MIRI, 4 April — Opis Perengka Pengangkut Jalai (JPJ) Sarawak nengah Unit Operasyen JPJ Miri bekerejasama enggau Opis Pansik enggau Penerit Adat Trafik (JSPT) Miri udah bejalaika operasyen ‘snap & check’ besepadu ba sekeda endur ke dikelala nyadi ‘hot spot’ belumba nadai pemendar.

Operasyen ke dipejalaika ari pukul 7.00 malam nyentuk 3.00 pagi nya mungkur pengawa meresa 86 buah mutosikal.

Asil operasyen nya tetemuka sekeda penyalah dikelala nyengkaum nadai lisin deriba, Lisin Perengka Pengangkut Bemotor (LKM) udah abis timpuh, ngubah struktur tauka kereban perengka pengangkut enggau nadai pemendar, sereta mega bemacham penyalah teknikal ke bukai.

Semua penyalah ke ditemu udah diambi atur ke patut nitihka penetap undang-undang ke udah bisi.

JPJ Sarawak dalam penerang iya madahka operasyen ke baka nya deka terus chakah dipejalaika ari sesiti maya ngagai sesiti maya, kelebih agi ba endur ke berisiko tinggi, nyadi chara proaktif dalam ngelaban aktiviti lumba ke nadai pemendar sereta nambahka tikas nitihka undang-undang jalai alun.

Berebak enggau nya, JPJ Sarawak mega meri pengaga ati ngagai kerejasama rat JSPT Miri ngemujurka operasyen bersepadu nya.

Kerejasama strategik entara ejensi penerit atur tu dipeda nyadi elemen ti beguna dalam nentuka pengelikun jalai alun terus dijaga sereta nempa rampa trafik ti likun agi, teratur ungkup semua penguna. — RBI

KOTA BHARU, 4 April — Peranak Kampung Chabang Tiga, Kedai Buloh napi pengirau ati lebuh lapan buah rumah diripotka angus ketegal penusah angus ke besai ke mega ngujungka siri penusah meletup ti ngaul 30 tong gis petroleum cecair (LPG) malam kemari.

Penusah angus ke nyadi urung pukul 9.30 malam nya udah nganguska nyau deka semua struktur genturung pendiau ba kandang endur ke mayuh mensia nya. Taja pia, nadai penusah bebadi nyawa diripot nyadi.

Ketuai Pampang Operasyen enggau Pengatur Balai, Opis Bomba enggau Penyah Penusah (JBPM) Kelantan, Mohd. Farid Ismail madahka, piak iya nerima kangau ngenyit pukul 9.55 malam sebedau nganjung 34 iku pemesai enggau raban ngagai palan penusah nyadi.

Nitihku iya, pansik tumu tetemuka penusah angus dipelaba bepun ari sebuah rumah ke nyimpan tong gis LPG ngujungka api jampat nyerarai ngagai rumah ke besepiak.

“Operasyen ngerara api chukup mar berindik ari struktur rumah ti balat dedat enggau penyauh urung satu meter ari pangan diri.

“Kelimpah ari nya, siri meletup 30 tong gis LPG ba endur nya mega nambahka pemar ngagai tim penyelamat,” ku iya.

Penusah nya meri pengerugi besai ngagai peranak menua nya nyengkaum beberapa buah entukar ke diengkah besemak ke mega rusak.

Tebal agi peranak menua nya diripotka nadai ba rumah lebuh penusah nya nyadi, lalu enggau nya ulih nyeliahka sebarang bakal tauka bebadi nyawa.

Operasyen ngerara api udah tembu pukul 12.00 tengah malam. Tim forensik bomba diatu benung bejalaika pansik ke silik agi dikena ngelala kebuah ke bendar penusah nya nyadi sereta beratika penyampau semua pengerugi ke ditapi mansa ke bekaul. — RBI

SAMARAHAN, 4 April — Siku juruteknik menara bebadi nyawa, seraya siku agi balat bakal pengudah kerita sedan ke ditepan seduai iya tepawah sebedau labuh ke dalam parit ba penusah ke nyadi ba Jalai Penrissen, tumu pagi kemari.

Penusah ke nyadi urung pukul 4.30 pagi nya dipelabaka nyadi ketegal deriba enda ulih nagang entukar nya lalu tepawah ari jalai besai.

Pemangku Ketuai Polis Pelilih Kota Samarahan, DSP Barry William madah, aksiden nya mungkur sebuah kerita ke dideriba siku lelaki beumur 27 taun.

Nitihku iya, pansik tumu tetemuka entukar nya benung dalam pejalai nuju rumah sida di Batu Kitang sebedau lenyau jaga lebuh datai ba mua Kem Batu Lapan.

“Berindik ari penusah belantak balat nya, penumpang lelaki ke beumur 36 taun nya dientaska bebadi nyawa ba palan penusah nyadi ketegal balat bakal ba pala,” ku iya nengah sebengkah penerang.

Ku iya nambah, raban bomba udah dikangau ngagai palan penusah nyadi ngambika ulih bejalaika operasyen mansutka tudah ke tepekul dalam entukar ke redak nya.

Mansa ke balat bakal nya udah ditaban ke sepital ngambika diperubat enggau silik agi.

Kes nya diatu benung dipansik ari baruh Seksyen 41(1) Akta Perengka Pengangkut Jalai 1987 ketegal deriba enda beradat tauka ngemai penusah ngujungka pemati. — RBI

KANOWIT, 4 April — Program Ketuai Begulai Enggau Rayat enggau Ngelancharka Projek (MRP–PPRMS) ke diatur ba Rumah Sobrie Mukow, Nanga Bat Kerangan (1), Sungai Ngemah sehari tu ngayanka komitmen perintah ti terus ngenegapka pemansang menua pesisir sereta ngemanahka agi genturung pendiau kandang Kunsil Nengeri (DUN) Ngemah.

Pengerami nya udah dipenyadika Kaban Kunsil Nengeri (ADUN) N.49 Ngemah, YB Anyi Jana, ke digulu bala ketuai komuniti, ketuai raban bansa enggau peranak menua nya.

Ba jaku pengelalu, Tuai Rumah Sobrie Mukow meri pengaga ati ngagai agih belanja dikena bejalaika projek MRP enggau PPRMS ti dikearapka peranak menua nya.

Iya mega bisi mantaika isu bekaul enggau sekeda peranak ke agi bedau bisi kad pengelala lalu ngarapka pekara nya diberi perati piak ke bekaul.

Kelimpah ari nya, iya nesau komuniti menua nya terus meri sukung ngagai perintah ke bisi diatu sebedau Pengawa Bepilih Nengeri Sarawak ti deka datai.

Berebak enggau nya, Penghulu Pree nyemetak madahka pemesai guna media rama enggau bejimat ngambika enda ngeruga maruah individu bukai, kelebih agi dalam konteks politik.

Iya mega ngelalau Komiti Pemansang enggau Pengelikun Genturung Pendiau (JKKK) rumah panjai ke bedau ngemaruka pangku pengawa sida ngambika bejalaika pengawa nya enggau lengkas, kelimpah ari ngingatka pangku pengawa Tuai Rumah ke nyadi chairman JKKK iya nya meseti dipejalaika enggau penuh integriti sereta pengandal.

Ngarika Opis Pelilih Kanowit, SAO Clinton Jelai madahka perintah deka meri kelala sistem pansik JKKK bepelasarka Penunjuk Prestasi Utama (KPI) dalam timpuh ke semak dikena ngangkatka pemanah pengawa ngatur pengawa ba renggat baruh.

Iya mega ngemeratka pemesai guna pengawa ngerejista penuh JKKK dikena nentuka pengelanchar pengawa ngagihka bantu sereta bejalaika projek perintah.

Dalam jaku bejadika pengawa nya, Anyi Jana ngemeratka konsep “Leadership by Example” nyadi pelasar ti beguna dalam pengawa nyadi ketuai, madahka genap iku ketuai meseti nyadi chunto ke pemadu manah ngagai komuniti.

Ngenang sukut pemansang, iya madahka projek ngaga jematan ba Rumah Nyaru ti betengahka Sungai Bat deka dipejalaika dalam awak ke semak tu.

Kelimpah ari nya, projek jalai alun ari Nanga Bat ngagai Nanga Perak diatu udah manggai 86 peratus tembu, lalu jalai kayu batang ti nyambung ngagai Nanga Jagau deka diambi nyadi jalai sementara ulih perintah Sarawak.

Iya mega madahka Rumah Panjai Sobrie deka dikemeratka dalam pengawa bejalaika projek ari baruh Program Transformasyen Menua Pesisir (RTP), kelimpah ari ngemendarka agih belanja MRP sepenyampau RM8,000 ungkup guna komuniti besemak.

Ba pemansang pelajar, iya meri pengaga ati ngagai SMK Nanga Dap laban udah teulihka 100 peratus pas ba peresa Sijil Pelajaran Malaysia (SPM), kelimpah ari muji pemanah prestasi SMK Sedaya ti bisi 177 ari 178 iku nembiak mujur pas.

Lebuh nyimpul jaku iya, iya minta semua komuniti terus begempung sereta nyukung perintah Gabungan Parti Sarawak (GPS) dikena nentuka penerus pemansang di kandang menua nya.

Pengawa ngatur pengerami tu ukai semina nyadi pelasar dikena ngenataika polisi perintah, tang mega ngerapitka kaul entara ketuai enggau rayat dalam pengawa ngemansangka kandang menua pesisir nengah chara ti inklusif sereta meruan.

Pengerami nya bela digulu Puan Gelim Utan, SAO Clinton Jelai ke nyadi pengari Pemesai Pelilih Kanowit, penghulu, kaunselor, Tuai Rumah enggau peranak menua nya. — RBI

SRI AMAN, 4 April — Program beripai ke diatur ba Rumah John Ricky, Pakit B enggau kerejasama Rumah Florence, Pakit Sungai Melaban pagi kemari udah dipenyadi Kaban Kunsil Nengeri (ADUN) Bukit Bengunan, Yang Berhormat Datuk Mong Dagang.

Nyerumba program nya mega, iya bisi madahka penyampau agih belanja Projek Mit Menua Pesisir (MRP) sepenyampau RM40,000 ngagai tiga buah rumah panjai di sitak nya nyadika pengeran ngenegapka pemansang komuniti ngelingi.

Rumah Ambrose, Pakit A nerima agih belanja sepenyampau RM10,000 lalu ditangkanka Rumah John Ricky, Pakit B sepenyampau RM20,000, lalu Rumah Florence, Pakit Sungai Melaban nerima agih belanja RM10,000.

Dikearapka pemeri tu ulih dikena ngangkatka perengka guna enggau pengelantang peranak rumah panjai, seriris enggau komitmen ti seruran dipejalai dikena ngenegapka pemansang menua pesisir.

Nitihka penerang ‘Facebook’ Palan Servis Bukit Bengunan, pengawa ngatur program beripai tu mega mandangka penegap semengat kerejasama enggau penyerakup entara komuniti menua nya. — RBI

SONG, 4 April — Sekolah Menengah Kebangsaan (SMK) Song No.2 ngerikod pemutus ti chukup meransang ba peresa Sijil Pelajaran Malaysia (SPM) 2025 ti baru dipadah tu tadi, ti mandangka sekula nya majak nyulut ba prestasi akademik.

Ngambi penerang ari Utusan Sarawak Prinsipal iya, Pulit Lai madah, pemujur nya ngayanka pengulih nembiak sekula nya besemekih enggau institusyen bukai ba renggat nengeri asil ari pengawa begempung dalam ngangkatka kualiti pelajar.

“Sepenyampau empat iku nembiak mujur bulih pemutus peresa nyulut iya nya 9A, ditangkanka empat iku nembiak ke bulih 8A, seraya ke bukai nya mega ngerikodka penyulut ke chukup manah enggau pemutus entara 7A enggau 3A,” ku iya ba sebengkah penerang.

Empat iku nembiak ke bulih 9A iya nya Cristiano Ganny Saloma, Jestiana Amanda Marcus, Ellysyiana Icha Rudy enggau Anastania Dammie Wahed.

Ba pemutus peresa 8A, iya dijapai Anisha Qhajijah Manap, Allisyia Sigau, Allyani Imas Tawi enggau Dayana Medonza Zamry.

Kelimpah ari nya, Rosalinda Laura Ensidy ngerikodka pemutus peresa 7A, ditangkanka tujuh iku nembiak bulih 6A, lima iku bulih 5A, lalu tiga iku siku-siku bulih 4A enggau 3A.

Nitihku Pulit, pemujur tu asil ari pengawa bejalaika mayuh macham program akademik ti diperambu sekula enggau sistematik, nyengkaum kelas tambah, kem motivasyen enggau kelala ngagai teknik nyaut tanya ti ngasi.

Iya mega ngenataika pengaga ati iya ngagai bala pengajar ketegal komitmen sida ti tinggi ba pengawa meri pelajar ngagai nembiak sekula, pia mega kaul apai indai ti chakah nengah Gerempung Apai Indai enggau Pengajar (PIBG) ti seruran nyukung pelajar anak di rumah.

“Pemutus tu ukai semina meri penguntung ngagai sekula enggau apai indai aja, tang mega meri pangka ngagai pemansang modal mensia ba kandang menua Song,” ku iya.

Ku iya nambah, pemujur tu dikearap ulih nyadi pemangkin ngagai bala nembiak ngambika terus nyapai penyulut sereta ngenegapka agi prestasi akademik sekula jemah ila. — RBI

KUALA LUMPUR, 4 April – Pengawa ngenegapka penuduk dalam sektor ngatur aset majak chakah lebuh Affin Bank Berhad ngambi singkang strategik dikena ngerembaika portfolio servis wang.

Beserimbai enggau nya, bank nya udah nerima pemendar ari Bank Negara Malaysia (BNM) ngulihka semua pemerat ekuiti dalam Pheim Asset Management Sdn Bhd (Pheim AM) enggau rega RM50 juta.

Dalam notis ngagai Bursa Malaysia kena Hari Lima tu tadi, Affin Bank madahka pemendar nya diulih nengah surat kena 2 April 2026, ti diterima ba hari ke sama.

Taja pia, pemendar nya bepanggai ba sekeda syarat nyengkaum bejalaika pengawa meresa pengudah tembu proses operasyen gerempung Pheim AM.

Nitihka penerang nya, entara peminta ke enda tau enda dititih iya nya meresa baru piak luar ke bebas sebedau proses integrasyen sistem dipejalaika, dikena nentuka operasyen bejalai enggau lanchar sereta nitihka standard ke udah ditetapka. – RBI

KUALA LUMPUR, 4 April – Menteri Komunikasyen Fahmi Fadzil ke mega Ketuai Pemadah Parti Keadilan Rakyat (PKR) ngelalau bala ketuai enggau kaban parti ngambika sama enggau perintah meri penerang ngagai rayat bekaul enggau gaya ke nyadi diatu berindik ari krisis kuasa global.

Ku iya, kaban parti meseti bejalaika tanggungpengawa nyadi mata enggau pending perintah nyengkaum nyakal tuduh ti nadai pengamat baka isu suntuk pemakai ba renggat renchit ti tau ngenataika pengeringat mensia mayuh.

Ba pemansang ke sebaka, sepenyampau 159 isi berita pelesu bekaul enggau krisis kuasa global udah ditemu sereta diturunka Suruhanjaya Komunikasyen enggau Multimedia Malaysia (MCMC) dalam timpuh empat hari kenyau ari 29 Mac.

Nitihka penerang iya, isi ke enda tulin nya ngaul isu rega petrol niki, dawa ke madahka perintah “mayar tol” ba Selat Hormuz enggau nikika chukai karan ari Tenaga Nasional Berhad.

Fahmi mega ngingatka mensia mayuh ngambika lebih bejejimat sereta anang sepeneka ati ngerembaika penerang ke enda dientaska.

“Dalam timpuh krisis kuasa global tu, kitai betapi enggau isi pelesu ti digaga piak ti nadai tanggungjawab, nyengkaum ngena teknologi pemintar tiru (AI) enggau ngubah tajuk berita media arus perdana,” ku iya.

Iya madah munyi nya pengudah ngulu pengerami bejadika Aum Besai Ninting Taun Pampang PKR Wilayah Persekutuan 2026 di Bandar Tun Razak, kemari.

Ku iya nambah, perintah komited nentuka bekal pemakai chukup ba makit lalu ngelalau mensia mayuh ngambika ngeripot sebarang pengawa ti disangka baka numpu bekal ngagai piak bekuasa.

Info asal kredit BERNAMA

JULAU, 4 April – Opis Bomba enggau Penyah Penusah Malaysia (JBPM) terus komited ngenegapka penyedar komuniti senentang pengelikun ari penusah angus nengah pengawa bejalaika program meri penerang enggau matau ba kandang endur ti berisiko.

Program ke diatur Balai Bomba enggau Penyah Penusah (BBP) Bintangor, berengkah urung pukul 11.30 pagi ba Rh. Vincent anak Mendu, Sgt. Kandut Sejugam, empai lama ngaul 17 iku penyereta ari komuniti menua nya.

Raban nya betuaika PBK I Mijan bin Pamin begulai enggau PBK II (TBBK I) Zulfaiza bin Mohammad enggau PBB Luther anak Junie ngenataika licha bekaul enggau pengelikun ari penusah angus, enggau pemerat khas ba prosedur madamka api dapur ti suah nyadi pun penusah angus ba rumah.

Kelimpah ari sesi randau, pengawa matau mega dipejalaika ba kandang endur ke ngelingi dikena ngelala endur ke berisiko tinggi ke bisi potensial ngasuh penusah angus tebuka nyadi.

Inisiatif tu setipak enggau pengawa JBPM ti seruran bejalaika pengawa ngenyemakka diri enggau komuniti nengah chara “Quick and Friendly”, kelimpah ari nentuka komuniti lebih nyikap diri sereta nemu atur nagang penusah angus.

Program nya dipejalaika Tim Alpha ari BBP Bintangor. – RBI

SARATOK, 4 April — Gerempung Bansa Dayak Sarawak (SDNU) enggau Sarakup Indu Dayak Sarawak (SIDS) Pampang Saratok deka ngatur pekit Pekit Kumang Saratok 2026 kena 9 Mei beserimbai enggau pengerami Hari Gawai Dayak ti deka datai.

Pekit ti beprestij tu diatur nyadi pelasar dikena ngetan sereta bebasaka pesaka budaya komuniti Iban, kelimpah ari mantaika pemanah, personaliti enggau pengarap ati indu Dayak ngidupka nilai asal ti udah diturunka ari aki ini.

Nitih ku Chairman Pengatur Pekit Kumang Saratok 2026, Sita Anak Inka, pengawa ngatur pekit tu ukai semina nyadi pengawa ninting taun beserimbai enggau Gawai Dayak aja, tang mega nyadi pelasar beguna dalam ngenegapka semengat enggau identiti budaya komuniti Dayak, kelebih agi ba raban nembiak rebak baru.

Ku iya, penyereta ba pekit tu tebuka ngagai semua indu Iban ari Sarawak enggau beberapa syarat ditetapka, entara nya pesereta meseti beumur entara 18 ngagai 30 taun, nadai kala bulih gelar Kumang ba sebarang pekit sebedau tu, sereta nadai kala nyereta Pekit Kumang Saratok lebih ari tiga (3) kali.

“Raban indu biak ti nitihka syarat amat diperansang nyereta pekit tu nyadika pengeransing dikena negika pesaka asal bansa Iban, kelimpah ari mantaika pengangkun diri enggau personaliti ti nyulut,” ku iya nerang ngagai Ruai Berita Iban

Berebak enggau nya, iya mega mantaika pengarap edisyen pekit tu deka terus nerima timbal ti meransang ari komuniti ngelingi sereta nyadi medium ti efektif dalam nentuka penerus pesaka budaya dijaga.

“Pekit Pekit Kumang Saratok nyadi siti ari pengawa ke pemadu dianti-anti maya ninting pengerami Gawai Dayak, setipak enggau pengawa ngenegapka nilai asal enggau budaya ba komuniti Dayak di Sarawak” ku Sita.

Penerang ti silik ulih dipeda ba penerang grafik ti dikunsika kami ba baruh nya — RBI

Grafik — Sita Inka