PETRA JAYA, 19 Mei — Perintah Sarawak majak ngenegapka agenda pengelikun pemakai nengeri nengah netapka tagit deka nambahka Tikas Pengelantang Diri (SSL) beras ngagai 60 peratus enggau dagin chapi ngagai 25 peratus manggai ba taun 2030.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom madah, diatu Sarawak udah nyapai tikas SSL ti meransang ungkup sekeda komoditi besai nyengkaum manuk (117 peratus), dagin babi (101 peratus), telu (100 peratus), buah (peratus) enggau sayur95).
Ku iya, pengawa nambahka pemansut beras deka ditegapka agi nengah pengawa bejalaika model Reka Bentuk, Bina, Beoperasyen enggau Mindahka (DBOT) ungkup pemansang komersial padi di Sarawak.
“Model DBOT ti dikemendarka Kaunsil Eksekutif Nengeri dalam bulan April 2026 ngembuan juluk deka matak penyereta sektor peribit, ngenyampatka pemansang projek sereta nambahka produktiviti nengah mekanisasyen enggau teknologi moden,” ku iya rambau nyimpul jaku iya ba Dewan Kunsil Nengeri (DUN) Sarawak
sehari tu.
Nitihku iya, nyentuk ke sehari tu bisi 52 buah kompeni udah mantaika pengingin nyereta inisiatif nya lalu kompeni ke dipilih nya dipelabaka deka dipadu ujung taun tu.
Dalam pengawa ngintu bansa padi premium menua tu, Opis Betanam Betupi Sarawak bekerejasama enggau Universiti Putra Malaysia Sarawak deka ngemansangka ladang ngeluarka benih padi Biris pemesai 10 hektar di Lubok Punggor, Gedong berengkah bulan Jun taun tu.
Iya mega madah, diatu bisi lapan iku nembiak Sarawak benung bejalaika latih pengelama 24 bulan ba Palan Latih Padi Lembaga Pembangunan Pertanian Muda (MADA), Kedah dikena nyikap diri ngadaka pengereja pengawa bepengelandik dalam industri padi.
Ungkup sektor chapi, perintah udah ngungkupka RM43.7 juta ba taun 2026 dikena ngenegapka pemansut domestik sereta nambahka kapasiti industri nupi jelu nengeri tu.
Ku iya, pengawa ngemansangka palan nupi enggau ngemesaika chapi ti dipejalaika SALCRA di Rimbas, Betong enggau Stenggang, Bau disadang tembu ba suku ketiga taun tu enggau penyampau kapasiti 500 iku.
“Perintah deka terus ngenegapka kapasiti industri betupi Sarawak nuju ngagai industri ti meruan agi, tan sereta ulih besemekih,” ku iya nerang.
Iya nyemetak madahka pengelikun pemakai ukai semina bepanggai ba pemansut aja, tang lebih agi ngaul semua rentayan bekal nyengkaum pengeluar, pengedar, pengangkut, penerit atur enggau penguna. — RBI
#Beritalban | Ruai Berita Iban
Rinduka | Titihka | Kunsika
