ENGKILILI, 27 Feb — Raban Penyaga Pengelikun Mensia Mayuh Malaysia (APM) Pelilih Lubok Antu ngentaska penusah tanah tusur nyadi ba kandang rumah panjai di Rumah Thomas Ringkai, Nanga Bangai Ulu Lemanak, ditu sehari tu.

Nitihka penerang rasmi, tanah tusur ti dipelabaka urung 70 meter pemesai enggau 20 kaki penalam nya dipelabaka bepun ari struktur tanah ti enda entap berindik ari ujan bangat enda ngengetu bedau lama tu tadi.

Tim APM ke datai ba palan nya udah matau kandang endur ke kena penusah nya sereta masang pita jaku tangkan pengelikun dikena nyeliahka mensia mayuh ari ngenyemakka diri enggau zon risiko nya.

Peranak menua nya mega dilalau ngambika seruran bejejaga enggau sebarang tanda tumu tanah mindah lalu lengkas ngeripot ngagai piak bekuasa enti sema bisi ditemu gaya ke disyaki.

Berebak enggau nya, APM ngenataika pengaga ati ngagai Opis Pelilih Lubok Antu ti udah jampat bejalaika pengawa nyadung penerang bekaul enggau penusah nya, lalu enggau nya pengawa matau tumu ulih dipejalaika ungkup pengelikun komuniti besemak.

APM Pelilih Lubok Antu madahka pengawa matau ari sesiti maya ngagai sesiti maya deka terus dipejalaika.

Orang ke napi penusah ngenyit tau betelefon ngagai lumur 999 tauka opis APM pelilih menua ba lumur 083-584639. — RBI

SIMUNJAN, 27 Feb — Siku orang tuai ke gawa ngaga rumah bebadi nyawa sepengudah ditinggang blok konkrit ba sebengkah penusah ke nyadi ba palan ngaga Sekolah Kebangsaan (SK) Sageng, ditu, tengahari tu tadi.

Mansa benama Chai Mui Kiong, 67, dientaska lesi ba palan penusah nyadi ketegal balat bakal pengudah tepekul ba baruh struktur berat nya ti diperetika dikena nguji pemerat ba palan projek nya.

Pengari Palan Operasyen Opis Bomba enggau Penyah Penusah Malaysia (JBPM) Sarawak madah, sida nerima kangau ngenyit urung pukul 2.08 lemai sebedau seraban enam iku kaban enggau jentera Light Fire Rescue Tender (LFRT) ari Balai Bomba enggau Penyah Penusah (BBP) Simunjan dianjung ngagai endur nya.

Nitihku iya, raban penyelamat datai dalam timpuh urung enam minit ngepunka operasyen nya.

“Komander Operasyen, PBK I Christoper Cungoh ngeripotka mansa ditinggang blok konkrit ti benung dikena nguji pemerat ba atas tanah palan endur ngaga rumah nya,” ku iya nengah siti penerang sehari tu tadi.

Raban bomba udah nya bejalaika operasyen khas mansutka mansa ke tepekul ba baruh struktur konkrit nya.

Taja pia, pemesai perubat ari Opis Menteri Pengerai Malaysia (KKM) ke bisi ba palan penusah nyadi ngentaska mansa udah lesi ba palan penusah nyadi.

Operasyen nya ulih dijaga urung pukul 2.18 lemai lalu tembu abis pukul 2.48 lemai pengudah gaya disahka likun.

Tubuh mansa udah diserah ngagai polis kena bejalaika pengawa buntas tasat.

Kes nya diklasifikasyenka nyadi kes mati ngenyit (SDR) seraya pansik silik agi dipejalaika dikena ngelala kebuah ke bendar penusah nya nyadi nyengkaum aspek nitihka prosedur pengelikun ba palan endur ngaga.

Piak bekuasa mega ngingatka semua kunteriktor enggau penyelia projek ngambika seruran nitihka garis lalau pengelikun kereja ti udah ditetapka dikena nyeliahka penusah bebadi ba endur gawa. — RBI

KUCHING, 27 Feb — Menteri Dagang Temuai, Industri Kreatif enggau Seni Persembahan Sarawak enggau Menteri Pemansang Nembiak, Lumba enggau Main enggau Orang Dagang Sarawak Yang Berhormat Dato Sri Abdul Karim Rahman Hamzah, bejalaika pengawa ngabas palan Projek Ngemanahka enggau Transformasyen Begunan Lama Kunsil Nengeri Sarawak nyadi Palan Seni Pemerindang Nengeri Sarawak, sehari tu.

Penemuai nya ngembuan tuju deka beratika baru status pejalai pengawa bejalaika projek sereta nentuka kereja ngaga nya dipejalaika enggau teratur nitihka pelin, spesifikasyen teknikal enggau timpuh ke udah ditetapka.

Naka 25 Februari 2026, pejalai fizikal projek nya udah manggai 29.84 peratus, setipak enggau jadual bejalaika projek ke diatu.

Projek ke beungkus RM247 juta nya dilangkar enggau kapasiti 600 penuduk dikena nangkup guna palan seni pemerindang renggat nengeri.

Dalam aum pengarang berita pengudah penemuai nya, iya madahka pengawa bejalaika projek benung dikuasa, nitihka timpuh sereta ngayanka prestasi ti meransang sereta dulu ari ti disadang penyulut pengawa.

Iya mega andal projek nya deka tembu dalam timpuh ke udah ditetapka kelimpah ari nitihka standard kualiti ke udah dilangkar.

Rambau penemuai nya, penerang projek diberi Direktor Opis Kereja Raya Sarawak YBhg Datu Adj Prof Ir Ts Gs Br PMr Dr Cassidy anak Morris, ti ​​nerangka skop kereja enggau pemansang pemadu baru dalam pengawa bejalaika pengawa.

Projek tu disadang tembu penuh dalam bulan Jun 2027 lalu deka nyadi tanda baru ungkup nengeri Sarawak, lalu enggau nya nyadi palan besai ngatur pengawa pemandang seni, pengawa pemerindang muzik, main enggau program budaya etnik ti majak bulih perati ba renggat menua enggau antarabansa. — RBI

BAU, 27 Feb — Siku indu peranak menua nya ke beumur urung 40 taun udah ditangkap Bagi Pansik Penyalah Komersial, Indu Opis Polis Pelilih Menua (IPD) Bau, lemai tu tadi ketegal iya bisi kaul nyadi “Keldai Akaun” dalam sekeda kes nipu.

Nitihka penerang ari Ketuai Polis Pelilih Bau, P/Supt. Mohd. Haide bin A. Rahman, saspek dipelabaka bisi kaul enggau kes ‘Tipu Pekerjaan Tidak Wujud’ke ngujungka pengerugi RM12,500, pia mega kes ‘Tipu Pinjaman Tidak Wujud’ enggau pengerugi RM8,368.

Polis ngelalau mensia mayuh ngambika enda nyerahka akaun bank, kad ATM tauka penerang bank ngagai sebarang piak enggau nadai pengentas, laban nya ulih dieksploitasi ungkup aktiviti nipu.

Individu ke nyadi keldai akaun ulih didawa ari baruh Seksyen 424B Kanun Keseksaan, ti nyendiaka ukum jil nyentuk tujuh taun, tauka ukum mata duit maksimum RM100,000, tauka kededua ukum nya.

Mensia mayuh ke bisi penerang bekaul enggau kes tu diperansang betanya ngagai IPD Bau nengah lumur 082-763311 tauka sebarang balai polis ke besemak ngambika ulih mantu pansik enggau atur ke nangkanka nya. — RBI

MIRI, 27 Feb – Sepenyampau 250 bungkus bubur lambuk udah disadung ngagai mensia mayuh dalam program Pematuhan Sistem Tugasan Balai (STB) ke diatur Opis Bomba enggau Penyah Penusah Malaysia (JBPM) Zon 6 Sarawak nengah Balai Bomba enggau Penyah Penusah (BBP) Lutong di Jalai Lutong–Kuala Baram, lemai tadi.

Program ti berengkah pukul 4.00 lemai nya dipejalaika nengah kerejasama pengari Stesyen Minyak Petronas Jalai Bintang.

Ketuai BBP Lutong, PBT II Henry Anak Jugah madah, kelimpah ari nyadung bubur lambuk begulai enggau Stesyen Minyak Petronas Jalai Bintang enggau Musolla Al-Azhar, sida iya mega bisi nyuaka bul kimpin pengelikun jalai alun beserimbai enggau musin pengerami ngagai penguna jalai alun ti nengah jalai nya.

Nitih ku iya, program tu ngembuan tuju deka ngenataika pesan ngagai komuniti lokal kelimpah ngerapitka kaul entara BBP Lutong enggau komuniti, kelebih agi ba kandang menua Senadin.

“Chara ngelawa komuniti bansa tu ukai semina ngerapitka kaul enggau komuniti, tang mega meri peluang ngagai mensia mayuh ngelala pangku pengawa enggau guna BBP Lutong enggau semak agi,” ku iya.

Program tu nyadi aktiviti ninting taun BBP Lutong ti setipak enggau aspirasyen JBPM ti deka terus meri servis enggau profesyenal, jampat sereta mesra komuniti.

Sama bisi ngulu program tu iya nya kaban Tim Alpha BBP Lutong enggau pengari ejensi ke bekaul. -RBI

KANOWIT, 27 Feb — Bagi Pemansik Jenayah Indu Opis Polis Pelilih Kanowit udah bejalaika Operasyen “Op Lejang” ti mujur nangkap siku lelaki peranak menua tu beumur 34 taun.

Rambau operasyen nya, polis mega ngerampas dua buah mutosikal ti diripotka dichuri ba sekeda kandang endur ngelingi pelilih Kanowit.

Nitihku DSP Junical Anak Ujal, Ketuai Polis Pelilih Kanowit, berindik ari pengawa nangkap enggau ngerampas nya, polis udah mujur mutarka dua kes enchuri mutosikal ti kala diripotka sebedau tu di Kanowit enggau Kuching.

Kes tu dipansik ari baruh Seksyen 379A Kanun Keseksaan, ti nyendiaka ukum jil entara setaun ngagai tujuh taun, lalu tau diukum mata duit.

Iya mega nyemetak madahka mensia mayuh patut seruran bejejimat maya ninggalka perengka pengangkut sida, nentuka perengka pengangkut nya diengkah ba endur ke likun, dikunchi enggau manah, sereta enda ninggalka kunchi dalam perengka pengangkut. — RBI

BETONG, 27 Feb — Bukit Sadok deka nyadi palan dagang temuai baru di Betong nengah pengawa ngaga replika Kubu Rentap, siku tokoh legenda Iban ke tebilang mantah perintah Rajah, nengah agih belanja sepenyampau RM16 juta ke diatu udah sedia dikena.

Sapit Premier Sarawak, YB Datuk Amar Douglas Uggah Embas madah, belanja ari baruh Kaunsil Pelilih Betong deka dikena penuh ungkup projek nya ti dikearap ulih matak mayuh agi temuai datai.

“Belanja RM16 juta nya dikena ngaga replika Kubu Rentap di Bukit Sadok.

“Enti udah tembu ila, kami melabaka penambah penemuai temuai ti mega deka muka peluang dagang asil pengelandik jari enggau produk asal ungkup peranak menua tu,” ku iya.

Ku iya nambah, projek tu deka nyungkak ekonomi komuniti ngelingi nyengkaum peluang ngelakuka asil pengelandik jari enggau produk budaya baka baju dabong enggau pua kumbu.

Iya mansutka penerang nya ba Pengerami Nyuaka Chek Pampas Tanah ungkup Projek Ngangkatmanah Jalai Mara, Jalai Selangking, Nanga Sela enggau Tanjung Paoh di Betong, ke bela digulu Datin Amar Dato Doreen Mayang, Kaban Parlimen Betong YB Dato Dr. Richard Rapu, Sekretari Politik Ngagai Premier Sarawak Roseline Mapong Sabai, sereta pemesai pentadbiran enggau pemesai teknikal bekaul. — RBI

BETONG, 27 Feb — Sapit Premier Sarawak, YB Datuk Amar Douglas Uggah Embas, sehari tu bejadika pengawa nyuaka chek pampas tanah Projek Ngangkatmanah Jalai Mara, Jalai Selangking, Nanga Sela enggau Tanjung Paoh di Betong.

Iya nyemetak madahka perintah Gabungan Parti Sarawak (GPS) seruran mayar pampas ke patut lebuh tanah begunaka pemansang jalai alun.

Ku iya, pengawa nyerahka chek pampas tu mega nyangkal dawa sekeda piak ti madahka perintah ngerampas tanah rayat, kelebih agi isu ti suah dimainka sebedau pengawa bepilih nengeri.

“Lebuh perintah begunaka tanah endur ngaga jalai alun, pampas deka dibayar ngagai pengempu tanah.”

“Pengerami sehari tu nyata ngayanka pekara nya,” ku Uggah lebuh bejaku ba Pengerami Nyuaka Chek Pampas Tanah ungkup projek nya.

Projek ngemanahka jalai beungkus RM15.9 juta udah dikemendarka Kaunsil Perambu Nengeri kena 4 April 2022.

Laban tanah ke bisi kaul nya Tanah Rizab Komunal Bumiputera, pengawa ngambi pulai nya dipejalaika ngena Notis 6(4) Kanun Tanah Negeri (KTN).

Ba pengerami nya, chek pampas disua ngena chara simbolik ngagai 41 iku penerima ti ngaul penyampau RM1,668,346.66.

Pemesai tanah projek nya 14.81 hektar, mungkur 48 lot tanah.

Datuk Amar Douglas mega meri besai terima kasih ngagai semua pengempu tanah ti meri kerejasama ke manah, lalu ari nya ngemuntangka pengawa Opis Tanah enggau Survei begulai enggau Opis Kereja Raya Sarawak.

Sama bisi datai ngulu pengerami nya, Datin Amar Dato Doreen Mayang, Kaban Parlimen Betong, Dato Dr Richard Rapu, Sekretari Politik Ngagai Premier Sarawak, Puan Roseline Mapong Sabai, sereta mega sekeda pemesai opis ke bekaul. — RB

MIRI, 27 Feb — Institut Pengelandik Nembiak Nasional (IKBN) Miri udah ngatur pengawa meri penerang ti berambaika leka jaku Servis Penyanding Penemu Bekaul enggau Muai Dokumen Perintah ba Bilik Librari IKBN Miri.

Penerang nya dikenataika Encik Afham Jauhari bin Aldi, Direktor Nengeri Arkib Negara Malaysia Pampang Sarawak, lalu mega digulu Direktor IKBN Miri enggau pemesai institut nya.

Program tu ngembuan tuju deka meri penerang enggau servis meri jaku lalau bekaul enggau pengawa ngatur rikod sereta muai dokumen perintah.

Entara pekara ke dikerandau iya nya klasifikasyen dokumen, chara ngerikod ke betul, enggau prosedur minta rikod dibuai nitihka atur enggau garis lalau ke udah ditetapka.

IKBN Miri ngarapka pengawa meri penerang tu ulih mantu nentuka pengawa ngatur dokumen enggau rikod dipejalaika enggau sistematik, teratur, sereta nitihka pinta undang-undang ti dikena. — RBI

KUCHING, 27 Feb — Perintah Sarawak udah meri kelala inisiatif Bantu Pengerai Orang Tuai (SCHB) nyadi siti pengawa dikena nambahka akses ngagai pengawa ngintu pengerai orang tuai nengah fasiliti berubat luar nadai ngena mata duit ba klinik panel ke dipilih di serata nengeri.

Program pengelantang pendiau tu nyendiaka penguntung berubat pesakit luar enggau takah maksimum RM500 setaun ungkup tetiap penerima, lalu enggau nya ulih mantu ngurangka tating ungkus berubat sereta nentuka pengelantang pengerai orang tuai terus dijaga.

Peminta SCHB dibuka ngagai individu ti nitihka kriteria iya nya Peranak menua Malaysia ke bisi status “K” ba MyKad, Beumur 60 taun ke atas, Penatai pemisi ruang bilik RM7,000 ke baruh sebulan .

Kelimpah nya, enda nerima belanja berubat pesakit luar ari sebarang ejensi bukai .

Peminta mesti nganjung Salin ari MyKad enggau Pom Pengesah Penatai Pemisi enggau Pengesah Enda Nerima Belanja ti dientaska Ketuai Raban Bansa, Ketuai Komuniti tauka Pemesai Raban A

Peminta tau digaga nengah ‘online’ nengah portal Servis Sarawak. Sebarang tanya tau dianjung nengah WhatsApp ba lumur 012-674 2360 (mesej aja).

Mensia mayuh diperansang madah ngagai diri sebilik ke patut pasal inisiatif tu ngambika mayuh agi orang tuai di nengeri tu bulih pemaik ari perengka guna pengerai ke disediaka perintah. — RBI