KUCHING, 24 Feb — Kerejasama komprehensif entara semua ejensi bekaul enggau betanam betupi di Sarawak patut ditegapka dikena nentuka agenda pengelikun pemakai nengeri tu dipejalaika enggau efektif sereta meri empas ke besai.

Menteri Industri Pemakai, Komoditi enggau Pemansang Kandang Menua, Sarawak (M-FICORD) YB Dato Sri Stephen Rundi Utom, nyemetak madahka tetiap ejensi sekalika ba renggat nengeri tauka perintah besai mesti ngenegapka sinergi sereta nyeliahka diri gawa dalam silo laban pangku pengawa sida empu beguna amat dalam ngamatka juluk pemansang sektor betanam betupi.

Iya madah munyi nya lebuh bejaku ba Mandat Menteri ke diatur ba Pullman Kuching saritu tadi.

Nitihku iya, tagit perintah deka ngemansangka sektor betanam betupi ti meruan sereta diiri ngena teknologi ti ulih nentuka pengelikun pemakai, ngangkatka tikas pengidup komuniti betanam betupi sereta nempa nengeri tu nyadi pengeksport beresi pemakai manggai ba taun 2030.

Iya mega nyemetak madahka pengawa ngurangka bepanggai ba import pemakai patut dipejalaika enggau chakah agi, kelebih agi ungkup komoditi asas baka beras, ke diatu mungkur urung 21 peratus ari pemansut menua tu.

Berebak enggau nya, iya nyemetak madahka pengawa ngenegapka sektor agro-pemakai deka dipejalaika nengah chara bepelasarka produktiviti, nyengkaum ngena teknologi moden, chara betanam betupi enggau tepat, pemansang taman betanam betupi ti begempung sereta ngenegapka kaul orang bumai enggau makit.

Atur tu dikearapka ulih nyungkak penatai pemisi ladang, nambahka rega dikena ngasil sereta ngenegapka daya tahan sistem bekal pemakai nengeri tu.

Pengerami nya mega digulu ketuai opis menteri, ejensi teknikal enggau bakih strategik dalam pemansang sektor pemakai nyadi pelasar ngatur polisi enggau strategi jemah ila.

SARATOK, 24 Feb – Penusah tanah tusur urung empat kaki penalam nyadi ba belakang sebuah rumah di Rumah Panjai Spencer Muling, Temudok, lemai tu tadi.

Raban Penyaga Orang Periman Malaysia (APM) Pelilih Saratok nengah penerang berita madahka sida nerima kangau ngenyit ari mensia mayuh urung pukul 5.08 lemai bekaul enggau penusah nya.

Berindik ari nya, tiga iku raban APM Saratok dianjung ngagai endur nya ngambika meresa sereta matau gaya ba palan nya.

Lebuh datai ba palan penusah nyadi, raban tetemuka bisi tanah tusur ba belakang rumah enggau penalam urung empat kaki.

Dikena nyaga pengelikun peranak rumah panjai nya, raban ke bejalaika pengawa terus ngelekatka tali pengelikun ngelingi kandang endur ke kena penusah nya, lalu ngelalau peranak rumah panjai nya ngambika seruran bejejaga sereta nyeliahka diri ari semak ngagai kandang endur ke berisiko.

Nadai penusah bakal diripotka nyadi ba penusah nya.

Operasyen tembu urung pukul 6.11 lemai pengudah gaya ba palan nya dientaska ulih dijaga, lalu semua kaban pulai ngagai Palan Kawalan Operasyen Pelilih Menua (PKOD) enggau selamat.

Mensia mayuh ke betapi enggau sebarang penusah ngenyit tau betanya ngagai APM Saratok nengah lumur 083-436094 tauka talipaun penusah ngenyit 999. -RBI

KUCHING, 24 Feb – Pengawa berunding ti ngaul sekeda pekara ti bedau ditembuka ari baruh Sempekat Malaysia 1963 (MA63) deka dibai ngagai Aum Komiti Teknikal ti diperambu kena 2 Mac tu ila.

Menteri ba Opis Menteri Besai (Sabah enggau Sarawak), Datuk Ts. Mustapha Sakmud madahka aum ke patut diatur kena 28 Februari nya patut ditangguh ketegal kebuah ke enda ulih diseliahka.

Nitih ku iya, isu ke bedau tembu deka dialuska agi ari sukut teknikal dulu sebedau dibai ngagai renggat komiti besai ngambika diputuska kepenudi.

“Kitai deka nguji mutarka sida ba renggat komiti teknikal dulu. Sebarang pemutus deka diambi komiti besai ngambika diputuska ba maya ke patut,” ku iya ba Pengerami Ngenataika Pesan Begulai enggau Ketuai Opis enggau Ejensi Perintah Besai di Sarawak di Begunan Sultan Iskandar, ditu.

Ba pemansang ke bekaul, iya mega meri komen bekaul enggau pengawa Perintah Sarawak ti ngaga petisyen ba Kort Perintah Besai minta penetap pasal pengamat konstitusyen enggau terus dikena Akta Pembangunan Petroleum 1974, Akta Pelantar Benua 1966 enggau Akta Perlombongan Petroleum 1966 (“Akta-Akta Persekutuan”) ngagai Sarawak.

Mustapha nyemetak madahka iya bebasaka proses nya lalu enggai nagang pemutus kot.

“Kami bebasaka pengawa nya lalu awakka kot nentuka bepelasarka undang-undang enggau fakta,” ku iya.

Dulu agi ari nya dalam jaku iya, iya mantaika sepenyampau 29 peminta MA63 udah dipejuraika nengah Kaunsil Tindakan Pelaksanaan MA63 (MTPMA63), enggau 13 ari nya mujur diputarka, lalu semilan ari baruh Perintah Madani lalu empat ari baruh pentadbiran sebedau tu.

Iya nerangka pemujur nya entara pemansang ke pemadu manah ba pengawa ngatur enggau bejalaika MA63 kenyau ditusun enggau chara ke lebih sistematik urung 10 taun ke udah. -RBI

KUALA LUMPUR, 24 Feb – Transformasyen industri ngaga rumah ukai agi nyadi pilih, tang nyadi pekara ti diguna enggau lengkas dikena nentuka sektor nya terus kompetitif sereta meruan napi pemar dunya manggai ba taun 2030.

Menteri Kereja Raya, Dato Sri Alexander Nanta Linggi madah, pengawa ngelancharka Pelin Tindakan Pembinaan 2026–2030 (CAP30) sehari tu nyadi pelasar strategik dalam ngaga industri ngaga rumah Malaysia ti lebih efisyen, inovatif sereta nyikap diri ti sedia napi ubah rampa ekonomi enggau teknologi.

Nitih ku iya, CAP30 dilangkar nyadi pelin pengawa lima taun ti betuaika industri enggau sukung tadbir urus ti begempung, ngemeratka pengawa ngangkatka kualiti enggau pengelikun projek, nyungkak produktiviti nengah digitalisasyen enggau ngena teknologi moden, ngemansangka pengelandik pengereja pengawa menua tu sereta ngenegapka daya besemekih global pemain industri nya ngagai menua.

“Pelin tu dipejalai nengah enam asil kunsi manggai ba taun 2030, nyengkaum ngenegapka pengelantang rampa menua nengah pengawa ngaga gadung, ngemansangka modal mensia ti nembam sereta bepengelandik tinggi, sereta pengawa tadbir urus ti terang, disiplin sereta akauntabiliti,” ku iya.

Iya nyemetak madahka pengawa bejalaika CAP30 setipak enggau Dasar Pembinaan Negara 2030 (NCP2030), Aspirasyen Ekonomi MADANI enggau Langgur Pemansang Malaysia Lumpar Ke-13, lalu enggau nya nentuka industri ngaga rumah terus nyadi pematak kunsi penumbuh ekonomi enggau ngangkatka kualiti pengidup rayat.

Ku iya nambah, pemujur CAP30 begunaka komitmen terus ari semua piak nyengkaum perintah, pemain industri enggau bakih strategik nentuka tagit transformasyen ulih dikeamatka penuh manggai ba taun 2030. -RBI

KUALA LUMPUR, 24 Feb — Bala ketuai komuniti enggau ketuai raban bansa (KMKK) dipinta nyadi ejen ubah nengah chara nambahka literasyen digital sereta ngembing komuniti menua pesisir ngambika sida enda tinggal dalam transformasyen teknologi menua, kelebih agi di menua pesisir baka Baram.

Sapit Menteri Digital ke mega Kaban Parlimen Hulu Rajang, Datuk Wilson Ugak Kumbong nyemetak madahka ketuai renggat baruh mesti besedia napi jeman teknologi sereta bejalaika tanggungpengawa chakah ngenegapka komuniti menua pesisir nengah digitalisasyen.

Iya madah munyi nya lebuh nerima penemuai basa ari KMKK ari Sitak Parlimen Baram ke diatur ba Indu Opis Digital Nasional Berhad (DNB) di Bursa 106, sehari tu tadi. Sama bisi datai Kaban Parlimen Baram, Dato Anyi Ngau.

Rambau penemuai nya, raban nya mega dibai ngagai Portal 5G meda bemacham guna teknologi 5G dalam sektor betanam betupi, pelajar, pengerai enggau pengelikun, lalu enggau nya meri penerang terus ngagai potensial teknologi nya dalam ngenyampatka pemansang menua pesisir.

Berebak enggau nya, iya mega bekunsika strategi enggau fokus opis menteri nuju ngamatka agenda Negara AI 2030 ti ngemeratka pemansang penau digital, etika tadbir urus enggau ngenegapka ekonomi digital dikena nentuka penyulut teknologi inklusif ulih diasaika semua renggat mensia mayuh, nyengkaum komuniti menua pesisir. -RBI

KUALA LUMPUR, 24 Feb – Menteri Penyerakup Menua, Datuk Aaron Ago Dagang nyemetak madahka pengulih skor 0.701 dalam Indeks Penyerakup Bansa (IPNas) 2025 nyata ngayanka penyerakup rayat ba renggat pun menua mengkang entap sereta tegap.

Nitih ku iya, IPNas nyadi instrumen strategik perintah dikena beratika tikas penyerakup menua enggau komprehensif sereta nyadi batang lalau dalam ngaga polisi sereta bejalaika intervensyen ti lebih fokus.

“Pekara ke ditemu IPNas mandangka realiti penyerakup ba renggat baruh lebih positif ari peragam ba media rama.

“Rayat Malaysia terus idup nyadi orang ke berimbai pendiau, bekerejasama sereta bisi kaul entara pupu bansa dalam pengidup sida ninting hari,” ku iya.

Iya ke mega Kaban Parlimen Kanowit madahka, bida ke nyengala entara realiti sosial enggau penulis digital mega dichampur ‘algoritma’, fenomena ‘ruang gema’, ‘gelembung penapis’ enggau Ulah Ti Enda Autentik Terkoordinasyen ti ulih nempa persepsyen ti bepolarisasi.

Ku iya nerang, pengulih skor 0.701 enggau nya ngelui ari tikas sedang peninggi sereta nyapai tagit ti ditetapka ari baruh Langgur Pemansang Malaysia Lumpar Kedua Belas (RMK12).

Ari sukut pelilih menua, Sarawak ngerikod skor pemadu tinggi iya nya 0.791, ti ngayanka penegap nilai komuniti ti entap sereta lantang dalam komuniti ti mayuh bida.

Wilayah Timur ngerikod 0.741, ditangkan Sabah enggau Labuan enggau skor 0.726, lalu Wilayah Selatan ngerikod 0.719 asil ari kaul rama entara etnik ti chakah.

Berebak enggau nya, Wilayah Tengah (0.670) enggau Wilayah Utara (0.650) napi pemar bekaul enggau sosio-ekonomi sereta urbanisasi, tang agi ngembuan potensial besai dikena ngenegapka agi nengah chara polisi ke lebih ditagit.

Nitihka nengeri, Pahang ngerikod skor pemadu tinggi iya nya 0.817, ditangkan Melaka (0.816) enggau Sarawak (0.791), lalu enggau nya nyadi chunto pengelantang mensia mayuh ti tan ke mayuh pupu bansa.

Berebak enggau nya, Datuk Aaron madahka, Tadbir Urus enggau Pemansang (TUP) nyadi batang pekara ti meri penyerakup enggau pemeri 69.7 peratus, mungkur pengawa ngatur ekonomi, politik, jenayah, servis mensia mayuh, perengka guna mensia mayuh enggau ngatur komuniti.

“Tu ditangkan enggau Etos Nasional, Tikas Etnik enggau Kaul Sosial Rentas Bansa ti begulai ngenegapka pelasar penyerakup enggau pengelantang bansa,” ku iya. -RBI

SERIAN, 24 Feb – Projek Jalai Besai Begembar Serian-Gedong dikearap ulih muka peluang besai ngagai peranak dia sepemanjai jalai nya ngemansangka ekonomi menua tu, kelebih agi nengah aktiviti betanam betupi, ku Menteri Pelajar, Inovasyen enggau Pemansang Bakat, Datuk Seri Roland Sagah Wee Inn.

Iya mega nyemetak madahka penerima pampas tanah ungkup projek nya patut nguna duit pampas nya dikena ngemansangka genturung pendiau diri empu.

Ku iya, nengah sambung jalai besai ngagai padang bilun enggau palan penyangkai kapal baru di Tanjung Embang, peranak menua nya bisi potensial eksport asil betanam betupi sida ngagai makit ke lebih besai.

“Perengkaguna udah bisi, muntang datai ngagai pasar.Kitai deka terus eksport nengah palan penyangkai kapal Tanjung Embang, ngena padang bilun dia mega,” ku iya lebuh bejaku ba Pengerami Nyerah Chek Projek Jalai Besai Begembar Serian-Gedong ba Dewan Kopi Kampung Munggu, sehari tu tadi.

Sagah ke mega Kaban Kunsil Nengeri (ADUN) Tarat ngenataika pengaga ati iya ngagai peranak Kampung Rayang, Kampung Munggu Kopi, Kampung Tanah Puteh enggau Kampung Sebemban ke bisi ngaul diri.

Ku iya nerang, pengawa ngambi sekeda tanah nya enda ulih diseliah ungkup pemaik mensia mayuh enggau pengelikun penguna jalai alun, tang meri penguntung timpuh panjai ngagai komuniti.

“Projek tu ukai semina deka ngangkatka pengelantang kemaya hari tu, tang mega meri penguntung ngagai bala anak enggau uchu kitai jemah ila.

“Genturung pendiau ba sepemanjai jalai nya deka muntang agi datai ba sekula, sepital, endur gawa, sereta peluang makit ungkup asil betanam betupi sida,” ku iya nerang.

Pengerami sehari tu meda 73 iku pemenggi tanah nerima chek pampas sepenyampau RM6.5 juta, ti nyadika singkang beguna dalam pengawa bejalaika Projek Pakej 1A enggau 1B ti disadang meri empas rama enggau ekonomi ke besai ngagai komuniti menua nya. -RBI

JULAU, 24 Feb — Siku ‘kelindan’ bebadi nyawa seraya dua iku agi bakal ba penusah aksiden ti mungkur dua buah lori di Jalai Batu 12, Julau tumu pagi tadi.

Nitihka penerang ari Ketuai Balai Bomba enggau Penyah Penusah (BBP) Bintangor, PPgB Mahmudin bin Narudin, raban iya nerima kangau ngenyit bekaul enggau penusah nya urung pukul 12.04 tengah malam sebedau tim ari BBP Bintangor nengah bantu BBP Sarikei ngesah ngagai endur ke bepalan kira-kira 32 kilometer ari balai nya.

Ku iya, lebuh datai ba endur nya urung pukul 12.40 pagi, ditemu penusah aksiden nya mungkur sebuah lori ke ngundan baja ke ngelantak belakang sebuah lori tangki.

“Asil pengawa meresa, tetemuka dua iku lelaki ti nyadi ‘kelindan’ agi tepekul dalam penuduk lori baja, lalu deriba lori semina bakal mimit lalu mujur pansut nyelamatka diri,” ku iya nerang.

Operasyen nyelamat nya mar ketegal endur gawa ke sempit ba penuduk lori ku Mahmudin.

Terang iya, raban bomba udah nya ngena bantu lori ari Sarikei narit perengka pengangkut ke bisi kaul dikena muka ruang nyelamat, enggau nya ngemudahka proses ngemansutka tudah ke tepekul.

Siku mansa mujur dipansutka dalam gaya sedar sebedau diserah ngagai Opis Menteri Pengerai Malaysia (KKM) ngambika diperubat enggau silik agi.

Ku iya nambah, operasyen nangkanka nya ngemeratka mansa kedua ti enda ngeleda nengah chara ngena perengka khas baka ‘teleskopik ram’ dikena ngelunggarka struktur enggau ‘cutter’ dikena netak bagi ti tepekul.

Mansa kedua taja pia dientaska raban KKM bebadi ba palan penusah ke nyadi sebedau tubuh tudah diserah ngagai Polis Diraja Malaysia (PDRM) ngambika atur nangkanka nya dipejalaika.

Ba operasyen nya, sepenyampau 13 iku raban dipasuk enggau penegap logistik dua buah entukar LFRT enggau sebuah EMRS, begulai enggau ejensi bukai iya nya PDRM, KKM enggau dua unit ambulans.

Operasyen nya mujur tembu pukul 5.40 pagi lalu tembu pukul 6.55 pagi sebedau semua perengka pengangkut bekejang nuju stesyen pukul 7.00 pagi lalu datai pukul 7.40 pagi. -RBI

KUALA LUMPUR, 24 Feb – Sepital Sarikei nerima agih belanja sepenyampau RM13 juta kenyau ari taun 2022 ungkup pengawa nukar enggau ngangkatmanah perengka perubat besai ba sepital nya.

Pekara tu dientaska Sapit Menteri Pengerai Malaysia, Dato’ Hajjah Hanifah Hajar Taib lebuh nyaut tanya ari Senator Roderick Wong Siew Lead ba Dewan Negara sehari tu tadi.

Sapit Menteri nya nerangka, kapasiti entepan kerita sepital nya diatu chukup, tang opis menteri agi beratika pematut ngemanahka agi ungkup pelin timpuh panjai nya.

Iya mega nyemetak madahka tetiap fasiliti pengerai meseti ulih meri servis ti bekualiti tinggi sereta likun ngagai pesakit.

Sepital Sarikei diperambu nerima beberapa renggat pengawa ngangkatmanah ti beguna taun tu, nyengkaum pengawa nukar sistem gis perubat, ngemanahka isu kulat enggau kondensasyen, sereta ngangkatmanah perengka guna hemodialisis.

Perengka baru ke diulih nya nyengkaum mesin Bius Am, Mobile X-Ray, Laparoskopik, Phaco, enggau Mesin Laser Argon, semua nya betuju ngangkatka pengelikun enggau pengelantang pesakit.

Atur ti seruran dipejalai tu mandangka komitmen KKM nentuka perengka guna pengerai di Sarikei seruran moden, likun, sereta kompetitif, seriris enggau pengawa perintah nyendiaka servis pengerai ti bekualiti tinggi ungkup rayat Sarawak. -RBI

MUKAH, 24 Feb – Siku lelaki peranak menua tu beumur 32 taun ditan polis pengudah dipelaba ngembuan sereta salah guna dadah ba Jalai Mukah-Selangau, kemari.

Nitihka penerang media ari Ketuai Polis Pelilih Mukah, DSP Muhamad Rizal bin Alias, pengawa datai ngenyit nya dipejalaika Bahagian Tasat Jenayah Narkotik IPD Mukah seraya saspek benung dalam kerita ba mua sebuah rumah puang.

Pengawa meresa polis tetemuka 0.15 gram dadah bansa methamphetamine (syabu) disimpan dalam tiub straw ti senayau.

Peresa ai kemi ba saspek mega tetemuka iya positif dadah bansa amphetamine enggau methamphetamine.

Saspek ke gawa nyadi pengereja pengawa kasar diatu diriman pengelama tiga hari nyentuk 27 Februari 2026 ngambika dipansik enggau silik agi ari baruh Seksyen 12(2) enggau Seksyen 15(1)(a) Akta Dadah Berbahaya 1952.

Polis ngemeratka komitmen sida deka bejalaika pengawa enggau tegap ngelaban pengawa salah guna dadah ungkup pengelikun komuniti. -RBI