TEBEDU, 4 Mac — Palan Servis Parlimen Serian udah bejalaika pengawa mansik palan ungkup dua perambu projek ari baruh Program Transformasyen Menua Pesisir (RTP) 2027 ti ngaul pengawa ngangkatmanah perengka guna komuniti di kandang menua Tebedu.

Pengawa mansik palan keterubah iya nya ngaul perambu ngangkatmanah Padang Main Bol Kampung Temong Bengan, Tebedu.

Penemuai nya disempulang raban teknikal Opis Kereja Raya (JKR) Sarawak, Ketui Raban Bansa (KK) Ruben enggau pengari raban nembiak Kampung Temong Bengan.

Projek ke diperambu tu ngembuan tuju deka ngenegapka perengka guna lumba enggau main ke bisi diatu ngambika likun sereta nyamai agi dikena, lalu ari nya nyukung pemansang nembiak sereta ngelakuka gaya pengidup ke bepengerai ba peranak menua nya.

Kelimpah ari nya, pansik palan ke bukai mega dipejalaika ungkup perambu ngangkatmanah Dewan Siden OKP di Kampung Tebedu Bung Padus.

Penemuai nya mungkur tim teknikal Opis Kereja Raya Sarawak begulai enggau KK, Kennedy Gangig.

Projek tu diperambu dikena ngemanahka perengka guna dewan nyadi palan aktiviti komuniti ti kondusif agi ngatur program pemansang komuniti, rama enggau kandang menua.

Pengawa bejalaika pansik palan tu nyadi singkang keterubah ti beguna dikena nentuka perambu projek RTP 2027 ulih dipejalaika enggau teratur, nangkup guna peranak ke bendar sereta nitihka spesifikasyen teknikal ti udah ditetapka. — RBI

KUALA LUMPUR, 4 Mac — Kereja ngangkatmanah Klinik Pengerai (KK) Nyabor enggau Klinik Pengerai Roban ari baruh Parlimen P205 Saratok mujur tembu dalam bulan Disember 2025 lalu kededua fasiliti berengkah beoperasyen penuh dalam bulan Februari 2026.

Pekara tu dipadahka Sapit Menteri ba Opis Menteri Pengerai Malaysia, YB Dato Hajjah Hanifah Hajar Taib lebuh ti nyaut Tanya Lisan ti dibantaika YB Senator Tuan Pele Peter ba Dewan Negara.

Nitihku iya, projek ngangkatmanah nya dipejalaika nengah inisiatif Bitara MADANI Ngangkatmanah Klinik Repuk ba taun 2025 ti nyadi komitmen Perintah MADANI dalam ngenegapka infrastruktur pengerai menua pesisir sereta nambahka akses rayat ngagai servis pengerai ti bekualiti sereta likun.

Klinik Pengerai Nyabor diatu nyendiaka servis berubat luar, pengerai indai enggau anak mit, farmasi enggau servis penusah ngenyit ti beoperasyen 24 jam sehari, tujuh hari seminggu dikena nangkup peminta komuniti ngelingi.

Berebak enggau nya, Klinik Pengerai Roban mega bisi nyendiaka servis ke sebaka enggau perengka guna makmal patologi tambah dikena nyukung proses diagnosis enggau ngubat pesakit enggau betul sereta ngasi agi.

Ari sukut pengereja pengawa, Klinik Pengerai Nyabor udah diungkupka 15 pangku pengawa ti ngaul Pemesai Perubat, Farmasi enggau jururawat, lalu semua pangku pengawa tu udah diisi penuh.

Ungkup Klinik Pengerai Roban, sepenyampau 18 pangku pengawa udah diungkupka nyengkaum Pemesai Perubat, Farmasi, indu misi enggau Teknologi Makmal Perubat.

Diatu, semina seiti aja pangku pengawa Pemesai Perubat bedau diisi lalu proses ngisi nya deka dipejalaika berenggat dikena nentuka pengawa meri servis pengerai ulih dipejalaika enggau optimum.

Penembu projek tu dikearap ulih meri empas positif ngagai peranak ngelingi Saratok nengah chara nyendiaka perengka guna pengerai ti lantang agi, moden sereta komprehensif. — RBI

LONG BANGA, 4 Mac — Direktor Kereja Raya Sarawak, YBhg. Adj Prof Ir Ts Gs Br PMr Dr Cassidy anak Morris udah ngatur Penemuai Ngenegapka Projek Siri Kedua dikena beratika pejalai pengawa bejalaika projek ngemanahka Jematan Sungai Peluan di Long Banga, Baram.

Projek nya sebagi ari inisiatif ngemanahka sekeda jematan ba kandang menua Baram ti mega ngaul Jematan Sungai Merawa, Sungai Balong enggau jalai Long Banga–Bario.

Skop pengawa bejalaika nya nyengkaum nukar jematan lama, repuk enggau jematan besi baru dikena ngangkatka tikas pengelikun, pengelama struktur enggau guna rentayab jalai alun ba kandang menua pesisir.

Naka ke diatu, pejalai fizikal projek nya udah manggai 13 peratus, iya nya dua peratus tumu ari timpuh asal ti udah ditetapka.

Pemansang positif tu mandangka komitmen tinggi piak ti bejalaika pengawa dalam nentuka projek nya tembu nitihka pelin enggau standard teknikal ti udah ditetapka.

Penemuai nya ngembuan tuju deka matau pengawa bejalaika pengawa ba palan nya dikena nentuka iya bejalai enggau lanchar sereta nitihka spesifikasyen enggau jadual ke udah dipesetuju.

Inisiatif tu setipak enggau komitmen Opis Kereja Raya Sarawak ti deka ngenegapka pemansang infrastruktur menua pesisir enggau ngemanahka agi penyambung ungkup pengelantang rayat di Sarawak. — RBI

ASAJAYA, 4 Mac — Balai Bomba enggau Penyah Penusah Malaysia (BBP) Asajaya udah bejalaika pengawa ‘flushing’ enggau kereja meresi Kompleks Lumba enggau Main Asajaya nyadi pemungkal nyendiaka diri ungkup ngemujurka ‘Program Lan Berambeh Sungkey Belia’ pelilih Asajaya.

Pengawa meresi nya mungkur kandang endur panggau besai, sistem parit enggau kandang endur mua kompleks dikena nentuka rampa menua beresi, likun sereta kondusif dikena bala temuai enggau pesereta program.

Operasyen nya betuaika Komander Operasyen, PBK I Abg Othman Bin Abg Sharbini, enggau pengering siku deriba enggau tiga iku raban operasyen.

Sebuah kerita LFRT Atego (BJU 5996) dikena bejalaika pengawa ‘flushing’ enggau meresi ba endur ke bisi kaul.

Operasyen bejalai enggau lanchar sereta dijaga. JBPM deka terus komited meri sukung ngagai program komuniti sereta nentuka sukut pengelikun enggau pemeresi seruran dikemeratka. — RBI

KANOWIT, 4 Mac – Sekretari Politik Menteri Penyerakup, Dr Stephen William nyemetak madahka semengat ‘Segulai Sejalai’, setipak enggau konsep penyerakup Malaysia Madani, enda tau enda disalin ngagai pengawa ari ti mengkang nyadi retorik aja.

“Penyerakup meseti nyadi nyata lalu ukai semina disebut aja, laban penyerakup lebuh disalin ngagai pengawa mai reti pemansang.

“Aku deka meda kitai di Kanowit amat-amat nempa penyerakup nyadi nyata lalu ukai semina jaku puang aja.Nengah chara tu aku pechaya kitai ulih ngemansangka Kanowit lebih agi ari kandang menua bukai di Sarawak,” ku iya.

Iya mansutka jaku tu rambau pengawa nyuaka setipikit nyiri ngagai 94 iku ketuai komuniti enggau ketuai genturung pendiau (KMKK) ari baruh Machan empai lama.

Ba berita kebukai, Dr Stepehen nyemetak madahka pengari nya ke diatu Allan Siden Gramong mengkang nyadi chalun ke patut disukung enti ketuai parti enda ngaga pemutus bukai.

Nengah jaku nya mega, iya nulak berita selebubu ti madahka iya udah dipilih bala ketuai Gempung Parti Sarawak (GPS) nyadi chalun ba sitak Machan ba pengawa bepilih nengeri ti deka datai.

“Aku madah ngagai kita, anang mendingka pekara ke baka nya.Ungkup ke diatu, enti penyandang kerusi nya dipilih ngetanka penuduk nya, udah nya kitai patut meri sukung penuh ngagai iya dikena nentuka iya menang enggau majoriti ke besai agi.

“Enti ketuai GPS madah bukai, kitai deka berundingka pekara nya ila, baka ke diatu, iya ke enda tau enda disukung kitai iya nya penyandang kerusi.

“Aku nandu baru, anang mendingka sida ti madahka aku deka nyadi chalun GPS. Nya bedau entas. Aram kitai nganti atur ari ketuai GPS,” ku iya

Ba pekara pengelantang pendiau, Stephen madahka pengudah gawa ba renggat baruh pengelama tiga taun ke udah, iya beratika sekeda individu ke patut nerima bantu pengelantang pendiau nyangka enda dikeibuhka.

Iya ngambi chunto kes ke alai sekeda peminta dikangau interbiu lalu ditanya lutur pasal ubat ke diberi sida, suah diperubat ba sepital enggau sejarah perubat tang sekeda enda ulih meri saut ke betul laban sida enda ulih ingatka penerang ke silik.

“Nya alai, KMKK meseti ngambi singkang proaktif ngelala peranak ke tau nerima bantu pengelantang pendiau ngambika sida ke amat patut enda dikelaung.

“Ketuai rumah panjai mega meseti bejalaika inisiatif ngelala peranak ke dianggap patut direjister dalam sistem eKasih,” ku iya.

Ku iya nambah, sida ke betapi enggau isu baka nya patut minta bantu ari opis pelilih menua.

“Enti bisi kes baka tu lalu begunaka bantu, betemu enggau pemesai pelilih menua.Aku pechaya pemesai pelilih menua baru kami lebih ari deka mantu,” ku iya.

Sama bisi datai iya nya ex-Kaban Kunsil Nengeri (ADUN) Machan Dato Sri Gramong Juna, Pemesai Pelilih Kanowit Cerisologo Sabut enggau sekretari politik Premier Sarawak Petrus Igat. -RBI

SPAOH, 4 Mac 2026 – Raban Penyaga Orang Periman Malaysia (APM) Pelilih Spaoh udah bejalaika operasyen nangkap ular berindik ari sebana bekaul enggau penatai anak ular sawa ba sebuah palan pengentap pendiau di Kampung Hilir Spaoh, lemai kemari.

Orang ke ngaga sebana nya ngeripotka diri tepedaka ular nya lebuh iya deka nurun ngagai ringkat baruh rumah iya.

Irauka pengelikun diri empu enggau sida sebilik, iya terus ngaga kanggau minta bantu enggau APM Spaoh minta bantu.

Berindik ari penerang ke diterima, empat iku raban Tim Alpha ngesah ngagai endur nya enggau perengka khas dikena nangkap ular.

Lebuh datai ba palan penusah nyadi, raban ngentaska bisi siku ular sawa urung tiga kaki pemanjai benung engkilong ba tangga ringkat atas rumah nya.

Operasyen nangkap ular nya mujur dipejalaika dalam timpuh urung 10 minit ngena teknik nyepit ti likun sereta dijaga.

Ular nya udah nya diengkah dalam kutak khas ungkup jelu bisa sebedau dibai ngagai Palan Kawalan Operasyen Pelilih Menua (PKOD) ngambika ulih dipejalaika enggau silik agi.

APM Spaoh ngelalau mensia mayuh ngambika seruran bejejaga enggau penatai ukui siga ba genturung pendiau sereta anang ngambi sebarang atur kediri empu ti tau ngeruga pengelikun.

Sebarang penusah ngenyit tau diripot nengah lumur 083-473006 tauka lumur penusah ngenyit 999. -RBI

KUALA LUMPUR, 4 Mac – Perlindungan Hak Cipta Pengarang Muzik (MACP) Berhad udah meri kelala enggau rasmi Garis Lalau Pemintar Tiruan (AI) (“Garis Lalau MACP AI”) dikena nyaga, ngetanka hak sereta nyaga pemerat penengkebang muzik di Malaysia.

Pengawa tu ngembuan tuju deka nentuka ekosistem muzik menua tu mengkang dijaga ari baruh langkar undang-undang ke diatu, dalam rampa teknologi AI ke jampat mansang ti bisi potensial meri pemar baru bekaul enggau hak cipta, pengempu, sereta pampas ke lurus sereta sama rata ngagai penengkebang muzik.

MACP ngemeratka hak cipta nya hak eksklusif ti asil ari kreativiti enggau asil ditempa mensia. Garis lalau baru nya netapka semina asil asal ke sepenuh iya ditempa mensia aja ke patut direjista enggau MACP sereta nerima bayar royalti.

Nya alai, MACP enda ngelala sebarang asil ti digaga sepenuh iya tauka sebagi ari Pemintar Tiruan (“AI”).

Apin lama ke udah ba Parlimen, YAB Menteri Besai, Dato’ Sri Anwar Ibrahim ngemeratka Rang Undang-undang Tadbir Urus AI (RUU) benung diperambu dikena nempa akauntabiliti enggau etika, kelimpah ari nentuka undang-undang ke udah bisi terus dikena sereta ulih diterit.

MACP ngelaluka inisiatif perintah tu lalu nandu baru komitmen MACP nentuka pengawa nyaga ungkup penengkebang menua tu terus dijaga, setipak enggau pematut seliris pemansang teknologi.

MACP mega sanggup ngambi bagi dalam proses ngaga perambu rang undang-undang nya sereta meri input dikena ngenegapka pengawa tadbir urus AI di menua tu, kelebih agi bekaul enggau hak cipta asil muzik.

Berindik ari nya, Menteri Dagang Dalam Menua enggau Ungkus Pengidup (KPDN), Datuk Armizan Mohd Ali mega madahka ari baruh Akta Hak Cipta 1987, hak nyaga hak cipta semina diberi ngagai orang ke bekualiti aja lalu pengawa nya meseti asil ari pengepuh mensia ke chukup.

Nya alai, asil ti ditempa AI enda layak dijaga hak cipta nitihka undang-undang ti udah bisi di Malaysia.

Iya mega madahka KPDN nengah Kaunsil Reta Intelek Malaysia (MylPO) benung mansik pematut ngemaruka undang-undang ke udah bisi. MACP mega nyukung penerang Menteri KPDN ti madahka pengempu hak cipta asal bisi hak ngambi atur undang-undang enti sema asil ti ditempa AI ditemu ngelanggar hak cipta.

Garis lalau MACP AI tu setipak enggau penetap perintah, beratika pematut nyaga pengawa nyaga hak asasi mensia dalam landskap teknologi AI.

Dikena bejalaika garis lalau tu, MACP udah meri kelala mekanisme ngentas mandatori ba portal kaban, ‘myKarya’. Kaban MACP beguna ngentaska pengawa ke direjista nya asal lalu ukai diasilka nengah AI.

Sebarang deklarasyen bula ti ngaul pengawa ti ditempa AI deka napi atur ti terit nyengkaum nginsil pengawa ngerejista pengawa nya sereta nagang bayar royalti.

Latih tauka nempa isi AI ari kompeni tauka penyendia servis AI bisi potensial ngaul asil ti bisi hak cipta, nyengkaum asil muzik ti diempu kaban MACP.

Nya alai, MACP ngemeratka atur khas ungkup Teks enggau Data Mining (TDM) ti deka dipejalaika perintah enda patut meri sebarang ‘pengecuali’ ti ngeruga hak pemegai hak cipta.

MACP mega ngemeratka sebarang piak ketiga nyengkaum kompeni AI ti deka

ngena ‘repertoire’ MACP ungkup latih AI tauka nempa isi, mesti ngulihka pemendar betulis dulu sereta ngaga sempekat lisin enggau MACP.

Ngena asil MACP enggau enda dikemendarka dalam pengawa ngaga tauka pemansut AI dianggap ngelanggar hak cipta lalu deka kena atur undang-undang.

Nyadi Gerempung Pengatue Begulai (CMO), MACP komited deka terus nyaga hak cipta enggau pemerat penengkebang muzik di Malaysia.

Komitmen ti seruran dipejalaika tu ukai dikena nulak teknologi, tang nyadi singkang proaktif MACP dikena ngetanka hak sereta ngetanka pemerat penengkebang ngambika AI enda ngerampas hak asil kereja penengkebang muzik.

MACP mega nyadi kaban Konfederasyen Antarabansa Gerempung Pengarang enggau Komposer.

(CISAC), rentayan pemadu besai di dunya ti ngempuruka lebih 227 gerempung ngatur pengawa begulai ari 111 buah menua, ngarika lebih 5 juta penengkebang di serata dunya.

Pengawa nyadi kaban tu ngemendarka MACP nyadi jematan entara perintah Malaysia enggau komuniti hak cipta muzik antarabansa, kelimpah ari mantu nentuka undang-undang hak cipta menua tu setipak enggau chara pemadu manah antarabansa.-RBI

SEBUYAU, 4 Mac — Projek ngaga jalai nuju ngagai Kampung Ijok di Ulu Sebangan diatu nyau deka tembu, semina kereja ngaga jematan meraka Sungai Ijok aja ke agi ba renggat dipejalaika.

Kaban Kunsil Nengeri (ADUN) Sebuyau, YB Dato Sri Haji Julaihi bin Haji Narawi madahka iya empu udah beratika pejalai projek nya apin lama ke udah lalu puas ati enggau penyulut ke udah dijapai naka ke diatu.

Jalai sepemanjai 2.6 kilometer nya bepun ari simpang jalai Kampung Stika lalu deka meri jalai ti likun sereta lantang agi ngagai peranak Kampung Ijok ti ngembuan 12 buah rumah, lalu majoriti sida nya bansa Iban.

Sungai Ijok ti bisi kaul enggau pengawa ngaga jematan nya sebagi ari anak sungai ba Sungai Sebangan.

Nitihku iya, projek tu entara inisiatif pemansang infrastruktur menua pesisir ti dipejalaika Perintah Sarawak nengah Ejensi Pemansang Besepadu (IRSDA) Bagi Menua Samarahan dalam pengawa ngenegapka rentayan penyambung jalai enggau ngangkatka kualiti pengidup komuniti ngelingi.

Iya ngarapka kereja ngaga jematan ke agi tinggal ulih ditembuka nitihka timpuh ke udah ditetapka ngambika kesemua projek nya ulih dikena penuh peranak Kampung Ijok dalam timpuh ke semak tu.

Ba penerang ke sama, iya mega ngenataika jaku selamat Salam Ramadan sereta selamat bejalai ngagai semua rayat ba kandang menua Sebuyau. — RBI

LONDON, 4 Mac – Dalam gaya ti penuh enggau pemerat sereta prestasi ti enda tentu, Wolverhampton Wanderers milih enda ngaku alah demalam maya ngelaban Liverpool FC dalam main Liga Premier ti richah ba Stadium Molineux.

Nyadi tim ke nyau deka tentu deka ditikika, Wolves baka nadai utai dikenangi. Sida ulih matahka serang Liverpool sepengudah tim Arne Slot ti benung bebendar deka ngulihka slot ba Liga Champions UEFA musin ti deka datai.

Liverpool nguasa tempo ari pun, tang pengujung main sida iya ngasuh sida irau.

Disiplin enggau penyabar tim tuai rumah pengujung iya meri asil ba minit ke-78 lebuh Rodrigo Gomes ngemasukka gol.

Lima minit udah nya, Mohamed Salah pansut nyadi penyelamat sementara ungkup The Reds enggau gol ba minit ke-83. Pengarap bala tim Liverpool diidupka baru.

Taja pia, malam nya enggi Wolves.

Lebuh main nya tama ngagai timpuh masa tambah, Andre ngulihka pemenang dramatik ungkup tim tuai rumah enggau gol penentu, meri sida tiga poin ti berega sereta pemenang liga keterubah beturut-turut kenyau ari bulan April 2025.

Seraya penuduk liga engka enda mayuh berubah, pesan Wolves terang, sida enda deka nyerah enti. – RBI

KUCHING, 3 Mac – Pengawa siku indu ngadaka anak mit ke enda chukup umur datai ba tikas ke pemadu tinggi lebuh iya diukum Kort Majistret RM4,000 ditu sehari tu ketegal ngelamun pengada anak mit nya nengah chara nguburka anak mit nya.

Indu nya beumur 24, ngaku salah ba mua Majistret Ling Hui Chuan ba dawa ari baruh Seksyen 318 Kanun Keseksaan ti nyendiaka ukum jil nyentuk dua taun tauka ukum mata duit tauka kededua ukum enti dikenuku salah.

Kort dipadahka, indu ke dituduh ke bedau belaki nya ngadaka anak mit lelaki ke enda chukup umur lebuh iya ngandung tujuh bulan ba bilik mandi rumah iya kena 28 Januari tu tadi, anak mit nya dientaska udah lesi pengudah ada.

Dalam gaya ti irau sereta enda besedia deka beranak, indu nya nguburka anak mit nya ba kandang babas ba mua rumah iya dikena ngelamun penusah nya.

Taja pia, pengawa iya tebantai pengudah iya minta perubat ba Sepital Besai Sarawak ketegal pedis perut sereta bedarah sebedau madah ngagai lutur iya udah beranak.

Ripot polis udah digaga lalu pansik ke silik ngujungka tubuh anak mit nya ditemu dikubur ba mua palan pengentap pendiau iya.

Kort netapka ukum mata duit RM4,000 tauka jil enam bulan enti enda mayar.

Iya diarika luyar Milton Foo lalu pengawa bedawa dipejalaika Sapit Pendawa Raya Ahmad Fauzulutfi Suriani. -RBI