SRI AMAN, 5 April — Raban Balai Bomba enggau Penyah Penusah (BBP) Sri Aman bejalaika pengawa enggau lengkas mutarka penangul pun kayu ke tumbang ke benung ngempang jalai nuju sebuah rumah di Kedang, pagi tadi.

Nitihka penerang Komander Operasyen, PBK I (TBK I) Mohd Fadhli bin Buyong, raban iya nerima kangau ngenyit urung pukul 8.39 pagi sebedau tekala nya ngatur raban ngagai endur penusah nya nyadi.

“Lebuh Raban Timbal Operasyen (PKO) datai ba endur nya, ditemu endang amat bisi pun kayu tumbang ngempang jalai nuju rumah orang ke ngaga sebana.

Raban nya udah nya bejalaika pengawa netak, ngupas enggau meresi ngena chinsaw seraya ngena perengka pengelindung diri (PPE) ke lengkap,” ku penerang nya

Ku iya, operasyen nya bejalai enggau lanchar sereta mujur ditembuka enggau nadai sebarang penusah ke enda manah nyadi.

“Pengudah nentuka nadai agi risiko penusah ba endur nya, raban nya ngeripotka diri pulai baru ngagai stesyen nya,” ku iya.

Berebak enggau nya, iya mega madahka operasyen nya napi sekeda pemar berindik ari jalai sempit nuju palan penusah nyadi sereta enda engkeman ditengah perengka pengangkut ke besai sereta tinggi.

Nadai penusah bakal diripotka nyadi ba penusah nya. — RBI

MATU, 5 April — Penusah babas angus ke nyadi ba kandang pendam Kampung Pergau ditu mujur dirara enggau jampat Raban Penyaga Pengelikun Mensia Mayuh Malaysia (APM) Pelilih Matu sehari tu.

Nitihka penerang ari Palan Kawalan Operasyen (PKOD) Pelilih APM Matu, piak nya nerima kangau ngenyit bekaul enggau penusah nya sebedau seraban dianjung ngagai endur nya ngambika atur jampat dipejalaika.

“Lebuh datai ba endur nya, ditemu penusah angus nya mungkur kandang babas ngelingi pendam nya.

“Raban APM bejalaika pengawa enggau jampat bejalaika operasyen madam enggau nagang api dikena nyeliahka api ari nyerarai ngagai kandang endur ke besemak,” ku penerang nya.

Operasyen madamka api bejalai enggau lanchar lalu api ulih dijaga enggau penuh dalam timpuh ke pandak.

Nadai mansa diripotka bisi kaul enggau penusah nya lalu kandang endur nya dientaska likun pengudah diperesa enggau silik agi.

Berindik enggau nya, mensia mayuh dilalau ngambika seruran bejejaga ari risiko angus kelebih agi maya hari angat enggau kemarau, lalu lengkas ngeripot sebarang penusah ngenyit nyadi ngagai piak bekuasa.

Sebarang penusah ngenyit tau disalur ngagai PKOD APM Pelilih Matu nengah lumur 084-832208. — RBI

KANOWIT, 5 April — Penumbuh Gerempung Ketuai Komuniti Ngemah Hilir nyadika singkang ke besai reti nuju pengawa ngenegapka penyerakup sereta koordinasyen nyadi ketuai komuniti ba renggat baruh ba kandang menua nya.

Gerempung tu ditumbuh enggau rasmi nengah aum khas ke diatur ba Dewan Serbaguna SPS Nanga Ngungun, pagi tadi, ke digulu Kaban Kunsil Nengeri (ADUN) Ngemah, Anyi Jana, ke bela meri sukung penuh ngagai inisiatif nya.

Dalam jaku dipansutka iya, iya ngenataika tabi puji enggau pengaga ati ngagai semua Penghulu enggau Tuai Rumah ketegal komitmen tinggi sida dalam ngamatka penumbuh gerempung nya, ti digambarka siti singkang strategik dalam nyerakupka iring Ketuai Komuniti enggau Ketuai Raban Bansa (KMKK).

“Penumbuh gerempung tu nyendiaka pelasar ke lebih bestruktur dikena ngatur pengawa KMKK. Nengah gempung tu, sada nyawa komuniti ulih dikenataika enggau lebih efektif ngagai raban ke bisi pemerat,” ku iya.

Ku iya nambah, pemisi gerempung tu mega beguna dalam nentuka tetiap isu enggau guna rayat ba renggat genturung pendiau enggau rumah panjai ulih dikemeratka enggau kolektif sereta sistematik.

Ngenang sukut pemansang, iya madahka semua Komiti Pemansang enggau Pengelikun Genturung Pendiau (JKKK) rumah panjai di Ngemah Hilir udah nerima projek ari baruh Program Transformasyen Menua Pesisir (RTP).

Projek ke dikerandau diatu benung dalam mayuh bengkah renggat dipejalaika nyengkaum projek ke udah tembu, benung dipejalai sereta ke udah dikemendar sereta nganti dipejalaika ejensi ke bekaul.

Ba aum ke sama, raban ketuai serakup nya dipilih enggau sepenemu ti mandangka semengat pengarap ti tinggi entara bala ketuai komuniti.

Tuai Rumah Kulleh Jabu dipadu nyadi Chairman, lalu ditangkanka Tuai Rumah Saini nyadi Sapit Chairman.

Pangku pengawa Sekretari dipegai Tuai Rumah Juro disaup Tuai Rumah Merebai nyadi Sapit Sekretari, lalu Tuai Rumah Linggi Sawing dipadu nyadi Tukang Wang enggau Tuai Rumah Baginda nyadi Sapit Tukang Wang.

Sama bisi datai Puan Gelim Utan, bini Kaban Kunsil Nengeri (ADUN) N.49 Ngemah, Penghulu Pree Minggat, siku penghulu kandang menua enggau Kaunsilor Mutang Karani.

Penumbuh Gerempung Ketuai Raban Bansa Ngemah Hilir dikearap ulih nyadi peyungkaj ngagai pemansang komuniti ti lebih bestruktur, kelimpah ari ngerapitka kaul kerejasama entara ketuai komuniti enggau ejensi perintah ungkup pengelantang rayat selampur. — RBI

SIBU, 5 April — Penanggul bekal ai di Sibujaya sekali agi nyadi batang sebana peranak lebuh penemuai pemanah ati beserimbai enggau musin pengerami kemari betukar nyadi sesi sebana bebala mayuh.

Nitihka penerang ari Dato’ Seri Tiong Kin Sing, “Kemari, aku bisi ke Sibujaya nemuai beserimbai enggau musim pengerami, tang utai ke dipelabaka penemuai enggau ati ti manah nyau betukar nyadi ‘sesi sebana bebala mayuh’; ari rumah ke rumah, utai ke dikerandauka ukai agi pengerami, tang pengawa penangul ai.

“Tu ukai agi kes kediri, tang krisis dalam pengidup rayat ti mungkur serata Sibujaya.”

Iya nyemetak madahka penanggul tu udah lama nyadi lalu pengawa ke dipejalaika agi bedau mutarka isu nya enggau penuh.

“Opis Menteri Perengka Guna enggau Telekomunikasyen (MUT) Sarawak enggau tu dipinta lengkas nganjung pelin mutar ke amat efektif dikena mutarka enggau penuh penanggul bekal ai tu.

“Anang semina bejaku pasal bekal ai tang nadai ngambi tindakan sekali.

Penanggul pemun rayat tu ukai semina enda teputar tang majak balat.”

Dato’ Seri Tiong mega bisi mantaika empas penanggul bekal ai ngagai pengidup ninting hari peranak menua nya.

Pengawa ai tejanggal tu ngujungka rayat idup tusah. Tebal agi peranak diatu dipejal meli ai mineral ari supermakit dikena nyumai.

Ukai semina nya aja, lebuh pengawa penangul nya majak nyadi, orang dagang mega enda ulih bejalaika pengawa dagang baka selama lalu daya idup sida majak tekeruga.

“Lebih balat agi, aku mega bisi nerima sebana taja pan nadai ai, meter ai agi bejalai lalu chaj agi diberi.”

Iya mega ngingatka pekara tu kala dibantai sebedau tu ba Dewan Undangan Nengeri (DUN)

“Aku udah suah mantaika isu bekal ai di Sibujaya nyengkaum ba bulan November 2023 ba Dewan Undangan Negeri, minta penanggul tu diberi perati sereta diputarka.

“Nama asil iya? Ukai pengawa tang nyangkal, ukai chara mutarka tang tuduh ti madahka isu tu nadai lalu aku dikumbai ‘ngaga cherita’.

“Pekara ke amat, penanggul bekal ai tu udah nyadi baru kenyau ari bepuluh taun tang majak ditangguh sereta enda dikeibuhka.” ku iya.

Iya nyemetak madahka rayat minta hak sida ke pemadu beguna, iya nya bekal ai ke entap.

“Utai ti dikedeka rayat semina pekara ti pemadu pemun, iya nya bekal ai ti entap.

Taja pia, piak bekuasa majak meri mayuh macham dalih, kekadang paip meletup, kekadang pejalai arus ai baruh, ninting hari sida nekan enggau narit enggau dalih baru, lalu indah guna bekal pemun tu diperubat enggau enda bejimat.”

Dato’ Seri Tiong mega minta piak bekuasa nyengkaum Premier Sarawak, YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg, masuk champur terus mutarka isu tu.

“Kitai suah ngenataika rambai jaku ‘Sarawak First’ sereta besemaya enda melakangka infrastruktur pemun.

“Rayat diatu minta semaya tu dikeamatka lalu krisis bekal ai ti lama tu diputarka enggau penuh.” ku iya.

Penerang tu ngemeratka isu bekal ai nyadi pekara ti pemadu diguna rayat lalu pengawa jampat diguna dikena nentuka pengidup rayat Sibujaya enda tekeruga agi. — RBI

MIRI, 5 April — Balai Bomba enggau Penyah Penusah (BBP) Sentral Miri udah bejalaika operasyen nyelamat ti ngaul siku peniki bukit ti diripotka luput maya bejalaika aktiviti di Taman Negara Lambir, lemai kemari.

Nitihka ripot, Balai Bomba enggau Penyah Penusah Miri Sentral nerima kangau ngenyit urung pukul 6.30 lemai madahka bisi tiga iku orang ke niki bukit ba kandang taman negara nya, enggau siku ari sida nya diripotka luput maya bejalaika aktiviti trekking.

Siku ari bakih tudah pansut ari jalai niki minta bantu, kelimpah ari madah ngagai piak bekuasa bekaul endur tudah enggau gaya nya.

Berindik ari nya, lima iku raban Tim A betuaika PBKIITBKI Jukernain bin Jon begulai enggau enam iku raban Tim B betuaika PBKIITBKI Stanley Paul udah dianjung ngagai endur penusah nya nyadi.

Operasyen nya mega dibantu lima iku renjer Taman Negara Lambir.

Raban penyelamat mujur tetemuka tudah dalam gaya sedar tang agi lemi. Mansa udah nya diiring pansut lalu diripotka ulih bejalai kediri nyentuk datai enggau selamat ba indu opis taman negara.

Operasyen nyelamat nya tembu enggau penuh urung pukul 3.05 pagi.

Sama bisi ba endur nya raban Polis DiRaja Malaysia (PDRM) mantu ngelanchar operasyen nya.

Mensia mayuh dilalau ngambika seruran ngemeratka sukut pengelikun maya bejalaika aktiviti rekreasyen ba kandang kampung, nyengkaum nentuka pengerai sida dalam gaya ke manah sereta madah ngagai piak ke bekaul pasal pemindah sida. — RBI

SELANGAU, 5 April — Program MyLesen DUN Tamin sehari kemari ngayanka pemanah lebuh mujur matak 595 iku pesereta ti mungkur raban nembiak ke beumur 16 taun enggau orang besai tuai dalam pengawa ngulihka Lisin Mutosikal Kelas B2 enggau entas.

Program tu dipejalaika nengah kerejasama strategik entara Palan Servis DUN Tamin, Opis Perengka Pengangkut Jalai (JPJ) Bagi Menua Sibu enggau Institut Memandu Ngu Chung Beng Sibu.

Ari baruh iring Kaban Kunsil Nengeri (ADUN) Tamin, YB Ir. Christopher Gira Sambang, program tu dilanchar nyadi chara proaktif dikena nentuka rayat enda muai peluang ngembuan lisin deriba ti entas.

“Timbal tu mandangka pekara ti amat diguna rayat. Pengawa deka terus ditegapka enggau kerejasama ejensi ti bekaul ngambika mayuh agi peranak bepeluang ngembuan lisin deriba ti entas,” ku iya.

Iya mega nyemetak madahka ngembuan lisin ukai semina beguna ari sukut nitihka undang-undang, tang mega bejalaika tanggungpengawa dalam nambahka mobiliti sereta muka mayuh agi peluang gawa ngagai rayat.

Kelimpah ari ngemudahka proses ngulihka lisin, program tu mega ngemeratka aspek pengelikun jalai alun, nitihka atur enggau penumbuh ulah ti betanggungjawap ba penguna jalai alun.

Berindik enggau nya, pengawa ngerejista diri masuk Program MyLesen Renggat Kedua agi dibuka lalu mensia mayuh diperansang ngerebut peluang nya sebedau hari bulan tutup penyereta dipadahka.

Inisiatif tu sekali agi mandangka komitmen ketuai DUN Tamin ti terus nentuka pengelantang pendiau rayat terus dijaga nengah pengawa bejalaika program ti meri empas tinggi.

Pengerami ngelancharka pengerejista nya dipenyadi Ketuai Pampang JPJ Bagi Menua Sibu, Tuan Jelapin Anak Entalai, pengari Opis Pelilih Selangau, SAO Chua Siong Wei, Pengari Palan Servis DUN N.59 Tamin, Kr. Nyireng Saleh, Kr. Ajan Dau enggau En. Alok Meliau, Pengari Institut Deriba Ngu Chung Beng, En. Shau ​​Sing Yang enggau Tuan Daglish Anak Charles Ambing. — RBI

SELANGAU, 5 April — Raban Penyaga Pengelikun Mensia Mayuh Malaysia (APM) Selangau enggau kerejasama sekeda ejensi ke bekaul udah bejalaika Operasyen Kemarau dikena ngenegapka agi pengawa ngagihka bantu ai beresi ngagai peranak ke tasah ketegal bekal ai tejanggal berindik ari musin kemarau.

Operasyen nya fokus ngagai kandang menua Nanga Tamin enggau Stapang, ti ngaul pengawa nganjung bekal ai beresi ngagai peranak ti ngasaika pemar ngulihka pun penatai ai ninting hari.

Nitihka penerang ari APM Selangau, pengawa nyuaka bantu udah bejalai enggau lanchar sereta ulih dijaga berindik ari kerejasama rat entara ejensi ti bekaul, nyengkaum Opis Pelilih Selangau, Opis Pengintu Pengelantang Raban Bansa (JKM) Selangau enggau Polis Stapang.

“Operasyen tu dipejalaika nyadi chara tekala nya dikena nentuka utai ke diguna mensia mayuh terus dijaga sepemanjai timpuh kemarau,” ku penerang nya, kena Hari Lima.

Mensia mayuh ti betapi enggau sebarang penusah ngenyit tauka begunaka bantu bekaul, tau betanya ngagai talipaun APM Selangau ba lumur 084-891285 ti beoperasyen 24 jam.

Operasyen ke baka tu ngayanka komitmen APM ti seruran dipejalaika dikena nentuka pengawa nyikap diri napi penusah ngenyit seruran ba tikas ti optimum, setipak enggau rambai jaku “Sedia, Pantas, Berintegriti”. — RBI

LIMBANG, 5 April — Penguna jalai alun ngelingi Jalai Kubong kelebih agi ba kandang Kampung Telahak dilalau bejejaga agi berindik ari pengawa muka jalai kelaung ti ngaul jalai alun ari CH11+200 ngagai CH11+900.

Nitihka penerang ari Kaunsil Pemansang Koridor Wilayah (RECODA), pengawa muka jalai kelaung nya sebagi ari pengawa bejalaika projek pemansang Jalai Besai Menua Pesisir Utara (Northern Coastal Highway) ungkup Limbang Seksyen 1.

Berindik enggau nya, mensia mayuh ti nengah kandang endur nya dipinta nitihka semua tanda pengelikun enggau gerah trafik ti udah disediaka, kelimpah ngurangka pengelaju dikena nentuka pengelikun semua penguna jalai alun.

Atur tu beguna dikena nentuka pejalai trafik lanchar sereta ngurangka risiko penusah bebadi jalai alun sepemanjai timpuh projek dipejalaika. — RBI

KUCHING, 4 April — Aum Besai Ninting Taun (MAT) PELASAR diatur enggau mujur sehari tu ba Hotel 56, Kuching, berengkah pukul 9.30 pagi nyentuk 12.00 tengahari.

Aum nya meda pengawa nyiri Raban Komiti (AJK) baru ungkup sesi 2026/2028, lalu enggau nya ngenegapka agi iring gerempung dalam neruska agenda pemansang enggau pengelantang pendiau raban.

PELASAR ngenataika jaku pengaga ati ke pemadu tinggi ngagai semua raban Exco ke udah dichiri, kelimpah ari nyadaka pengandal ngagai pengulih ketuai ke baru megai tanggungpengawa sida enggau nyulut.

Tu rintai nama kaban Exco PELASAR ungkup sesi 2026/2028:

1. Penaung
(a). Tuan Jugah Muyang

2. Penyanding Penemu
(a). En. Mawang Kayan
(b). Kr. Gemong Batu
(c). En. Brown Sang

3. Chairman
(a). Dr. Dana Badang

4. Sapit Chairman
(a). Kr. Ts. Matthew Igoh

5. Sekretari
(a). Dr. Modin Ambau

6. Penulung Sekretari
(a).Cik Jelening Seli

7. Tukang Wang
(a). Cik Aileen Kumang

8. Sapit Tukang Wang
(a). Tuan Benjamin Kibong

9. Kaban Komiti (AJK)
(a). En. Jesley Jabu
(b). Tr. Ruekeith Jampong
(c). En. Rangga Rabit
(d). En. Robin Tubam
(e). Puan Lily Geramong
(f). Puan Christina Ngali
(g). Puan Chela Rengkang
(h). Puan Melissa King
(i). En. Geoffery Pillai

Nengah pengawa nyiri tu, PELASAR dikearap ulih terus ngenegapka pangku pengawa ngetanka pemerat kaban sereta meri bantu ngagai pemansang komuniti ti enda ngetu. — RBI

KUCHING, 4 April — Siku baya besai pemanjai 4.8 meter ditemu mati ba tebing Sungai Segubang semak Kampung Segubang, Batu Kawa, tengahari tu tadi.

Penemu baya nya diripotka siku peranak menua nya ke benung nginti udang begulai enggau anak lelaki iya ba endur nya sebedau beratika bisi bangkai jelu nya.

Nitihka penerang, baya nya dipelabaka kala diginti sebedau tu, tang tali ginti diripotka putus ngujungka jelu nya ngelarika diri sebedau pengujung iya ditemu mati ba palan penusah nyadi.

Berindik ari penemu nya, Tim Baya Sarawak (Sarawak Crocter) begulai enggau Opis Kampung Sarawak (SFC) berumban ngelawa endur nya bejalaika pengawa meresa sereta bejalaika pengawa nangkanka nya.

Dipelabaka palan penusah nya nyadi besemak enggau kandang endur siku nembiak ke diserang baya kena 27 Mac tu tadi.

Ba penusah nya, tubuh mansa mujur ditemu raban ngiga enggau nyelamat (SAR) begulai enggau sida sebilik ba hari ke sama.

Penatai siku baya besai ba endur nya sekali agi ngenataika pengirau ati peranak menua nya, kelebih agi sida ti bejalaika aktiviti ba sungai nya.

Nitihka ripot ari Utusan Sarawak, penemu baya nya udah ngenegapka agi pengirau ati komuniti bekaul enggau pemisi jelu reptilia ti ganas nya ba endur nya, lalu enggau nya minta atur matau enggau nagang ti lebih efektif ari piak bekuasa. — RBI