KUCHING, 24 Feb — Aktivis Sarawak, Peter John Jaban nerangka pengawa Perintah Sarawak ti ngemai isu ngena undang-undang petroleum Perintah Besai ngagai Kort Perintah Besai Malaysia nyadi siti singkang ti tuai runding dalam sistem demokrasi konstitusyen.

Ku iya, ngulihka pekarq bepelasarka undang-undang iya nya chara ke pemadu betul dikena nerangka bidang kuasa entara perintah nengeri enggau perintah besai enggau enda dikeruga retorik politik.

Nitih ku iya, pekara nya begunaka perati dalam langkar ke lebih besai nyengkaum penuduk Sarawak ari baruh Sempekat Malaysia 1963 (MA63), ti nyamin sekeda hak enggau autonomi maya numbuhka Malaysia.

“Naka ​​ke diatu, isu ti bekaul enggau Petroleum Development Act 1974 enggau pangku pengawa Petroliam Nasional Berhad (PETRONAS) suah nyadi pekara dipejurai undang-undang enggau pemerat mensia mayuh. Udah datai ba maya iya penetap kepenudi diulih nengah kort,” ku iya.

Peter John Jaban mega nyemetak madahka rayat Sarawak diatu majak sedarka hak konstitusyen sida sereta pemesai guna ngatur pengeraja asal nengeri tu enggau terang sereta lurus.

Ku iya, penetap undang-undang ukai semina ngenegapka perintah besai, tang mega meri pengarap ngagai pemeranak puku sereta nentuka asil ari minyak enggau gis ulih dikena penuh ungkup pemansang menua pesisir, pelajar, pengerai enggau pengelantang rayat Sarawak. -RBI

KUCHING, 24 Feb – Perintah Sarawak ngaga petisyen ba Kort Perintah Besai dikena nentuka pengamat konstitusyen enggau terus dikena undang-undang perintah besai ngagai nengeri tu.

Sapit Menteri ba Opis Premier Sarawak (Undang-Undang, Sempekat Malaysia 1963 enggau Kaul Negeri enggau Perintah Besai), Datuk Sharifah Hasidah Sayeed Aman Ghazali madah, petisyen ke digaga nya ngaul Akta Pemansang Petroleum 1974, Akta Pelantar Benua 1966 enggau Akta Perlombongan Petroleum 1966 (“akta-akta Persekutuan”), minta penetap ari Kort Federal sekalika akta nya dikena ba Sarawak.

Nitih ku iya, Akta Perintah Besai ngeruga sereta nyangkal hak Sarawak ba pengeraja asal nyengkaum minyak enggau gis ti ditemu ba tasik Sarawak dalam kandang endur ti udah dikerembaika sereta ditukuka Perintah Kunsil Sarawak (Ubah Sempadan) 1954 enggau Perintah Kunsil Sarawak (Penetap Sempadan) 1958.

“Akta Perintah Besai meri empas ngagai adan menua Sarawak ti ditumbuhka sebedau Hari Malaysia lalu pia mega hak Sarawak ba pengeraja asal petroleum ti ditemu ba kandang tasik dalam kandang menua iya.

“Sarawak bisi hak, dikena nyaga pemerat enggau hak ke entas Sarawak enggau rayat iya baka ke udah ditulis dalam Konstitusyen Perintah Besai sereta mega dalam Sempekat Malaysia 1963 (MA63) enggau kereban konstitusyen ke ditambah enggau nya, minta pemutus ari Kort Perintah Besai bekaul enggau peminta sereta terus bejalaika pengawa ngagai nengeri tu dalam Akta-akta Perintah Besai,” ku iya.

Ku Hasidah, ari baruh MA63 enggau instrumen konstitusyen ti ditambahka enggau nya, hak bedaulat atas pengeraja asal petroleum ba tasik dalam garis entara menua Sarawak diberi Perintah British ngagai Sarawak, lalu ukai ngagai Persekutuan tauka Perintah Besai, maya Hari Malaysia.

Ku iya, Artikel 2(c) Jadual Kesembilan Konstitusyen Perintah Besai meri kuasa legislatif ngagai Dewan Undangan Nengeri ngatur pengawa ngena hak petroleum ke baka nya nengah pengawa ngeluarka suwa ngulih, setipikit enggau lisin ngiga.

“Akta Pelantar Benua 1966 enggau Akta Perlombongan Petroleum 1966 asal dikena ba nengeri di Malaya, tang dikerembaika ngagai Sarawak nengah ordinan ti dikemendar pengudah Deklarasyen Darurat 1969.

“Atur Darurat nya udah dikinsil kededua Dewan Parlimen dalam bulan Disember 2011. Nya alai manggai ba bulan Jun 2012, kededua undang-undang tu enda patut agi dikena ba Sarawak nitihka Pekara 150(7) Konstitusyen Perintah Besai,” ku iya.

Ku Hasidah, pengawa nganjung petisyen tu digaga berindik ari pengawa Petroliam Nasional Berhad (Petronas) ti ngaga peminta kena 10 Januari minta pemendar minta ngagai Kort Perintah Besai nyakal pengamat sekeda undang-undang nengeri ti ngatur operasyen petroleum, pengawa dagang enggau aktiviti bukai Petronas di Sarawak.

Berindik enggau nya ku iya, Perintah Sarawak deka mantah peminta nya laban enda masuk dalam bidang kuasa asal eksklusif Kort Federal ari baruh Pekara 128(1)(a) Konstitusyen Perintah Besai ngambika dipendingka kena 16 Mac tu ila.

“Ketegal nya, Perintah Sarawak mega minta penetap ari Kort Perintah Besai ari baruh Artikel 4(3) enggau 128(1) Konstitusyen Perintah Besai senentang pengamat Akta Perintah Besai ti disebut naka ke diatu aplikasyen sida ngagai Sarawak,” ku iya.

Iya nyemetak madahka hak Sarawak minta pemutus ke baka nya ari kort tinggi menua tu udah ditulis dalam Perkara 4(3) enggau (4) Konstitusyen Perintah Besai.

Ku iya nambah, penetap isu konstitusyen tu deka meri penerang senentang langkar atur ungkup industri minyak enggau gis di Sarawak, kelebih agi ungkup pemeranak puku dalam dagang ‘huluan’ enggau ‘hiliran’ industri nya.

Berebak enggau nya, iya madahka taja pan petisyen tu udah digaga, Perintah Sarawak mengkang komited neruska randau ti konstruktif enggau Perintah Besai dikena nyapai chara mutarka penanggul ti ulih ngenegapka penyerakup menua, ngelakuka pengawa ngena pengeraja asal minyak enggau gis enggau meruan agi, sereta ngasuh Sarawak ulih terus meri pangka ngagai pengelantang ekonomi enggau pengelantang g Malaysia. -RBI

KEMENA, 23 Feb – Komitmen Perintah Sarawak ngenegapka pengelantang entara jalai pengarap terus dipandangka nengah pengawa nyuaka geran Unit Pekara Jalai Pengarap Bukai (UNIFOR) ngagai komuniti lokal di sitak Kemena.

Pengerami ke diatur dalam gaya ke manah, meda bala ketuai gerija enggau eklisia meri besai terima kasih ngagai pengibuh perintah nengeri mantu ngangkatmanah sereta ngintu rumah sembiang sida.

Sarawak endang amat dikelala nyadi model penyerakup ti nyelai di Malaysia. Ba menua tu, bida pengarap enggau budaya enda kala nyadi dinding ti mechahka, tang nyadi jematan ti ngerapitka kaul entara rayat.

“Nengah UNIFOR, bantu ke dikenataika ukai semina belanja pemansang fizikal aja, tang kelai ngaku penyelai jalai pengarap ke nyadi pelasar penegap nengeri tu.

“UNIFOR semina siti aja institusyen di menua tu ti fokus khas ngagai pengawa pengarap bukai,” ku Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi anak Utom.

Ku Rundi mega, inisiatif tu nentuka genap iku orang ti nitihka jalai pengarap bisi palan endur besembiang ti lantang sereta likun, seraya nyukung sekula misyen dalam nyendiaka pelajar ti bekualiti ngagai nembiak rebak baru dalam gaya ti lantang.

“Lebih ari nya, pengawa tu ngayanka prinsip keadilan sosial lebuh nadai komuniti ditinggalka ari arus pemansang, setipak enggau aspirasyen Strategi Pemansang Pengudah COVID-19 2030 (PCDS 2030),” ku iya ke mega ADUN Kemena.

Pengawa nyerahka geran UNIFOR di Kemena nyadika bukti perintah nengeri seruran ngemeratka ba isu penyerakup enggau pengelantang rayat.

Tetiap agih belanja ti dikenataika dipeda nyadi puku timpuh panjai ungkup penegap rama enggau jemah ila di Sarawak.

“Ari baruh pegai pentadbiran Gempung Parti Sarawak (GPS), prinsip inklusiviti terus diangkatka nyadi pugu perintah, nentuka tetiap rayat Sarawak enda ngira bansa enggau jalai pengarap bisi ruang enggau peluang ngasaika pengelantang begulai,” ku iya.

Semengat “Segulai Sejalai” mengkang nyadi prinsip lalau ti tegap beserakup, ungkup Sarawak ti lebih lantang sereta likun. -RBI

Batu Tanam Demong di NANGA ENTAIH, Ulu Krian, SARATOK ke enda jauh ari Nanga Awas, UKAI kelai adan pentadbiran BAKA KE AYAN BA PENANDA KE DIGAGA SIDA ARI UPIS MUZIUM SARAWAK, tang nyadi kelai pengawa magi MENUA ke bepun ari sejarah adat komuniti lokal.

Mandal Presiden Kanan Gerempung Bansa Dayak Sarawak (SDNU), Chambai Lindong madah, anggap ti ngaitka batu besejarah nya enggau garis entara menua Betong JAUH RARI ARI penatai malin sejarah ti tulin.

Iya ngenang pasal siti nota dalam bup The Sea Dayaks of Borneo before White Rajah Rule ti dikarang ex-Kurator Muzium Sarawak, Benedict Sandin, ti nerangka batu nya DITANAM Demong ba Nanga Entaih besemak enggau nanga Sungai Awas di Ulu Krian.

Kenu ku Chambai, pengawa NANAM batu nya nyadi lebuh Demong NGASAIKA diri nyau majak tuai umur lalu IYA MEGA NGIRA IYA PATUT magi tanah IYA ENGGAU ADIL ngagai bala anak DULU IYA ENGGAU BINI DULU IYA Rinda, bansa Iban, enggau BALA ANAK DUDI IYA ENGGAU BINI DUDI IYA Lemia, bansa Bukitan.

Ku iya, pengilap mandangka sejarah ba papan tanda tauka kereban penerang rasmi tau ngasuh saru penemu entara komuniti, KELEBIH AGI BALA PETURUN DEMONG ARI SUNGAI PAKU ENGGAU DI ULU KRIAN ENGGAU BALA PETURUN DEMONG DI JULAU ENGGAU DI BATANG RAJANG.

Nitihka jaku ti ditulis Benedict, lebuh Demong nyau tuai lalu NGASAIKA IYA ENDA ULIH LAMA AGI IDUP DI DUNYA, iya lalu merambu deka MAGI TANAH IYA NGAGAI semua anak iya, baik nya anak DULU IYA ENGGAU bini DULU IYA ti bansa Iban enggau anak DUDI IYA ENGGAU bini iya TI DUDI ti bansa Bukitan.

“Iya lalu NANAM batu siti ba endur ke dikumbai Nanga Entaih, DI ULU KRIAN enda jauh ari nanga Sungai Awas, AWAKKA NYADI GARIS MENUA TAUKA ENTARA TANAH KE DIBAGI IYA NGAGAI ANAK DULU ENGGAU NGAGAI ANAK DUDI IYA.

“Iya ngasuh batu nya nyadika tanda garis entara tanah ti deka dipeturunka ngagai anak DULU IYA ENGGAU bini DULU enggau tanah ti deka dipeturunka ngagai anak DUDI bini KE DUDI AGI,” nitihka fakta ti ditulis dalam bup nya ku Chambai.

Enti nitih ka bagi tu, bala PETURUN Rinda (ti ngaku diri Iban) deka bempu tanah lama ari Sungai Paku enggau Ulu Krian nyentuk ngagai batu ti ditanam nya.

Bala PETURUN Lemia (ti tulin Bukitan) deka BEMPU tanah berengkah ari batu NYA tunga ke Sungai Julau enggau BATANG Rejang.

Taja pia, taja raban PETURUN DEMONG keterubah (Iban) dikemendarka PINDAH MERAKA GARIS BA batu nya, tang raban kedua (Bukitan) enda DIKEMENDARKA pulai ngagai menua lama.

Ku iya, nengah dekrit nya, bala anak Rinda bempu tanah lama ari Sungai Paku enggau Ulu Krian nyentuk ke batu NYA, lalu bala anak Lemia bempu kandang menua baru berengkah ari batu nya nuju Sungai Julau enggau BATANG Rejang.

Chambai ti asal ari Awas, Ulu Krian di Saratok nyemetak madahka pemetul fakta sejarah meseti dijaga dikena nyeliahka PENYARU penemu entara komuniti, kelebih agi komuniti lokal ENGGAU BALA PETURUN DEMONG DI PAKU, DI ULU KRIAN, DI JULAU ENGGAU TI BATANG RAJANg ti bisi kaul terus enggau sejarah nya.

Berindik enggau nya, iya ngansak Opis Muzium Sarawak mansik baru pengawa mandangka penerang rasmi sereta nukar penerang ti enda betul enggau fakta bepelasarka malin akademik, ngambika ulih ngetanka integriti sejarah menua sereta bebasaka pesaka asal komuniti Iban enggau Bukitan di SUNGAI PAKU, DI ULU KRIAN, DI JULAU ENGGAU DI BATANG RAJANG.

Batu Tanam Demong ti dipelabaka udah bisi BA urung taun 1500 AD, LALU mega diperambu deka digazet nyadi Pesaka Budaya Sarawak ari baruh Ordinan Pesaka Budaya Sarawak 1993. -RBI

MERADONG, 23 Feb – Tiga buah entukar aksiden ba jalai alun di Jalai Kelupu, Sungai Gemuan, urung pukul 6.40 pagi tadi.

Ketuai Polis Pelilih Meradong, DSP Tansli Mering madah, penusah aksiden nya mungkur sebuah kerita Mitsubishi Triton, Toyota Hilux enggau Perodua Myvi.

Nitihku iya, penusah nya dipelabaka nyadi lebuh entukar Mitsubishi Triton ke dideriba seiku lelaki ari tunga Bintangor nuju ke Sibu tepawah sebedau tama ngagai jalai betentang.

“Kerita nya udah nya ngelantak sebuah kerita Toyota Hilux enggau sebuah Perodua Myvi ke benung ba belakang kerita Toyota Hilux nya,” ku iya nengah sebengkah penerang sehari tu tadi.

Berindik ari aksiden nya, ketetiga entukar nya napi pengerusak ba luan enggau sepiak kanan. Taja pia, semua deriba diripotka nadai bakal.

“Kes tu dipansik nitihka Atur 10 LN 166/59,” ku iya nerang.

Berindik enggau nya, piak polis ngelalau mensia mayuh ngambika seruran bejejimat maya deriba, kelebih agi maya hari ujan, sereta nentuka perengka pengangkut dalam gaya ke manah sebedau dikena. -RBI

BINTANGOR, 23 Feb – Siku lelaki peranak menua tu beumur 26 taun bebadi nyawa ba penusah aksiden kediri ti ngaul sebuah mutosikal SYM VF3I 185 di Jalai Kelupu, kandang menua Sungai Gemuan, tumu pagi tadi.

Ketuai Polis Pelilih Meradong, DSP Tansli Mering madah, piak iya nerima penerang pasal penusah nya urung pukul 6.00 pagi ari mensia mayuh.

“Berindik ari penerang nya, pemesai pemansik begulai enggau raban trafik berumban ngelawa endur nya ngambika ulih bejalaika pansik ke silik agi.

“Pansik tumu tetemuka tudah ke datai ari Sibu nuju Bintangor dipelabaka tepawah sebedau tegelinchir ngagai sepiak kiba jalai lalu ngelantak tong uras,” ku iya.

Ku iya, pengawa meresa ba palan penusah nyadi tetemuka pengerusak nya ba mua mutosikal lalu semina repik enggi mutosikal aja ditemu, nadai ngaul perengka pengangkut bukai.

Tudah disahka bebadi ba palan penusah nyadi ulih Pemesai Perubat Klinik Bintangor urung pukul 6.19 pagi.

Berindik enggau nya, DSP Tansli ngelalau semua penguna jalai alun ngambika seruran bejimat sereta nentuka perengka pengangkut dalam gaya ke manah nengah chara meresa sistem brek enggau taya, kelebih agi maya musin pengujan.

“Kes tu benung dipansik ari baruh Seksyen 41(1) Seksyen nya Akta pgangkutan jalan 1987enggau tubuh tudah udah dibai ngagai Sepital Sarikei pagi tu tadi kena bejalaika pengawa beputung tasat.Sida sebilik mega udah dipadah,” ku iya. -RBI

KUCHING, 23 Feb – Tanah berenyang ke nyadi enggau pemalat 6.8 magnitud ba tasik semak Kota Kinabalu, Sabah urung pukul 12.57 pagi demalam sereta mega bela diasaika ba sekeda kandang menua bukai nyengkaum Sarawak enggau Semenanjung Malaysia.

Opis Meteorologi Malaysia nengah siti penerang madahka tanah berenyang nya ditemu ba koordinat 7.0 darjah Utara enggau 116.4 darjah Timur.

Tanah berenyang nya bepalan urung 49 kilometer barat Kudat enggau penalam 678 kilometer.

Nitihka penerang ari piak nya, taja pan tanah berenyang diasaika ba sekeda endur nyengkaum Sabah, Sarawak enggau Semenanjung, tang nadai penusah tsunami diripotka ungkup Malaysia.

“Nadai sebarang penusah tsunami ngagai Malaysia,” ku penerang nya seraya madahka pengawa matau terus dipejalai dikena nentuka gaya nya mengkang dijaga.

Berebak enggau nya, ripot Bernama madahka naka ke diatu nadai sebarang penusah ke enda manah diripot berindik ari penusah nya.

Palan Operasyen (PGO) Opis Bomba enggau Penyah Penusah Sabah mega ngenukuka nadai kangau ngenyit diterima bekaul enggau penusah tanah berenyang nya.

“Semua stesyen benung bejalaika pengawa matau enggau bejaga ba kandang endur sida empu dikena nentuka pengelikun mensia mayuh sereta gaya rampa menua likun sereta dijaga,” ku PGO baka ke diambi dalam ripot nya. -RBI

MIRI, 22 Feb – Kaban Kunsil Nengeri (ADUN) Marudi, Datuk Dr Penguang Manggil, terus diberi mandat ngiring Parti Demokratik Progresif (PDP) N76 Marudi lebuh iya mengkang nyadi chairman beserimbai enggau Aum Besai Tiga Taun Sekali (TGM) parti nya.

Sama dipilih nyereta rintai ketuai baru iya nya Cr Edward Mendai nyadi Sapit Chairman, dibantu tiga iku Sapit Chairman iya nya Cr Wahid ak Sayun, Cr Philip Anyi enggau KK Wen Magelit.

Pangku pengawa Sekretari dipegai Nelson Nang ak Balai disaup Penulung Sekretari KK David Wen. Tr Anthony Ladi dipilih nyadi Sekretari Pengatur begulai enggau Penulung iya Tr Jilan Chaong, lalu Donny Joseph dipadu nyadi Ketuai Pemadah.

Ungkup pangku pengawa Kaban Komiti Biasa (AJK), bisi enam individu dipilih iya nya Tr Henry Gomes, Tr Rantai Melanyi, Cr Abdul Malik bin Abdullah, KK Setia Ngau, Andrious Ding enggau Bolhie bin Munir.

Berebak enggau nya, Cr Martin Dinil dipilih nyadi Ketuai Nembiak enggau Stella Lenda ak Tadong nyadi Ketuai Indu.

Pangku pengawa Audit Dalam dilempaika ngagai Tr Kompeni ak Agon enggau KK Jarau @ Jerome.

TGM diatur enggau lanchar sereta teratur enggau penatai urung 540 iku kaban ti mandangka penegap enggau penyerakup jentera parti ba sitak N76 Marudi.

Dalam jaku dipansutka iya, Penguang minta semua ketuai enggau kaban parti terus ngenegapka penyerakup sereta komited terus meri servis ngagai komuniti di DUN N76 Marudi.

Sama bisi datai nyadi pemerati Kaban Kaunsil Supremer PDP, Hillary Mawan enggau Andrew Abak, sereta Ketuai Nembiak PDP David Yeo, Sekretari Politik Sam Laya enggau sekeda Exco Indu enggau Nembiak PDP. -RBI

MIRI, 22 Feb – Aum Tiga Taun Sekali (TGM) ungkup Pengawa Bepilih Nembiak Parti Demokratik Progresif (PDP) N.76 Marudi ti mujur diatur di Pullman Miri Waterfront sehari tu meda baris ketuai terus diberi mandat penuh ungkup sesi 2026–2029.

Ba pengawa bepilih ke sekali tu, Kaunselor Martin Dinil mengkang ngetanka pangku pengawa Ketuai Nembiak pengudah menang nadai di darat.

Pangku pengawa nyadi Sapit Ketuai Nembiak ke dipegai Lawrance Mugang Anak Asan mega menang enda diperebutka, begulai enggau lima iku Kaban Komiti, lalu enggau nya ngayanka penyerakup enggau pengarap ke tegap bala kaban ngagai ketuai ke bisi diatu.

Ungkup pangku pengawa Sekretari, Penulung Sekretari, Tukang Wang, Penulung Tukang Wang enggau Auditor, pengawa nyiri nya digaga nitihka konstitusyen ‘pergerakan’.

Chairman baru Gerakan Nembiak PDP N.76 nya nyemetak madahka baris nembiak mesti terus ngenegapka pangku pengawa nyadi tulang belakang parti, kelebih agi dalam nyukung agenda pemansang Perintah Sarawak enggau iring Datuk Dr. Penguang Manggil, ADUN Marudi ti udah mayuh ngemai pemansang ngagai sitak nya.

Nengah semengat beserakup enggau komitmen ke tinggi, Nembiak PDP N.76 Marudi sedia nyingkang jauh agi dikena nentuka sada nyawa raban nembiak terus relevan sereta progresif, lalu enggau nya nyadi batang pengerembai pemansang di Marudi sepemanjai sesi 2026–2029. -RBI

RINTAI PENUH BARIS KOMITI NEMBIAK PDP N.76 MARUDI 2026–2029:

Chairman:

Kr. Martin Dinil

Sapit Chairman:

Lawrance Mugang Anak Asan

Sekretari:

Donny Josep

Penulung Sekretari:

Dennis Usa

Tukang Wang:

Wilson Robert Sabang

Penulung Tukang Wang:

Estrada Wahid

Kaban Komiti:

Patrick Anak Madar

Rolldy Juli

Walter Mawie Anak Buang

Andy Anak Changgie

Elvis Louis

Dunstan Linggi Ak Kalang

Nickey Anak Joseph

Pengaudit:

Peter Ak Jalang

MIRI, 22 Feb – Kaban Kunsil Nengeri (ADUN) Marudi, Datuk Dr Penguang Manggil madah, pemujur Parti Demokratik Progresif (PDP) Bagi Menua Marudi matak kaban lebih 10,000 iku nyata ngayanka penegap enggau penyerakup parti ba kandang menua nya.

Ku iya, tu kelebih agi dalam nentuka penyereta ari mayuh bengkah renggat raban bansa enggau jalai pengarap.

“PDP Bagi Menua Marudi diatu ngerikod penyampau kaban ke pemadu mayuh, lalu nyadika siti ari pampang PDP ke pemadu besai ari sukut penyampau kaban.

“Kitai patut temegah ati laban penyampau kaban PDP di Marudi diatu ngelui 10,000 iku, enti dibandingka enggau bagi menua bukai ke semina bisi 4,000 ngagai 5,000 iku aja,” ku iya.

Penguang mansutka jaku tu ba Aum Media beserimbai enggqu Aum Besai Tiga Taun (TGM) PDP Bagi Menua Marudi, sehari tu tadi.

Aum nya mega bisi meda pengawa milih komiti baru PDP Marudi, nyengkaum ketuai ba renggat komiti besai, raban bala nembiak enggau raban bala indu.

Penguang nyemetak madahka pengawa milih komiti nya digaga bepelasarka prinsip inklusif, nyengkaum kaban ari parti bukai baka Parti Pesaka Bumiputera Bersatu (PBB) enggau Parti Rakyat Sarawak (PRS), dikena nentuka semua diberi ruang gawa begulai ungkup rayat.

“Aku mega deka ngemeratka di Marudi, kitai enda ngira sekalika kita ari PDP, PBB tauka PRS.Kitai semua satu,” ku iya.

Nengah pemujur tu, Marudi dipeda nyadi chunto pampang PDP ti chakah sereta beserakup, lalu enggau nya ngenegapka pengering parti nya sebedau pengawa bepilih nengeri ti deka datai. -RBI