KOTA BELUD, 1 Mac — Siku lelaki bebadi nyawa pengudah dipechayaka labuh ari pun kayu maya ngasu ba kandang kampung Sapoda, ditu, malam kemari (28 Feb).

Ba penusah nya, tudah ke beumur 44 taun nya diripotka enda ngeleda sebedau kaban iya pansut ari kandang kampung laban deka minta bantu.

Ketuai Balai Bomba enggau Penyah Penusah (BBP) Kota Belud, Elge Bakuk madah, bilik kawalan BBP Kota Belud nerima kangau ngenyit urung pukul 7.45 malam.

Ku iya, tim lima iku raban udah nya ngesah ngagai endur penusah ke bepalan urung 39 kilometer ari balai nya.

“Raban penyelamat betapi enggau pemar lebuh jalai ngagai endur nya enda ulih ditengah perengka pengangkut.

“Gaya nya ngujungka sida begulai enggau raban ari Opis Menteri Pengerai Malaysia (KKM) enggau Ranger Sapoda bejalai kaki penyauh tiga kilometer datai ba palan penusah nyadi,” ku iya nengah penerang media sehari tu.

Nitihku iya, lebuh datai ba endur nya, tudah lelaki nya ditemu enda ngeleda lalu dientaska lesi ulih pemesai perubat ba palan penusah nyadi.

“Raban bomba udah nya mai tudah pansut ngena ‘jungkin stretcher’ ngagai jalai besai sebedau nyuaka ngagai polis ngambika atur nangkanka nya dipejalaika.”

“Operasyen ti ngaul raban polis, KKM, Ranger Sapoda enggau 12 iku orang periman nya tembu enggau penuh urung pukul 10.56 malam,” ku iya. -RBI

MIRI, 1 Mac – Sapit Menteri Dagang Temuai, Seni enggau Budaya ke mega Kaban Parlimen Miri, Chiew Choon Man, udah mansang ke mua mantu siku pengajar main asal menua tu ke udah nyerahka pengidup iya ngetanka pesaka main asal Sarawak.

Nitihku iya, duit ari kuchik diri sepenyampau RM350 sebulan diberi ngagai Pak Zaidi dikena mantu nyaga anak iru iya, Ika ke nyadi orang timpang pendiau (OKU) begunaka pengawa nyaga penuh.

“Aku ngereja pengawa tu dalam kapasiti diri empu laban jasa iya ngagai Sarawak chukup besai. Kitai enda ulih ngelakka orang baka tu kediri,” ku iya ke mega madahka belanja nya diberi iya ninting bulan ngagai Pak Zaidi.

Pak Zaidi sebedau tu ninggalka pengawa dalam sektor korporat ngambika fokus penuh nyadi pengajar main asal di Miri. Pemutus nya digaga pengudah meda pesaka asal Sarawak majak ‘luya’ sereta kurang nerima perati ari nembiak rebak baru.

Asil ari dedikasyen iya betaun-taun, lebih 500 iku petanda asal profesional udah mujur dilatih Pak Zaidi, lalu enggau nya nentuka pesaka seni pemerindang Bumi Kenyalang terus idup sereta mansang.

Tang pengawa Pak Zaidi ukai semina ba pengawa seni aja.

“Kira-kira 15 taun ke udah, iya mutuska deka ngintu siku anak indu mit ke ditinggalka indai ada lalu nyerahka ngagai Pak Zaidi.

“Nembiak mit nya, udah nya ditemu bisi pengerusak untak ketegal balat tabin maya agi mit, ngujungka iya bisi penanggul sereta enda ulih bejaku.

“Kenyau ari nya, Pak Zaidi megai tanggungpengawa nyadi apai tunggal, ngatur semua utai ti diguna anak indu iru iya ninting hari enggau nadai kala sebana,” ku Chiew.

Ba pekara bukai, Chiew madahka pengawa ngelakuka pesaka main asal Sarawak diatu mega udah berengkah di Padang Bilun Miri ti nyadi singkang dikena ngenegapka sektor dagang temuai sereta meri kelala identiti nengeri tu ngagai bala temuai.

Iya ngambi inisiatif ngengkahka rintai petanda asal ti dilatih Pak Zaidi mantaika pengawa pemerindang nyambut penatai bala temuai ke datai di Miri.

“Tetiap iku temuai ke nyingkang ke kaki ngagai Sarawak patut terus ngasaika semengat enggau identiti nengeri tu nengah pesaka main asal. Berebak enggau nya, iya nyendiaka peluang penatai pemisi ke entap agi ngagai bala petanda menua tu,” ku iya nerang.

Ku iya nambah, inisiatif nya ukai semina ngenegapka imej Miri nyadi palan dagang temuai ke enda tau enda dilawa, tang mega nyadi pelasar meri basa ngagai budaya ungkup nengeri tu.

Ku iya nambah, kenyau nerima ‘mandat’ baru bulan Disember tu tadi, iya ransing agi meri pulai baru ngagai komuniti, kelebih agi ba sukut pelajar, pemansang komuniti enggau nyaga pesaka asal.

“Pesaka ukai semina ngajat aja. Iya nyadi semengat, sejarah enggau identiti kitai. Nyadi tanggungpengawa kitai nentuka iya terus idup ungkup rebak dudi hari,” ku iya nyemetak. -RBI

PAKAN, 1 MAC – Chairman Kaunsil Industri Kayu Ramu Malaysia (MTIB) ke mega Kaban Parlimen Julau Datuk Larry Sng Wei Shien terus ngenegapka pemansang ekonomi enggau pengelantang komuniti lebuh nyuaka bantu penyampau RM83,900 ngagai lima Komiti Pemansang enggau Pengelikun Genturung Pendiau Santai enggau sebuah Biro Indu lebuh bejadika Program Belepa sereta Bejadika Rumah Biro Indu Nyalak Atas kemari.

Agih belanja nya meri penguntung ngagai JKKK Rh Layau ak Lian, JKKK Rh Kanyan anak Sudok Nyalak Atas, JKKK Rh Sumping Wong Bebelit enggau JKKK Rh Asun Nanga Marau enggau Biro Indu Rh Kanyan Nyalak Atas.

Inisiatif tu ngemeratka pengawa ngemanahka infrastruktur pemun, ngenegapka ekonomi komuniti sereta nambahka peluang penatai pemisi peranak menua nya.

Nyadi Kaban Parlimen Julau kenyau ari taun 2018, Datuk Larry nyemetak madahka iya endang seruran nurun ke ngabas rayat ninting ujung minggu iya nya komitmen iya ti seruran dikena nentuka tetiap isu enggau guna rayat dikelala terus.

Kenu ku iya, pemansang enda ulih bemusin, tang meseti diperambu terus sereta berenggat ngambika penguntung ulih diasaika semua komuniti.

Ba pengawa ngenegapka ekonomi menua pesisir, iya mega ngemeratka pemansang sektor betanam betupi nyengkaum nanam sawit kelimpah ngaul diri ba industri perabot enggau dagang temuai ti ngembuan potensial besai di Julau.

Nengah kapasiti iya ke nyadi Chairman MTIB, Larry nerangka rentayan industri kayu ramu di Semenanjung mega diserungkai dikena muka peluang baru ngagai komuniti lokal, kelimpah ari mai pulai penemu pemansang ari kandang menua bukai ngambika diguna di Julau.

Kelimpah ari nya, iya nerangka wang turu Sejati MADANI sepenyampau RM100,000 mega dikena mantu JKKK merambu sereta bejalaika projek ti ulih nyungkak ekonomi sereta ngenegapka struktur rama ba renggat baruh.

Inisiatif baka MyLesen mega diguna ungkup meransang ngambika mayuh agi raban nembiak enggau peranak bisi lisin deriba mutosikal ke entas.

Program Belepa Enggau enggau Pengawa Bejadika Rumah Biro Indu kediatur ba Rumah Kanyan di Nyalak Atas, dipeda nyadi siti chara pemansang ti begempung ti ukai semina ngemeratka pengawa ngaga fizikal aja, tang mega ngenegapka pengelandik, rentayan industri enggau daya besemekih komuniti Julau ungkup selampur. -RBI

KAPIT, 1 Mac – Kaban Kunsil Nengeri (ADUN) Katibas, Lidam Assan ngemai semua rayat nyingkang ke mua enggau penetap ati bebasaka pangan diri.

“Besaup enggau pangan diri sereta nentuka “nadai orang tinggal” ngambika pengelantang enggau pengelikun ulih diasaika selampur komuniti.

“Aku begulai enggau Dato Sri Alexander Nanta Linggi deka mantu enggau naka pemanah ba pekara ti diguna komuniti Cina ba Kandang Menua Song,” ku Lidam.

Iya mansutka jaku tu lebuh nemuai ngagai komuniti Cina di menua nya beserimbai enggau Pengerami Taun Baru Cina.

“Awakka taun tu mai pengelantang, pengerai enggau rezeki ti belimpah.

“Dalam penyelai budaya enggau pengarap, kitai terus ngenegapka semengat beserakup ketegal pengelantang begulai,” ku iya nambah.

Iya mega ngenataika jaku terima kasih ngagai komuniti Cina menua nya dalam pemujur ngatur pengawa ketegal pengeransing enggau komitmen. -RBI

BINTULU, 1 Mac — Datuk Henry Harry Jinep mantaika pengaga ati enggau terima kasih ke pemadu tinggi ngagai polis enggau komuniti lokal ketegal pengawa sida ke jampat mantu nyidi individu ke bisi kaul enggau pengawa enchuri dua iti telefon binching iya apin lama ke udah.

Iya nyemetak ngenataika pengaga ati iya ngagai Kepala Polis Pelilih Bintulu, Supt. Nixon Joshua Ali, begulai enggau semua pemesai sereta kaban Polis Diraja Malaysia (PDRM) Bintulu ti bejalaika pengawa tekala nya lebuh ripot nya digaga.

Nitihku iya, penyikar enggau komitmen tinggi tim pengelikun bejalaika pansik nya ngayanka profesionalisme PDRM dalam nentuka pengelikun mensia mayuh seruran dijaga.

Kelimpah ari nya, apresiasyen mega diberi ngagai Cr. Demong (Engkilili), Kapitan Alvin Chong, Cr. Chong Wee Lin, kaban RELA sereta mensia mayuh ti datai ke mua meri penerang enggau kerejasama sepemanjai proses nyidi.

Iya mega meri besai terima kasih ngagai Tuan Chua It Boon (蔡乙文) enggau tim Lion Dance ari Gerempung Tua Pek Kong Bintulu ketegal pengibuh enggau sukung tegap sida ngagai piak bekuasa dalam mantu mutarka penusah nya.

“Aku amat muji semengat kerejasama enggau penyerakup ti dipandangka semua piak.Nya mandangka penegap komuniti kitai ti seruran beserakup sereta besaup enggau pangan diri,” ku iya nengah sebengkah penerang sehari tu.

Iya ngarapka semengat begulai tu terus ditegapka dikena nentuka pengelantang enggau pengelikun komuniti di Bintulu seruran dijamin. -RBI

KUCHING, 1 Mac — Pelajar nyadi kunchi besai dikena napi pemar jeman moden ke majak kompleks, pia ku Tan Sri William Mawan Ikom.

Kenu ku iya, taja pan kediatu majak mayuh pemar, tang peluang ke bisi mega besai amat nyema pelajar, latih enggau peneleba ulih digempung enggau betul.

“Sarawak jampat mansang lalu ekonomi iya meri prospek ti meransang.Kitai mesti nyingkang ke mua begulai enggau enda nempa penanggul ti enda patut ti deka ngujungka peragam negatif ngagai komuniti,” ku iya.

Iya madah munyi nya lebuh bejadika pengawa ngelancharka Gerempung Bansa Dayak Sarawak (SDNU) Pampang Matang ba Palan Sembiang Ekumenikal Kristian, Jalai Stampin, malam Hari Enam tu tadi.

Presiden SDNU nya mega nyemetak madahka komuniti Dayak patut terus begempung sereta ngatur diri enggau chara teratur dikena nentuka sada nyawa sida seruran relevan dalam polisi perintah enggau perambu pemansang nengeri.

“Lebuh kitai begempung ari baruh organisasyen ti tegap sereta ngenuluka pemerat komuniti ungkup timpuh panjai ari pemerat diri empu, kitai deka lebih dipebasa sereta dikelala,” ku iya.

Mawan ke mega Kaban Kunsil Nengeri (ADUN) Pakan sereta Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua) ngelalau nyeraraka diri ari arus pemansang semina deka ngasuh komuniti tinggal.

“Enti kitai ngenyauhka diri ari utai ke dibantaika perintah kemaya hari tu, kitai berisiko tinggal ari arus pemansang,” ku iya.

Iya mega nerangka kaban SDNU ke diatu lebih tuai runding sereta bepeneleba, lalu mayuh ari sida nya raban profesyenal.

“Kitai enda kurang penau. Utai ke kekadang nekul kitai iya nya kurang penyerakup tauka fokus. Peneleba enggau pengarap mesti digabung,” ku iya nerang.

Ngenang pasal pemayuh orang ke datai ngulu pengawa nya, iya nerangka nya nyadika nunjukka komuniti Dayak ke dinamik sereta beserakup, sekalika di mengeri tauka di menua pesisir.

“Nyadi Iban enggau Dayak, mayuh ari kitai datai ari ulu enggau ulu, taja pan bisi sekeda udah lama mindah ke mengeri lalu bisi mega ada ditu tang pun penatai kitai mengkang sama.

“Lebuh kitai ulih begempung sereta ngelala penegap penyampau enggau pemerat ke sama, kitai deka dipebasa nyadi komuniti,” ku iya.

Kelai nyukung penumbuh pampang baru nya, iya madahka geran perintah sepenyampau RM10,000 sereta meransang ketuai pampang minta kerejasama ari pengari rayat enggau ketuai komuniti ke bukai dikena ngemujurka program jemah ila.

Berebak enggau nya, Chairman SDNU Pampang Matang Catherine Jeli Daeng madahka pampang nya nerima pemendar ari Opis Pengerejista Gerempung (ROS) Sarawak kena 18 Februari tu tadi.

Ari keterubah iya bisi 81 iku kaban, diatu penyampau kaban udah nambah ngagai 250 iku, enggau tuju deka nyerakupka komuniti Dayak di Matang enggau kandang menua ngelingi sereta nyadi jematan nyambung enggau perintah ba isu ke bekaul enggau komuniti. -RBI

SELANGAU, 1 Mac — Pengerami Taun Baru Cina renggat Pelilih Selangau ti diintu beserimbai enggau Chap Goh Meh malam ensanus richah enggau penatai mayuh bengkah renggat mensia mayuh, mandangka semengat penyerakup ti majak tegap ba Selangau.

Kaban Kunsil Nengeri (ADUN) Tamin, Ir. Christopher Gira Sambang, dalam jaku dipansutka iya nyemetak madahka pengerami Chap Goh Meh ukai semina pengujung pengerami Taun Baru Cina aja, tang lebih agi kelai pengarap baru, penampak penyerakup enggau jemah ila ti digaga begulai.

Iya nerangka api tanglung ti ngias malam pengerami nya kelai penegap komuniti Selangau ti mungkur pupu bansa enggau budaya, tang taja pia beserakup dalam ngetanka pengelantang enggau penegap ti udah dipeturun.

Kenu ku iya, tu meh penegap Sarawak ke bendar, bebida ba jaku enggau budaya tang bediri ba tanah ke sama, ngetanka pemaik enggau basa sereta nirika penyulut begulai.

Gira mega nyemetak madah ari baruh iring Premier Sarawak, Abang Johari, Sarawak diatu benung nyingkang enggau andal dalam ngatur pengeraja asal, ngemansangka ekonomi enggau nentuka kuing kediri ungkup pengelantang rayat.

Ku iya nambah, pemansang di kandang menua Selangau terus diberi perati, nyengkaum ngemanahka jalai alun menua pesisir, ngemesaika bekal ai enggau kuasa karan, perengka guna lumba enggau main sereta bemacham inisiatif dikena nyukung orang dagang enggau orang dagang mit.

“Semua tu ukai utai ditusui, tang asil ari penegap politik enggau penyerakup rayat ke nyadi pelasar ngagai penyulut,” ku iya.

Berebak enggau nya, iya mega ngenataika pengaga ati ngagai Balai Dagang Cina Selangau enggau Stapang ti udah chakah bejalaika tanggungpengawa meransang ekonomi menua tu sereta nyukung pemansang dagang di pasar Selangau.

Kelai sukung ti meruan ngagai pemansang pelajar enggau komuniti lokal, Gira mega bisi madahka agih belanja Projek Mit Menua Pesisir (MRP) penyampau RM5,000 ngagai SJK(C) Tong Ah enggau RM10,000 ngagai JKKK Bazaar Selangau dikena nyukung pengawa bejalaika aktiviti enggau guna komuniti.

Nitih ku iya, ekonomi menua tu dipejalai ari pemerani orang dagang ngambi risiko sereta ngadaka peluang kereja, lalu enggau nya muka jalai dudi hari ti manah agi ngagai nembiak rebak baru.

Lebuh nyimpul jaku iya, Gira minta semua rayat Selangau terus beserakup, ngetanka pengelantang sereta nentuka pelilih menua tu terus maju setipak enggau pemansang nengeri Sarawak.

Iya mega meri jaku selamat “Gong Xi Fa Cai” enggau “Xin Nian Kuai Le” ngagai komuniti Cina, ngarapka taun baru tu deka mai pengerai, pengelantang enggau pemujur ngagai semua.

Sama bisi ngulu pengawa nya Cr. Binit Madang; pengari Edwin Banta, Kaban Parlimen Selangau; Kapitan Ting Hua Chuan nyadi Chairman Program Pengerami Chap Goh Meh Selangau, Yalin Anak Assan, Pemesai Pelilih Menua Selangau; Penghulu, Kunsilor, Tuai Rumah enggau komuniti China ari serata kandang menua DUN Tamin. -RBI

SPAOH, 1 Mac — Projek ngemanahka jalai ladang ba Kandang menua Rumah Panjai Tuai Rumah Adrian Luat, Bangkit Ijok, di Spaoh udah tembu penuh lalu udah diserah ngagai komuniti menua nya, kena Hari Dua kelai siti agi pemujur dalam pemansang infrastruktur menua pesisir di kandang menua nya.

Nitihka penerang, projek nya inisiatif Perintah Gabungan Parti Sarawak (GPS) ti dipejalaika nengah agih belanja Ejensi Pemansang Bagi Menua Betong (BDDA) dikena ngemanahka perengka guna di menua pesisir.

Pengawa ngemanahka jalai nya dikearap ulih meri penguntung ke besai ngagai peranak menua nya nengah chara nyendiaka jalai ke likun sereta lanchar agi, kelebih agi ungkup pemindah ninting hari, kelimpah ari ngemudahka aktiviti betanam betupi sereta nyungkak aktiviti ekonomi komuniti ngelingi Betong.

Penerang nya nyemetak madahka pengawa bejalaika projek baka tu mandangka komitmen perintah ti terus ngenegapka rentayan infrastruktur menua pesisir ungkup pengelantang rayat. — RBI

MERADONG, 28 Feb – Tiga iku lelaki ke beumur 34 ngagai 35 taun ditan Tim Petugas IPD Meradong maya operasyen “Ops Saringan Khas Sarawak.

Saspek dipelaba bisi kaul enggau aktiviti nyadung dadah lalu dibai pulai ngagai IPD Meradong ngambika dipansik enggau silik agi.

Asil peresa ai kemi ba Opis Bagian Tasat Jenayah Narkotik (BSJN) Pelilih Meradong tetemuka ketiga-tiga saspek nya positif Amphetamine enggau Methamphetamine.

Pengawa meresa baru rikod ke udah mandangka dua iku saspek sama bisi rikod jenayah bekaul enggau dadah, lalu siku saspek nadai rikod jenayah.

Kes tu dipansik ari baruh Seksyen 15(1)(a) Akta Dadah Berbahaya 1952, enggau ukum maksimum iya nya ukum mata duit RM5,000 tauka jil enda ngelui dua taun enti dikenuku salah.

Ketuai Polis Pelilih Meradong, DSP Tansli Mering nyemetak madahka polis enda belembut bekaul enggau penanggul dadah ba kandang menua Meradong.

Iya nesau bala komuniti ngambika ngenataika sebarang penerang bekaul enggau aktiviti dadah ngagai Balai Polis Bintangor nengah lumur 084-693222 dikena mantu pengawa ngelaban penyalah dadah.

Polis ngingatka pengawa ngaul diri enggau dadah ukai semina ngelanggar undang-undang tang mega meri empas ke enda manah ngagai mensia mayuh. -RBI

KOTA SAMARAHAN, 1 Mac — Siku lelaki napi pengirau ati lebuh mutosikal ke ditepan iya labuh ke dalam parit besai pengudah betempuh enggau sebuah kerita di Taman Merdang Fasa 1, ditu kemari.

Ba penusah ke nyadi urung pukul 5.45 lemai nya, tudah ke nepan mutosikal diripotka semina bakal mimit aja, tang gaya ba endur nya ngasuh orang betanya lebuh deriba kerita ke bisi kaul nya dipelabaka ‘lenyau’ ari palan penusah nyadi.

Pengari Opis Bomba enggau Penyah Penusah Malaysia (JBPM) Sarawak madah, sida nerima kangau ngenyit urung pukul 5.48 lemai sebedau nganjung raban ngagai endur nya ngambi bantu enggau lengkas.

Lebuh raban penyelamat datai dia, sida tetemuka sebuah mutosikal ba dalam parit besai ba tisi jalai.

“Komander Operasyen ngeripotka orang ke ngena mutosikal nya betuah laban semina bakal mimit aja.

“Taja pia, deriba kerita ke bisi kaul enggau penusah nya dipelabaka udah pansut ari endur nya sebedau piak bekuasa datai,” ku iya nengah siti penerang.

Piak bomba ngentaska nadai operasyen teknikal nyelamat dipejalaika laban mansa enda tepekul dalam penusah nya.

Tudah diberi bantu keterubah sebedau pekara tu disua ngagai piak bekaul.

Penusah tu nyadika pengingat ngagai peranak menua nya ngambika bejejimat agi lebuh nengah kandang genturung pendiau, kelebih agi maya jam peak dikena nyeliahka penusah ke enda dikedekaka nyadi. — RBI