SIBU, 26 April – Kaban Kunsil Nengeri (ADUN) Tamin, Ir Christopher Gira Sambang nyemetak madahka Sarawak ngembuan potensial ke besai dalam sektor dagang temuai, kelebih agi ba kandang menua pesisir ti kaya enggau pemanah rampa menua sereta penyelai budaya komuniti iya.
Kenu ku iya, Sarawak ukai semina sebuah nengeri aja, tang lebih agi nyadi palan ti ngundan reta tengkira dagang temuai ti nyelai nyengkaum kampung tropika, sungai, ai wong, bukit enggau rumah panjai ti agi ngetanka pesaka budaya enggau main asal.
“Taja pia, mayuh ari potensial tu bedau dipansik enggau luas ketegal endur iya ba kandang menua pesisir,” ku iya nerang.
Gira madah munyi nya lebuh bejadika Pengerami Makai Lemai Ninting Taun PRM 4×4 2026 ke diatur ba sebuah hotel ti tebilang di Sibu, malam kemari.
Berebak enggau nya, iya ngemeratka pangku pengawa komuniti 4×4 ti ukai semina orang ti rinduka aktiviti kasar, tang mega nyadi pematak pemansang dagang temuai menua pesisir.
“Komuniti 4×4 ukai semina nyadi kelab rekreasyen aja, tang mega nyadi ejen pemansang, penyambung komuniti enggau pengerawang ungkup sektor dagang temuai menua pesisir,” ku iya nerang.
Iya mega madah, Perintah Nengeri Sarawak begulai enggau Kaunsil Dagang Temuai Sarawak udah bejalaika mayuh macham inisiatif dikena ngenegapka industri dagang temuai nyengkaum ngatur pengerami betikas antarabansa baka Rainforest World Music Festival, Borneo Jazz Festival enggau Sarawak Regatta, kelimpah ari kimpin “Sarawak More to Discover”.
Iya nerang agi, pengawa tu setipak enggau Strategi Pemansang Pengudah COVID-19 (PCDS) 2030 ti nyadika sektor dagang temuai nyadi siti ari batang pemansut ekonomi nengeri tu.
Nitih ku iya, Sarawak diatu nerima urung empat juta temuai ninting taun ti meri pangka ngagai penumbuh ekonomi sereta muka peluang kereja ngagai peranak menua tu.
Taja pia ku Gira, penyampau tu agi bisi potensial ditambah nengah pemansang ti lebih teratur sereta ngelakuka kandang menua pesisir.
Berebak enggau nya, iya nyemetak madahka dagang temuai ukai semina meri empas ngagai sektor ekonomi, tang mega terus nyungkak penatai pemisi komuniti menua pesisir.
Kelai sukung ngagai komuniti PRM 4×4, iya mega ngentaika bantu belanja penyampau RM20,000 dikena nyukung aktiviti gerempung nya.
Pengerami nya udah digulu Presiden PRM 4×4, Presley ak Peter, kaban komiti pengatur, orang ke melanja enggau kaban gerempung. -RBI
#ruaiberitaiban#newsiban#beritaiban
Rindu | Titih | Kunsika
