BATU NIAH, 28 Mei — Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom nesau bala pekebun sawit di kandang menua Niah-Ulu Suai ngambika enda bepanggai sepenuh iya ba siti pun penatai pemisi, tang mansik peluang baru dalam sektor betanam betupi enggau penegap ekonomi dalam timpuh panjai.
Ku iya, sektor betanam betupi di Sarawak ngembuan potensial ke besai ulih dipechahka, nyengkaum nengah pengawa nanam bansa nanas SG1 (Sarawak Gold), utai tanam tunai enggau aktiviti nupi jelu ke ulih meri pulai baru ke meruan agi ngagai peranak menua pesisir.
“Sawit ukai semina pun penatai pemisi. Kitai bisi mayuh potensial bukai ke ulih dikemansang, nyengkaum pengawa nanam nanas SG1 ke diatu majak mayuh peminta tinggi ba makit,” ku iya.
Iya madah munyi nya lebuh ngenataika jaku nyadi Temuai Dipebasa ba Pengerami Mantar Gawai Dayak 2026 ke diatur Serakup Tuai Raban Bansa Ulu Suai (PKKKUS) begulai enggau Komiti Penduduk Bansa Iban (JKPI) Zon Niah Kemena ba Dewan Masyarakat Batu Niah, kena Hari Tiga tu tadi.
Dr.Rundi ke mega Kaban Kunsil Nengeri (ADUN) Kemena madah, pemansang kilang memproses buah nanas di Sungai Tukau nyata ngayanka komoditi alternatif bisi potensial dikemansang nengah chara komersial sereta ulih nyadi pemansut penatai pemisi baru ungkup komuniti menua nya.
Nitih ku iya, bansa nanas SG1 tauka Sarawak Gold ti dikemansang di Sungai Tukau, Miri diatu majak dikerindu ukai semina ba makit menua tu aja, tang mega ba renggat antarabansa.
Berebak enggau nya, iya mega ngingatka orang dagang minyak sawit ngambika meretika pengawa ngira penguntung ke bendar industri nengah chara ngambi kira kos operasyen nyengkaum upah pekereja, guna mesin enggau bemacham kos ngatur ke bukai.
Iya mega ngemeratka pemesai guna nitihka tanggungpengawa chukai laban tetiap transaksyen nyual minyak sawit dirikod kilang enggau sistematik.
Ku iya nambah, pengawa ngemayuhka pun penatai pemisi beguna amat dalam napi ekonomi dunya ti enda tentu, nyengkaum ungkus minyak ti majak niki enggau inflasyen ketegal konflik geopolitik di Timur Tengah enggau Eropah.
Ku iya, chara ekonomi ti bemacham ulih mantu nyungkak penatai pemisi rayat menua pesisir seraya ngenegapka pengelikun pemakai enggau penegap ekonomi nengeri. — RBI
#Beritalban | Ruai Berita Iban
Rinduka | Titihka | Kunsika
