KUCHING, 2 Mac — Direktor Unit Jalai Pengarap Bukai (UNIFOR) Dato Georgina Apphia Ngau, nguluka siri penemuai gawa ngabas palan pendam sehari tu nyadi timbal ngagai Woksyop Ngatur Pendam ke diatur kena 4 ngagai 5 Februari tu tadi.

Pennemuai nya berengkah ari pukul 9.00 pagi nyentuk 4.00 lemai nya mungkur sekeda endur ngelingi Kuching, nyengkaum Pendam Immaculate Heart, The Lord’s Resting Ground, Pendam Sacred Heart, Pendam Hindu ba Jalai Badruddin, sereta mega Pendam St. Thomas semak Rumah Mijum Sarawak enggau kandang St. Thomas’ Cathedral.

Sesi nemuai pagi nya mega disempulang Simon Poh ti ngepunka pejalai ba St.Lukas Chapel sebedau terus ngagai St.Paul’s Chapel on the Hill enggau sekeda pendam besai bukai.

Nitihka penerang, inisiatif nya ngayanka komitmen UNIFOR ti seruran ngenegapka kerejasama enggau institusyen jalai pengarap, ngemanahka standard ngatur pendam, sereta nentuka sukung terus ngagai guna komuniti mayuh jalai pengarap di serata Sarawak. — RBI

KUALA LUMPUR, 2 Mac – Aku balat amat asa enggau asil undi Ubah Konstitusyen Perintah Besai ti nyekat timpuh Menteri Besai ngagai 10 taun ba Parlimen baru-baru tu,” ku Menteri Pengangkut Anthony Loke Siew Fook.

Tampung iya ke mega Kaban Parliemn Seremban madahka, ngambika ubah tu ulih dikemendarka, iya begunaka sukung dua pertiga tauka 148 iku Kaban Parlimen ke bisi datai enggau fizikal.

Pemutus ke nyukung iya nya 146, iya nya 2 undi kurang ari manggai dua pertiga.

“Aku deka ngemeratka semua 40 iku Kaban Parlimen Parti Tindakan Demokratik (DAP) bisi datai nyukung ubah nya. DAP udah bebendar gawa ngamatka agenda reformasyen.

“Mensia mayuh enggau bala pengundi ti deka meda reformasyen institusyen di menua tu enda tau enda ngutuk sereta nanya bala Kaban Parlimen ti enda datai lalu enda nyukung ubah tu, nyengkaum blok penyakal,” ku iya nulis dalam Facebook iya. -RBI

BINTULU, 2 Mac — Projek Transformasyen Menua Pesisir (RTP) ungkup pengawa ngemanahka jalai nuju Rh. Ringgit anak Enturan ba Batu 14, Jalai Bintulu–Miri nyadika bukti komitmen perintah ti terus ngenegapka pemansang infrastruktur menua pesisir di Bintulu.

Kaban Kunsil Nengeri (ADUN) Samalaju, YB Datuk Majang Renggi madah, projek nya bejalaika tanggungpengawa ke beguna dalam ngangkatka pengelantang enggau pengelikun peranak menua nya kelimpah ngenegapka kaul komuniti di kandang menua nya.

Nitihku iya, pengawa bejalaika projek nya mandangka pengibuh perintah dalam nentuka perengkaguna pemun menua pesisir terus dikemanah berenggat ungkup pengelantang rayat.

“Projek tu siti ari inisiatif perintah dalam nentuka perengkaguna infrastruktur menua pesisir terus dikemanah ungkup pengelantang enggau pengelikun peranak menua tu.

“Manah pengawa sereta meri pengaga ati ngagai ejensi ti bejalaika pengawa, kunteriktor enggau peranak rumah panjai ketegal kerejasama rat nentuka projek tu ulih dipejalai enggau lanchar sereta tembu nitihka perambu,” ku iya.

Iya mega ngarapka perengka guna ke udah diangkatmanah nya ulih meri pemaik ti seruran diberi ngagai selampur komuniti sereta nyadi pemangkin pemansang jampat agi ba kandang menua nya.

Program Ketuai Begulai Komuniti ke diatur beserimbai enggau pengawa bejadika projek nya nyadi dalam gaya ti lantang sereta begulai, lalu enggau nya ngayanka kaul rat entara ketuai enggau komuniti setempat. — RBI

Gerah Pengawa Puan

BINTULU, 2 Mac — Pekara pelajar patut dikemeratka dalam komuniti di bagi menua tu dikena ngadaka rebak ti bepenemu ke ulih ngerebut peluang pemansang ti disediaka di nengeri tu kelebih agi ba kandang menua Samalaju.

Sapit Menteri Infrastruktur enggau Pemansang Palan Penyangkai Kapal Datuk Majang Renggi madah, setipak enggau pengerembai chakah pemansang di sitak DUN Samalaju diatu, pekara pelajar patut dikemeratka lalu dikemekuhka enggau pematut.

“Pelajar iya nya pemun ti beguna dalam ngadaka rebak ti bepenemu, ulih besemekih sereta ulih ngerebut enggau ngena memanah peluang pemansang ti disediaka,” ku iya lebuh ti ngulu program di Rumah Kalik Janting, Sungai Nyuruk enggau Rumah Sawing di batu 23, Jalai Bintulu-Miri bedau lama ti udah.

Majang ti mega Kaban Kunsil Nengeri (ADUN) Samalaju madahka kerejasama rat entara apai indai, bala anak enggau Komiti Pemansang enggau Pengelikun Genturung Pendiau (JKKK) rumah panjai endang beguna dalam nentuka pekara pelajar ulih dipejalaika enggau manah, nyamin pengelantang enggau pemasnang komuniti.

Pia mega, ku iya, penyerakup enggau pengelantang dalam idup komuniti mega patut seruran dijaga enggau ditegapka dalam rayat.

Ku iya, semua tu iya nya pemun besai dalam nentuka pengelantang enggau pemansang komuniti ulih dijapai begulai enggau meruan.

SERIAN, 2 Mac – Siku nembiak lelaki beumur 20 taun ditan Bagi Tasat Jenayah Narkotik Indu Opis Polis Pelilih Menua (IPD) Serian dalam operasyen tumu pagi tadi pengudah dipelaba ngembuan dadah ba kandang menua nya.

Ketuai Polis Pelilih Serian nengah penerang berita madahka pengawa ngetan nya digaga asil ari pansik enggau penerang ke diberi mensia mayuh.

“Asil peresa saspek tetemuka 0.57 gram syabu.Berindik ari nya, saspek ditan ari baruh Seksyen 12(2) Akta Dadah Berbahaya 1952,” ku iya.

Nitihku iya, peresa tisih ai kemi keterubah mega tetemuka lelaki nya positif amphetamine/methamphetamine, seraya pengawa ngetan nya ari baruh Seksyen 15(1)(a) akta ke sama.

Pansik tumu tetemuka saspek asal ari Kuching sereta benung belajar ba sebuah palan pelajar di Serian. Diatu lelaki nya udah diriman ngambika ulih mantu pengawa mansik silik agi.

Berebak enggau nya, iya nyemetak madahka polis enda deka belembut ngagai sebarang individu ke bisi kaul enggau pengawa salah guna dadah.

“Atur ke terit deka diambi nitihka undang-undang ke dikena.Ukum ke berat agi nyangka deka ditinggang nyema penyalah nya nyadi baru,” ku iya nyemetak.

Iya mega ngelalau komuniti di kandang menua nya terus meri kerejasama ngagai Polis DiRaja Malaysia (PDRM) nengah pengawa nyadung penerang bekaul enggau aktiviti salah guna enggau bedagangka dadah.

“Kerejasama komuniti beguna dikena nentuka pengawa ngelaban penyalah makai dadah ari baruh pentadbiran Pelilih Serian ulih dipejalaika enggau ngasi agi,” ku iya. -RBI

MIRI, 2 Mac – Sepital Miri diatu benung nyidi aris tauka diri sebilik siku pesakit lelaki beumur 73 taun, benama Ong Ngee Eng.

Tudah ke megai lumur kad pengelala 520603-13-XXXX, lalu palan pengentap pendiau iya nya Lot 9172 Desa Indah, Jalai Dato Permaisuri 3D Lorong 2, Bandar Baru Permyjaya, Miri.

Pesakit nya berengkah nerima perubat ba Sepital Miri kenyau ari 01 Februari 2026.

Pesakit nya mega ditemu enda ulih meri penerang ti nyemetak pasal diri empu enggau sida sebilik.

Nya alai, nyentuk ke diatu, nadai kaban belayan tauka aris bisi datai ungkup perambu berubat tauka pekara ngemansutka pesakit.

Berindik enggau nya, Sepital Miri nesau mensia mayuh ti ngelala pesakit tauka bisi penerang bekaul enggau aris pesakit tauka sida sebilik ngambika lengkas betanya ngagai Pemesai Kereja Rama Perubat, Adriana Mathew Lugun ba lumur 085-460633 maya jam opis (Hari Satu ngagai Hari Lima). -RBI

KUCHING, 2 Mac — Sebuah kerita ke dideriba siki indu nuju ngagai Jalai Song nengah Jalai Laksamana Cheng Ho enda ulih dijaga lalu ngelantak tiang lampu urung pukul 11.10 pagi tadi.

Eksiden nya nyadi ba mua Chicago 7, ngujungka tiang lampu nya tumbang lalu ninggang sebuah kerita ke datai ari arah ke bebida nuju Batu 3.

Penusah nya mega ngasuh trafik sekut ba endur nya enda lama.

Taja pia, kededua deriba nya diripotka semina bakal mimit aja. — RBI

Keserak tu Ruai Berita Iban udah ngaga Randau Eksklusif begulai enggau pemenang Queen Kebaya Miri Fest 2025 ti negika pesaka asal nyadi kelai identiti, pengandal enggau pengidup dudi hari nembiak rebak baru.

Peranak Lun Bawang asal ari Lawas, pejalai Stacy Rosedyana Sigar ukai semina cherita menang ba pekit ratu kebaya aja, tang naratif transformasyen diri ti diisi enggau disiplin, pemerani sereta pengerindu ke dalam ngagai budaya.

Di belakang tuchum ti manis sereta narit ati bala akim enggau bala orang ke datai meda, bisi cherita siku nembiak indu ti kala napi pemalu pasal pengulih iya empu.

Taja pia, pengerindu iya ba pengawa pemerindang kenyau ari mit nyadika pun ubah.

Setiap renggat ari pekit sekula nyentuk ke pengawa budaya, iya ngambi bagi, nempa pengarap ati enggau identiti iya.

Ba iya, pemenang ukai tuju kepenudi, tang nyadika bukti pengawa ti terus ulih mutarka penakut ti nyadika pengerawan ati.

“Aku deka kebaya dipeda ukai semina selambar gari aja, tang nyadi lambang pengering, elegan enggau identiti budaya,” ku iya enggau andal.

PESAKA DI BELAKANG NGEPAN.

Ba Stacy, kebaya mai reti ti jauh ngelui ari ‘estetika’. Iya nyadi kelai penerus tradisyen entara rebak lama enggau rebak baru, siti tukuh seni ti seruran relevan taja pan jeman berubah.

Iya pechaya pemanah pekayan asal bisi ba cherita di belakang jait, motif enggau tukuh pekayan nya.

Sepemanjai pekit nya, pemar ke pemadu besai ditapi iya iya nya penanggul awak nyendiaka gari pengudah ‘tema’ berubah ba minit kepenudi.

Taja pia, enggau chara ngatur jam enggau bejimat sereta sukung ti tegap ari tim kreatif, iya mujur mantaika pengawa pemerindang ti narit ati.

Latih ‘catwalk’ ninting hari, latih komunikasyen enggau nyendiaka runding nyadi pengawa pengelama sebulan sebedau renggat kepenudi.

Iya nyemetak madahka sukut runding enggau pikir kebendar iya lebih mar ari sukut fizikal laban penyereta patut ngetanka fokus, pengarap ati enggau penelap lebuh diakim.

SUKUNG TI NEMPA PEMUJUR

Stacy enda nyangkal pemujur iya digaga bepelasarka sukung ari mayuh piak. Diri sebilik, bala bakih enggau tim kreatif nyadi tulang belakang ti ngeringka semengat iya lebuh napi penguji.

Kebendar iya, peluang betemu enggau penyereta bukai mega nyadi kenang pemadu berega sepemanjai pekit laban nya muka ruang kaul sereta betukar peneleba.

Pengudah bulih gelar nya, iya chakah ngulu program main asal enggau pengawa mandangka fesyen, nyengkaum ngelaluka pengawa ke diatur The Rotary Club of Miri Oil Town enggau Serakup Indu Orang Ulu Miri di Miri.

Ba iya, tetiap pelasar nyadi peluang dikena meri kelala pesaka budaya ngagai mensia mayuh ke lebih mayuh.

MISYEN BARU: PANGGAU TI BESAI AGI

Diatu, Stacy benung nyediaka diri enggau intensif napi pekit Miss Heritage Sarawak 2026.

Fokus iya ukai semina ba gamal aja, tang mega nguasa penemu budaya, sejarah enggau nilai asal ngambika iya ulih enggau temegah ati ngarika identiti nengeri Sarawak ba panggau ke besai agi.

Iya mega ngemeratka penyelai main asal menua tu baka asil pengelandik jari enggau pekayan etnik nyadi elemen beguna ti deka dikemeratka iya.

Ba iya, nembiak rebak baru mesti meretika pun budaya diri empu sebedau ulih mai iya ngagai renggat dunya.

INSPIRASYEN NGAGAI REBAK BIAK

Nyadi ikon budaya baru, Stacy meda gelar ke dimenang iya nya nyadika inspirasyen. Iya deka ngena pengulih iya meri inspirasyen ngagai raban nembiak ngambika lebih agi angkunka pesaka asal kelebih agi di Malaysia ti kaya enggau penyelai budaya.

Stacy ngelalau tetiap iku penyereta enggau nembiak rebak baru patut seruran nyadi diri empu sereta beterima kasihka penyelai diri, laban pengarap ati ke bendar ada ari nerima identiti diri.

Berebak enggau nya, pengawa nyendiaka diri enggau silik ari sukut runding, penemu enggau pengelandik beguna amat dikena nentuka setiap orang ulih ngayanka diri enggau pengarap ati.

Ke pemadu beguna ku iya, ngelantangka diri enggau tiap sikin pejalai laban peneleba ke ditengah nuan sekalika manis tauka mar, nyadi pengajar ke pemadu manah ti nempa pengering enggau pemansang nuan jemah ila.

PESAKA NYADI PUGU PENGERING

Ba Stacy, pesaka ukai utai ke udah lama. Tang ku iya, urat ti nentuka siku orang enda mudah rebah taja pan napi pemar jeman.

Enggau penetap ati sereta visi ti terang, iya diatu nyingkang ngagai renggat ke nangkanka nya ukai semina nguji ngulihka jumpang enggau gelar, tang mai enggau iya nyawa budaya ti deka terus idup sereta dipebasa.

“Ba aku, elegan ukai semina gaya aja, iya nya penerang identiti” ku Stacy ngujungka randau enggau Ruai Berita Iban seraya tuchum. — RBI

BINTULU, 2 Mac — Ejensi Penerit Adat Maritim Malaysia (APMM) Zon Maritim Bintulu ngetan sebuah kapal berikan menua tu pengudah dipelaba ngelanggar syarat lisin ke sah lebuh bejalaika aktiviti berikan ba palan 1.6 batu nautika barat laut Tanjung Payung, urung pukul 8.15 pagi, ditu kemari.

Direktor Zon Maritim Bintulu, Muhammad Suffian Eldine Abdullah madah, pengawa nya dipejalaika asil ari pengawa meresa ti dipejalaika sebuah bot Patrol Maritim Malaysia lebuh bejalaika pengawa matau Op Tiris 3.0, Op Permai 01/2019 enggau Op Pelantar Merah 03/2023 ba kandang endur nya.

Nitihku iya, pengawa meresa kapal nya tetemuka krew kapal ke bisi lima iku peranak Indonesia nyengkaum nakhoda ke beumur entara 21 ngagai 52 taun.

Ku iya nambah, kapal nya dipelaba ngereja penyalah ari baruh Seksyen 8(b) Akta Berikan 1985 laban bejalaika aktiviti berikan kurang ari tujuh batu nautika ari tebing tasik, lalu enggau nya ngelanggar syarat lisin ke entas.

“Enti dikenuku salah, pengempu kapal nya ulih diukum enda ngelui ari RM20,000 tauka dijil nyentuk dua taun, tauka kededua nya,” ku iya ba sebengkah penerang berita.

Kapal nya enggau semua kru ditan sereta diiring ngagai Palan Ngetanka Kapal Zon Maritim Bintulu sebedau diserah ngagai Pemesai Pemansik Maritim Malaysia ngambika bejalaika atur nangkanka nya.

Malaysian Maritime mega nyemetak madahka semua komuniti maritim meseti seruran nitihka atur enggau undang-undang ke udah dikena sereta ngemeratka prosedur pengelikun di tasik dikena nyeliahka penusah ke enda dikedekaka nyadi.

Mensia mayuh ke bisi penerang, sebana tauka napi penusah ngenyit di tasik tau betelefon ngagai lumur 999 tauka Palan Gerakan Maritim Zon Maritim Bintulu ba lumur 086-314254 enggau Palan Gerakan Maritim Nengeri Sarawak ba lumur 082-432544 ngambika atur jampat dipejalaika. — RBI