SARATOK, 19 Feb – Siku indu tuai ditemu bebadi pengudah rebah lalu enda ngeleda ba jalai alun semak Simpang Roban, pagi tadi.

Pemesai Raban Penyaga Orang Periman Malaysia (APM) Pelilih Saratok, Leftenan Nur Athirah Batu madah, raban iya nerima kangau ngenyit ari mensia mayuh urung pukul 7.16 pagi bekaul enggau penusah nya.

Berindik ari nya, tiga iku raban APM dianjung ari Palan Kawalan Operasi Pelilih Menua (PKOD) urung pukul 7.18 pagi lalu datai ba endur nya urung 16 minit udah nya.

“Lebuh datai, raban polis udah bisi ba palan nya, tudah ditemu gali ba jalai alun enda ngeledaka diri enggau bekau gemaran ba pala,” ku iya ba sebengkah penerang sehari tu tadi.

Tudah udah dikelala enggau nama Yong Swee Siong ke diau ba Sungai Anak, Roban.

Nitih ku iya, raban APM terus bejalaika pengawa bantu ngenyit nyengkaum CPR, tang tudah enda meri ngeleda.

Polis udah nya ngentaska indu nya udah bebadi ba palan penusah nyadi.

Tubuh tudah dibai ngagai Sepital Saratok ambika atur nangkan nya ulih dipejalaika.

Operasyen ke mega ngaul tujuh iku pemesai polis nya udah tembu enggau penuh urung pukul 8.48 pagi. Kebuah penusah nyadi agi benung dipansik piak bekuasa. -RBI

#ruaiberitaiban#newsiban#beritaiban

Rindu | Titih | Kunsika

SIBU, 19 Feb – Lebih 20,000 iku temuai ngerami kandang endur Rejang Park, Sibu beserimbai enggau Pengerami Rumah Tebuka Taun Baru Cina 2026 ti diatur enggau richah ba hari ketiga pengerami nya.

Penatai ke pengabang mayuh nya ngayanka semengat penyerakup enggau begulai dalam komuniti pupu bansa ke datai begulai ngintu taun baru dalam gaya ke penuh enggau pengelantang sereta pengaga ati.

Mayuh macham pemakai asal menua tu bisi disediaka ungkup temuai, nyengkaum mee suah, kampua, laksa enggau mee dagin.

Kelimpah ari nya, bala temuai mega diperindang enggau pengawa belagu, tanda, muzik asal Cina, pengawa rama yee sang enggau pengawa mandangka tanda singa ti ngerindangka bala pengabang.

Menteri Dagang Temuai, Seni enggau Main Asal (MOTAC, Dato’ Sri Tiong King Sing madah, Sarawak ngembuan budaya ke nyelai, kelebih agi Sibu ke tebilang enggau identiti budaya kediri empu.

Kenu ku iya, enti dikelaku enggau lebih teratur sereta sistematik, penyelai tu ulih nyadi pematak besai ngagai temuai domestik enggau antarabansa.

Iya mega madahka diri deka ngatur randau silik agi enggau ejensi ke bekaul di Sarawak, kelimpah ari minta Dagang Temuai Malaysia chakah agi bejalaika pengawa ngelakuka enggau kerejasama perintah nengeri, di serata menua ngambika pengerami enggau pengawa main asal nyadi produk besai dagang temuai.

Ku iya nambah, ngatur rumah tebuka skala besai ukai semina deka ngerichahka gaya pengerami, tang mega meri penguntung ekonomi ngagai orang dagang pemakai, pendaja enggau komuniti lokal nengah penambah belanja temuai.

Iya meri pengaga ati ngagai sukung ti seruran diberi komuniti lalu ngarapka semengat beserakup terus ditegapka ungkup pengelantang begulai. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 19 Feb — Kaban Kunsil Nengeri (ADUN) Tamin, YB Ir. Christopher Gira Sambang, nerangka pengawa ngatur Program Ngabang Taun Baru China (TBC) 2026 di Pakan nyadi pelasar beguna dalam ngerapitka kaul entara bala ketuai enggau komuniti pupu bansa.

Kenu ku iya, pengerami ti diatur dalam gaya ti richah mandangka semengat beserakup enggau pengelantang ti nyadi tiang penegap nengeri Sarawak.

“Program baka tu ukai semina ngenegapka kaul entara ketuai enggau rayat, tang mega ngerapitka pemereti ati enggau semengat manah entara komuniti pupu bansa,” ku iya lebuh ngulu pengawa nya begulai enggau bini iya, Puan Anita Anthony Ijan ditu, kemari.

Sama bisi datai Kaban Kunsil Nengeri (ADUN) Pakan YB Tan Sri William Mawan Ikom, ADUN Meluan YB Dato Rolland Duat Jubin, kelimpah ari Ketuai Komuniti enggau Ketuai Raban Bansa (KMKK) kandang menua DUN Tamin enggau Kaban Kunselor Kandang Menua.

Iya mega meri besai terima kasih ngagai Pemesai Pelilih Selangau, Encik Yalin Assan, begulai enggau sida sebilik sereta komuniti setempat ketegal kangau enggau pengawa nerima temuai enggau manah ke rumah iya ba Pakan.

Berebak enggau nya, Gira ngarapka pengerami Taun Baru China taun tu ulih mai pengelantang, pengerai enggau pemujur terus ngagai selampur komuniti, seraya meri selamat “Gong Xi Fa Cai” enggau “Xin Nian Kuai Le” ngagai semua ke ngintu pengerami nya. — RBI

#RuaiBeritaiban#News|ban

#Beritalban | Ruai Berita Iban

#Rinduka | #Titihka | #Kunsika

LUBOK ANTU, 19 Feb — Raban Penyaga Pengelikun Mensia Mayuh Malaysia (APM) Pelilih Menua Lubok Antu udah bejalaika Operasyen Ngiga enggau Nyelamat (SAR) hari keterubah ungkup kes siku mansa lelaki dipelaba lemas di Rumah Panjang Tisak, Ulu Skrang, Parlimen P.203 Lubok Antu, DUN N.33 Engkilili.

Nitihka ripot, kangau ngenyit diterima kena 18 Februari 2026 urung pukul 4.15 lemai ari mensia mayuh ke madah ngagai sida, mansa, Denickles Anak Lensen, 20 taun, dipelabaka lemas pengudah bot laju ke diuji iya karam urung pukul 3:51 lemai

Mansa diripotka dipeda benung kekasak ba atas ai sebedau lenyau ari peda mata.

Sepenyampau semilan iku kaban APM Lubok Antu begulai enggau tim ari Sri Aman, Polis Diraja Malaysia, Opis Bomba enggau Penyah Penusah Malaysia enggau RELA udah dianjung ngagai endur nya lalu datai urung pukul 9.20 pagi.

Penerang operasyen diatur sebedau pengawa ngiga dibagi ngagai tiga raban ti mungkur radius dua kilometer ari palan penusah nyadi.

Operasyen ngiga berengkah pukul 10.00 pagi ngena aset tanah enggau ai.

Naka pukul 11.20 pagi, nadai mansa diripot temu lalu operasyen diketuka sementara ngambika belelak sebedau disambung baru.

Nengah penerang kebukai, pengari APM Pelilih Lubok Antu, Mohtar Samat enggau Desem Samuel, madahka operasyen nya deka diteruska berenggat enggau matau enggau silik nyentuk ke bisi pemansang baru diulih.

Mensia mayuh dilalau ngambika seruran ngemeratka pengelikun maya bejalaika aktiviti ai sereta lengkas betelefon ngagai talipaun penusah ngenyit 999 nyema bisi sebarang penusah nyadi. — RBI

#RuaiBeritaiban#News|ban

#Beritalban | Ruai Berita Iban

#Rinduka | #Titihka | #Kunsika

PAKAN, 19 Feb — Kaban Kunsil Nengeri (ADUN) Pakan, YB Tan Sri William Mawan Ikom, kemari ngatur penemuai iya beserimbai enggau pengerami Taun Baru Cina di Pakan ti nyadi pengeran dikena ngelantangka ati komuniti besemak sereta ngenegapka semengat pemaik entara komuniti pupu bansa.

Iya datai begulai enggau bini iya, Datin Sri Julia, disempulang Kaban ADUN Meluan, YB Dato Rolland Duat Jubin enggau ADUN Tamin YB Ir. Christopher Gira Sambang, sereta bala pemesai perintah, ketuai raban bansa enggau ketuai raban bansa ngelingi pelilih menua nya.

Sepemanjai penemuai nya, raban nya ngena awak begulai enggau peranak menua nya, ngenataika jaku pengerami sereta betanya pasal gaya enggau pemansang komuniti dalam gaya ti mudah tang bisi reti.

Nitih ku iya, penemuai beserimbai enggau musin pengerami nyadi pelasar beguna dikena ngenegapka penyerakup rayat sereta nentuka sada nyawa komuniti terus didinga nengah chara renggat baruh.

“Pengerami baka tu patut terus nyadi jematan ti ngerapitka kaul bakih sereta nerenakka semengat begulai enggau rayat,” ku iya.

Ku iya nambah, tradisyen nemuai pengerami ngayanka pengelantang komuniti Sarawak ti seruran ngetanka nilai bebasaka pangan diri, bebatak asur enggau begulai enda ngira ari ni penatai. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

BELAWAI, 19 Feb — Siku orang berikan dikeirauka lemas pengudah iya diripotka lenyau ngenyit maya mukat undang ba kandang pantai Kampung Tepi Laut, lemai kemari.

Mansa benama Sabaruddin Awang Kamarudin, 48, peranak menua nya ari genturung pendiau tu lalu bedau ditemu pengudah operasyen ngiga enggau nyelamat (SAR) dipejalaika tekala nya pengudah penusah nya nyadi.

Ketuai Polis Pelilih Sarikei, Superintenden Aswandy Anis madah, raban sida nerima ripot pengelenyau mansa urung pukul 5.21 lemai.

“Bepelasarka saksi mensia mayuh ba endur nya, mansa dipeda lemas ngenyit seraya jari iya kepai-kepai minta bantu sebedau lenyau ari atas ai.

“Pansik tumu mega tetemuka mansa nadai ngena jaket pengelikun maya penusah nya nyadi,” ku iya ba sebengkah penerang sehari tu tadi.

Berindik ari ripot nya, operasyen SAR bersepadu diaktifka ti ngaul 61 iku pemesai polis, Opis Bomba enggau Penyah Penusah Malaysia (JBPM), Raban Pengelikun Mensia Mayuh (APM) enggau peranak genturung pendiau nya enggau bantu 19 buah bot.

Aswandy madah, radius ngiga diatu udah dikerembaika nyengkaum penyauh tiga kilometer ari endur kepenudi mansa dipeda, enggau fokus besai ba semanjai tebing tasik Kampung Tepi Laut.

Polis mega nesau mensia mayuh ti bisi penerang bekaul enggau penusah tu ngambika lengkas betanya ngagai Pemesai Pemansik Kes, Sarjan Rafiee Berawi nengah lumur 016-5227983.

Berebak enggau nya, piak bekuasa ngingatka komuniti orang berikan ngambika seruran ngemeratka sukut pengelikun, nyengkaum ngena jaket pengelikun maya di tasik dikena ngurangka risiko bebadi nyawa. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika

LUNDU, 19 Feb – Pengawa ngabang beserimbai enggau Taun Baru Cina ba kandang sitak N3 Tanjong Datu terus nyadi medium ti beguna dalam nerenakka pemereti ati sereta ngenegapka penyerakup entara komuniti pupu bansa, ku Kaban Kunsil Nengeri (ADUN) Tanjung Datu, Azizul Annuar Pehin Sri Haji Adenan.

Program Ngabang Taun Baru Cina 2026 tu, iya bisi nemuai ngagai lima palan pengentap pendiau tokoh komuniti China menua nya, nyengkaum Chairman SUPP N3 Tanjong Datu, Goh Chin Seng, Pemancha Chin Kian Ming, Penghulu Khiew Nam Fa, Kapitan Bong Chai Chin enggau Kapitan Jee Hiong Chiew.

Azizul madah, program nya ukai semina mandangka semengat pengerami nya, tang mega mandangka komitmen ketuai sitak nya terus ngelawa rayat.

Kenu ku iya, tradisyen ke diatur ninting taun nyadi pelasar dikena ngerapitka kaul entara ketuai enggau komuniti, lalu enggau nya nentuka pengelantang ke diasai di Sarawak meruan dijaga.

Gaya penemuai nya ditambah enggau sesi ngerapitka kaul sereta ngasaika pemakai, ti ngayanka penyelai Lundu nyadi pelilih menua ti kaya enggau penyelai budaya sereta semengat bebatak asur ti tinggi.

Sama bisi nyempulang program nya, Menteri Pemansang Orang Indu, Ruang Bilik enggau Komuniti ke mega Kaban Parlimen P193 Santubong, Dato’ Sri Hajah Nancy Shukri, ex-ADUN) Tanjong Datu, Datin Patinggi Datuk Amar Hajah Jamilah Binti Haji Anu, Sekretari Politik Premier Sarawak, Abang Abdul Aziz Datuk Abang Draup, Pemesai Pelilih Menua Lundu, Zulkarnain Ismail, Ketuai Komuniti enggau Ketuai Raban Bansa (KMKK), kaunselor enggau peranak menua nya.

Pengawa ngatur program tu sekali agi ngayanka tradisyen rumah tebuka enggau penemuai pengerami mengkang relevan nyadi jematan penyerakup rayat di Tanjong Datu. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 19 Feb – Chairman Kaunsil Industri Kayu Ramu Malaysia (MTIB) ke mega Kaban Parlimen Julau, Datuk Larry Sng Wei Shien udah nyuaka bantu belanja sepenyampau RM34,500 ngagai 69 iku nembiak nengah Wang Turu Pelajar Larry Sng (LSEF) ba sebengkah pengerami ditu, kemari.

Ari penyampau nya, 43 iku penerima iya nya nembiak renggat degree, 25 iku nampung pelajar diploma lalu siku agi nampung pelajar ba renggat master.

Bejaku ba pengerami nya, iya ngarapka bantu nya ulih ngelempungka tating belanja bala nembiak sereta nyadi pengeransing ngagai sida terus nyulut dalam pelajar, lalu ari nya ulih ngangkatka nama Julau, enggau Sarawak ungkup selampur.

Datuk Larry mega nyemetak madahka pemesai guna nampung pelajar ba universiti ke diempu Sarawak, kelebih agi dalam bidang Sains, Teknologi, Injinir enggau Matematik (STEM).

Ku iya, diatu perintah Sarawak nyendiaka bemacham perengka guna enggau insentif nyengkaum peluang belajar enda bebayar ungkup peranak Sarawak ti ngambi kus STEM ba palan pelajar tinggi ke diempu nengeri tu.

Nitihku iya, milih belajar di Sarawak ukai semina meri pengelebih ari sukut insentif, tang mega lebih lantang laban semak enggau diri sebilik sereta ngelimat ungkus pejalai, kelebih agi maya musin pengerami.

“Bala nembiak enggau apai indai patut berunding enggau dalam sebedau ngaga pemutus.Mayuh penguntung ulih diasaika enti kitai nyukung sereta ngena palan pelajar di nengeri kitai empu,” ku iya.

Program nya mandangka komitmen iya ti seruran ngenegapka pelajar nembiak di kandang menua Julau enggau kandang ngelingi nya. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 18 Feb — Kaban Parlimen Kapit, YB Dato Sri Alexander Nanta Linggi, bejadika Pengerami Mankung Tiang Rumah Sara ba Nanga Dendang, Ulu Wak, Pakan, kelai terima kasih ngagai komuniti Iban sereta pemungkal pengidup ti lantang agi ba palan pengentap pendiau rumah panjai baru nya.

Pengerami nya mega digulu sekeda ketuai enggau orang ti dipebasa nyengkaum ADUN Katibas YB Lidam Assan, ADUN Baleh YB Nicholas Kudi enggau Sekretari Politik Menteri Kereja Raya Alvin Runggah Jimbun.

Dalam jaku dipansutka iya, Nanta ngenataika pengaga ati ngagai peranak Rumah Sara ti udah mujur nembuka rumah panjai baru ti bisi 31 pintu, bilik, penuh enggau perengka guna pemun nyengkaum kuasa karan, ai beresi enggau jalai semin nuju mua rumah.

Nitih ku iya, pemujur nya mandangka penyulut ti enda ngetu ba pemansang infrastruktur menua pesisir asil ari pengawa begempung perintah enggau komuniti.

Iya mega meri pengaga ati ngagai Sagu Anak Unting ke udah dipadu nyadi Direktor Wilayah URDA, seraya ngarapka palan pengentap pendiau baru nya seruran diisi enggau pemaik sereta pengelantang.

Berebak enggau nya, iya ngemeratka pemesai guna komuniti menilai guna ba jeman teknologi moden enggau pemintar tiru ngambika enda mudah tepejuh enggau berita ti enda dientaska ti tau ngeruga penyerakup.

Iya mega meri pengaga ati ngagai iring Premier Menua Sarawak Datuk Patinggi Tan Sri (Dr) Abang Haji Abdul Rahman Zohari

Bin Tun Datuk Abang Haji Openg, ti kenyau ari taun 2017 udah meri kelala bemacham inisiatif nyengkaum numbuhka ejensi pemansang kandang menua baka MIRDA dikena ngenyampatka pemansang menua pesisir.

Agih belanja sepenyampau RM1.5 bilion ngagai ejensi ke bekaul ku iya, nyata ngayanka komitmen perintah ba pengawa ngangkatka sosioekonomi rayat nyengkaum ba kandang menua Kapit.

Iya nyemetak madahka politik patut nyadi pelasar pemansang, ukai penyarut, lalu nesau semua piak enda ngira parti nyengkaum Gempung Parti Sarawak (GPS) terus bekerejasama ngetanka hak Sarawak sereta meransang pemansang nengeri ungkup pengelantang rayat. -RBI

#ruaiberitaiban#newsiban#beritaiban

Rindu | Titih | Kunsika

SPAOH, 18 Feb — Penatai Sapit Premier Sarawak, YB Datuk Amar Douglas Uggah Embas begulai enggau bini iya, Datin Amar Dato Doreen Mayang ngerichahka pengerami Taun Baru China ke diatur komuniti Cina di Spaoh sehari tu, lalu enggau nya mandangka semengat penyerakup enggau pengelantang komuniti pupu bansa ba Sarawak.

Penemuai nya mega disempulang Kaban Parlimen Betong, YB Dato Dr. Richard Rapu, enggau Sekretari Politik gagai Premier Sarawak, Roseline Mapong Sabai, ke sama bela ngerichah pengerami enggau pemanah ati.

Sepemanjai penemuai nya, Uggah bepeluang begulai enggau komuniti, ngenataika jaku pengerami sereta nanya pasal bekaul pemansang kemaya hari ba genturung pendiau nya.

Penatai iya dipeda nyadi kelai pengibuh ketuai nengeri ngagai rayat ti bemacham penatai asal, setipak enggau aspirasyen deka ngenegapka penyerakup enggau pengelantang rama. — RBI

#RuaiBeritaiban#Newslban

#Beritalban | Ruai Berita Iban

#Rinduka | #Titihka | #Kunsika