MERADONG, 6 Mei — Siku lelaki peranak menua tu bebadi nyawa ba penusah aksiden ba jalai alun ti mungkur sebuah entukar pikap enggau sebuah mutosikal di Jalai Lasi nuju ngagai Jalai KJD, lemai tu tadi.
Ketuai Polis Pelilih Meradong, DSP Tansli Mering madah, penusah nya nyadi urung pukul 5.10 lemai lebuh deriba pikap ke datai ari Jalai Lasi nuju Jalai KJD dipelabaka ensayar lebuh nengah tiku sebedau tama ngagai lurung ke betentang.
“Berindik ari nya, entukar nya ngelantak sebuah mutosikal ke datai ari Jalai KJD,” ku iya nengah penerang media sehari tu tadi.
Tudah ke bebadi dikelala enggau nama Brahim Anak Jika, 24, ari Rh Jika, Nanga Labah, Pakan dientaska bebadi ketegal balat bakal.
Nitih ku iya, empas ari penusah belantak nya ngujungka kededua entukar nya tepawah ngagai tisi kanan jalai nuju ngagai Jalai KJD.
Tudah deriba mutosikal udah nya dibai ngagai Poliklinik Julau sebedau dientaska bebadi.
Diatu kes nya benung dipansik ari baruh Seksyen 41(1) Akta Pengangkutan Jalan 1987.
Berindik ari nya, polis minta sebarang saksi penusah tauka individu ke bisi penerang nyengkaum rikod ‘dashcam’, datai ke mua mantu dalam pansik nengah chara ngaga kaul enggau Pemesai Pemansik, Insp. Mohd Zainal bin Abdul Ghafar ba lumur 011-11945095.
Berebak enggau nya, DSP Tansli mega ngelalau semua penguna jalai alun ngambika seruran bejimat, belubah lebuh nengah tiku sereta ngasika undang-undang jalai alun dikena nyeliahka penusah ke enda dikedekaka nyadi. -RBI
