BINTANGOR, 19 Jun — Pengeransing nerenakka budaya pengelikun enggau nyikap diri napi penusah ngenyit ba raban nembiak majak ditegapka lebuh Balai Bomba enggau Penyah Penusah (BBP) Bintangor ngatur Program Penyedar Pengelikun Penusah Angus di Sekolah Primari (SK) Bukit Papit, sehari tu tadi.
Nitihka penerang ari Ketuai Balai Bomba enggau Penyah Penusah Bintangor, PPgB Mahmudin Narudin, program nya ngembuan tuju deka nambahka penemu enggau penyedar peranak sekula bekaul enggau chara nagang penusah angus sereta pengawa ti patut dipejalaika lebuh betapi enggau gaya penusah ngenyit.
Program ke diatur ari pukul 8.30 nyentuk 11.30 pagi nya mungkur 62 iku penyereta lalu dikemujurka kaban BBP Bintangor iya nya PBK I Wan Azri Wan Adennan, PBK II (TBBKI) Ahmad Jais Ahad enggau PBB Graind Jubin Joseph.
Sepemanjai program nya, bala penyereta dibantaika enggau mayuh macham isi ti beguna nyengkaum randau penyedar pengelikun penusah angus ti meri penerang pasal risiko penusah angus, chara nagang sereta pemesai guna bejalaika pengawa enggau jampat enti sema bisi penusah ngenyit nyadi.
Demonstrasyen ngena Perengka Pengerara Api (APA) mega bisi diatur dikena meri peneleba praktikal ngagai penyereta bekaul enggau teknik ngerara api ke betul sereta likun.
Kelimpah ari nya, pengawa pemandang pengelikun ari penusah angus mega bisi disediaka dikena meri kelala guna enggau pangku pengawa Opis Pengerara Api enggau Penyah Penusah Malaysia (JBPM) ngagai nembiak sekula.
Inisiatif BBP Bintangor ti seruran dipejalaika nengah program pelajar komuniti baka tu dipeda beguna amat dalam nempa raban bansa ti lebih sedarka sukut pengelikun, kelimpah ari ngenegapka penemu pemun bekaul enggau pengawa nagang penusah angus kenyau ari sekula.
Program tu sebagi ari komitmen JBPM dalam ngenataika pelajar pengelikun penusah angus ngagai komuniti setipak enggau aspirasyen “JBPM Berprestasi Tinggi, Cepat dan Mesra” dikena nempa genturung pendiau ti lebih likun sereta tan napi sebarang risiko penusah ngenyit. – RBI
#ruaiberitaiban#newsiban#beritaiban
Rindu | Titih | Kunsika
