BELURU, 20 Feb — Palan Bejaga Operasyen (PKOD) Pelilih Beluru nerima kangau ngenyit ari mensia mayuh bekaul enggau kes nangkap ular ba kandang IOI Pelita Plantation Sdn. Bhd., Sejap Estate, Lot 8, 17 & 3, Batang Tinjar Baram, Miri, pukul 10.41 pagi, ditu kemari.

Skuad Alpha ti betuaika L/Kpl. (PA) Lydia Nagi Anak Keyai enggau pengering tiga iku kaban, dianjung ngagai endur nya kira-kira 30 kilometer penyauh.

Lebuh datai ba endur nya, raban nya tetemuka orang ke ngaga sebana ke nyadi mansa nadai bakal.

Skuad Alpha udah nya bejalaika operasyen khas lalu mujur nangkap siku ular kobra pemanjai lebih 3.2 meter ngena teknik nyepit enggau perengka khas.

Pengudah operasyen tembu, raban nya mulaika diri ngagai PKOD Beluru enggau selamat.

Nitihka penerang berita ari Unit Perhubungan Awam dan Dokumentasi Marudi, operasyen tu ngayanka penyikap ti seruran dipejalaika Angkatan Pertahanan Awam Malaysia di Sarawak dalam napi situasyen penusah ngenyit sereta nentuka pengelikun komuniti, kelebih agi di kandang menua pesisir. — RBI

#RuaiBeritaiban#NewsIban

#Beritalban | Ruai Berita Iban

#Rinduka | #Titihka | #Kunsika

SERIAN, 20 Feb — Penusah angus ke nyadi ba Kampung Entubuh urung pukul 4.07 lemai kena Hari Tiga tu tadi ngujungka tiga buah rumah angus lengis, tang nadai mansa diripot bakal tauka bebadi nyawa.

Kaban Parlimen Serian YB Dato Sri Richard Riot Anak Jaem nya madah, iya berumban ngelawa endur nya pengudah nerima penerang bekaul penusah nya dikena beratika baru gaya ke nyadi diatu sereta nentuka pengelantang pendiau peranak ke dituntung penusah nya diberi perati ke patut.

Iya mega ngenataika pengaga ati iya ngagai peranak genturung pendiau ti bejalaika pengawa enggau lengkas sereta raban ari Balai Bomba enggau Penyah Penusah Serian ti bebendar gawa nagang sereta madamka api enggau efektif.

Kebuah penusah nyadi agi benung dipansik piak bekuasa. —RBI

#RuaiBeritaiban#NewsIban

#Beritalban | Ruai Berita Iban

#Rinduka | #Titihka | #Kunsika

Sumber, photo — Dato’ Sri Richard Riot Jaem

SERIAN, 20 Feb — Raban Penyaga Pengelikun Mensia Mayuh Malaysia (APM) Pelilih Serian udah bejalaika operasyen matau ba sekeda kandang endur ti berisiko ampuh bah kena Hari Empat dikena beratika gaya ke diatu sereta nentuka pengelikun peranak dijaga.

Operasyen ke berengkah urung pukul 4.56 lemai nya mungkur tiga endur iya nya Kampung Mundai, Kampung Kerumboi enggau Kampung Simpok.

Tim nya datai ba palan keterubah pukul 5.23 lemai sebedau tembu pengawa matau pukul 9.30 malam.

Asil pansik nya tetemuka 17 buah rumah di Kampung Mundai, empat buah di Kampung Kerumboi enggau tiga buah rumah di Kampung Simpok diripotka ampuh bah.

Taja pia, tikas ai ba semua kandang endur ngayanka gaya surut lalu gaya jalai alun agi ulih ditengah perengka pengangkut.

Sepemanjai pengawa matau nya, gaya hari diripotka ujan bangat.

Operasyen nya ngaul tiga iku raban APM enggau sukung logistik nyengkaum perengka pengangkut pacu empat roda, perengka nyukat tikas ai, vest pengelikun enggau kereban ujan dikena nentuka pengawa matau ulih dipejalaika enggau likun sereta efektif.

Nitihka ripot rasmi, gaya ba endur ke bisi kaul nya dalam gaya ke manah sereta dijaga enggau nadai sebarang penusah ke ngaul mensia mayuh.

Naka ke diatu, nadai Palan Pengenduh Sementara (PPS) udah dibuka, lalu pengawa matau ari sesiti maya ngagai sesiti maya deka terus dipejalaika ari sesiti maya ngagai sesiti maya dikena nentuka pengelikun komuniti setempat dijaga. — RBI

#RuaiBeritaiban#News|ban

#Beritalban | Ruai Berita Iban

#Rinduka | #Titihka | #Kunsika

BAU, 19 Feb — Polis udah nangkap tujuh iku lelaki peranak menua nya ke beumur entara 22 ngagai 39 taun dalam operasyen ngenyit bekaul enggau pengawa salah guna dadah ngelingi Kampung Serikin tumu pagi tadi.

Ketuai Polis Pelilih Bau, P/SUPT Mohd Haide bin A. Rahman madah, operasyen ke dipejalaika urung pukul 5.45 pagi nyentuk 6.30 pagi nya ngaul raban ari Bagi Tasat Jenayah Narkotik begulai enggau tim ari Indu Opis Polis Pelilih Bau.

Nitihku iya, asil peresa tetemuka siku ari saspek ngembuan ‘keranjang timah’ bechura mirah enggau pirak ti ngundan lima igi pil Erimin 5 enggau bungkus plastik lutsinar ti ngundan gumpal kristal ti dipelaba syabu.

Saspek ditan ari baruh Seksyen 12(2) Akta Dadah Berbahaya 1952 ketegal ngembuan utai ke ditagang nya.

“Peresa ai kemi keterubah ba semua tujuh saspek tetemuka sida positif dadah lalu udah nya ditangkap ari baruh Seksyen 15(1)(a) akta ke sama,” ku iya nengah siti penerang sehari tu.

Iya nyemetak madahka Polis Diraja Malaysia deka terus chakah agi bejalaika operasyen sereta bejalaika atur ke terit ngagai sebarang individu ke bisi kaul enggau salah guna dadah.

Mensia mayuh ke bisi penerang bekaul enggau aktiviti dadah tau ngenataika nya nengah talipaun JSJN Bukit Aman ba lumur 012-208 7222 tauka talipaun IPK JSJN Sarawak ba lumur 017-592 9211 dikena mantu pengawa ngemuntanka penyalah narkotik. — RBI

#RuaiBeritaiban#News|ban

#Beritalban | Ruai Berita Iban

#Rinduka | #Titihka | #Kunsika

LUBOK ANTU, 19 Feb – Siku indu peranak menua tu ke beumur urung 30 taun udah ditan polis ketegal dipelabaka bisi kaul enggau pengawa nipu nengah online ti ngaul pengerugi lebih RM35,500.

Pengawa ngetan nya digaga seraban pemesai enggai raban polis ari Indu Opis Polis Pelilih (IPD) Lubok Antu dalam operasyen di Engkilili, lemai tu tadi.

Operasyen nya betuaika Inspektor Muhammad Asyraf Azmi ke nyadi Ketuai Bagi Pansik Penyalah Komersial pelilih menua nya.

Nitihka penerang, saspek dipelabaka nyadi “keledai akaun” ungkup dua kes ke bebida iya nya Love Scam enggau pengawa nipu e-dagang ke diripotka di Pulau Pinang enggau Sabah.

Duit orang kena tipu dipelabaka diberi ngagai akaun bank saspek sebedau dipindahka ngagai piak bukai.

Polis pechaya pengawa keledai akaun nya dikena sebuah sindiket dikena ngaburka pansik lalu ngasuh tusah deka tetemuka ‘orang belakang’ ke bendar dalam pengawa nipu nya.

Berebak enggau nya, Polis Diraja Malaysia (PDRM) ngelalau mensia mayuh anang sepeneka ati nyerahka akaun bank, kad ATM tauka penerang bank ngagai sebarang piak laban pengawa ke baka nya ulih narit orang ke ngempu akaun nya ngagai aktiviti jenayah.

Kes tu dipansik ari baruh Seksyen 424B Kanun Keseksaan ti nyendiaka ukum jil nyentuk tujuh taun tauka ukum mata duit maksimum RM100,000 tauka kededua ukum enti dikenuku salah.

Pansik ke silik agi benung dipejalai dikena ngelala rentayan sindiket ke bisi kaul. -RBI

Sumber IPD Lubok Antu

#ruaiberitaiban#newsiban#beritaiban

Rindu | Titih | Kunsika

ENGKILILI, 19 Feb – Operasyen ngiga enggau nyelamat (SAR) udah dipejalaika dikena ngiga siku lelaki beumur 84 taun ti diripotka lenyau pengudah pansut ari rumah panjai iya di Skim Skrang laban deka berubat ba sebuah klinik, Hari Tiga tu tadi.

Tudah benama Igoh Sengaling dipadahka mupuk urung pukul 7 pagi ngena perau iya nuju ngagai Klinik Skim Skrang laban deka ngambi ubat.

Taja pia, iya enda mulaika diri ke rumah ngujungka sida sebilik irau ati.

Ripot polis udah nya digaga anak lelaki iya pengudah pengawa ngiga keterubah dipejalaika enggau peranak rumah panjai sereta ba kandang genturung pendiau ke besemak pengelama dua hari nadai meri asil.

Nitihku pengari Palan Operasyen Opis Bomba enggau Penyah Penusah Malaysia (JBPM) Sarawak, opis nya nerima kangau bekaul enggau penusah nya urung pukul 9.07 malam Hari Empat tu tadi sebedau Tim Operasyen ari Balai Bomba enggau Penyah Penusah Betong dianjung ngagai endur nya.

Raban nya betuaika PBK I Yusuf Tamin enggau tiga iku kaban enggau lengkas ngesah kia.

Lebuh datai ba kandang endur nya, tim nya dulu ngulihka penerang silik ba Balai Polis Skim Skrang sebedau merambu atur nangkan nya.

Penyauh balai bomba enggau endur penusah nyadi dipelabaka urung 21 kilometer. Operasyen SAR diatu agi ba renggat tumu enggau fokus meresa jalai sungai enggau kandang ngelingi rumah panjai iya.

Mensia mayuh ti bisi penerang bekaul enggau peranak orang tuai umur tu ti lenyau nya dipinta lengkas ngenataika penerang nya ngagai piak bekuasa ngambika ulih mantu ngenyampatka pengawa ngiga iya. -RBI

Sumber TVS

#ruaiberitaiban#newsiban#beritaiban

Rindu | Titih | Kunsika

PAKAN, 19 Feb – Orang indu terus diaku nyadi orang ke beguna sereta mantu dalam pengawa ngatur rumah panjai, kelebih agi dalam nentuka pengelantang enggau pemansang komuniti seruran dijaga.

Pekara tu dikemeratka Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan, Tan Sri William Mawan Ikom lebuh bejaku ba Program Bejadika Biro Indu Rumah Mancha di Supi Atas Pakan kemari.

Program tu ukai semina ngelai penumbuh Biro Indu Rumah Mancha enggau rasmi, tang mega nyadi pelasar dikena ngenegapka penyerakup enggau semengat kerejasama peranak Supi Atas, Pakan.

Nitih ku iya, pangku pengawa orang indu dalam struktur pentadbiran rumah panjai ukai semina mantu aja, tang mega nyadi penggerak ke besai dalam bejalaika aktiviti rama enggau ekonomi ruang bilik.

“Orang indu chukup beguna dalam pengawa ngatur rumah panjai laban sida tu mih ti ngatur pengidup ninting hari sereta ngenegapka pengelantang komuniti.

“Taja pia, sida mega dilalau bekerejasama rat enggau Komiti Pemansang enggau Pengelikun Genturung Pendiau (JKKK) sereta ejensi ti bekaul ngambika ulih merambu pemansang ti lebih betukuh sereta ngasi,” ku iya.

Iya mega bisi ngenang pasal pematut ngulihka penerang ti betul sereta enda teparuk enggau berita selebubu ngapa tauka penerang ti enda tentu, kelebih agi jeman digital kemaya hari tu.

Berindik enggau nya, aspek literasyen digital patut ditegapka agi ngambika komuniti menua pesisir enda tinggal ari arus pemansang teknologi.

Berebak enggau nya, Mawan ngemeratka pemesai guna perengka guna pemun baka jalai kebun ti ulih nyungkak produktiviti sereta ngemudahka pengawa ngangkut produk betanam betupi peranak menua nya.

Kelai komitmen ngagai pemansang menua pesisir, iya madahka agih belanja penyampau RM100,000 ari baruh Projek Transformasyen Menua Pesisir (RTP) dikena bejalaika projek ngaga jalai kebun di Rumah Mancha, Supi.

Iya mega ngingatka bala komuniti ngambika enda ngemeratka diri empu sereta pambar, tang terus beserakup sereta bekerejasama dalam ngemansangka rumah panjai enggau kandang menua sida empu. -RBI

#ruaiberitaiban#newsiban#beritaiban

Rindu | Titih | Kunsika

SIMUNJAN, 19 Feb – Enam iku individu bakal ba penusah aksiden ti ngaul sebuah kerita Perodua Axia enggau sebuah kerita Perodua Bezza di Jalai Sungai Nibong Sebangan, lemai tu tadi ti ngasuh peranak menua nya begau.

Nitihka penerang ari Palan Gerakan (PGO) JBPM Sarawak, kangau ngenyit bisi diterima urung pukul 3.03 lemai. Seraban bomba ari BBP Simunjan terus dianjung ngagai endur nya.

“Nadai orang tepekul.Semua sida mujur pansut kediri sebedau dibantu mensia mayuh sereta diperesa Opis Menteri Pengerai,” ku penerang rasmi.

Semua sida ke aksiden udah dibai ngagai Sepital Simunjan ngambika diperubat enggau silik agi.

Operasyen nya tembu urung pukul 4.20 lemai pengudah pengawa meresi jalai nya tembu lalu jalai nya dientaska likun ditengah penguna.

Pia mega, chara bomba gawa ngayanka penyikar pengawa JBPM enggau kerejasama mensia mayuh dalam nentuka pengelikun orang ke aksiden. -RBI

Penatai TVS

#ruaiberitaiban#newsiban#beritaiban

Rindu | Titih | Kunsika

TEBEDU, 19 Feb – Tiga ruang bilik di Kampung Entubuh nadai endur diau pengudah penusah angus rumah penusah ke nyadi lemai kemari.

Kaban Kunsil Nengeri (ADUN) Tebedu Dr Simon Sinang Bada terus nurun ngagai palan nya pagi tadi laban deka ngabas kediri empu gaya ba palan penusah nyadi sereta betemu enggau sida ke tasah.

Ba penusah ke nyadi kena 18 Februari tu tadi, rumah enggi Senawi anak Lang, Elton anak Enam enggau Joki anak Jaban diripotka abis lengis. Taja pia, nadai penusah bebadi nyawa diripot nyadi.

Sama bisi datai ba penemuai nya, Pemesai Opis Pelilih Tebedu Gerald George Entigar enggau pengari ari Opis Pengintu Pengelantang Pendiau Mensia Mayuh (JKM) ti bejalaika pengawa enggau lengkas nyuaka bantu pemakai rangkai enggau barang ke diguna ngagai ruang bilik ke bisi kaul.

Nitihka penerang JKM, tetiap ruang bilik deka nerima bantu belanja sepenyampau RM10,000 ungkup tuju meli kereban dikena ngaga baru rumah ke udah angus nya.

Dr Simon madahka, iya deka terus matau pejalai bantu nya sereta minta sukung tambah enti diguna.

“Kitai deka nentuka pengelantang pendiau ruang bilik ke bekaul terus diberi perati ngambika sida ulih mantu baru enggau naka pengelengkas,” ku iya.

Penusah angus nya nyadi siti agi pengingat ke beguna bekaul enggau pematut atur pengelikun enggau nyikap komuniti napi sebarang penusah ke tau nyadi. -RBI

#ruaiberitaiban#newsiban#beritaiban

Rindu | Titih | Kunsika

LAWAS, 19 Feb – Jalai ti nyambung Sekula Kebangsaan (SK) Long Sebalang ngagai Kampung Long Ugui diatu dalam gaya rusak enggau belubang sereta enda rata ti ngeruga pengelikun penguna.

Isu tu dibantaika Ketuai Pampang Parti Keadilan Rakyat (PKR) Lawas, Zahid Matserudin, iya ngansak ejensi ke bekaul ngambika lengkas nurun lalu berati sereta bejalaika pengawa ngemanah enggau lengkas.

Nitihku iya, gaya jalai ti rusak ukai semina ngenusahka peranak mindah kin kitu ninting hari, tang mega nambahka risiko penusah aksiden, kelebih agi ngagai sida ti bekenaka mutosikal enggau perengka pengangkut ke lempung ti nengah jalai nya ninting hari.

“Maya ujan tauka maya malam hari, lubang pedis dipeda sereta tau ngundang penusah ke enda dikedekaka nyadi.

“Mayuh peranak menua nya nanggung ungkus nukar taya pechah, rim bingkuk enggau pengerusak bukai ketegal ngelantak lubang ke dalam ti enda entu ulih diseliah,” ku iya nengah sebengkah penerang sehari tu.

Iya nyemetak madahka sebarang kereja ngemanah meseti dipejalaika nitihka spesifikasyen teknikal ke udah ditetapka, nyengkaum ngaga pelasar jalai ke tegap, ngena kereban ke bekualiti sereta sistem parit ke ulih diguna enggau manah.

“Pengawa nampal sementara ukai chara mutarka penanggul.Enti enda digaga enggau meruan, pengerusak nya deka nyadi baru lalu rayat deka majak ditating,” ku iya.

Ku iya nambah, jalai alun nyadi perengkaguna besai ti nyambung peranak menua pesisir ngagai aktiviti pelajar, pengerai enggau ekonomi.

Nya alai, pengawa enggau lengkas sereta pengawa matau enggau silik beguna dikena nentuka pengelikun enggau pengelantang komuniti lokal dijaga. -RBI

Penatai Utusan Borneo

#ruaiberitaiban#newsiban#beritaiban

Rindu | Titih | Kunsika