KUALA LUMPUR, 29 Mei — Sapit Menteri Besai, Datuk Amar Fadillah Yusof nyemetak madahka pemar jeman digital ti penuh enggau pemayuh penerang ti enda betul, petenah enggau budaya negatif, minta pemekuh media terus ngetanka integriti enggau prinsip pengawa pengarang berita ti bepelasarka responsibiliti.
Ku iya, ba dunya media kemaya hari ti jampat berubah, pengawa pengarang berita ti bisi etika beguna amat dikena nentuka rayat nerima penerang ti betul, tulin sereta setimbang.
Nitih ku iya, media ukai semina nyadi medium dikena ngenataika berita aja, tang lebih agi bejalaika tanggungpengawa ke besai nyadi jematan entara rayat enggau perintah dalam ngenegapka demokrasyen sereta nempa mensia mayuh ke bisi penerang.
“Media ti bibas, betanggungjawap sereta bisi etika nyadi kaling strategik menua dalam nentuka penegap, pengelantang enggau penyulut Malaysia dijaga,” ku iya beserimbai enggau pengawa ngintu Hari Pengarang Berita Nasional (HAWANA) 2026 sehari tu.
Iya mega meri besai terima kasih ngagai semua pengarang berita, pemekuh media enggau raban industri penabur ti mengkang komited bejalaika pengawa sida taja betapi enggau bemacham pemar dalam bidang nya.
Ku iya, pengawa pengarang berita ti sanggup dalam penusah, krisis enggau gaya ti mayuh pemar dikena nentuka rayat bulih penerang ti tulin endang besai reti ngagai menua.
Berebak enggau nya, iya nyemetak madahka perintah seruran ngaku pemesai guna institusyen media dalam proses pemansang menua.
Ku iya nambah, kaul rat entara perintah enggau pemekuh media ulih mantu ngenataika polisi, inisiatif enggau agenda pemansang menua enggau efektif agi ngagai rayat ba semua renggat.
Iya ngarapka industri media menua tu terus ngerembai nitihka pemansang teknologi enggau enda ngelengkaka nilai etika, profesionalisme enggau mensia.
“Pemberita ukai semina nyadi pengerikod sejarah aja, tang mega nyadi individu ti beguna dalam nempa runding mensia mayuh enggau pengidup menua jemah ila,” ku iya.
Iya mega meri Selamat Hari Pengarang Berita Nasional 2026 ngagai semua pemekuh media di serata menua lalu minta sida terus tegap ati, ngembuan integriti sereta bebendar bejalaika pengawa sida ketegal jalai pengarap ti dilempaika, bansa enggau menua. -RBI
#ruaiberitaiban#newsiban#beritaiban
Rindu | Titih | Kunsika
