KUCHING, 28 Mei – Sepenyampau 99 kontinjen ari bemacham pupu bansa enggau komuniti ari serata Sarawak disadang nyeretw Pengerami Niti Daun beserimbai enggau Pengerami Gawai Dayak Sarawak taun tu.
Pekara nya dikerandauka ba Aum Komiti Besai Pengerami Gawai Dayak Sarawak 2026 ti bechairmanka Sapit Premier Sarawak Datuk Amar Douglas Uggah Embas.
Program Niti Daun tu ila diperambu deka diatur kena 21 Jun 2026 ba semanjai Tebing Ai Kuching.
Bela dipejuraika mega iya nya atur dikena berandauka pengawa nyendiaka dua agi pengawa besai pengerami Gawai Dayak renggat nengeri ti deka diatur di Kuching.
Kelimpah ari nya, Pengerami Makai Lemai Gawai Dayak Nengeri 2026 deka diatur kena 22 Jun 2026 ba Palan Konvensyen Borneo Kuching lalu dikearap ulih ngempuru bala ketuai komuniti, pengari ejensi perintah enggau temuai ari serata nengeri.
Aum nya mega berindika ari pemujur dua bengkah atur pengawa ti udah mujur diatur di Miri berengkah ari 1 ngagai 23 Mei tu tadi iya nya Bazaar Gawai Dayak enggau Festival Etnokultural ti nerima timbal ti chukup meransang ari komuniti ari bemacham serak pengidup.
Berebak enggau nya, jaku puji enggau pengaga ati mega dikenataika ngagai Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil ke mega Chairman Komiti Pengatur Pengerami Gawai Dayak Renggat Sarawak 2026 enggau Datuk Majang Renggi, Chairman Komiti Pengerami Gawai Dayak Renggat Nengeri Sarawak tu udah mujur ngaturka program enggau manah.
Semua piak ke bisi kaul ngemujurka Pengerami Gawai Dayak Renggat Sarawak 2026 mega dipinta terus ngenegapka kerejasama enggau komitmen dikena nentuka pengerami ke agi tinggal ke deka diatur di Kuching ulih dipejalaika enggau lanchar, teratur sereta richah ngambika ulih negika pesaka enggau budaya bansa Dayak di Sarawak. – RBI
#ruaiberitaiban#newsiban#beritaiban
Rindu | Titih | Kunsika
