KUCHING, 18 April – Konvensyen Gempung Parti Sarawak (GPS) kena 19 April nyadi palan beguna dikena ngenegapka kuing politik enggau pemansang nengeri lebuh lebih 5,000 iku pengari diadang begempuru ba Palan Konvensyen Borneo Kuching (BCCK).
Sekretari Besai GPS ke mega Menteri Kereja Raya, Dato Seri Alexander Nanta Linggi madah, konvensyen berambaika leka jaku “PCDS 2030: Wawasan Menjadi Nyata” ukai semina gempuru ninting taun aja, tang nyadi pelasar strategik dikena ngatur tuju, ngenegapka pengawa enggau ngelanggur kuing Sarawak jemah ila.
Nitihku iya, tetiap parti komponen iya nya Parti Pesaka Bumiputera Bersatu (PBB), Parti Sa’ati Rakyat Sarawak Bersatu (SUPP), Parti Rakyat Sarawak (PRS) enggau Parti Demokratik Progresif (PDP) tetiap parti nganjung urung 1,000 iku pengari ti mandangka komitmen tinggi sida dalam ngenegapka agenda begulai.
“Konvensyen tu nyadi pelasar ke beguna dikena nerangka kuing GPS dalam nentuka pemansang Sarawak terus meruan, inklusif sereta kompetitif seriris enggau aspirasyen PCDS 2030,” ku iya pengudah beratika pengawa nyendiaka diri ke penudi ba BCCK malam ensanus.
Konvensyen nya deka dipenyadika Premier Sarawak ke mega Chairman GPS, Datuk Patinggi Tan Sri Abang Johari Tun Openg.
Entara batang isi iya nya sesi kerejasama strategik bekaul enggau Sempekat Malaysia 1963 (MA63) ti dipeda nyadi pugu dalam ngetanka hak enggau autonomi Sarawak dalam Persekutuan Malaysia.
Sesi tu deka dibantaika Datuk Sharifah Hasidah Sayeed Aman Ghazali enggau Dato Sri Doris Sophia Brodie nyadi moderator.
Kelimpah ari nya, pengulih enggau tuju Strategi Pemansang Pengudah COVID-19 2030 (PCDS 2030) deka diperatika baru ulih ex Sekretari Perintah Sarawak, Datuk Amar Jaul Samion, seraya Dato Sri Lee Kim Shin nyadi moderator, lalu enggau nya meri peragam ti terang pasal penyulut enggau pemar ti patut diputarka.
Sama bisi diperambu deka meri jaku iya nya Presiden SUPP Datuk Amat Dr Sim Kui Hian, Presiden PDP Dato Seri Tiong King Sing enggau Presiden Parti Rayat Sarawak (PRS) Dato Sri John Sikie Tayai, ti dikearapka deka ngemeratka penyerakup politik enggau komitmen terus dalam ngetanka pemerat rayat Sarawak.
Konvensyen sehari nya deka dientudika enggau pengerami makai lemai ba endur ke sama.
Ngelansa pasal pengawa nyendiaka diri, Nanta madahka pengawa bejalai enggau lanchar, tang beberapa sukut teknikal agi dialuska dikena nentuka konvensyen nya bejalai enggau lanchar sereta nyapai juluk ke udah ditetapka. -RBI
