MIRI, 27 Feb – Sepenyampau 250 bungkus bubur lambuk udah disadung ngagai mensia mayuh dalam program Pematuhan Sistem Tugasan Balai (STB) ke diatur Opis Bomba enggau Penyah Penusah Malaysia (JBPM) Zon 6 Sarawak nengah Balai Bomba enggau Penyah Penusah (BBP) Lutong di Jalai Lutong–Kuala Baram, lemai tadi.

Program ti berengkah pukul 4.00 lemai nya dipejalaika nengah kerejasama pengari Stesyen Minyak Petronas Jalai Bintang.

Ketuai BBP Lutong, PBT II Henry Anak Jugah madah, kelimpah ari nyadung bubur lambuk begulai enggau Stesyen Minyak Petronas Jalai Bintang enggau Musolla Al-Azhar, sida iya mega bisi nyuaka bul kimpin pengelikun jalai alun beserimbai enggau musin pengerami ngagai penguna jalai alun ti nengah jalai nya.

Nitih ku iya, program tu ngembuan tuju deka ngenataika pesan ngagai komuniti lokal kelimpah ngerapitka kaul entara BBP Lutong enggau komuniti, kelebih agi ba kandang menua Senadin.

“Chara ngelawa komuniti bansa tu ukai semina ngerapitka kaul enggau komuniti, tang mega meri peluang ngagai mensia mayuh ngelala pangku pengawa enggau guna BBP Lutong enggau semak agi,” ku iya.

Program tu nyadi aktiviti ninting taun BBP Lutong ti setipak enggau aspirasyen JBPM ti deka terus meri servis enggau profesyenal, jampat sereta mesra komuniti.

Sama bisi ngulu program tu iya nya kaban Tim Alpha BBP Lutong enggau pengari ejensi ke bekaul. -RBI

KANOWIT, 27 Feb — Bagi Pemansik Jenayah Indu Opis Polis Pelilih Kanowit udah bejalaika Operasyen “Op Lejang” ti mujur nangkap siku lelaki peranak menua tu beumur 34 taun.

Rambau operasyen nya, polis mega ngerampas dua buah mutosikal ti diripotka dichuri ba sekeda kandang endur ngelingi pelilih Kanowit.

Nitihku DSP Junical Anak Ujal, Ketuai Polis Pelilih Kanowit, berindik ari pengawa nangkap enggau ngerampas nya, polis udah mujur mutarka dua kes enchuri mutosikal ti kala diripotka sebedau tu di Kanowit enggau Kuching.

Kes tu dipansik ari baruh Seksyen 379A Kanun Keseksaan, ti nyendiaka ukum jil entara setaun ngagai tujuh taun, lalu tau diukum mata duit.

Iya mega nyemetak madahka mensia mayuh patut seruran bejejimat maya ninggalka perengka pengangkut sida, nentuka perengka pengangkut nya diengkah ba endur ke likun, dikunchi enggau manah, sereta enda ninggalka kunchi dalam perengka pengangkut. — RBI

BETONG, 27 Feb — Bukit Sadok deka nyadi palan dagang temuai baru di Betong nengah pengawa ngaga replika Kubu Rentap, siku tokoh legenda Iban ke tebilang mantah perintah Rajah, nengah agih belanja sepenyampau RM16 juta ke diatu udah sedia dikena.

Sapit Premier Sarawak, YB Datuk Amar Douglas Uggah Embas madah, belanja ari baruh Kaunsil Pelilih Betong deka dikena penuh ungkup projek nya ti dikearap ulih matak mayuh agi temuai datai.

“Belanja RM16 juta nya dikena ngaga replika Kubu Rentap di Bukit Sadok.

“Enti udah tembu ila, kami melabaka penambah penemuai temuai ti mega deka muka peluang dagang asil pengelandik jari enggau produk asal ungkup peranak menua tu,” ku iya.

Ku iya nambah, projek tu deka nyungkak ekonomi komuniti ngelingi nyengkaum peluang ngelakuka asil pengelandik jari enggau produk budaya baka baju dabong enggau pua kumbu.

Iya mansutka penerang nya ba Pengerami Nyuaka Chek Pampas Tanah ungkup Projek Ngangkatmanah Jalai Mara, Jalai Selangking, Nanga Sela enggau Tanjung Paoh di Betong, ke bela digulu Datin Amar Dato Doreen Mayang, Kaban Parlimen Betong YB Dato Dr. Richard Rapu, Sekretari Politik Ngagai Premier Sarawak Roseline Mapong Sabai, sereta pemesai pentadbiran enggau pemesai teknikal bekaul. — RBI

BETONG, 27 Feb — Sapit Premier Sarawak, YB Datuk Amar Douglas Uggah Embas, sehari tu bejadika pengawa nyuaka chek pampas tanah Projek Ngangkatmanah Jalai Mara, Jalai Selangking, Nanga Sela enggau Tanjung Paoh di Betong.

Iya nyemetak madahka perintah Gabungan Parti Sarawak (GPS) seruran mayar pampas ke patut lebuh tanah begunaka pemansang jalai alun.

Ku iya, pengawa nyerahka chek pampas tu mega nyangkal dawa sekeda piak ti madahka perintah ngerampas tanah rayat, kelebih agi isu ti suah dimainka sebedau pengawa bepilih nengeri.

“Lebuh perintah begunaka tanah endur ngaga jalai alun, pampas deka dibayar ngagai pengempu tanah.”

“Pengerami sehari tu nyata ngayanka pekara nya,” ku Uggah lebuh bejaku ba Pengerami Nyuaka Chek Pampas Tanah ungkup projek nya.

Projek ngemanahka jalai beungkus RM15.9 juta udah dikemendarka Kaunsil Perambu Nengeri kena 4 April 2022.

Laban tanah ke bisi kaul nya Tanah Rizab Komunal Bumiputera, pengawa ngambi pulai nya dipejalaika ngena Notis 6(4) Kanun Tanah Negeri (KTN).

Ba pengerami nya, chek pampas disua ngena chara simbolik ngagai 41 iku penerima ti ngaul penyampau RM1,668,346.66.

Pemesai tanah projek nya 14.81 hektar, mungkur 48 lot tanah.

Datuk Amar Douglas mega meri besai terima kasih ngagai semua pengempu tanah ti meri kerejasama ke manah, lalu ari nya ngemuntangka pengawa Opis Tanah enggau Survei begulai enggau Opis Kereja Raya Sarawak.

Sama bisi datai ngulu pengerami nya, Datin Amar Dato Doreen Mayang, Kaban Parlimen Betong, Dato Dr Richard Rapu, Sekretari Politik Ngagai Premier Sarawak, Puan Roseline Mapong Sabai, sereta mega sekeda pemesai opis ke bekaul. — RB

MIRI, 27 Feb — Institut Pengelandik Nembiak Nasional (IKBN) Miri udah ngatur pengawa meri penerang ti berambaika leka jaku Servis Penyanding Penemu Bekaul enggau Muai Dokumen Perintah ba Bilik Librari IKBN Miri.

Penerang nya dikenataika Encik Afham Jauhari bin Aldi, Direktor Nengeri Arkib Negara Malaysia Pampang Sarawak, lalu mega digulu Direktor IKBN Miri enggau pemesai institut nya.

Program tu ngembuan tuju deka meri penerang enggau servis meri jaku lalau bekaul enggau pengawa ngatur rikod sereta muai dokumen perintah.

Entara pekara ke dikerandau iya nya klasifikasyen dokumen, chara ngerikod ke betul, enggau prosedur minta rikod dibuai nitihka atur enggau garis lalau ke udah ditetapka.

IKBN Miri ngarapka pengawa meri penerang tu ulih mantu nentuka pengawa ngatur dokumen enggau rikod dipejalaika enggau sistematik, teratur, sereta nitihka pinta undang-undang ti dikena. — RBI

KUCHING, 27 Feb — Perintah Sarawak udah meri kelala inisiatif Bantu Pengerai Orang Tuai (SCHB) nyadi siti pengawa dikena nambahka akses ngagai pengawa ngintu pengerai orang tuai nengah fasiliti berubat luar nadai ngena mata duit ba klinik panel ke dipilih di serata nengeri.

Program pengelantang pendiau tu nyendiaka penguntung berubat pesakit luar enggau takah maksimum RM500 setaun ungkup tetiap penerima, lalu enggau nya ulih mantu ngurangka tating ungkus berubat sereta nentuka pengelantang pengerai orang tuai terus dijaga.

Peminta SCHB dibuka ngagai individu ti nitihka kriteria iya nya Peranak menua Malaysia ke bisi status “K” ba MyKad, Beumur 60 taun ke atas, Penatai pemisi ruang bilik RM7,000 ke baruh sebulan .

Kelimpah nya, enda nerima belanja berubat pesakit luar ari sebarang ejensi bukai .

Peminta mesti nganjung Salin ari MyKad enggau Pom Pengesah Penatai Pemisi enggau Pengesah Enda Nerima Belanja ti dientaska Ketuai Raban Bansa, Ketuai Komuniti tauka Pemesai Raban A

Peminta tau digaga nengah ‘online’ nengah portal Servis Sarawak. Sebarang tanya tau dianjung nengah WhatsApp ba lumur 012-674 2360 (mesej aja).

Mensia mayuh diperansang madah ngagai diri sebilik ke patut pasal inisiatif tu ngambika mayuh agi orang tuai di nengeri tu bulih pemaik ari perengka guna pengerai ke disediaka perintah. — RBI

SERIAN, 27 Feb — Peranak ngelingi Kampung Mundai enggau Kampung Simpok diperansang mai ukui tupi sida nerima vaksin anti-rabies pechuma nengah program penyedar pengerai mensia mayuh ti deka dipejalaika enda lama agi.

Program tu diatur begulai enggau Opis Servis Veterinar nyadi sebagi ari pengawa perintah nengeri ti majak ngemuntanka pengelekai igi penyakit rabies sereta nentuka tikas pengelikun komuniti seruran dijaga di serata Sarawak.

Nitihka penerang pengatur, orang ke ngempu ukui dilalau nentuka ukui ke dibai sida nitihka pinta pengerai ke udah ditetapka, iya nya ambis nadai umur tiga bulan, bepengerai sereta enda ngandung tauka nusu.

Orang ke ngempu mega dipinta mai kad pengelala enggau rikod vaksinasyen ke udah bisi enti bisi dikena ngemudahka proses ngerejista.

Kelimpah ari nya, orang ke ngempu ukui dikingatka pengawa meri vaksin enggau lisin ukui nya mandatori nitihka atur undang-undang.

Pengudah vaksinasi diberi, ukui mesti dikuarantin pengelama 28 hari dikena nentuka penumbuh imuniti ti optimum, lalu enda dikemendarka bejalai nadai dikemataka ba palan mensia mayuh.

Raban pengatur ngarapka mensia mayuh ulih beambi ulih ari perengka guna enda bebayar tu lalu ngerembaika penerang ngagai peranak menua nya nyadika singkang begulai ngelaban penyakit rabies sereta nyaga pengelantang pendiau komuniti. — RBI

KAPIT, 27 Feb — Direktor Kereja Raya Sarawak, Datu Adj Prof Ir Ts Gs Br PMr Dr Cassidy anak Morris, kena Hari Tiga udah bejalaika penemuai ngenegapka projek ngagai palan perambu ngaga baru Jematan Sungai Musah di Kapit dikena beratika pejalai keterubah pengawa bejalaika sereta nentuka kereja ngaga nya nitihka pelin enggau spesifikasyen ke udah ditetapka.

Nitih ku iya, penemuai nya meri awak ngagai tim pengatur projek mantaika ripot status ke diatu nyengkaum pejalai pengawa, pemar ba palan enggau atur koordinasyen ke benung dipejalaika.

“Aku berasai puas ati enggau prestasi projek tu ke agi ba renggat tumu dipejalaika enggau penyulut fizikal ke diatu manggai 4.14 peratus,” ku iya.

Skop projek nya nyengkaum pengawa ngeruntuhka struktur atas enggau baruh jematan ke udah bisi sereta mega ngaga komponen jematan baru ke digaga ngambika ulih nyendiaka infrastruktur ke lebih likun, tegap sereta meruan agi ungkup penguna.

Projek tu dipelaba tembu penuh dalam bulan April 2027.

Iya mega ngemeratka pemesai guna nitihka spesifikasyen teknikal, bejalaika pengawa ngatur pengelikun palan endur ngaga enggau ngawal kualiti kereja sepemanjai timpuh ngaga dikena nentuka asil projek nya nitihka standard ti udah ditetapka.

Berebak enggau nya, Opis Kereja Raya Sarawak deka terus matau pejalai projek nya enggau tetap dikena nentuka pengawa bejalaika iya bejalai enggau lanchar sereta tembu nitihka timpuh.

Inisiatif tu ngayanka komitmen perintah nengeri ti seruran ngenegapka rentayan infrastruktur menua pesisir ti likun, tan sereta bekualiti ungkup pengelantang rayat. — RBI

SARATOK, 27 Feb — Opis Muzium Sarawak ngenukuka sida udah beratika isu viral ba laman rama bekaul enggau tugu sejarah Batu Tanam Demong baka ti diripotka Utusan Borneo kena 22 Februari tu tadi.

Nitihka penerang rasmi, tugu nya kebendar udah digazet enggau entas kena 21 Mac 2022 ari baruh ordinan pesaka nengeri.

Berindik ari nya, piak nya udah ngaga kaul enggau orang ke ngempu akaun media rama ke bisi kaul ngambika meri penerang ke silik agi bekaul enggau pekara nya.

Dalam pengawa mutarka isu tu enggau komprehensif, sesi aum mega bisi diatur kena 26 Februari 2026 begulai enggau bala Tuai Rumah sereta komuniti menua nya di Ulu Krian, Saratok.

Opis Muzium nyemetak madahka sida beterima kasih ngagai pengibuh komuniti ba pengawa ngintu enggau ngintu pesaka asal nengeri tu, lalu komited nentuka pengawa ngenataika penerang ti betul sereta tulin.

Berebak enggau nya, singkang dikena ngenegapka proses meresa fakta enggau koordinasyen deka terus dipejalaika dikena nyeliahka saru penemu ngambika enda nyadi baru. — RBI

BELAGA, 27 Feb — Tiga iku lelaki menua tu ditangkap polis pengudah dipelaba bisi kaul enggau aktiviti salah guna dadah nengah operasyen ke dipejalaika ari 26 ngagai 27 Februari 2026.

Tim pemesai ari Bagi Pansik Jenayah Narkotik, Indu Opis Polis Pelilih Belaga, ngetan ketetiga saspek dalam gaya ke disyaki sebedau bejalaika pengawa meresa keterubah ba endur nya.

Taja pia, pengawa meresa nya nadai tetemuka sebarang barang ke enda entas.

Berindik ari nya, semua saspek dibai ngagai Balai Polis Sungai Asap ngambika atur ke silik agi dipejalaika.

Asil peresa ai kemi tetemuka sida tiga ditemu positif Amphetamine enggau Methamphetamine.

Kes tu dipansik ari baruh Seksyen 15(1)(a) Akta Dadah Berbahaya 1952.

Raban polis ngemeratka komitmen sida ti terus ngemuntanka pengawa salah guna dadah lalu minta mensia mayuh terus meri kerejasama dalam nyadung penerang dikena nentuka pengelikun enggau pengelantang komuniti seruran dijaga. — RBI