KUCHING, 16 April – Padi Adan ke ditanam ba tanah tinggi Ba’kelalan, di kandang menua ulu utara Sarawak majak ditegapka nyadi batang produk pesaka komuniti Lun Bawang pengudah nerima kelala Penunjuk Geografi (GI) ari Perbadanan Harta Intelek Malaysia (MyIPO) dalam taun 2022.
Pengelala nya ngenukuka penulin enggau penyelai Padi Adan ti nyadi sebagi ari identiti komuniti Lun Bawang, kelimpah ari bisi kaul rat enggau tanah asal sereta main asal betanam betupi ti diturun ari setiap serak.
Pengawa ngetanka pesaka tu mega ditegapka nengah chara betanam betupi ti meruan nengah kerejasama WWF-Malaysia enggau pengawa bejalaika Sistem Intensifikasyen Padi (SRI), ti keterubah diberi kelala dalam taun 2017.
Pemesai Ngaul enggau Ngenegapka Komuniti WWF-Malaysia, Nadya Cindy Wembly madah, chara SRI ukai semina mantu ngintu rampa menua, tang mega meri empas ke manah ba pengawa nambahka asil padi.
“Ba renggat keterubah, semina 12 iku orang bumai berani nyereta projek pemungkal tu nengah sukung belanja ari sebuah bank menua tu.
“WWF-Malaysia mega nyiri pakar SRI, Kapten (Pinchin) Zakaria Kamantasha, ke mega pemungkal SRI Lovely Organic Farm, Kedah, ngelatih orang bumai di Ba’kelalan,” ku iya.
Ku iya, ba taun 2019, asil ari pengawa nya berengkah mandangka pemansang ti lebuh utai tanam nyadi agi sereta meruan, enggau penambah asil padi ti enda ngena rachun.
“Chara tu mega mantu nyungkak penatai pemisi orang bumai, kelimpah ari ngurangka pengawa muka ba kandang kampung baru endur betanamka padi enggau pengamah sungai.
“Taja betapi enggau pemar pandemik COVID-19 ba taun 2020, raban pekebun tetap tegap neruska pengawa sida nengah latih bepelasarka komuniti enggau sukung terus ari WWF-Malaysia,” ku iya.
Ku iya, manggai ba taun 2025, lebih 100 iku orang bumai deka dilatih ngena chara SRI, lalu 12 iku orang bumai Ba’kelalan mega udah mujur bulih Skim Pensijilan Amalan Baik Pertanian Malaysia (myGAP).
Kelimpah ari nya, iya madahka kerejasama strategik mega benung dipejalaika dikena ngerembaika pasar Beras Adan ngagai tikas ke besai agi, seraya nyukung pengawa ngintu rampa menua nengah pemeri ari tetiap bejual.
Ba pemansang ke bekaul, Beras Adan ke diasilka di Ba’kelalan diatu diaku nyadi produk pesaka asal premium Sarawak ke mandangka tanah, budaya enggau legasyen betanam betupi komuniti Lun Bawang, kelimpah ari dijual di makit nyadi pemeri korporat sereta nengah kedai pakar enggau pelasar dagang temuai. -RBI
