KUCHING, 16 Mei — Menteri Pemansang Orang Indu, Ruang Bilik enggau Komuniti (KPWKM), YB Dato’ Sri Hajah Nancy binti Shukri ngenataika pengaga ati enggau terima kasih ngagai semua raban pengajar beserimbai enggau pengerami ngintu Hari Pengajar 2026 ketegal semua jasa sida dedikasyen pengorbanan dalam pengawa narak anak bansa.

Kenu ku iya, pangku pengawa pengajar ukai semina meri penemu dalam kelas aja, tang mega nyadi lalau, penyanding penemu enggau pun inspirasyen dalam nempa pengidup bansa jemah ila.

Ku iya, pengawa nyadi pengajar ukai pengawa ke muntang laban begunaka penyabar, berambun nyawa enggau pengering, kelimpah ari pengelurus ati dalam ngajar sereta nempa ulah nembiak.

“Di belakang tetiap pemujur sesiku orang, meseti bisi pengajar ti enda kala lelak ngajar, ngiring sereta pechaya tetiap iku nembiak bisi potensial mansang jauh agi dalam pengidup,” ku iya nengah sebengkah penerang beserimbai enggau Hari Pengajar 2026 sehari tu.

Nancy mega nyemetak madahka raban pengajar diatu betapi enggau pemar baru setipak enggau pemansang dunya digital enggau teknologi ‘artificial intelligence’ (AI), tang mengkang bebendar nentuka rebak baru enda tinggal ari arus ubah dunya.

Ku iya, tema pengerami Hari Pengajar taun tu, “Guru Bitara Nadi Negara”, amat engkeman dalam meri puji ngagai jasa enggau pangku pengawa besai raban pengajar nyadi tulang belakang pemansang modal mensia menua.

Iya mega nerangka pengajar nyadi penampak penemu enggau pengarap ungkup menua jemah ila ti seruran bejalaika tanggungpengawa ti beguna dalam nempa raban bansa ti bepenemu, moral enggau integriti.

Berindik ari nya, iya ngarapka semua jasa enggau pengelurus ati raban pengajar terus diberekat sereta nyadi pengasih ti meruan ungkup penyulut mensia mayuh enggau menua.

“Terima kasih ngagai semua pengajar ba tetiap pengibuh, jasa ti engka enda tampak, tang besai reti dalam pengidup nembiak enggau mensia mayuh,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SPAOH, 16 Mei — Projek Ngangkatmanah Jalai Ladang di Munggu Gernis, Spaoh ti dipejalaika nengah Program Ejensi Pemansang Bagi Menua Betong (BDDA) udah mujur tembu nitihka timpuh ti udah ditetap, lalu enggau nya ulih ngemanahka akses ungkup peranak, kelebih agi komuniti orang bumai ba kandang DUN N.37 Bukit Saban.

Nitihka penerang ari Opis Kereja Raya (JKR) Bagi Menua Betong, projek nya dipejalaika dalam timpuh lapan bulan berengkah 9 Oktober 2025 lalu diperambu tembu kena 8 Jun 2026.

Pengawa bejalaika projek tu ngembuan tuju deka ngemanahka jalai tama ke manah agi, likun sereta nyamai agi ngagai kandang endur ladang ke diempu peranak menua nya, kelimpah ari ngenegapka agi sambung ngagai kandang endur betanam betupi ngelingi Munggu Gernis.

Nengah penembu projek tu, peranak menua tu diatu ngasaika akses ti lanchar agi, lalu enggau nya ngemudahka pemindah ninting hari sereta ngenyampatka pengawa ngangkut asil betanam betupi ngagai pasar.

Berebak enggau nya, projek tu mega meri empas positif ngagai pemansang ekonomi menua pesisir nengah chara nambahka efisyen logistik enggau akses ngagai kandang endur ngeluarka asil betanam betupi.

Opis Kereja Raya Bagi Menua Betong nyemetak madahka pengawa bejalaika projek tu mandangka komitmen perintah ti terus ngenegapka pemansang infrastruktur menua pesisir ungkup pengelantang rayat sereta ngangkatka sosioekonomi komuniti setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 16 Mei – Raban pemekuh gendang pampat patut ngena pelasar digital enggau media rama dikena ngerembaika pengawa ngelakuka pengawa sida ngagai mensia mayuh.

Sapit Menteri Digital, Datuk Wilson Ugak Kumbong madah, ngena pelasar digital ukai semina ulih meri kelala pesaka budaya ngagai mensia mayuh ke lebih mayuh, tang mega bisi potensial muka peluang ekonomi ngagai pemain gendang pampat.

“Aku dekaka raban gendang pampat ngena media rama enggau pelasar digital ngambika pengawa pemerindang sida dikelala mensia mayuh.

“Mensia mayuh ulih nemu pasal raban ti chakah bemain maya pengerami Gawai, ari nya ngemuntangka pengawa ngelakuka servis sida,” ku iya.

Iya madah munyi nya lebuh bejaku ba Pekit Gendang Pampat beserimbai enggau Bazar Gawai Dayak enggau Pesta Etnobudaya 2026 di Permyjaya, malam kemari.

“Pekit Betabuh Gendang Pampat terus nyadi medium ti beguna dalam pengawa ngetan sereta nurunka seni muzik asal komuniti Iban ngagai nembiak rebak baru.

“Gendang pampat tu sebengkah pemerindang asal ke chukup dikelala enggau pengerami Gawai kelia sereta patut dijaga ngambika enda dilalaika,” ku Wilson.

Kenu ku iya, rebak tuai megai tanggungpengawa ti beguna amat ngembing rebak baru ngambika tradisyen nya ulih diteruska jemah ila.

“Lebuh maya musin Gawai, munyi gendang pampat nyadi pemerindang komuniti kelia, rebak tuai beguna amat ngiring raban nembiak ngambika pesaka asal tu terus idup sereta nyadi temegah ati komuniti,” ku iya.

Berebak enggau nya, iya mega meransang Serakup Dayak Miri ngaga begunan tetap dikena ngenegapka pengawa ngatur aktiviti budaya sereta nyadi palan gempuru komuniti Dayak di mengeri tu.- RBI

Sumber TVS

#ruaiberitaiban#newsiban#beritaiban

Rindu | Titih | Kunsika

SRI AMAN, 16 Mei – Jaku “jari ti ngusak enyut ulih ngasuh dunya begetar” nyadika simbol pemesai jasa indai enggau pangku pengawa indai ti besai dalam ngasilka rebak ti bepenemu, bemoral sereta kompetitif, ku Kaban Parlimen Sri Aman Doris Sophia Brodie.

Kenu ku iya, pengawa, penyayau enggau pengeliat ati siku indai nyadi pelasar ke beguna dalam nempa pemujur anak enggau pengidup jemah ila sebuah ruang bilik.

Iya mansutka jaku tu lebuh ngulu sereta bejadika Pengerami Makai Lemai Hari Indai ke diatur St. Peter’s Chapel lalu disempulang laki iya, Dr. William Chua, kemari.

Dalam jaku pengerami iya, Doris mantaika pengaga ati ngagai pengawa besai indai nyadi tiang batang dalam institusyen ruang bilik sereta penumbuh mensia mayuh ti likun sereta lantang.

Ku iya nambah, budaya bebasa, sayau sereta beterima kasih ngagai indai ukai semina tanggungpengawa aja, tang nyadi puku rama ti berega amat laban nilai mulia tu deka nyadika chuan sereta dititih nembiak rebak baru jemah ila.

Pengerami nya diatur dalam chukup pengerami sereta beterima kasih nyadika kelai ngaku jasa enggau pengawa bala indai dalam pemansang ruang bilik, komuniti enggau menua.

Pengerami nya bela digulu Betty Munji, Tony Jilat George, Jecksion Tay, Daniel Sawing enggau Minging.— RBI

#ruaiberitaiban#newsiban#beritaiban

Rindu | Titih | Kunsika

KUCHING, 16 Mei — Projek Jalai Penyambung Sarawak Sabah Renggat 2 (SSLR2) entara inisiatif beguna perintah Sarawak dalam ngemanahka rentayan jalai alun menua pesisir sereta ngenegapka sambung darat entara Sarawak enggau Sabah ungkup pemaik rayat enggau pemansang ekonomi pelilih menua tu.

Beduduk ari nya, Opis Kereja Raya (JKR) Sarawak majak ngenegapka pengawa matau pengawa bejalaika projek infrastruktur strategik di nengeri tu nengah penemuai ngagai palan ungkup SSLR2 ba minggu tu tadi.

Nitihka penerang ti dikunsi nengah Facebook ari Maltimur Resources Sdn Bhd, tim projek SSLR2 nerima penemuai ari pengari JKR Sarawak beratika pemansang ke diatu dalam sekeda pakej kereja kunsi projek nya.

“Penemuai tu meri awak beratika pejalai pengawa ngaga ti benung dipejalaika, ngenukuka pemansang ba palan sereta nentuka pengawa bejalaika projek tetap nitihka spesifikasyen projek, standard kualiti enggau timpuh ti udah diperambu,” ku penerang nya.

Penerang ke sama mega madahka kerejasama rat enggau pengawa matau ti enda ngetu entara semua raban beguna amat dalam nentuka projek ti meri empas tinggi nya ulih dipejalaika enggau lanchar sereta efektif.

“Nengah kerejasama rat enggau pengawa matau ti enda ngetu, SSLR2 tetap komited nyendiaka infrastruktur ti ngenegapka sambung rentayan sereta nyukung pemansang kandang menua dalam timpuh panjai di Sarawak,” ku penerang nya nerang — RBI

#ruaiberitaiban#newsiban#beritaiban

Rindu | Titih | Kunsika

Selamat Hari Pengajar ngagai semua raban pengajar ti terus gawa enggau enda leju sereta enda bansu ungkup pengidup anak bansa jemah ila.

Pengajar ukai semina meri penemu dalam kelas aja, tang mega nyadi lalau, penempa ulah sereta inspirasyen pengarap ngagai rebak ti deka ngiring mensia mayuh enggau menua jemah ila.

Ba jari pengajar, individu ti bepenemu, bemoral, meruan sereta kompetitif deka ditempa asil ari ajar enggau lalau.

Ruai Berita Iban ngenataika pengaga ati enggau terima kasih ti pemadu tinggi ngagai semua jasa, penyabar enggau komitmen bala pengajar ti terus meri pelajar enggau penuh dedikasyen, sekalika di mengeri tauka di menua pesisir.

Tiap penemu ti diberi, tiap jaku lalau ti diiri enggau tiap pengibuh ti digaga amat berega lalu deka terus dikeingat sepemanjai maya.

Terus nyadi penampak ngagai nembiak rebak baru. Tarak enggau pengerindu, ngiring enggau penemu sereta tempa anak bansa enggau nilai integriti, disiplin enggau pengerindu ba penemu.

Pemar dalam dunya pelajar kemaya hari tu majak besai, tang pangku pengawa pengajar mengkang nyadi pelasar besai dalam nempa raban bansa ti mansang, bepenemu sereta ngembuan mensia.

Awakka semua raban pengajar seruran diberekat enggau pengerai, pengering, pengelantang sereta terus dipebasa ketegal jasa enggau pengawa sida ti enda ulih dibeli.

Pengajar sempama baka lilin nerangka semua orang enggau pachar api.

SARIKEI, 15 Mei – Tim Bravo ari Opis Bomba enggau Penyah Penusah Malaysia nengah Balai Bomba enggau Penyah Penusah (BBP) Sarikei udah ngatur latih mindah ari begunan di Begunan IAC, Sarikei, sehari tu tadi.

Program ti berengkah urung pukul 2.30 lemai nya mungkur 100 iku pemesai nengeri enggau pengereja pengawa perintah.

Latih nya diatur nyadika atur dikena nambahka tikas penyikap enggau penyedar senentang prosedur pengelikun enggau pengawa ngenyit nyema bisi penusah ke enda dikedekaka nyadi.

Program tu mega meri penerang ngagai penyereta pasal prosedur mindah dalam begunan ti likun, jampat sereta teratur.

Aktiviti nya dipejalaika Tim Bravo BBP Sarikei setipak enggau komitmen Opis Bomba enggau Penyah Penusah Malaysia ti deka nyendiaka servis beprestasi tinggi, jampat sereta mesra. -RBI

KUCHING, 15 Mei – Menteri Kereja Raya, Dato Sri Alexander Nanta Linggi nyemetak madahka pemansang di Bagi Menua Kapit meseti dipeda ari sukut guna rayat nengah chara nentuka tetiap projek tembu nitihka timpuh, penanggul bejalaika pengawa diputarka enggau lengkas lalu penguntung nya amat datai ba komuniti menua nya.

Nitihku iya, pekara tu nyadi batang fokus Aum Komiti Pemansang Bagi Menua (DDC) enggau Komiti Pengatur Pemansang Bagi Menua (JTPB) Kapit ti digulu iya di Kuching, sehari tu.

Aum nya mantaika status diatu senentang pejalai projek pemansang ke benung enggau deka dipejalaika di Bagi Menua Kapit, nyengkaum projek ari baruh Perintah Sarawak enggau Perintah Besai.

Kelimpah ari beratika pejalai projek, aum nya mega nyadi pelasar ngagai semua piak bekunsika penemu, ngatur pengawa sereta ngiga chara mutarka isu ti tau ngeruga pengelanchar bejalaika projek.

Iya pechaya pemansang ti amat meri penguntung ngagai rayat begunaka kerejasama rat entara ejensi ti bejalaika pengawa, opis teknikal, ketuai kandang menua enggau semua raban.

“Tetiap isu patut diputarka begulai lalu tetiap projek meseti ditentuka bejalai enggau lanchar ungkup pengelantang rayat,” ku iya ke mega Kaban Parlimen Kapit.

Sama bisi datai Sapit Menteri ba Opis Menteri Besai Sarawak (Undang-Undang enggau Adat Bumiputera), Datuk Jefferson Jamit Unyat ke mega Kaban Kunsil Nengeri (ADUN) N.63 Bukit Goram, Sapit Menteri Perengka Guna enggau Telekomunikasyen (Telekomunikasyen) Sarawak, Datuk Liwan Lagang sereta mega ADUN N.65 Belaga, Kennedy Chukpai Ugon, ADUN sitak N.66 Murum; Wilson Nyabong Ijang, ADUNN.61 Pelagus sereta mega pengari ejensi ke bekaul.

Iya mega ngarapka semua pengawa pemansang di Kapit terus ditegapka ungkup pengelantang rayat, kelebih agi sida di menua ulu. – RBI

KUCHING, 15 Mei — Sepenyampau 19 individu sehari tu ngangkat sumpah nyadi Sekretari Politik ngagai Premier Sarawak ba sebengkah pengerami rasmi ke diatur ba Dewan Santapan, Kompleks Dewan Undangan Negeri (DUN) Sarawak.

Nitihka ripot TVS pengerami nya dikemata Sapit Premier Sarawak, Datuk Amar Douglas Uggah Embas.

Ari penyampau nya, sepenyampau 14 iku individu dichiri baru ngarika Parti Pesaka Bumiputera Bersatu (PBB) iya nya Sarkawi Suhaili, Fridah Osman, Petrus Igat Mathias, Abdul Samat Kethergany, Dr Dayang Nurfizawati Abang Abdul Karim, John Nyigor, Damen Rejek, Sayed Azmee Wan Junaidi, Awangku Jinal Abedin Dato Pengiran Jawa, Dominic Nyurang Ajang, Watson Awan Jalai, Afiq Fikri Brahim, Hajis Japar Labaw dan Collin Patan.

Sama bela ngangkat sumpah iya nya Fung Kok Shiun enggau Joshua Ting Fu Ying ari Parti Demokratik Progresif (PDP), Susan Clement Ingun enggau Thomas Balan Bang ari Parti Rakyat Sarawak (PRS), sereta mega Niponi Undek ari Parti Rayat Bersatu Sarawak (SUPP).

Ripot ke sama mega bisi nyebut pasal pengerami nya digulu Speaker DUN Sarawak, Tan Sri Mohamad Asfia Awang Nasar, Sapit Menteri ba Opis Premier Sarawak Datuk Abdul Rahman Junaidi, Sapit Menteri Tenaga enggau Pengelikun Rampa Menua Sarawak Datuk Dr Hazland sereta Sapit Menteri ba Opis Premiet Sarawak Datuk Gerawat Gala.

Sama bisi datai Ketuai Sekretari Politik Premier Sarawak, Dato Fazzrudin Abdul Rahman begulai enggau sekeda Kaban Kunsil Nengeri (ADUN) sereta bala pemesai ke bukai. — RBI

SIBU, 15 Mei — Opis Menteri Pengerai Malaysia (KKM) tetap komited ngenegapka profesyen indu misi nengah pemansang modal mensia, nambahka kompetensyen enggau ngangkatka pengelantang pendiau pengereja pengawa pengerai dikena nentuka sistem pengerai menua meruan, inklusif sereta tan.

Komitmen nya dibantaika nengah Seminar Indu Misi beserimbai enggau Program Jelajah Wira MADANI 2026 ti dipenyadika Sapit Sekretari Besai (Pekara Wang) KKM, Dato’ Sri Zahrul Hakim bin Abdullah ba Dewan Rejang, Sepital Sibu seharitu tadi.

Berambaika jaku “Aspirasi MADANI Memandu Jururawat Cemerlang”, pengerami Hari Indu Misi 2026 ngaku pangku pengawa besai indu misi nyadi tiang batang sistem pengerai nasional.

Kelimpah ari bejalaika tanggungpengawa sida dalam pengawa ngintu enggau ngubat pesakit, indu misi mega megai tanggungpengawa nyadi pengajar pengerai, penyanding penemu enggau koordinator servis pengerai ngagai komuniti.

Pengeransing enggau pengeliat ati bala indu misi kelebih agi maya menua betapi enggau bemacham pemar pengerai dianggap nyadi pengawa ti besai ti balat dikerinduka sereta nyadi inspirasyen ngagai rayat Malaysia.

Ba pengerami ke sama, Sepital Sibu mega nerima setipikit pengangkun nyadi Sepital Mesra Anak Mit ungkup timpuh ke entas ari 31 Januari 2026 nyentuk 30 Januari 2029, enggau nya ngayanka komitmen institusyen dalam ngenegapka servis pengerai indai enggau anak mit ke ditetapka nitihka standard.

Pengerami nya mega dipenyadi enggau pengawa nyirap kek kelai pengerami Hari Indu Misi 2026.

Pengudah pengawa bejadi, Dato’ Sri Zahrul Hakim bejalaika pengawa nemuai ngagai sekeda fasiliti perubat di Sepital Sibu dikena beratika diri empu pekara ti diguna dikena ngemanahka infrastruktur enggau servis pengerai.

Entara palan ke dilawa iya nya Wad Berubat, Wad Beputung Indu enggau Nembiak Mit, Ophthalmology, Wad Otorhinolaryngology enggau Neurosurgery, Wad Ortopedik Indu, Unit Rawatan Rapi Hibrid (ICU), Wad Jaga Siang Hari, Unit Xray enggau Tabung Darah Sepital Sibu.

Sama bisi datai iya nya Sekretari Bagi Opis Menteri Pengerai (Servis Pengatur), Rosnina binti Yaakop, Direktor Pengerai Nengeri Sarawak, Dr. Veronika Lugah enggau Direktor Sepital Sibu, Dr. Nanthakumar a/l Thirunavukkarasu enggau Ketuai Supervisor Indu Misi Opis Pengerai Nengeri Sarawak, Matron Noor Lita binti Samion. – RBI