BETONG, 16 April 2026 – Pengerami Nyerahka Projek Tembu Klinik Pengerai Nanga Atoi, Saratok ti dipejalaika ari baruh Projek Perintis Perengka Pengerai di Sarawak ti udah mujur diatur kemari.
Projek tu mungkur penyampau ungkus sepenyampau RM5,607,454.86 lalu nyadi siti ari inisiatif ti beguna dalam ngenegapka pengawa ngenataika servis pengerai di menua pesisir.
Pengerami nya dipenyadika Kaban Kunsil Nengeri (ADUN) sitak N.39 Krian YB Friday Belik.
Skop projek nya nyengkaum pengawa ngeruntuhka begunan ke suba sereta ngaga perengka guna baru ke lengkap, nyengkaum blok Klinik Pengerai Jenis 7 (Tulip), blok kuarters (Jenis F), rumah pam enggau elekterik, sereta rumah uras.
Projek tu mega ngaul pengawa masang sistem mekanikal enggau elektrik (M&E) sereta mega pengawa luar baka pengawa tanah, ngaga dinding penagang, sistem parit, jalai premix enggau palan endur ngengkahka kerita.
Pengawa bejalaika projek tu dikearapka ulih nambahka akses ngagai servis pengerai ti lebih muntang, jampat sereta efisyen agi ungkup peranak menua nya.
Kelimpah ari nya, iya mega mantu ngurangka penyekut ba fasiliti ke udah bisi, kelimpah ari ngangkatka kualiti berubat enggau pengelantang pesakit.
Projek tu ukai semina meri empas positif ngagai tikas pengerai komuniti, tang mega meri pangka ngagai pemansang rama enggau ngangkatka kualiti pengidup peranak ngelingi Nanga Atoi, Saratok.
Opis Kereja Raya Sarawak tetap komited nentuka tetiap projek pemansang dipejalai nitihka spefikasyen enggau standard ti udah ditetapka, ungkup pengelantang rayat enggau pemansang meruan nengeri tu.
Sama bisi datai pengari kanan ari Opis Menteri Pengerai Malaysia, Datin Paduka Roslinah Binti Md Jani; Direktor Pengerai Nengeri ari Opis Pengerai Nengeri Sarawak, Dr. Veronica Lugah; Pemesai Pelilih Saratok, Encik Muhammad Dino Bin Amid; pia mega pemesai kanan ari Opis Kereja Raya Sarawak enggau ejensi ke bekaul.— RBI
