palan pengentap pendiau aja, tang mega nyadi palan penyerakup komuniti sereta nyadi pelasar ngadaka rebak ti beserakup, ulih idup sereta bisi visyen.

Enggau nya pengerami Gawai Mangkung Tiang mantaika penerus tradisyen komuniti rumah panjai ti majak tegap nyadi pelasar pengidup rama enggau budaya di menua pesisir Sarawak. — RBI

KAPIT, 5 Mei — Pengawa ngungkupka agih belanja renggat keterubah ari baruh Projek Mesra Rayat (PMR) dikena ngaga sistem parit nengah program beripai di Rumah Dennis, Amang Ulu, Jalai Selirik, digambarka nyadi siti singkang ke besai reti ba pengawa ngemanahka perengkaguna pemun enggau ngenegapka penyerakup komuniti lokal.

Inisiatif nya dipejalaika nengah sukung ari Sapit Menyeri Digital Datuk Wilson Ugak Kumbong ke mega Kaban Parlimen Hulu Rajang ke meruan komited mantu pemansang menua pesisir, kelebih agi ba kandang menua Kapit.

Pengawa nyuaka agih belanja nya disuaka pengari iya, Encik Seta begulai enggau Penghulu Manyi, ngagai Tuai Rumah Dennis, kemari lalu dikemataka peranak rumah panjai nya.

Nitihka penerang berita ari Komiti Pemansang enggau Pengelikun Genturung Pendiau (JKKK) Rumah Dennis, projek nya ukai semina ngembuan tuju deka ngemanahka sistem parit, tang mega nyadika pelasar ngerapitka kaul entara peranak nengah pengawa bejalaika pengawa beripai.

“Tuai Rumah Dennis udah nerima ‘Wang Turu Fasa 1’ ari baruh Projek Mesra Rayat (PMR) ungkup pengawa ngaga sistem parit nengah program beripai, siti pengawa ti ukai semina ngemanahka perengka guna, tang mega ngenegapka semengat komuniti,” ku penerang nya.

Penerang ke sama mega madahka pengawa nyerahka pengawa ti diarika Tuan Seta enggau Penghulu Manyi mai reti ti besai ngagai selampur komuniti rumah panjai.

Peranak menua nya mega meri pengaga ati ngagai pengibuh enggau sukung ti enda ngetu ari YB Datuk Wilson Ugak Kumbong ti mantu ngangkatka pengelantang pendiau rayat.

Pengawa baka tu meri empas ke manah ngagai pemansang komuniti menua pesisir selampur, kelimpah ari nentuka pengelantang peranak terus dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKKK RH Dennis anak Langok, Amang Ulu, KM 5 Jalai Selirik, 96800 KapitYB Datuk Wilson Ugak KumbongPusat Khidmat Masyarakat P.216 Hulu Rajang

SIBU, 5 Mei 5 — Projek ngemanahka Loji Meresi Ai Salim enggau kapasiti 300 juta liter sehari (MLD) diatu udah dulu ari timpuh enggau penyulut fizikal 68.0 peratus enti dibanding enggau 64.0 peratus ti diperambu ngelama tu.

Menteri Perengka Guna enggau Telekomunikasyen Sarawak, Dato Sri Julaihi Narawi madah, projek ngemesaika loji nya dipelaba tembu ujung taun 2026, lalu enggau nya ulih ngeluarka pemungkal 150 MLD ai beresi.

Nitihku iya, berebak enggau nya, kereja ngangkatmanah loji 150 MLD ke bisi diatu mega dipejalaika berenggat, ngaul 75 MLD ke benung diangkatmanah, lalu ke bukai 75 MLD terus beoperasyen dikena nentuka bekal ai enda tekeruga.

“Ujung taun tu, Loji Ai Salim dipelabaka ulih mekalka 225 MLD ai beresi, iya nya gempung 150 MLD ari loji pengerembai enggau 75 MLD ari loji ke udah bisi,” ku iya rambau penemuai kereja beratika pejalai projek di Salim, sehari tu tadi.

Ku iya nambah, pengawa ngangkatmanah ungkup kapasiti 75 MLD ke agi tinggal dipelaba tembu penuh tengan taun 2027, lalu enggau nya loji nya ulih beoperasyen enggau kapasiti maksimum 300 MLD.

“Enti udah tembu penuh ila, Loji Ai Salim deka ulih mekalka ai beresi ke chukup dikena nangkup guna peranak di Sibu enggau kandang menua ngelingi, nyengkaum nyendiaka margin rizab bekal ai urung 30 peratus,” ku iya nerang.

Ku iya nambah, pengawa bejalaika projek tu mandangka komitmen Perintah Sarawak terus ngenegapka infrastruktur bekal ai dikena nyukung pemansang sosio-ekonomi enggau pengelantang rayat di nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KOTA SAMARAHAN, 5 Mei — Universiti Malaysia Sarawak (UNIMAS) terus bejalaika singkang dikena ngenegapka pemansang modal mensia teknikal lebuh diaku enggau rasmi nyadi Palan Latih enggau Peresa Tauliah Kus Kompetensi Gis enggau Elekterik.

Pengawa ngaku nya nyadika pemujur ti beguna dalam pengawa ngangkatka penau teknikal enggau ngenegapka standard profesional dalam sektor utiliti Sarawak, seriris enggau guna pemansang nengeri tu sereta ubah landskap kuasa nyengkaum ngena kuasa tau dikena baru.

Setipikit pengangkun nya disuaka ngagai Naib Canselor UNIMAS, Ahmad Hata Rasit, lalu dikemataka Sapit Menteri Perengka Guna enggau Telekomunikasyen (Telekomunikasyen) Sarawak, Datuk Liwan Lagang, ti ngarika Menteri Perengka Guna enggau Telekomunikasyen Sarawak.

Sama bisi datai Chairman Kaunsil Direktor UNIMAS, Sulong Matjeraie, pengurusan kanan universiti, pemesai opis menteri, pengari industri enggau temuai dipebasa.

Akreditasyen tu ngembuan tuju dikena nyukung pengawa bejalaika latih bestruktur enggau ‘pensijilan’ profesional ti ngemeratka aspek pengelikun, kompetensi enggau penyedia industri.

Inisiatif tu mega dikearapka ulih ngasilka pengereja pengawa menua tu ti bepengelandik tinggi, bisi setipikit ti sedia napi pemar sektor gis, elekterik enggau kuasa tau dikena baru.

Pengangkun tu ngenegapka kaul strategik entara UNIMAS enggau Perintah Sarawak, ngengkahka agi universiti nyadi ketuai dalam ngemansangka pengereja pengawa jemah ila ti kompeten sereta kompetitif dalam sektor utiliti nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Universiti Malaysia Sarawak (UNIMAS)

KUCHING, 5 Mei — Opis Kastam Diraja Malaysia (JKDM) Sarawak ngenegapka kerejasama strategik enggau Opis Betanam Betupi Sarawak nengah penemuai basa ngagai Direktor Opis Betanam Betupi Sarawak, ditu kemari.

Raban JKDM Sarawak betuaika Puan Fauziah binti Wan Ismail, Sapit Direktor Kastam Nengeri WK14, Bagi Kastam, begulai enggau pemesai kanan opis nya.

Penemuai nya siti singkang proaktif dalam ngerapitka kaul entara kededua ejensi, kelebih agi dalam ngenegapka sukut pengawa ngawal, nitihka atur enggau penerit atur bekaul enggau import enggau eksport kereban betanam betupi.

Kelimpah ari nya, sesi nya mega nyadi pelasar strategik endur betukar penemu, bekunsika penerang sereta berandauka isu kemaya hari, nyengkaum aspek biosekuriti utai tumbuh, nitihka atur kuarantin enggau pengawa ngangkatka pengelanchar proses dagang ba palan penama garis entara menua.

Nengah kerejasama ti ditegapka tu, kededua piak komited deka ngangkatka pemanah sistem meri servis, seraya nentuka pengelikun enggau pengelantang sektor betanam betupi terus dijaga.

Sama bisi datai iya nya Ts. Hajah Asmah Salowi, Penulung Direktor Kepala Bagi Pengelikun Bio enggau Kuarantin Loji; Encik Petrus Kang, Ketuai Penulung Direktor Bagi Tanaman; enggau Puan Shariah binti Umar, Penulung Direktor Kepala Bagi Penjamin Kualiti Tanaman, begulai enggau pemesai ari Bagi Tanaman enggau Bagi Perambu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Jabatan Pertanian Sarawak

MIRI, 5 Mei — Program Niti Daun beserimbai enggau Pengerami Gawai Dayak Sarawak 2026 dikearap nyadi pelasar ke beguna dalam ngenegapka kaul budaya serantau lebuh matak penyereta ari Indonesia, lalu enggau nya ulih ngangkatka pesaka asal Dayak ngagai renggat antarabansa.

Nitihka ripot TVS, Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Dr Penguang Manggil madahka piak iya udah nerima timbal positif ari penyereta ari menua luar ti udah mantaika pengerindu nyereta program nya.

“Kitai bisi nerima kangau ari Indonesia madahka diri bisi ati sereta deka nyereta program Niti Daun ti diperambu deka diatur kena 21 Mei tu di Kuching,” ku iya.

Iya madah munyi nya lebuh bejaku ba Pengerami Bejadika Pengerami Gawai Dayak enggau Etnokultural beserimbai enggau Pengerami Gawai Dayak Sarawak 2026 ba Tapak Bazaar Gawai Dayak, Bandar Baru Permyjaya, Miri, kena Hari Satu tu tadi.

Berebak enggau nya, iya madahka pengawa ngatur pengerami Gawai Dayak di luar Kuching siti pengelebih ti diatur keterubah iya, lalu enggau nya muka ruang ngagai chara ti lebih inklusif dalam ngerembaika pejalai program nya ngagai komuniti.

“Berengkah 1 ngagai 23 Mei, bemacham panggau pemerindang enggau main asal deka diatur ninting malam ungkup pemandang komuniti di Miri, kandang menua ngelingi sereta mega temuai ari Brunei enggau menua luar.

“Siti basa ke besai lebuh kami diberi pengarap nyadi tuai rumah taun tu,” ku iya.

Ku iya nambah, sambut ti meransang ari bala temuai kenyau ari penumbuh organisasyen tu mandangka potensial besai pengerami nya nyadi pematak budaya ti ulih ngempuruka mensia mayuh ari bemacham asal penatai.

Entara pengerami ke deka diatur nyengkaum pekit karaoke, Sape Duo, Ngajat enggau Bertabuh, Kuntau, Gendang Pampat sereta bemacham aktiviti budaya ke bukai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MANCHESTER, 5 Mei — Ekonomi Sarawak dikearapka terus ditegapka nengah pengawa ngena data nyadi perengka guna strategik baru, setipak enggau pemansang ke jampat ba pemintar tiru (AI) enggau teknologi mikrocip ke diatu nyadi pemansut besai transformasyen ekonomi dunya.

Premier Sarawak, Datuk Patinggi Tan Sri Abang Abdul Rahman Zohari Tun Abang Openg madah, revolusyen teknologi ke udah nyadi dalam timpuh sedekad ke udah, ngubah abis struktur ekonomi dunya, kelebih agi nengah penyulut AI ke disukung inovasyen dalam teknologi cip enggau sistem nyimpan data ke bekapasiti tinggi.

Iya madah munyi nya lebuh nyereta sesi randau strategik enggau pengemeran industri ti betuaika Kaban Parlimen Manchester Rusholme, Afzal Khan, ba Palan Pesaka Orang Islam British, kena Hari Satu jam menua tu tadi.

Nitih ku iya, AI diatu udah masuk ngagai renggat pemansang ke lebih tuai lebuh iya ukai agi ngemeranka pengawa nyadi teknologi sukung aja, tang lebih agi nyadi komponen kunsi dalam pengawa ngaga strategi pemansang ekonomi enggau rama.

“Lima taun ke udah, AI agi dikumbai teknologi baru, tang diatu iya nyadi beguna amat.

Dalam timpuh sepuluh taun ke udah, iya udah jampat mansang, lalu dalam timpuh lima taun ti deka datai, iya deka ngalih ngagai strategik intelijen,” ku iya.

Iya mega nyemetak madahka data diatu nyadi aset strategik baru ti ukai semina nyukung penumbuh ekonomi, tang mega bejalaika tanggungpengawa ti beguna dalam ngenegapka efektiviti pengawa bejalaika tanggungpengawa rama.

“Data nyadi perengka guna baru ti ngemendarka kitai nyingkang ke mua, baikka ari sukut ekonomi enggau rama,” ku iya nerang.

Berindik enggau nya, iya ngemeratka pemesai guna ngemansangka ekosistem teknologi ti komprehensif, mungkur industri semikonduktor, palan data enggau sistem ngatur penerang ti efisyen dikena nentuka transformasyen digital ulih dipejalaika enggau efektif.

Sarawak ku iya, deka terus ngenegapka pengulih dalam bidang tu nengah pemansang modal mensia, nyengkaum pengawa nganjung nembiak ngagai menua luar ngangkatka pengelandik, inovasyen enggau penguasaan dalam bidang reta intelektual.

Ba pengawa ke sama, Sempekat Pemereti Ati (MoU) mega bisi disain dikena ngenegapka kerejasama strategik sereta mansik peluang baru ti meri pemaik ngagai pemansang Sarawak enggau bakih antarabansa.

Sama bisi datai Sapit Menteri Besai Sarawak Datuk Amar Dr Sim Kui Hian, Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri ba Opis Premier Sarawak (Undang-Undang, MA63 enggau Kaul Nengeri enggau Perintah Besai) Datuk Sharifah Hasidah Sayeed Aman Ghazali, Sekretari Pekara Wang Sarawak Wan Lizozman Wan Omar, (Perambu enggau Pemansang Ekonomi) Muhammad Abdullah Zaidel, begulai enggau ketuai opis enggau ejensi perintah. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku

KUCHING, 5 Mei – Lembaga Perindustrian Nanas Malaysia (LPNM) Sarawak nemuai meri basa ngagai Opis Betanam Betupi Sarawak ba Indu Opis Betanam Betupi Sarawak, Kuching, dikena ngenegapka kerejasama strategik dalam pemansang industri nanas nengeri tu.

Raban LPNM Sarawak ti betuaika Mohd. Nazaiful Azdi bin Rahman udah ngatur aum rasmi begulai enggau Direktor Betanam Betupi Sarawak Dominic anak Chunggat berandauka kuing pemansang industri nanas di Sarawak, kelebih agi ba pengawa ngemanahka pemanah pengawa bejalaika program pemansang enggau ngenegapka rentayan rega industri nya.

Randau nya mega ngemeratka pengawa ngerembaika kerejasama entara ejensi dalam ngangkatka pemanah guna sumber, ngenegapka ekosistem industri nanas, sereta nambahka penau ngeluarka ti lebih kompetitif, beteknologi tinggi sereta meruan.

Inisiatif tu mega dipeda meri empas positif ngagai penatai pemisi orang bumai enggau pemansang ekonomi menua pesisir di nengeri tu.

Kerejasama strategik tu setipak enggau aspirasyen Strategi Pemansang Pengudah COVID-19 (PCDS) 2030, ti ngemeratka pemansang sektor agro-pemakai nyadi seiti ari batang pemansut ekonomi Sarawak, kelimpah ari ngenegapka pengelikun pemakai enggau nambahka daya bepekit industri bepelasarka global agriculture.

Sama bisi ngulu sesi penemuai nya Dr. Maclin anak Dayod, Petrus Kang enggau Shariah binti Umar begulai enggau pemesai ari ‘Bahagian Tanaman enggau Bahagian Perancangan’

Penemuai basa tu mandangka komitmen terus kededua ejensi dalam ngenegapka pemansang industri nanas Sarawak nengah chara ti lebih beserakup, meruan sereta nuju jemah ila. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Jabatan Pertanian Sarawak