PUTRAJAYA, 3 Mac — Datuk Aaron Ago Dagang, Menteri Penyerakup Menua Malaysia nyemetak madahka pengerami Chap Goh Mei ukai semina pengujung Taun Baru Cina aja, tang mandangka pengarap, pengerindu enggau semengat begulai dalam mayuh macham mensia mayuh di menua tu.

Dalam penerang iya sehari tu, iya madahka tetiap pengerami di Malaysia muka ruang dikena ngenegapka kaul entara bansa sereta ngerapitka seraka rama.

Nitih ku menteri iya, penyelai bansa, jalai pengarap enggau budaya ke bisi di menua tu nyadi reta ke berega ke patut ditan nengah pemintar enggau pengelurus ati. 

“Penyelai ti dikembuan kitai nyadi reta menua ti enda ulih dibeli. Iya meseti ditan enggau penemu sereta lurus ati. Sensitiviti jalai pengarap enggau bansa enda tau sekali-kali dipolitik tauka dikena nyadika pun penyarut,” ku iya.

Iya mega minta rayat Malaysia ngaga pengerami nya nyadi awak dikena ngenegapka nilai diri sebilik ba pupu bansa sereta ngemeranka ulah mereti sebedau bejaku sereta bebasaka pangan diri. Enggau basa, nitihka iya, bisi penerima penyelai ti nyadi pelasar penyerakup. 

“Sebuah bansa ke beserakup iya nya bansa ke tegap, entap sereta ulih dikearapka.Penyerakup nyadi tanggungpengawa begulai,” ku iya nambah.

Menteri Penyerakup Menua nya mega meri selamat Chap Goh Mei ngagai semua rayat Malaysia sereta ngarapka pengerami tu terus nyerakupka ati semua komuniti di menua tu. -RBI

MIRI, 3 Mac — Sebuah kerita BMW ti ngembuan lumur rejista Brunei angus lengis ba penusah angus ba premis Leesing Logistic Sdn. Bhd., Piasau, malam kemari.

Nitihka penerang rasmi ari Tim Bravo, Balai Bomba enggau Penyah Penusah Miri Sentral, sida nerima kangau ngenyit bekaul enggau penusah nya urung pukul 11.15.00 malam sebedau locheng penusah ngenyit ditebah urung pukul 11.15.10 malam.

Sebuah entukar FRT ti bisi tujuh iku kaban enggau sebuah unit EMRS ti bisi dua iku kaban tekala nya dipindah ngagai endur penusah nyadi ti bepalan urung tujuh kilometer ari stesyen nya.

Entukar nya datai ba palan nya urung pukul 11.22 malam lalu operasyen madamka api berengkah seminit udah nya.

Komander Operasyen, PBKI Mohamad Fairus, ngeripotka lebuh datai ba palan penusah nyadi, ditemu sebuah kerita BMW ke ngembuan lumur rejista Brunei udah angus 100 peratus.

Dua iku pekereja kilang diripotka nguji madamka api ngena enam iti perengka pengerara api sebedau raban bomba datai.

Pengawa mansik keterubah ngena konsep RECEO tetemuka nadai kes bebadi nyawa.

Raban bomba udah nya bejalaika operasyen madamka api ngena siti batang hos bantu enggau siti batang sepemanjai 100 kaki enggau muncung buih enggau dua tong buih, ngena ai ari paip bomba ke besemak nyentukka api abis padam.

Penusah angus nya udah mujur dijaga urung pukul 11.40 malam lalu operasyen tembu urung pukul 12.15 pagi pengudah raban nya nentuka nadai risiko api tau mau baru.

Tim nya bekejang ke stesyen nya urung pukul 12.35 pagi lalu datai urung pukul 12.45 pagi.

Nadai penusah bakal diripot nyadi lalu kebuah penusah angus nyadi agi dipansik piak bomba. — RBI

MERADONG, 3 Mac – Siku lelaki peranak menua tu beumur urung 40 taun ditan Bagi Pansik Jenayah Komersial (BSJK) IPD Meradong kena 2 Mac 2026 urung pukul 10.50 pagi ketegal dipelabaka bisi kaul enggau pengawa nipu nengah telefon ti nyaru diri nyadi pemesai DHL.

Ketuai Polis Pelilih Meradong, DSP Tansli Mering madah, orang dikena tipu nerima kangau ari siku individu ti madahka diri pemesai DHL ari Melaka lalu madahka mansa udah nganjung barang ke ditagang sebedau ngasuh mansa mindahka duit ke dikumbai nyadika chara nyaga diri.

“Asil ari kena tipu taktik nya, mansa napi pengerugi sepenyampau RM49,850.00,” ku iya nengah sebengkah penerang sehari tu.

Nitihku iya, pansik silik mega tetemuka saspek bisi kaul enggau ripot polis di Serian. Taja pia, pengawa meresa rikod ke udah mandangka saspek nadai ngembuan sebarang rikod jenayah sebedau tu.

Kes tu dipansik ari baruh Seksyen 420 Kanun Keseksaan, ti netapka ukum jil enda kurang ari setaun enggau enda ngelui ari 10 taun sereta sipat sereta tau kena ukum mata duit, enti dikenuku salah.

Berindik enggau nya, DSP Tansli ngelalau mensia mayuh anang tekenyit sereta lengkas meresa ngagai Polis Diraja Malaysia nyema bisi nerima kangau ti ngasuh nangi sebedau ngaga sebarang transaksyen wang.

Mansa pengawa nipu mega tau betanya ngagai talipaun hotline Palan Timbal Penipuan Nasional (NSRC) ba lumur 997 tauka betanya ngagai Balai Polis Bintangor ba lumur 084-693222 ngambika ulih dipejalaika enggau lengkas. -RBI

Sumber IPD Meradong

KUALA LUMPUR, 3 Mac — Rang Undang-Undang (RUU) Konstitusyen (Ubah) 2026 ti deka natak timpuh mangku pengawa Menteri Besai (PM) maksimum 10 taun enda mujur teulihka sukung ari dua pertiga kaban Dewan Rakyat, ngujungka enda mujur dikemendarka.

Pemutus nya dibantaika Speaker Dewan Rakyat Tan Sri Johari Abdul, pengudah pengawa ngundi diatur tekala nya pengudah tembu sesi bejurai ti ngaul 41 iku Kaban Parlimen ari piak perintah enggau penyakal.

Nitihku iya, penyampau sukung ke diulih enda tetangkupka peminta majoriti dua pertiga baka ke udah ditetapka ungkup ubah Konstitusyen Perintah Besai.

“Sida ke enda datai bisi 32 iku, sida ke enda nurun ngundi bisi 44 iku, sida ke setuju bisi 146 iku.

“Nya alai, pemutus nya kurang ari dua pertiga majoriti setuju,” ku iya lebuh mantaika pemutus undi ba Dewan Rakyat, kena Hari Satu tu tadi.

RUU nya ngembuan tuju deka ngubah Konstitusyen Perintah Besai ngambika timpuh siku Menteri Besai ditatak ngagai 10 taun, sekalika beturut-turut tauka enda.

Ubah nya begunaka sukung ambis nadai dua pertiga ari semua kaban Dewan Rakyat ngambika ulih dikemendarka. — RBI

KUALA LUMPUR, 3 Mac — Aum Komiti Teknikal ari baruh ‘Majlis Tindakan Pelaksanaan Perjanjian Malaysia 1963’ (MTPMA63) kemari ngumpul timbal ari raban bekaul enggau pekara ke agi bedau teputar dalam Sempekat Malaysia 1963 (MA63).

Aum ke diatur ba Begunan Parlimen nya bechairmanka Sapit Menteri Besai Datuk Amar Fadillah Yusof ke nyadi Chairman Komiti Teknikal MTPMA63.

“Aum sehari tu ngembuan tuju deka ngulihka timbal ari opis menteri enggau ejensi perintah besai sereta mega Perintah Nengeri Sabah enggau Sarawak ba semua pekara ke agi bedau teputar, nyengkaum kuing ke ulih diambi bekaul enggau isu nya.

“Tiga keretas kereja mega bisi dibantaika Opis Menteri Pengerai, Opis Menteri Pelajar enggau Bagi Hal Ehwal Sabah enggau Sarawak, Jabatan Perdana Menteri (BHESS, JPM),” ku iya nengah siti post ba Facebook iya.

Aum nya meda Perintah Besai diarika Menteri ba Opis Menteri Besai (Sabah enggau Sarawak) Datuk Mustapha Sakmud begulai enggau sekeda menteri perintah besai ke bukai.

Berebak enggau nya, perintah Sarawak diarika tiga iku Sapit Premier Sarawak iya nya Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Dr. Sim Hui Hian.

Perintah Sabah diarika tiga iku Sapit Kepala Menteri iya nya Datuk Seri Dr Jeffrey G Kitingan, Datuk Seri Masidi Manjun enggau Datuk Ewon Benedick — RBI

SONG, 2 Mac — Penegap penyerakup pupu bansa nyengala dipeda maya Pengerami Nyadung Bubur Lambuk enggau Buka Puasa ke diatur ba Masjid Nurul Islam, Kampung Gelam ditu, Hari Minggu tu tadi.

Pengerami ke digulu bansa Iban, China enggau Melayu nya ukai semina dikena buka puasa aja tang kelai pemanah kaul enggau penyerakup rayat di menua nya.

Maya nya, Kaban Kunsil Nengeri (ADUN) Katibas, Lidam Assan dipebasa nyuaka pemeri ari Tabung Baitulmal Majlis Islam Sarawak ngagai 35 iku penerima.

Ba jaku iya, Lidam beterima kasih ngagai rayat mayuh ti semampai tegap nyukung penyerakup pupu bansa nyengkaum di menua Song.

Iya madah, pemansang ke nyadi maya hari tu enda nekul pemanah kaul enggau pangan diri.

Pengerami lemai nya diatur Saberkas Pampang Katibas, Komiti Pengatur Masjid Nurul Islam Song, LAKIS Song, BKI IPD Song, KRT Kampung Gelam, KRT Kebiau enggau JKKK Kampung Gelam Song.

DALAT, 2 Mac — Siku ular sawa batik pemanjai urung tiga meter mujur ditangkap raban Alpha Squad ari Raban Penyaga Pengelikun Mensia Mayuh Malaysia (APM) pengudah iya ditemu tepekul dalam kandang manuk enggi siku peranak di Kampung Patok Oya, ditu, tumu pagi tadi.

Nitihka penerang rasmi, Palan Kawalan Operasyen APM Pelilih Menua Dalat nerima kangau ngenyit bekaul enggau penusah nya sebedau raban nya terus dipindah ngagai endur nya.

Ular nya dipelabaka tama ke dalam kandang manuk ngiga pemakai lalu ditemu kenyang pengudah nelan siku manuk.

Operasyen nangkap jelu reptilia nya mujur dipejalaika enggau likun nadai sebarang bakal ngagai peranak tauka raban ke bejalaika pengawa.

Jelu nya udah nya dipindahka ngagai endur ke engkeman agi dikena nyeliahka sebarang risiko ngagai komuniti besemak.

Mensia mayuh dilalau ngambika lengkas betanya ngagai talipaun penusah ngenyit APM Dalat ba lumur 084-867357 ti beoperasyen 24 jam enti sema betapi enggau penusah ngenyit tauka tetemuka jelu siga ti tau mai penusah. — RBI

SELANGAU, 2 Mac — Raban Penyaga Pengelikun Mensia Mayuh Malaysia (APM) di pelilih Selangau nerima kangau ngenyit pukul 6.40 pagi bekaul enggau penusah eksiden ba jalai alun semak Jematan Batang Mukah sehari tu tadi.

Nitihka penerang rasmi, tiga iku kaban APM dianjung ngagai endur nya lebuh nerima ripot nya ngambika bejalaika pengawa mansik keterubah enggau operasyen bantu.

Penusah nya mungkur sebuah lori enggau sebuah kerita Proton Saga ti bisi dua iku mansa.

Asil peresa tetemuka mansa keterubah bisi bakal mimit lalu mansa kedua nadai bakal.

Kededua mansa diberi perubat keterubah ba palan nya lalu enda begunaka pemindah ngagai klinik ngambika diperubat enggau silik agi.

Mensia mayuh dilalau lengkas betanya ngagai talipaun APM Selangau ba lumur 084-891285 nyema bisi penusah ngenyit nyadi ba kandang endur diri empu dikena nentuka bantu ulih dikenataika enggau lengkas. — RBI

MIRI, 2 Mac – Bazar Gawai Dayak (GDB) ungkup Pengerami Gawai Dayak Renggat Nengeri Sarawak 2026 diperambu deka berengkah 1 Mei ngagai 24 Mei 2026 ba palan GDB taun nyin kemari di Permy, enggau nya nyadi siti ari batang pengerami taun tu.

Semua program ari baruh Pesta Budaya Etno (ECF) deka diatur ba palan GDB nyadika pengerami program ninting malam sepemanjai timpuh ngatur.

Pekara nya udah dikerandau dalam aum ti bechairmanka Datuk Dr Penguang Manggil ti nyadi Sapit Chairman Komiti Besai enggau Chairman Komiti Pengatur Pengerami Gawai Dayak renggat negeri Sarawak 2026.

Aum nya mega ngemeratka dua bengkah atur pengawa ti deka diatur di Miri taun tu iya nya Bazaar Gawai Dayak (GDB) enggau Pengerami Etno Budaya (ECF).

“Dua bengkah pengawa tu ila deka betuaika Datuk Majang Renggi,” ku Penguang.

Ungkup penerang, chairman komiti besai pengerami tu betuaika Datuk Amar Douglas Uggah Embas. – RBI

KUCHING, 2 Mac – Opis Kereja Raya Sarawak (JKR) Sarawak mantaika komitmen terus ngenegapka kerejasama strategik enggau Opis Bekal Ai Menua Pesisir Sarawak (JBALB) dalam ngamatka agenda pemansang menua pesisir ti inklusif sereta meri empas tinggi ungkup pengelantang rayat nengeri tu.

Komitmen nya dibantaika beserimbai enggau penemuai basa JBALB Sarawak ngagai Direktor Kereja Raya Sarawak, Datu Dr Cassidy anak Morris dalam aum rasmi ke diatur sehari tu.

Aum nya nyadi pelasar beguna dalam ngenegapka kaul dua piak entara kededua ejensi teknikal besai nengeri tu.

Dalam sesi randau nya, kededua piak ngemeratka pengawa ngatur bejalaika projek infrastruktur bekal ai menua pesisir, nyengkaum aspek matau pejalai pengawa, ngemanahka chara bejalaika pengawa enggau optimumka perengka guna dikena nentuka tetiap projek ulih ditembuka nitihka taga enggau spesifikasyen ti udah ditetapka.

Kelimpah ari nya, potensial kerejasama teknikal ti lebih komprehensif mega bisi dikerandau, kelebih agi dalam pengawa ngangkatka pemanah pengawa meri servis sereta nentuka sistem bekal ai ti dikemansang nya meruan sereta nangkup guna komuniti menua pesisir ba selampur.

JKR Sarawak nyambut manah penemuai nya lalu netapka nya siti singkang ke besai reti ba pengawa ngenegapka kaul strategik entara ejensi ti bejalaika pengawa, lalu enggau nya ulih ngenyampatka pengawa tadbir urus dalam nyendiaka infrastruktur pemun ti bekualiti tinggi ngagai rayat Sarawak, kelebih agi ba kandang menua ulu. -RBI