LUNDU, 28 Feb — Rumah Adat Kampung Sebako ti ba pelilih menua tu deka digaga baru nengah agih belanja sepenyampau RM100,000 ari baruh dana Unit Pekara Jalai Pengarap Bukai (UNIFOR).

Kaban Kunsil Nengeri (ADUN) Opar, Billy Sujang madahka pengawa ngaga baru Rumah Adat tu ukai semina nirika sebuah begunana fizikal, tang mega nyadika simbol pemeruan budaya enggau sejarah penatai asal komuniti Kampung Sebako ti ari bansa Salako.

“Taja majoriti peranak genturung pendiau tu diatu udah megai jalai pengarap Kristian, Rumah Adat tu megai pangku pengawa ti beguna nyadika kelai adat enggau budaya ti ngayanka pemanah ulah komuniti tu.

“Jalai pengarap enggau adat iya nya dua pekara ti enda sama, tang bela ngelengkapka sama diri. Megai jalai pengarap nentuka pemanah dalam pengidup, lalu adat enggau budaya ngayanka pemesai reti enggau tradisyen bala aki ini ke patut dipeturunka enggau ditegika,” ku iya.

Iya madah munyi tu maya ti bejaku ba Pengerami Bejadi enggau Nasih Tanah Nirika Baru Rumah Adat Kampung Sebako di Lundu kena Hari Empat.

Bejaku silik, Billy madahka Rumah Adat tu ila deka nyadi palan bejalaika pengawa proses adat enggau pesaka, palan berandau komuniti sereta ngatur pengawa aktiviti main asal dalam nentuka rebak nembiak enda ngelengkaka penatai asal sida.

Iya mega madahka agih belanja tumu RM100,000 ari UNIFOR tu bedau chukup dalam nangkup semua ungkus bejalaika projek tu.

Berindik ari tu ku iya, pengeransing tu deka diteruska dalam ngulihka dana tambah ungkup renggat ke nangkanka tu, nyengkaum pemeri ari iya ti nyadi pengari rayat ba kandang menua tu.

Billy mega meri besai terima kasih ngagai raban pengatur UNIFOR ari baruh Opis Premier Sarawak sereta semua raban ti bekaul terus tauka enda dalam ngemujurka projek ngaga baru Rumah Adat Kampung Sebako.

Iya muji pengeransing bekerejasama peranak Kampung Sebako ti bejalaika projek tu nengah chara beripai lalu ngena memanah pengelandik ti bisi di kandang menua nya.

PULAU PINANG, 28 Feb — Penatai tiga buah kapal Soldadu Tasik Rusia iya nya RFS SOVERSHENNIY (333), RFS REZKIY (343) enggau PECHENGA (MST) ba North Butterworth Container Terminal (NBCT), Pulau Pinang ditu kemari mandangka kerejasama dalam pengawa ngetanka menua Malaysia enggau Rusia ke majak rat.

Penatai kapal nya disambut delegasyen Soldadu Tasik Diraja Malaysia (TLDM) ti betuaika Kepten Khairisharizal bin Hj Salehin TLDM, Pemangku Panglima Markas Wilayah Laut 3, ti ngari ke delegasyen TLDM begulai enggau pengari Kedutaan Rusia di Malaysia.

Sebagi ari penemuai nya, TLDM mega nerima penemuai basa ari delegasyen Soldadu Tasik Rusia ti betuaika Captain 1st Rank Victor A. Shkulepa, Deffence Attaché.

Penemuai rasmi tu dipeda nyadi pelasar ke beguna dalam ngenegapka kaul soldadu-diplomatik, ngangkatka kerejasama strategik sereta nerenakka pemereti ati profesional entara kededua soldadu tasik. — RBI

BELAGA, 28 Feb — Mensia mayuh ngansak piak ke bekaul bejalaika atur enggau lengkas berindik ari ripot bisi dua tiang chundung ke bisi potensial ngeruga penguna jalai alun di kandang menua Belaga.

Nitihka penerang ti diberi Monica Unyang, struktur nya bepalan betunga enggau Simpang Miku, iya nya jalai penyambung entara Uma Daro enggau Uma Kelep.

Gaya tiang nya ke dipeda chundung balat ngirauka ati laban bisi risiko ngeruga pengelikun penguna trafik ke nengah kandang endur nya.

Penerang keterubah pasal gaya nya mega dikunsi Andrew Bang nengah pelasar Facebook Berita Belaga, lalu enggau nya narit ati komuniti menua nya.

Berindik enggau nya, mensia mayuh ngarapka piak bekaul ulih bejalaika pengawa meresa sereta ngambi atur ngemanah enggau lengkas dikena nentuka pengelikun penguna jalai alun seruran dijamin. — RBI

BINTULU, 28 Feb — Dewan Suarah Bintulu richah enggau penatai beratus iku peranak menua nya beserimbai enggau Rumah Tebuka Taun Baru China ke diatur Parti Demokratik Progresif (PDP), ke nyadi sehari tu.

Pengerami nya dirami enggau penatai Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, ti disambut enggau manah Presiden PDP, Dato Seri Tiong King Sing, enggau Sapit Presiden PDP, Datuk Harry Henry Jinep lebuh datai ba premis dewan nya.

Pengerami ke digulu mayuh bengkah renggat mensia mayuh enggau pupu bansa mandangka penegap semengat penyerakup di Sarawak, setipak enggau juluk Sarawak Maju Makmur, seraya mantaika penyelai penyerakup ke nyadi tiang penegap nengeri tu.

Sama bisi ngulu atur pengawa nya, YB Datuk Majang Renggi, Sapit Menteri Infrastruktur enggau Pemansang Penyangkai Kapal, YB Johnny Pang, Kaban Kunsil Nengeri (ADUN) Tanjong Batu, pia mega Direktor Opis Betanam Betupi Sarawak begulai enggau sekeda temuai dipebasa ke bukai. — RBI

BINTULU, 28 Feb — Universiti Putra Malaysia Sarawak (UPMS) nengah Palan Betanam Betupi Putra (PPP) ngatur Kus Pengatur Manuk Dagin ti betuju ngansah penemu enggau pengelandik orang dagang ladang dalam sektor nupi manuk.

Kus tu diperambu deka diatur kena 18 April 2026 (Hari Enam), berengkah ari pukul 8.00 pagi nyentuk pukul 5.00 lemai ba kampus UPMS, Bintulu.

Nitihka penerang ari UPMS madahka Ts. Dr.Carlina Freddie Simol @ Rachellynna, pengelicha kus, program tu digaga dikena nyendiaka gempung teori enggau praktikal ti komprehensif, mungkur aspek ti beguna dalam pengawa ngatur manuk nyengkaum milih bansa, nyendiaka kandang, sistem pengangat angin, pemakai, ngatur rampa menua sereta mega latih praktikal dalam pengawa pravaksin pengerai enggau pengawa ngurus penyakit jelu tupi.

“Pesereta kus deka dibantai enggau teknik ngatur jelu tupi ninting hari ti sistematik dikena nentuka pengerai enggau produktiviti manuk dagin dijaga, lalu ari nya ulih mantu nyungkak penatai pemisi orang dagang betanam betupi sereta nyukung pengelikun pemakai menua,” ku iya.

Bayar penyereta ditetapka RM180 ungkup pesereta luar enggau RM150 ungkup staf, kaban staf sebilik enggau nembiak UPMS, ti nyengkaum setipikit penyereta, kereban kus enggau pemakai enggau ai irup.

Kus tu dibuka ngagai mensia mayuh, tang penyereta deka ditutup kena 14 Mac 2026 (Hari Enam).

Pengawa tu deka dikinsil enti penyampau pesereta minimum 20 iku enda dijapai, lalu yuran ke dibayar deka dipulaika penuh.

Ngagai tanya silik, mensia mayuh tau betanya ngagai Ts. Carlina Freddie Simol @ Rachellynna ba lumur 019-8340886, Cik Jega Jantai ba lumur 013-8395384, tauka Cik Josephine Jawai Makos ba lumur 013-7073252. — RBI

BINTULU, 28 Feb — Opis Kereja Raya Sarawak majak chakah agi ngenegapka infrastruktur pelajar menua pesisir nengah pengawa bejalaika projek pemansang perengkaguna sekula di Sekolah Kebangsaan Ulu Kakus, Tatau.

Projek pemansang tu mungkur pengawa ngaga mayuh macham perengka guna pelajar enggau sukung ti komprehensif dikena nentuka rampa belajar ti nyamai, likun sereta kondusif ungkup nembiak enggau raban pendidik.

Entara komponen besai iya nya ngaga blok buding indu enggau lelaki Jenis A ti ulih ngundan 50 iku tiap iku lengkap enggau perengka guna jamban, kelimpah ari dewan makai ti ulih ngundan 100 iku orang.

Sama bisi disediaka iya nya blok prasekula, blok pentadbiran ti dipadu enggau bilik kelas, dua blok rumah pengajar bansa Semi-D Barracks enggau empat blok rumah pam dikena nentuka pengelanchar sistem bekal ai sekula nya.

Inisiatif tu mandangka komitmen Perintah Sarawak ti majak ngenegapka akses ngagai pelajar ti bekualiti, kelebih agi di menua pesisir enggau kandang menua ulu di Sarawak, setipak enggau aspirasyen pemansang pelajar ti inklusif sereta meruan.

Nengah perengkaguna ti lebih lengkap sereta diperambu enggau manah, projek tu dikearap ulih meri empas positif ngagai pengelantang pendiau nembiak, pengelantang raban pendidik enggau penyikar pengawa ngatur sekula, lalu enggau nya ulih ngenegapka sistem pelajar di kandang menua Bintulu enggau ngelingi iya. — RBI

KUCHING, 28 Feb — Pasukan Gerakan Am (PGA) Briged Sarawak mujur bejalaika lima pengawa ngenyit nyerumba Op Taring Chiller berengkah ari 23 nyentuk 26 Februari tu tadi, lalu enggau nya ngerikodka penyampau semua pengawa dirampas sepenyampau RM10.74 juta ti ngaul produk beku enggau kereban proses.

Komander Briged Sarawak Lim Bak Phai madah, operasyen di Saratok ngujungka siku lelaki peranak menua nya ke beumur 34 taun mujur ditangkap enggau ngerampas 7,659.4 kilogram produk beku enggau dua stor storan ke berega RM1.37 juta.

Nitih ku iya, pengawa ngenyit di Miri mega mujur nangkap dua iku lelaki peranak menua tu ke beumur entara 23 ngagai 33 taun enggau ngerampas 6,277 kilogram produk beku, kelimpah ari bemacham perengka proses nyengkaum injin pengangkat enggau sebuah entukar ke berega RM1.16 juta.

Ba operasyen kediri di Sibu enggau Samarahan, lima individu ke beumur entara 32 ngagai 57 taun ditangkap begulai enggau pengawa ngerampas 37,257 kilogram produk beku, stor endur nyimpan, forklift enggau perengka pengangkut enggau penyampau semua rega RM8.21 juta.

Semua kes ke ditangkap enggau barang ke dirampas udah diserah ngagai Opis Servis Veterinar Sarawak ngambika atur nangkanka nya dipejalaika ari baruh Seksyen 9(1) Veterinary Public Health Ordinance 1999.

Iya nyemetak madahka parti iya deka terus chakah agi bejalaika operasyen neritka atur dikena nagang pengawa nyadung produk pemakai ti enda nitihka standard pengelikun.

Mensia mayuh dilalau meli produk beku ti entas sereta likun, seraya orang dagang diingat nitihka undang-undang sereta nentuka dagang bisi permit enggau pemendar ti entas di nengeri Sarawak. — RBI

BINTULU, 27 Feb — Pengawa meri dana nengah Unit Pekara Jalai Pengarap Bukai (UNIFOR) entara pengeransing perintah Sarawak ngenegapka pemun penyerakup ti udah lama bisi di nenger tu.

Menteri Industri Pemakai, Komoditi enggau Pemansang Wilayah Dato Sri Dr Stepehen Rundi Utom madah, di Sarawak bida ukai nya seraka tang nyadi jematan.

Ku iya, nengah UNIFOR, perintah Sarawak ukai semina meri dana tang mega ngenegapka pemun penyerakup.

“UNIFOR iya nya sebuah aja institusyen ti baka tu di Malaysia, megai pangku pengawa ti ngelui semina bantu pekara wang,” ku Dr Rundi ti mega Kaban Kunsil Nengeri (ADUN) Kemena lebuh ti nyuaka geran UNIFOR kandang menua Kemena ditu, bedau lama ti udah.

Ku iya madah, tu inklusiviti kebendar dalam nentuka tetiap raban jalai pengarap bukai ngembuan palan besembiang ti lantang enggau likun.

Ku iya, pelajar ti meruan enggau sukung sekula misyen iya nya ngambika bala anak nerima pelajar ti pemadu manah dalam rampa ti lantang.

“Tu mega entara pemanah rama dalam nentuka nadai komuniti ti tinggal ari arus pemansang, setipak enggau Strategi Pemansang Pengudah COVID-19 (PCDS) 2030,” ku iya nerang.

Berindik ari tu, ku iya, pengawa nyuaka geran UNIFOR ungkup DUN Kemena nyadika kelai komitmen ti meruan dalam nyukung aktiviti jalai pengarap ungkup pemanah jemah ila.

“Ti nyata, ekonomi ti mansang nadai reti nyema runding rayat enda beserakup lalu UNIFOR tu nyadi simbol iya nya ari baruh pegai Gabungan Parti Sarawak (GPS), tetiap anak Sarawak enda ngira bansa enggau jalai pengarap, ngembuan hak sereta awak ngambika terus lantang.

“Kitai deka neruska pengeransing tu laban di Sarawak, kitai iya nya sebuah ruang bilik ti besai bela ngibun pangan diri.

“Segulai Sejalai, tegap begulai ungkup Sarawak,” ku iya.

LUBOK ANTU, 27 Feb – Dua iku lelaki beumur urung 30-an enggau 40-an ditan dalam OP Tapis Khas ti dipejalaika tim pemesai enggau kaban Bagian Pansik Jenayah Narkotik (BSJN), Indu Opis Polis Pelilih Lubok Antu di kandang menua Engkelili lemai tadi.

Pengawa nyerungkai nya sebagi ari operasyen polis ti benung dipejalaika dikena ngelaban pengawa salah guna enggau pengawa bedagangka dadah ba pelilih menua tu.

Pemutus peresa ai kemi keterubah tetemuka kededua saspek positif dadah bansa Methamphetamine enggau Amphetamine.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka atur ngagai individu ke ditemu ngena utai ke ditagang.

Polis minta mensia mayuh ke bisi penerang bekaul enggau aktiviti salah guna dadah datai ke mua mantu tasat nengah chara nyalurka penerang nengah Talian Hotline JSJN Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211.

IPD Lubok Antu ngemeratka komitmen terus dalam pengawa ngelaban penyalah dadah dikena nentuka pengelikun enggau pengelantang komuniti setempat seruran dijaga. -RBI

MIRI, 27 Feb — Pengerami Nyerahka Blok Buding Lelaki enggau Indu, Dewan Makai enggau Berek Baru Genturung Pendiau Sekolah Kebangsaan Lambir diatur sehari tu nyadi sebagi ari proses nyerahka rasmi projek ngagai penguna iya nya raban sekula.

Pengerami nya dikemataka pengari Opis Pelajar Nengeri Sarawak, Opis Pelajar Pelilih Miri, pengari Opis Kereja Raya Sarawak, pentadbiran sekula sereta mega pemesai teknikal enggau pengajar.

Penatai semua raban ngayanka kerejasama ti begempung dalam nentuka projek nya ditembuka enggau meruan sereta nangkup guna pelajar ke diatu.

Pengawa ngaga fasiliti baru tu ngembuan tuju deka nganti blok lama ke udah jai, lalu enggau nya nyendiaka kandang endur ke nyamai agi, likun sereta kondusif ungkup nembiak enggau staf sekula.

Pengawa ngemanahka tu dikearapka ulih ngangkatka kualiti pengidup nembiak ka ngani buding kelimpah ari nyukung proses belajar ti lebih efektif.

Pengerami nyerahka pengawa rasmi ke diatur urung pukul 9.30 pagi nya ngelai penembu renggat pengawa mulaika pemanah infrastruktur ke beguna di Miri.

Penembu projek nya mandangka komitmen Perintah Sarawak ti terus ngenegapka perengka guna pelajar, kelebih agi di menua pesisir, setipak enggau pengawa ngenegapka pemansang modal mensia rebak dudi. — RBI