TADA, 21 Feb – Sepenyampau RM16 juta udah diungkupka ari baruh Projek MiRRDA ungkup kandang menua Rascom, ti ngaul RM10 juta ungkup kereja nukar atap enggau RM6 juta ungkup pengawa ngaga baru wayar rumah peranak menua nya.

Pekara nya dipadahka Kaban Kunsil Nengeri (ADUN) sitak Ngemah, Anyi Jana lebuh ngulu Program Belepa begulai enggau komuniti menua nya lalu udah nya bejadika Komiti Pemansang enggau Pengelikun Genturung Pendiau (JKKK) Rumah Bulan, Tada.

Nitih ku iya, inisiatif nya betuju ngangkatka tikas pengelikun enggau pengelantang peranak menua pesisir setipak enggau agenda pemansang perintah.

Dalam jaku iya, iya mega ngemeratka pemesai guna beratika konsep Malaysia MADANI ti bepelasarka nilai pemereti ati, bebasa, nerima sereta ngerami bida dalam pengidup komuniti dikena nentuka penyerakup meruan tegap.

Iya mega ngaitka pengawa bejalaika projek ari baruh Program Transformasyen Menua Pesisir (RTP) enggau begunaka atur dalam bejalaika pengawa ti betul, nyengkaum dalam proses milih enggau nyiri Ketuai Komuniti enggau Ketuai Raban Bansa (KMKK).

Ngenang sukut pelajar, iya madahka berengkah ari taun 2026, pelajar ba Palan Pelajar Tinggi Awam (IPTA) deka disedia enggau enda bebayar ngagai raban ke patut.

Berebak enggau nya, iya mega bisi nyendiaka insentif khas dikena mantu nembiak ba kandang menua nya nampung pelajar sida.

Pengerami nya mega digulu SAO Clinton, Pemancha Charlie, Penghulu Ugap, Penghulu Pree lalu urung 30 iku tuai rumah, pengari Pampang Khas enggau pemesai UPKS.

Ba hari ke sama, iya mega bisi ngaga penemuai ngagai sekeda rumah panjai ngelingi Nanga Tada dikena betemu enggau peranak sereta mendingka guna kandang menua nya.

Program tu mandangka pengawa ti seruran dipejalai dalam ngerapitka kaul entara ketuai enggau rayat sereta nentuka pemansang menua pesisir terus diberi perati. -RBI

BANGKOK, 21 Feb – Siti taktik nyaru diri ke nyelai dikena polis di Bangkok lebuh raban penerit atur nyaru diri nyadi petanda singa beserimbai enggau pengerami Taun Baru Cina dikena nangkap siku lelaki ke dipelaba bisi kaul enggau sekeda kes nyerungkai rumah di Bangkok enggau Nonthaburi.

Nitihka rikod ke dikunsi Polis Metropolitan Bangkok, sekeda pemesai dipeda belalai ba belakang ngepan singa mirah enggau emas sebedau berinsur mansang semak ngagai saspek maya pengerami kuil di Nonthaburi.

Lebuh penyauh nyau majak semak, pemesai ke megai pala singa nya bejalaika pengawa enggau jampat lalu ngenyit pansut lalu nangkap saspek sebedau iya ulih ngelarika diri, lalu enggau nya ngujungka pengawa ngiga orang ke udah dipejalaika kenyau ari pun bulan tu tadi.

Saspek ke beumur 33 taun nya dipelabaka udah tiga kali nyerungkai rumah siku pemesai kanan polis di Bangkok lalu ngelarika diri enggau barang emas sereta reta tengkira ke dipelabaka berega lebih dua juta baht (urung RM250,000).

Polis Thailand madahka, pengawa nguji nangkap saspek sebedau tu suah enda mujur laban lelaki nya dipadahka sensitif enggau pengawa nyaru diri sereta muntang ngelala penatai pemesai pemansik.

Pansik udah nya ngujungka tetemuka sekeda barang ke dichuri nyengkaum ‘jimat’ enggau puchau ke udah dijual, lalu enggau nya mantu polis nyidi pejalai saspek ba sekeda kuil ngelingi Nonthaburi.

Polis nerangka, pengawa nyaru diri nyadi petanda singa nya dipilih laban pengawa pemerindang nya nyadi pengawa ke suah dikereja maya ngintu Taun Baru Cina, ngemendarka pemesai semak enggau tagit enggau enda ngasuh mensia mayuh nyangka.

Pengudah ditangkap, saspek diripotka ngaku nyerungkai rumah ngulihka duit dikena meli dadah enggau bejudi. -RBI

SIBURAN, 21 Feb – Siku anak baya dipelabaka pemanjai urung dua meter udah mujur ditangkap dalam operasyen Nangkap Jelu Siga (MHL) Raban Penyaga Orang Periman Malaysia (APM) di Pelilih Samarahan, lemai kemari.

Penatai jelu nya ditemu pengudah APM nerima kangau ngenyit ari peranak menua nya ti ngeripotka jelu nya nguji tama ngagai parit besemak enggau sebengkah genturung pendiau di Kampung Sindang.

Berindik ari penerang nya, seraban APM terus dianjung ngagai endur nya sebedau mujur nagang sereta nangkap anak baya nya nengah saup mensia mayuh ba kandang menua nya.

Jelu siga nya deka diserah ngagai Kaunsil Pengintu Kampung Sarawak (SFC) ngambika atur dipejalaika nangkan ke nya nyengkaum pengawa matau enggau ngatur palan.

Operasyen nya dipelabaka bisi kaul enggau penambah tikas ai ketegal ujan ke enda ngetu apin lama ke udah ti ngujungka jelu siga kelebih agi baya ngenyemakka diri enggau palan pengentap pendiau mensia.

Berindik enggau nya, APM ngingatka mensia mayuh ngambika seruran bejejaga sereta lengkas ngeripot ngagai opis bekuasa nyema bisi tepedaka jelu siga dikena nyeliahka sebarang penusah ke enda dikedekaka nyadi. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Feb – Polis udah ngetan enam iku peranak menua luar dalam pengawa datai ngenyit ngagai sebuah rumah di Jalai Stutong, ditu ke dipelabaka bejalaika aktiviti nyundal.

Ketuai Polis Pelilih Kuching, ACP Alexson Naga Chabu madah, semua individu ke beumur entara 30 ngagai 40 taun nya ditan dalam operasyen ke dipejalaika kena 20 Februari 2026.

Nitihku iya, semua sida ke ditan nya diatu diriman dikena ngemudahka pengawa mansik silik agi.

“Kes tu dipansik ari baruh Seksyen 372B Kanun Keseksaan ti nyendiaka ukum jil nyentuk setaun tauka ukum mata duit tauka kededua ukum nya.

“Iya mega benung dipansik ari baruh Seksyen 39(b) Peraturan Imigresen 1963 ketegal ngelanggar syarat pas tauka permit, ti nyendiaka ukum maksimum RM1,000 tauka jil nyentuk enam bulan tauka kededua ukum nya.

“Kelimpah ari nya, pansik mega benung dipejalai ari baruh Seksyen 6(1)(c) Akta Imigresen 1959/63 ti mai ukum jil nyentuk lima taun tauka ukum mata duit maksimum RM10,000 tauka kededua nya enggau sipat nyentuk enam kali,” ku iya nengah sebengkah penerang sehari tu.

Iya mega ngelalau mensia mayuh ngambika meri penerang bekaul enggau aktiviti nyundal nengah chara betanya ngagai Palan Kawalan IPD Kuching ba lumur 082-244444. -RBI

#ruaiberitaiban#newsiban#beritaiban

Rindu | Titih | Kunsika

MERADONG, 20 Feb – Seku lelaki beumur 20 taun udah ditan Tim Task Force Indu Opis Polis Pelilih Menua (IPD) Meradong ba Op Tapis ti dipejalaika ba kandang menua Bintangor, lemai tu tadi.

Ketuai Polis Pelilih Meradong, DSP Tansli Mering madah, pengawa ngetan nya digaga urung pukul 3.25 lemai pengudah saspek dipelaba bisi kaul enggau aktiviti salah guna dadah sebedau dibai ngagai IPD Meradong ngambika atur silik agi dipejalaika.

Nitihku iya, asil peresa ai kemi ke dipejalaika ba Opis Bagian Tasat Jenayah Narkotik (BSJND) Meradong tetemuka saspek positif Amphetamine enggau Methamphetamine.

“Meresa baru rikod ke udah tetemuka saspek ngembuan rikod penyalah dadah,” ku iya nengah sebengkah penerang sehari tu.

Ku iya, kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum enda ngelui RM5,000 tauka jil nyentuk dua taun, nyema dikenuku salah.

DSP Tansli nyemetak madahka polis beratika penyalah bekaul enggau dadah enggau berat sereta enda deka belembut enggau sebarang individu ke bisi kaul enggau pengawa ke baka nya.

“Kerejasama komuniti amat diguna dikena ngelaban penanggul dadah tu.Mensia mayuh ke bisi penerang tau ngenataika penerang ngagai Balai Polis Bintangor nengah lumur 084-693222,” ku iya. -RBI

Sumber IPD Meradong

#ruaiberitaiban#newsiban#beritaiban

Rindu | Titih | Kunsika

BINTULU, 20 Feb — Pengawa ti lengkas dipejalaika bala ketuai lebuh nerima sebana rayat nyata ngayanka tikas penyikar enggau pemerat ba ngatur pengawa nentuka pengelantang pendiau komuniti seruran dijaga.

Nitihka penerang ke ditulis Winnie Ho Chee Moi ba Facebook, atur udah dikeluarka tumu pagi pengudah pesan sebana nya diterima, lalu Opis Kereja Raya (JKR) mega bejalaika pengawa nangkan nya ba ‘lapangan’.

Iya nyemetak madahka kerejasama rat entara ketuai enggau ejensi ti bejalaika pengawa beguna amat dikena nentuka tetiap isu rayat ulih diputarka enggau ngasi sereta lengkas.

Rentayan koordinasyen ke manah ku iya, ukai semina mandangka penyikar tadbir urus, tang mega meri empas positif ngagai pengelantang pendiau komuniti.

Berebak enggau nya, iya mega madahka pengawa nyadi ketuai ti dipandangka Dato Sri Dr.Stephen Rundi Utom patut nyadika chunto laban ngemeratka pengawa ti lengkas sereta ngemeratka guna rayat.

Ku iya nambah, tetiap iku individu bisi ngemeranka pengawa, enda ngira mit baka ni.

Ulah ti betanggungjawap sereta ngena jalai ti betul dipechaya ulih ngasilka ubah ti manah sereta meri penguntung ngagai semua piak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 FEB – WAIfm Seksyen Radio RTM Kuching majak ngatur Program Lenten@WAI ke diatu masuk taun keempat dipejalaika.

Program tu nerima kerejasama LIANSIN Trading enggau sukung ari Kaban Kunsil Nengeri (ADUN) Tamin Insinyur Christopher Gira Sambang ti mega nyadi Penyanding Penemu Lenten@WAI.

Pemeri dalam tukuh bakul pemakai enggau beras diagih ngagai sida ti begunaka bantu kelai pengirau ati beserimbai enggau musim Pra-Paskah.

Kemari, program ti betuaika Menijar WAIfm, Monica Midi udah nemuai ngagai rumah Panglima Gagah Berani (PGB), Pemesai Pinchin Sarjan Dajai anak Anggie di Batu Kawa, Kuching bekaul enggau pemidang bini iya, Lemengkai anak Tamat ti udah nadai kena Hari Dua tu tadi.

Sama bisi datai Menijar WAIfm Iban Edmund Langgie enggau pengari Unit Pemasar RTM nembuka pengawa nyuaka pemeri nya.

Sarjan Dajai lebuh dikerandau RTM ngenataika pengaga ati enggau terima kasih ngagai pemeri nya, ti dikumbai iya chukup besai reti dalam ngelempungka tating pengidup sida sebilik.

Program Lenten@WAI tu beserimbai enggau musim Pra-Paskah ti diintu raban Kristian.

DIsalin ari RTM

#ruaiberitaiban#newsiban#beritaiban

Rindu | Titih | Kunsika

KOTA SAMARAHAN, 20 Feb – Opis Menteri Pemansang Menua Pesisir enggau Kandang Menua (KKDW) ngenukuka baru komitmen ngenegapka koordinasyen entara semua ejensi ti bejalaika pengawa dikena nentuka projek pemansang menua pesisir di Sarawak dipejalaika enggau lebih efisyen sereta ngasi.

Sapit Menteri iya, Datuk Rubiah Wang madah, pengawa nya dikena nentuka genap perambu enggau pengawa bejalaika projek dipejalaika enggau teratur, terang sereta amat meri empas ngagai rayat.

“Aku ngemeratka tetiap projek enggau program dipejalaika enggau teratur, terang sereta meri empas tinggi ngambika pemaik nya ulih diasaika penuh komuniti,” ku iya nengah Facebook pengudah nyadi chairman aum begulai enggau ejensi ari baruh KKDW Sarawak ba Opis KKDW Sarawak, kemari.

Iya mega ngemeratka pengawa matau ti seruran dipejalaika dikena nyeliahka penanggul laun, seriris enggau pengawa perintah ngangkatka kualiti pengawa meri servis ngagai rayat.

Berebak enggau nya, iya nerangka chara baru KKDW diatu ukai semina fokus nyendiaka infrastruktur pemun aja, tang mega mungkur pengawa ngenegapka ekonomi menua pesisir enggau pemansang komuniti chara holistik.

Dipelabaka atur koordinasyen ti ditambah nya ulih ngenyampatka pengawa bejalaika projek sereta nentuka pemansang menua pesisir di Sarawak terus setipak enggau penyulut nengeri enggau menua. -RBI

Sumber TVS

#ruaiberitaiban#newsiban#beritaiban

Rindu | Titih | Kunsika

BINTULU, 20 Feb — Kaban Kunsil Nengeri (ADUN) Kemena, Dato Sri Dr Stephen Rundi Utom, nyemetak madahka pengelikun rayat seruran dikemerat pengudah atur lengkas dipejalai dikena mutarka sebana peranak bekaul enggau pengerusak jalai alun ba kandang menua nya.

Nitihku iya, pengudah nerima timbal ari mensia mayuh, iya terus ngaga kaul enggau Opis Kereja Raya Bintulu ngambika isu nya ulih diputarka enggau enda betangguh.

Iya nyemetak madahka nadai pengawa belembut lebuh ngenang pasal pengelikun penguna jalai alun.

Iya mega meri besai terima kasih ngagai injinir pelilih menua, Lau Sie Hung, enggau selampur tim opis nya ketegal pengawa sida ti jampat sereta komitmen ti tinggi bejalaika pengawa ngemanahka nya.

Berebak enggau nya, iya meri terima kasih ngagai Winnie Hoe enggau peranak menua nya ti nyadung penerang enggau pengirau ati sida, seraya ngemeratka ripot enggau timbal ari komuniti nyadi pelasar ti beguna dalam nentuka servis ngagai rayat ulih dipejalaika enggau efektif sereta responsif. -RBI

#ruaiberitaiban#newsiban#beritaiban

Rindu | Titih | Kunsika

BETONG, 20 Feb — Polis minta kerejasama ari mensia mayuh mantu ngiga aris siku lelaki ke dikelala enggau nama Jubli ke dipelabaka beumur urung 60 taun lalu diatu benung berubat ba sepital nya.

Nitihka penerang, lelaki nya ditemu raban Penyaga Orang Periman Malaysia (APM) ba kandang Pasar MID, Betong, sebedau dibai ngagai opis penusah ngenyit ngambika diperubat enggau silik agi.

Diatu iya benung berubat ba Wad Emejinsi Sepital Betong ngambika diperati sereta diperubat nangkanka nya.

Berindik enggau nya, piak sepital enggau polis nesau mensia mayuh ke bisi penerang bekaul enggau identiti tauka aris lelaki nya lengkas datai mantu nengah chara datai terus ngagai sepital tauka ngaga kaul enggau polis pelilih menua.

Kerejasama enggau pengibuh komuniti amat diberi basa dikena nentuka individu nya ulih begulai baru enggau diri sebilik. -RBI

#ruaiberitaiban#newsiban#beritaiban

Rindu | Titih | Kunsika