KUCHING, 22 Feb – Pengudah dua hari lenyau, pengujung iya tubuh siku nembiak lelaki beumur 16 taun ke labuh ba Sungai Kolong, Sungai Tengah kena Hari Lima nyin tadi udah ditemu sehari tu.

Nitihku pengari Palan Operasyen Bomba Sarawak, tudah ditemu mensia mayuh urung pukul 11.20 pagi, urung 2.7 kilometer ari Palan Kawalan Operasyen Bomba.

“Tubuh tudah dibai ngena perau sebedau dibai ngagai pengkalan Masjid Kampung Sungai Tengah.Bala sida sebilik udah ngentaska identiti sebedau nyerahka ngagai polis ngambi atur nangkanka nya dipejalaika,” ku iya nengah penerang berita.

Tudah sebedau tu diripotka ditabanka arus deras maya bemain enggau bala bakih iya ba tebing sungai urung pukul 4 lemai Hari Lima nyin tadi.

Operasyen ngiga enggau nyelamat (SAR) tekala nya dipejalaika, lalu tembu enggau tubuh tudah ditemu pagi tadi. -RBI

KUCHING, 22 Feb – Perintah Sarawak tetap ransing nentuka bantu enggau sukung terus dikenataika belama ngagai semua orang ampuh bah, enggau ngemeratka sukut pengelikun, pengerai enggau pengelantang sepemanjai sida diau ba Palan Pengenduh Sementara (PPS).

Komitmen nya dikemendarka baru ulih Sapit Premier Sarawak, Datuk Amar Douglas Uggah Embas rambau penemuai rasmi ngagai Dewan Darul Istiqlaal Sungai Maong PPS pukul 9.00 pagi tadi.

Penemuai Uggah nya beratika gaya sida ke tasah diatu sereta nerima penerang bekaul enggau pengawa ngatur enggau atur operasyen ba palan nya.

Nitih ku iya, penemuai nya mega betuju nentuka pengelantang pendiau sida ke tasah seruran dijaga kelimpah beratika tikas penyikap ejensi ti ngaul diri ba pengawa mutarka penusah ngenyit.

Rambau penemuai nya, iya mega ngelantangka ati sida ke tasah sereta ngenataika pengaga ati ngagai raban pekereja rintai mua ti bebendar gawa nentuka operasyen bejalai enggau lanchar.

Sama bisi nyempulang iya, Sapit Sekretari Perintah (Pentadbiran) Sarawak, Datu Felicia Tan Ya Hua enggau Kaban Kunsil Nengeri (ADUN) N.8 Satok, Dato Ibrahim Baki.

Sama bisi datai Direktor Opis Entali Ai enggau Parit (DID) Nengeri Sarawak, Datu Ir. Ts. Ahmad Denney Haji Ahmad Fauzi, Sapit Direktor (Nengeri) Opis Pengintu Pengelantang Raban Bansa Sarawak, Hajah Norhayati Haji Abdul Rahman, Direktor Unit Pengelikun enggau Penerit Adat Sarawak, Opis Premier Sarawak, Haji Abdul Wahab Haji Rahim.

Bela sama enggau iya nya Residen Bagi Menua Kuching, Dayang Hajah Joanita Azizah Abang Haji Morshidi, Sekretari Eksekutif Kaunsil Pemansang Rama (MPS), Opis Menteri Pengelantang Orang Indu, Nembiak Mit enggau Komuniti Sarawak (KPWK), Riziandy Nawawi, Pemesai Raban Penyaga Orang Periman (APM) Pelilih Kuching, Leftenan Kolonel (PA) Ismail Mahedin, Pemesai Pelilih Menua Kuching, Encik Zaidi Haji Sarkawi pia mega pengari raban pengatur enggau pentadbiran Bagi Menua Kuching sereta mega ejensi ti bekaul terus enggau pengawa mutarka penusah ngenyit di Bagi Menua Kuching. -RBI

MERADONG, 22 Feb – Aktiviti bejudi nadai lisin majak nyadi tagit polis lebuh siku lelaki peranak menua nya ke beumur urung 20 taun ditan ba pengawa ngerap ngenyit ba Jalai KJD Bintangor, tengah hari kemari.

Pengawa ngetan nya digaga urung pukul 1.40 lemai ari tim pemesai enggau kaban ari Bagi Pansik Jenayah (BSJ), Indu Opis Polis Pelilih Menua (IPD) Meradong asil ari pengawa pemansik enggau pengawa matau ti dipejalaika.

Ketuai Polis Pelilih Meradong, DSP Tansli Mering madah, asil peresa saspek tetemuka sekeda perengka ke dipelabaka dikena bejalaika aktiviti judi ke enda beradat.

“Entara barang ke dirampas iya nya seunit tablet jenama Samsung, beberapa iti keretas ke bisi dichelak lumur dipelabaka lumur tikit judi ke nadai lisin enggau penyampau duit tunai.

“Semua barang nya udah dirampas ngambika dipansik enggau silik agi,” ku iya nengah sebengkah penerang, sehari tu tadi.

Nitihku iya, saspek enggau barang nya udah nya dibai ngagai Balai Polis Bintangor ngambika atur ke silik agi dipejalaika.

Kes tu dipansik ari baruh Seksyen 4A(a) Akta Rumah Judi Tebuka 1953 ti nyendiaka ukum mata duit enda kurang ari RM1,000 enggau enda lebih ari RM100,000 sereta ukum jil enda lebih ari lima taun tauka kededua ukum nya, nyema dikenuku salah.

DSP Tansli nyemetak madahka polis enda belembut ba sebarang aktiviti bejudi ti enda beradat ti tau ngeruga pengelantang pendiau komuniti.

“PDRM kelebih agi IPD Meradong ngelalau mensia mayuh anang ngaul diri enggau sebarang bansa pengawa bejudi.

“Kitai mega nesau komuniti ngambika terus meri kerejasama sereta meri penerang bekaul enggau aktiviti jenayah dikena nentuka pengelikun enggau atur mensia mayuh seruran dijaga,” ku iya nyemetak. – RBI

ROY ANGAU GINGKOI BEJADIKA PENGERAMI TAUN BARU CHINA ARI Gerempung HAKKA ENGKILILI

ENGKILILI, 22 Feb – Kaban Parlimen, Roy Angau Gingkoi udah ngulu sereta bejadika Pengerami Makai Lemai Taun Baru Cina enggau Pengerami Lambaian Kasih diatur Serakup Hakka Engkilili ti nyadi ba Dewan Kunsil Pelilih Engkilili, malam ensanus.

Dalam jaku iya, Roy mantaika pengaga ati enggau terima kasih ke pemadu tinggi ngagai kangau enggau sambut ke chukup manah ke diberi piak pengatur enggau komuniti menua nya.

Kelai sukung ngagai pengawa gerempung nya ngenegapka penyerakup sereta ngintu pengelantang pendiau komuniti, iya mega bisi madahka diri deka meri pemeri RM10,000 ngagai Serakup Hakka Engkilili.

Pengerami nya mega dirichah enggau penatai Chairman Gerempung Hakka Engkilili, Jee Jan Nam, Chairman Dipebasa, Lai Ngi Tha enggau Bong Swee Fah, Penyanding Penemu, Fam Ted Bun, Sapit Chairman, Jee Jit Shin, pia mega baris Ketuai Komuniti enggau Kapitan menua nya.

Iya ngarapka program baka tu terus nyadi pelasar dikena ngerapitka kaul, nerenakka pengelantang sereta ngenegapka semengat beserakup entara mayuh bengkah komuniti etnik di kandang menua nya.

“Gong Xi Fa Cai sereta meri pengaga ati ngagai Serakup Hakka Engkilili ketegal pengawa ngatur ti chukup manah sereta bisi reti,” ku iya. -RBI

MIRI, 22 Feb – Siku lelaki peranak menua tu ke beumur urung 30 taun napi pengerugi sepenyampau RM233,950 pengudah tepejuh dalam skim beranakka puku saham online ke nadai ditemu.

Ketuai Polis Pelilih Miri, ACP Mohd Farhan Lee bin Abdullah, nengah penerang media sehari tu ngentaska Bagi Pansik Jenayah Komersial (CSID) Indu Opis Polis Pelilih Miri udah nerima ripot polis kena 21 Februari 2026 bekaul enggau kes nya.

Nitihka penerang iya, tudah minat ba pengawa beranakka puku saham nengah online kenyau ari bulan Oktober 2025 pengudah muka siti laman web, iya nya https://site.quantumone.asia/?a=login, sebedau diasuh muka akaun ungkup transaksyen beranakka puku.

“Tudah mega dipasukka dalam raban WhatsApp pasal beranakka puku saham ke alai kaban dalam raban nya mandangka penguntung sida empu, lalu enggau nya ngasuh tudah pechayaka skim nya,” ku iya.

Ku iya, tudah keterubah iya beranakka puku semina RM100 lalu nerima penguntung pulai RM700 ti dikredit ngagai akaun iya.

“Berindik ari nya, tudah ngaga puku tambah enggau penyampau ke besai agi laban iya disemaya bulih penguntung dua kali lipat,” ku iya nerang.

Taja pia, tudah udah nya ngaga 27 transaksyen bayar ngagai 21 akaun ti bebida sebedau sedarka diri nyadi mansa pengawa nipu lebuh saspek majak minta bayar tambah taja pan penguntung ti disemaya bedau diulih.

Berindik ari penusah nya, tudah napi pengerugi sepenyampau RM233,950.

Kes tu dipansik ari baruh Seksyen 420 Kanun Keseksaan ketegal nipu lalu pemesai pemansik kes nya iya nya Insp Sisim bin Abd Samad.

Berebak enggau nya, ACP Mohd Farhan Lee ngelalau mensia mayuh ngambika seruran bejejaga sereta anang mudah pechayaka iklan beranakka puku ti besemaya deka bulih penguntung ke tinggi dalam timpuh ke pandak.

Pengawa meresa status beranakka puku tau digaga nengah laman web Bank Negara Malaysia ba http://www.bnm.gov.my/financial-consumer-alert-list tauka nengah Suruhanjaya Sekuriti Malaysia ba http://www.

Mensia mayuh ke nyadi mansa pengawa nipu siber baka pengawa nipu nengah telefon, pengawa nipu pengerindu (Love Scam), e-dagang, pinjau ke nadai enggau ke bukai sereta ke baru ngaga transaksyen mindahka duit ngagai akaun tauka sindiket dilalau ngambika lengkas betanya ngagai Palan Timbal Penipuan Nasional (NSRC) ba lumur 997.

Kelimpah ari nya, pengawa meresa lumur telefon enggau akaun bank saspek mega ulih digaga nengah portal CCID Semak Mule ba http://semakmule.rmp.gov.my sebedau ngaga sebarang transaksyen wang.

Mensia mayuh mega diperansang ngelawa ‘Facebook’ Opis Pemansik Jenayah Komersial, ‘Cyber ​​Crime Alert’ Polis Diraja Malaysia enggau Opis Pemansik Jenayah Komersial Sarawak dikena ngulihka penerang pasal modus operandi pemadu baru pengawa nipu. -RBI

Bintulu, 22 Feb – Sebuah kilang di Jalai Tanjung Kidurong napi pengerusak urung 40 peratus ketegal penusah angus ke nyadi pagi tadi.

Nitihka penerang ari pengari Palan Operasyen Opis Bomba enggau Penyah Penusah Malaysia (JBPM) Sarawak, penusah angus nya mungkur seksyen ‘fiber’ enggau sekeda injin ba begunan kilang nya.

Ku iya, seraban bomba ari Balai Bomba enggau Penyah Penusah Kidurong enggau bantu Balai Bomba enggau Penyah Penusah Bintulu udah dianjung ngesah ngagai endur nya pengudah nerima kangau ngenyit urung pukul 9.09 pagi.

“Lebuh datai dia, raban nya tetemuka api benung mau ba seksyen ‘fiber’ enggau mesin.

“Operasyen madamka api tekala nya dipejalaika nyengkaum kereja ‘overhaul’ enggau ‘cooling’ dikena nentuka api ulih dijaga enggau penuh,” ku iya ba sebengkah penerang.

Penusah angus nya mujur dijaga dalam timpuh urung 30 minit, tang operasyen penyelap agi dipejalai nyadika chara bejejaga dikena nyeliahka risiko angus nyadi baru.

Nadai orang diripotka bakal ba penusah nya. Kebuah penusah angus nyadi agi benung dipansik piak bomba. -RBI

SARIKEI, 22 Feb – Sapit Menteri Kebun Bedandang Besai enggau Komoditi, Datuk Sri Huang Tiong Sii, madahka agih belanja sepenyampau RM30,000 ngagai Gerempung Kwong Wai Siew Sarikei dikena nyukung aktiviti enggau ngatur gerempung sejarah ti nerenakka kerejasama enggau pengelantang komuniti lokal.

Tiong Sii mega madahka iya ngemeratka komitmen dalam ngenegapka pemansang di Sarikei enggau Meradong nengah peneleba iya nyadi pengari rayat sitak nya.

Pengawa nya deka dipejalaika begulai enggau rayat dikena nentuka penyulut diasaika begulai, enggau batang fokus ngangkatka perengka guna jalai alun sereta ngenegapka aspek pelajar ungkup rebak baru.

“Pelajar beguna amat kelimpah ari perengkaguna infrastruktur ke manah ungkup pengelantang rayat.

“Aku deka nentuka peranak ngasaika pengidup ke lebih lantang sereta likun jemah ila,” ku iya lebuh bejaku ba Pengerami Nyambut Taun Baru Cina malam kemari.

Kaban Parlimen Sarikei ke mega Kaban Kunsil Nengeri (ADUN) Repok nya mega ngarapka rayat Sarikei nyengkaum Repok enggau Meradong terus meri peluang ngagai iya meri servis. -RBI

SIBU, 22 Feb – Isu pengelikun mensia mayuh meseti nyadi pekara dikemeratka berindik ari penusah struktur runtuh ti ngaul sebuah begunan kedai di Palan Komersil Palawan, enggau pansik teknikal ‘bebas’ sereta komprehensif dipejalaika tekala nya sebedau sebarang pengawa meresi dipejalaika.

Senator Robert Lau Hui Yew nyemetak madahka chara profesional, bepelasarka fakta nyadi chara ke pemadu engkeman maya tu, ari ke nyalahka sebarang piak ke nadai penemu teknikal ke entas.

Penusah ke nyadi minggu nyin kemari ukai semina ngerusak siti unit begunan aja, tang mega ngeruga struktur premis bukai ke sama baris dalam kandang beberapa hari pengudah penusah nya nyadi.

Ketegal faktor pengelikun, kandang endur ke bisi kaul diatu ditutup piak bekuasa dikena nyeliahka risiko ngagai peranak enggau mensia mayuh.

Nya alai, iya nyemetak madahka nadai pengawa meresi bekau runtuh patut dipejalaika, nyentuk semua bukti teknikal udah didokumentasyen enggau dianalisis enggau penuh.

Iya merambu ngambika tekala nya nyiri pakar forensik struktur enggau geoteknikal ngambi bejalaika pengawa beratika enggau silik nyengkaum nentuka sekalika begunan ke besemak agi likun endur orang ke ngempu tama.

Ngelansa pasal penteba pengatur pemansang, iya madahka Kaunsl Kandang Mengeri Sibu udah meri kelala Garis Lalau Penurun Tanah 2010 ti berengkah dikena kena 1 Januari 2011, mandangka pengawa nagang enggau terit agi bekaul risiko tanah tusur ba projek komersial lalu udah nya dikerembaika ngagai pemansang pengawa berumah.

Taja pia, begunan ke runtuh nya udah dikemendarka sebedau garis lalau nya diteritka.

Ku iya nambah, sekeda begunan lama di Sibu ke digaga entara taun 1970 ngagai 2000 udah betapi enggau isu rusak struktur ketegal ‘piling’ enda datai ba lapis tanah ke kering.

Taja pia, kes ke udah nyadi sebedau tu selalu iya ngaul penusah berinsur lalu ukai runtuh ngenyit.

Iya ngaku ungkus pansik nya engka besai, tang nyemetak madahka puku nya beguna dikena nentuka pengelikun mensia mayuh, terang dalam pansik enggau pengarap mensia mayuh ngagai integriti pemansang mengeri. -RBI

SRI AMAN, 21 Feb — Bala Ketuai Komuniti Bansa (KK) nyengkaum Tuai Rumah enggau Tuai Genturung Pendiau dipinta ngembuan runding ti ulih nerima penemu enggau ubah ke dibai rayat ke dijaga diri empu.

Kaban Kunsil Nengeri (ADUN) Bukit Begunan, Datuk Mong Dagang madahka, pekara ke ditapi nyadi KK diatu, lebuh majak mayuh rayat ngembuan pelajar ke tinggi sereta megai pangku pengawa ke beguna dalam sektor perintah enggau peribit, lalu penemu ke patut ari sida nya patut ulih dipending.

Ku iya, bala KK patut lebih sensitif sereta deka mendingka penemu enggau bantah ti dipansutka rayat nyengkaum maya aum Komiti Pemansang enggau Pengelikun Genturung Pendiau (JKKK).

“KK enda patut mantul ati nyema rayat seruran mantah kelebih agi maya baum JKKK nyentuk ke bisi sida dipansutka belalai ari nerima bantu ke diberi perintah.

“Pekara ke dibantaika rayat ukai niat deka meri penyarut, tang lebih agi ari pengingin deka meda genturung pendiau sida maju agi setipak enggau pemansang ti majak nyadi,” ku iya bepelasarka penerang Unit Komunikasi Awam Sarawak (UKAS) kena Hari Enam.

Mong madahka pekara nya lebuh bejaku ba Pengerami Nyuaka Surat Chiri enggau Ngelanjarka Timpuh Tuai Komuniti enggau Tuai Komuniti Bansa (KMKK) Kandang Menua Melugu-Dau Baruh enggau Dau Atas ke diatur ba Rumah Panjai Entulang Danau ditu, kena Hari Lima tu tadi.

Berebak enggau tu, iya mega ngingatka bala KK ngambika enda ngelebu pengandal ke udah diberi Perintah Sarawak ngagai sida iya ba pengawa mantu ngemansangka pengidup rayat ke dijaga.

“Tanggung pengawa tu chukup besai. Ketegal nya, perintah nengeri nikika penyampau elawin KK ngambika sida ulih bejalaika pengawa ke udah diberi iya nya ngintu pengelantang pendiau rayat sereta ngemansangka genturung pendiau diri empu enggau manah,” ku iya.

Ba pengerami tu iya bisi nyuaka Setipikit Chiri Ketuai Komuniti (KM) ngagai siku Penghulu ke dilanjarka timpuh, Setipikit Chiri KK baru ngagai empat iku Tuai Rumah, Setipikit Chiri ngagai 37 iku Tuai Rumah ke dilanjarka timpuh enggau setipikit basa ngagai sida ke badu nyadi KMKK.

Beserimbai enggau pengerami nya, Mong bisi madahka agih belanja ari Projek Mit Menua Pesisir (MRP) sepenyampau RM10,000 diungkupka ngagai JKKK Rumah Noria Ampat, Entulang Danau dikena nyukung pengawa ke diatur rumah panjai nya.

Sama bisi datai Pegawai Tadbir Opis Pelilih Menua Sri Aman, Joshua Martin Jantan enggau KM Iban Bagi Menua Sri Aman, Temenggong Leonard Libau Anol

MERADONG, 21 Feb – Siku indu peranak menua tu ke beumur urung 20 taun ditan ketegal dipelabaka bisi kaul enggau pengawa nipu ti ngaul modus operandi nyaru diri nyadi bakih sereta nyual barang ke nadai nengah online.

Ketuai Polis Pelilih Meradong, DSP Tansli Mering madah, saspek ditan urung pukul 11.10 pagi kena 20 Februari tu tadi ulih seraban pemesai enggau kaban Bagi Pansik Jenayah Komersial (BSJK) IPD Meradong.

Nitihku iya, saspek dipelabaka nyaru diri nyadi bakih mansa deka nginjau duit enggau dalih napi penanggul belanja jampat.

“Kelimpah ari nya, saspek mega nipu mansa ke bukai nengah iklan nyual telefon pintar iPhone 12 Pro Max ba Facebook enggau rega ke mudah agi ari makit dikena matak pemeli,” ku iya ba sebengkah penerang sehari tu.

DSP Tansli madah, penyampau pengerugi diripotka mansa iya nya RM1,130.

Ku iya nambah, pansik silik tetemuka saspek mega bisi kaul enggau ripot polis di Gombak enggau Port Dickson, tang meresa rikod ke udah mandangka indu nya nadai ngembuan rikod jenayah sebedau tu.

Kes tu dipansik ari baruh Seksyen 420 Kanun Keseksaan ti netapka ukum jil enda kurang ari setaun enggau enda ngelui ari 10 taun kelimpah ari sipat enggau ukum mata duit, nyema ditemu salah.

“Mensia mayuh dilalau ngambika seruran bejimat enggau kangau telefon tauka peminta bejual nengah ‘online’ ti enda ditemu penatai.

“Peresa dulu enggau piak bekuasa sebedau ngaga sebarang transaksyen wang,” ku iya.

Mansa pengawa nipu nengah online tau betanya ngagai lumur hotline Palan Timbal Penipuan Nasional (NSRC) ba lumur 997 tauka Balai Polis Bintangor ba lumur 084-693222 ngambika ulih dipejalaika enggau lengkas. -RBI