JOHOR, 16 April — Direktor Betanam Betupi Sarawak, Yang Berusaha Tuan Dominic Anak Chunggat udah bejalaika penemuai gawa ngagai Ladang Jutawan ba Simpang Renggam enggau Kilang Proses Nanas Premium di Pagoh, Johor meresa terus operasyen ladang enggau perengka guna proses nanas, kena Hari Dua tu tadi.
Penemuai nya betuju ngulihka eksposur ti komprehensif ngagai rentayan rega industri nanas ti nyengkaum pengawa ngeluarka benih, nanam, ngetau, proses enggau ngelakuka ‘produk hiliran’
Pengawa tu seriris enggau komitmen perintah ti majak ngenegapka pemansang sektor agro-komoditi, kelebih agi industri nanas di Sarawak.
Rambau penemuai nya, deligit nya diberi penerang sereta meda enggau chara pemadu manah dalam pengawa ngatur kebun dandang besai, ngena teknologi moden dalam pengawa proses nanas sereta bejalaika sistem rentayan bekal ti efisyen sereta begempung.
Chara tu dipeda ulih nyungkak produktiviti, kualiti produk enggau daya besemekih industri nanas ba renggat nengeri.
Penerang enggau input ti diulih nengah penemuai tu dikearap ulih dikena dalam merambu strategi pemansang industri nanas ti meruan agi sereta meri empas tinggi di Sarawak, setipak enggau agenda pengelikun pemakai enggau penumbuh ekonomi nengeri tu.
Penemuai nya mega disempulang pemesai ari Lembaga Industri Nanas Malaysia (LPNM) Sarawak. — RBI
