MIRI, 16 Mei — Pengerami ngintu Hari Ruang Bilik Kampung Long Atip ke diatur ba Begunan Budaya FORUM pagi tadi chukup richah, lalu enggau nya nyadi pelasar ke beguna dalam ngenegapka penyerakup, bekaban enggau pengelantang entara peranak Kampung Long Atip ke mayuh ari sida diatu diau di Bandaraya Miri.
Program tu ukai semina nyadi pelasar dikena ngenegapka kaul diri sebilik enggau kaban belayan dalam komuniti, tang mega bejalaika tanggungpengawa ti beguna dalam nerenakka semengat bekerejasama, besaup enggau ngenegapka identiti enggau pesaka asal genturung pendiau ngambika meruan meruan taja pan maya diau di menua luar.
Pengawa tu mega dipeda besai reti dalam nentuka nembiak rebak baru terus ngelala asal, budaya enggau nilai mulia komuniti kampung.
Kaban Kunsil Nengeri (ADUN) Telang Usan, Dato Dennis Ngau, ba penerang iya madah, ngatur Hari Ruang Bilik baka tu beguna amat dalam ngenegapka semengat beserakup enggau begulai dalam komuniti.
“Program baka tu ukai semina nyadika pelasar dikena ngerapitka kaul diri sebilik enggau diri menyadi, tang mega nerenakka semengat bekerejasama, besaup enggau ngenegapka identiti enggau pesaka komuniti rumah panjai ngambika terus meruan taja pan maya di menua luar,” ku iya.
Iya mega ngenataika pengaga ati enggau jaku selamat ngagai Gerempung Peranak Long Atip ketegal pemujur ngatur program sereta komitmen terus mantu pemansang rama enggau pengelantang pendiau peranak rumah panjai.
Sama bisi datai ngerichahka agi pengerami nya Pemanca Nawan Luhat, Ketuai KK Kampung Long Atip Wilson Anyi, enggau Chairman Gerempung Peranak Long Atip Encik Paten Lah. — RBI
#Beritalban | Ruai Berita Iban
Rinduka | Titihka | Kunsika
