KUCHING, 26 April 26 — Pengawa muka rasmi Komleks Unit Pekara Jalai Pengarap Bukai (UNIFOR) Sarawak mandangka komitmen Perintah Sarawak terus ngetanka pemaik, pengelantang enggau ulah bebasaka pangan diri nyadi penegap raban bansa nengeri tu ti mayuh macham.
Sapit Premier Sarawak, Datuk Amar Douglas Uggah Embas madah, kompleks nya ukai semina kelai fizikal aja, tang nyadi kelai pengeran perintah nengeri nentuka semua komuniti jalai pengarap terus diberi ruang, sukung enggau kelala dalam proses pemansang.
Iya madah munyi nya ba jaku pengelalu beserimbai enggau pengawa bejadi rasmi kompleks nya ti dipenyadika YAB Premier Sarawak ialah Datuk Patinggi Tan Sri Dr. Abang Haji Abdul Rahman Zohari bin Tun Datuk Abang Haji Openg, ditu, sehari tu.
Nitihku iya, ba dunya ke majak kompleks sereta besambung enggau pangan diri, rayat Sarawak meseti terus bepegai ba nilai ke sama iya nya pemaik, seraya ngetanka chara ke mudah, inklusif sereta bebasa.
“Penyerakup ukai nyadi ‘kebetulan’. Iya begunaka pengawa ti enda ngetu, ngaul diri enggau lurus sereta pengeran bekunsi bebasaka bida seraya ngerami nilai mensia universal,” ku iya.
Ku Uggah, UNIFOR iya nya inisiatif strategik Perintah Gabungan Parti Sarawak ti ditumbuhka bepelasarka penemu jauh ketuai nengeri dikena nyukung sereta ngenegapka komuniti ukai Islam di serata Sarawak.
Ku iya, Sarawak aja nengeri di Malaysia ti bejalaika chara baka nya nengah penumbuh UNIFOR, lalu enggau nya mandangka model merintah ti nyelai ti ngemeratka pengelantang, bebatak asur enggau pengelantang bekunsi.
Ku iya nambah, pangku pengawa UNIFOR ukai semina nyadung bantu ngagai rumah sembiang aja, tang mega befungsyen nyadi jematan penyerakup ti ngelakuka randau, kerejasama enggau pemereti ati entara bemacham pengarap.
“Nengah pengawa nyukung guna semengat rumah sembiang jalai pengarap bukai, UNIFOR terus ngenegapka pelasar pemaik, basa enggau penyerakup ti udah lama nyadi penegap Sarawak nyadi model pengelantang,” ku iya.
Kompleks UNIFOR ti digaga ngena ungkus RM75.663 juta, ngembuan langkar moden enggau konsep “One Wrap” sereta langkar ti meruan enggau motif bintang ti berulang nyadi kelai penyelai pupu bansa mensia di Sarawak.
Begunan 10 ringkat nya digaga ba tanah pemesai 3.19 ekar ba kandang endur ti strategik dikelala enggau nama “Unity Lane”, besemak enggau sekeda institusyen ti beguna baka Palan Pemadah Islam (IIC) Yayasan Budaya Dayak (DCF), Balai Dagang enggau Industri Dayak (DCCI) enggau Gerempung Bansa Dayak Bidayuh (DBNA).
Setipak enggau agenda pemanah rampa menua, kompleks nya digaga bepelasarka Indeks Begunan Hijau enggau ngena penampak asal, sistem angin ti efisyen sereta perengka elektrik ti ngelimatka kuasa.
Perengka guna ke bisi disediaka nyengkaum menara opis semilan ringkat, lounge eksekutif enggau dua bilik function, taman atas beratap, dewan pengerami makai lemai ke ulih endur 1,000 iku orang, semilan unit palan komersial enggau 286 palan endur ngengkah kerita nyengkaum pengecas perengka pengangkut elektrik ari SEDC Energy.
Ku Uggah, perengka guna ba ringkat semilan enggau taman atas beratap ba ringkat 10 disedia enggau enda bebayar ungkup guna mayuh bengkah palan besembiang, lalu enggau nya meransang interaksyen enggau randau entara jalai pengarap.
Ku iya, kompleks nya deka nyadi pelasar ti dinamik dikena ngenegapka pemereti ati enggau kaul ti harmoni entara bemacham komuniti jalai pengarap di nengeri tu.
Nitihku iya, Perintah Sarawak udah ngemendarka agih belanja sepenyampau RM685 juta ngagai UNIFOR ari taun 2017 ngagai 2026, kelimpah ari nerima pemeri tanah besepiak ari Arif Hemat Sdn Bhd (Samling).
Ku iya nambah, kompleks nya deka diurus Lembaga Amanah Kebajikan Unit Hal Ehwal Agama Lain Sarawak (SUCT) ti udah digazet kena 25 April 2018 ari baruh Ordinan Amanah Kebajikan 1994.
Kelimpah ari ngatur begunan nya, SUCT mega nyukung bemacham aktiviti jalai pengarap nyengkaum program pengelantang pendiau, aktiviti semengat sereta mega bantu bebelika perabot enggau perengka elekterik.
“Ari taun 2025 nyentuk Mac 2026, sepenyampau RM629,000 udah dipelanja dikena nyukung pengawa bejalaika 26 program ti ngaul aktiviti pengelantang pendiau enggau jalai pengarap,” ku iya.
Iya mega meri besai terima kasih ngagai Premier Sarawak ketegal ti seruran meri sukung ngagai operasyen SUCT sereta mega ngagai pemeri nyengkaum PETROS, Sarawak Energy Berhad, Pengeluar Kuasa Hidro Bakun enggau Bank Pemansang Sarawak.
Uggah nyemetak madah, pemisi Kompleks UNIFOR nyata ngayanka penyerakup enggau pemaik di Sarawak terus dijaga nengah polisi ti praktikal, inklusif sereta ngemeratka pemerat semua renggat mensia mayuh.
Iya mega minta rayat Sarawak terus nyukung ketuai nengeri dalam pengawa ngenegapka pengelantang, nempa komuniti ke tan sereta ngetanka pemaik ke diasai kemaya hari tu.
“Kitai betuah laban bisi ketuai ti inklusif, progresif sereta komited nyadi ketuai ungkup semua” ku iya. — RBI
#Beritalban | Ruai Berita Iban
Rinduka | Titihka | Kunsika
