BINTULU, 25 Feb – Projek Begunan Pentadbiran Baru Bintulu di Jepak diatu benung ba renggat kepenudi dipejalaika lebuh ngerikodka penyulut fizikal 96.75 peratus lalu dipelaba tembu penuh tengan bulan April 2026.

Pengawa nyerahka projek nya deka digaga berenggat bepelasarka penyedia tetiap komponen begunan sereta mega guna operasyen opis ke bisi kaul dikena nentuka proses transisyen lanchar.

Direktor Kereja Raya Sarawak, Datu Dr.Cassidy anak Morris madah munyi nya pengudah bejalaika Penemuai Ngenegapka Projek ngagai palan endur ngaga projek dikena beratika diri empu pemansang kemaya hari sereta nentuka pengawa bejalaika projek nitihka timpuh ke udah ditetapka.

Nitih ku iya, pemerat mega diberi ngagai aspek pengawa nyaga kualiti, nitihka spesifikasyen teknikal enggau koordinasyen kepenudi nyadi singkang dikena nentuka begunan ke udah tembu nya nitihka standard pengelikun enggau guna ke dipinta.

Opis Kereja Raya (JKR) Sarawak komited nentuka projek nya tembu enggau mujur dalam pengawa ngenegapka sistem pentadbiran enggau ngangkatka pemanah pengawa meri servis mensia mayuh di Bintulu. -RBI

KOTA SAMARAHAN, 25 Feb— Bagi Penerit Adat Opis Imigresen Malaysia, Pampang Kuching, nangkap 54 iku peranak menua luar dalam operasyen bersepadu ti dipejalaika ngelingi pelilih menua tu kena malam 23 ngagai 24 Februari 2026.

Operasyen nya dipejalaika bepelasarka penerang ari mensia mayuh enggau pemansik tumu ari ejensi penerit adat.

Sepenyampau 26 iku pemesai imigresen ngaul diri dalam operasyen nya ti nagit sekeda endur ti dikelala nyadi ‘hotspot’ ungkup pengawa ngelanggar atur imigresyen.

Entara kandang endur ke diperesa iya nya premis bilik suwa ngelingi Aiman ​​Mall, Pusat Bedagang Bandar Riyal, Medan Bedagang Uni Garden, bilik suwa di Taman Riveria enggau sekeda palan pengentap pendiau di Kampung Sindang.

Tim penerit adat mega bisi nyerungkai sebuah premis ke dipelaba bejalaika aktiviti judi online ti nyaru diri nyadi operasyen restoran.

Semua individu ke ditan dipelaba ngereja mayuh macham penyalah ari baruh Akta Imigresen 1959/63 lalu udah dibai ngagai depo ngetan imigresyen ngambika dipansik sereta dipejalaika enggau silik agi.

Jabatan nya ngemeratka komitmen sida ti seruran dipejalaika dikena ngenegapka agi operasyen neritka atur ari sesiti maya ngagai sesiti maya dikena ngelaban penatai orang luar ti enda beradat, lalu enggau nya nentuka pengelikun enggau atur mensia mayuh dijaga. — RBI

KUCHING, 25 Feb — Komiti Pengatur Pengerami Gawai Dayak Renggat Sarawak 2026 udah ditumbuh dikena nyikap enggau tumu agi pengerami ke diperambu, ti deka diatur berengkah bulan Mei tu ila.

Bepelasarka ripot Unit Komunikasi Awam Sarawak (UKAS), pengawa numbuhka komiti nya diputuska ba Aum Nyerahka Pengawa Komiti Pengatur Pengerami Gawai Dayak Renggat Sarawak ti bechairmanka Sapit Premier Sarawak ti mega Chairman Komiti Besai Pengerami Gawai Dayak Renggat Sarawak 2026, Datuk Amar Douglas Uggah Embas, kena Hari Dua.

Uggah ba aum nya nyemetak madahka, tuju aum nya dikena nentuka tiap perambu program dipejalaika enggau bisi atur, lanchar sereta meri empas ti tinggi.

“Pengerami taun tu patut diatur enggau standard ke tinggi agi ngena perambu ti silik, setipak enggau aspirasyen Perintah Sarawak deka ngangkatka Gawai Dayak nyadi pengerami main asal nengeri ke ulih negika pesaka enggau identiti komuniti Dayak ngagai tikas ke besai agi,” ku iya.

Berebak enggau tu Uggah mega meri terima kasih ngagai semua orang ti udah bebendar meri komitmen enggau kerejasama ngemujurka pengerami taun nyin tadi.

Ba aum nya mega, udah setuju nyirika Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil nyadi Chairman Komiti Pengatur Pengerami Gawai Dayak Sarawak 2026.

Iya deka dibantu Sapit Sekretari Perintah Sarawak (Administrasyen) Datu Felicia Tan Ya Hua ke dichiri nyadi Sapit Chairman.

Sama bisi dichirika iya nya Direktor Opis Kereja Raya Sarawak, Datuk Cassidy Morris nyadi Sekretari; Sapit Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal, Desmond Douglas Jerukan nyadi Sapit Sekretari enggau Penulung Akauntan Nengeri, Roland Tama nyadi Tukang Wang.

Bisi datai ba aum nya, Sapit Menteri ba Opis Premier Sarawak (Pekara Pengereja Pengawa, Imigresyen enggau Patau Projek), Datuk Gerawat Gala ti nyadi Chairman Komiti Pengatur Pengerami Gawai Dayak Sarawak 2025, sereta bala menteri enggau sapit menteri enggau bala pemesai kebukai.

Dalam aum ke sama, Gerawat bisi mantaika ripot bekaul enggau perambu tumu pengawa ngatur, lalu Roland ti ngarika Komiti Besai mantaika ripot belanja ngambika nyadi lalau sereta pengawa ke patut ulih dikereja nangkanka nya.

Pengawa ngatur Gawai Dayak Renggat Sarawak ninting taun nyadi pelasar beguna dalam negika budaya enggau tradisi raban bansa Dayak seraya ngetanka penyerakup enggau ngelakuka pemayuh pesaka Sarawak.

LUNDU, 25 Feb — Dua ruang bilik di Kampung Sampadi, ditu, betapi enggau penusah pengudah rumah sida angus lengis ba penusah angus ke nyadi lemai kemari.

Taja pia, pengawa jampat raban bomba mujur nyelamatka sebuah rumah ketiga ari mega kena angus dalam penusah nya.

Palan Operasyen Opis Bomba enggau Penyah Penusah (JBPM) Sarawak nerima kangau ngenyit urung pukul 10.42 malam.

Raban penyelamat nempuh bejalai penyauh 38 kilometer ari stesyen ke pemadu semak ngambika ulih datai ba palan penusah nyadi.

Lebuh datai ba palan penusah nyadi, ditemu dua buah rumah ukai tetap pemesai 20 x 20 kaki persegi sebuah udah angus 100 peratus.

Komander Operasyen ngeripotka, raban bomba tekala nya bejalaika pengawa ngena teknik madamka api ti ofensif dikena nentuka api enda ngerekai ngagai struktur genturung pendiau ke besepiak ti dalam penyauh ti tau mai penusah.

“Raban bomba ngena batang ai sepemanjai 200 kaki enggau dua iti muncung, ke alai pun penatai ai diulih ari paip bomba ke besemak.

Batang fokus iya nya ngaga ‘fire break’ dikena nyaga rumah ketiga,” ku ripot operasyen nya.

Penusah angus nya udah ulih dijaga enggau penuh urung pukul 11.20 malam.

Raban bomba udah nya bejalaika pengawa ‘overhaul’ dikena nentuka nadai agi pun penatai api tauka bara api ke ulih ngidupka api nya baru.

Operasyen nya tembu enggau penuh pengudah gaya nya disahka likun enggau penuh. Raban bomba ngelalau peranak rumah panjai ngambika seruran bejimat enggau pengawa bekenaka perengka elekterik enggau dapur, kelebih agi maya malam hari dikena nyeliahka penusah ke sebaka nyadi. — RBI

LUNDU, 25 Feb — Dua ruang bilik di Kampung Sampadi, ditu, betapi enggau penusah pengudah rumah sida angus lengis ba penusah angus ke nyadi lemai kemari.

Taja pia, pengawa jampat raban bomba mujur nyelamatka sebuah rumah ketiga ari mega kena angus dalam penusah nya.

Palan Operasyen Opis Bomba enggau Penyah Penusah (JBPM) Sarawak nerima kangau ngenyit urung pukul 10.42 malam.

Raban penyelamat nempuh bejalai penyauh 38 kilometer ari stesyen ke pemadu semak ngambika ulih datai ba palan penusah nyadi.

Lebuh datai ba palan penusah nyadi, ditemu dua buah rumah ukai tetap pemesai 20 x 20 kaki persegi sebuah udah angus 100 peratus.

Komander Operasyen ngeripotka, raban bomba tekala nya bejalaika pengawa ngena teknik madamka api ti ofensif dikena nentuka api enda ngerekai ngagai struktur genturung pendiau ke besepiak ti dalam penyauh ti tau mai penusah.

“Raban bomba ngena batang ai sepemanjai 200 kaki enggau dua iti muncung, ke alai pun penatai ai diulih ari paip bomba ke besemak.

Batang fokus iya nya ngaga ‘fire break’ dikena nyaga rumah ketiga,” ku ripot operasyen nya.

Penusah angus nya udah ulih dijaga enggau penuh urung pukul 11.20 malam.

Raban bomba udah nya bejalaika pengawa ‘overhaul’ dikena nentuka nadai agi pun penatai api tauka bara api ke ulih ngidupka api nya baru.

Operasyen nya tembu enggau penuh pengudah gaya nya disahka likun enggau penuh. Raban bomba ngelalau peranak rumah panjai ngambika seruran bejimat enggau pengawa bekenaka perengka elekterik enggau dapur, kelebih agi maya malam hari dikena nyeliahka penusah ke sebaka nyadi. — RBI

MIRI, 25 Feb — Sebuah kapal penumpang ditan Ejensi Penerit Adat Maritim Malaysia (Maritim Malaysia) Zon Maritim Miri urung 0.4 batu nautika barat laut Kuala Sungai Miri maya pengawa meresa rutin urung pukul 12.20 tengah hari kemari.

Direktor Zon Maritim Miri, Mohd Khairol Anuar bin Saad, madahka kapal ke bisi kaul nya sebedau tu udah diukum ketegal penyalah ari baruh Ordinan Perkapalan Saudagar (MSO) 1953 taun nyin tadi lalu ditan baru berindik ari pengawa meresa tim bot matau dalam operasyen penerit atur bersepadu.

Nitih ku iya, asil pengawa meresa kapal nya tetemuka kapal nya dipelaba ngelanggar syarat lisin ti entas ketegal beoperasyen nadai kru ti chukup sereta mai kru ti nadai pemendar maya pengawa meresa nya dipejalaika.

Kapten ke beumur 55 taun enggau siku kru kapal ke beumur 43 taun ditan sereta diiring ngagai Palan Tahanan Kapal Miri sebedau diserah ngagai pemesai pemansik ngambika atur ke silik agi dipejalaika.

Kes tu dipansik ari baruh Kaedah 12 (Boat Rules 1953) Ordinan Perkapalan Saudagar 1952.

Enti ditemu salah, pengempu enggau tuan kapal tau diukum nyentuk RM1,000 enggau kompaun RM500 ari baruh Seksyen 484 ordinan ke sama.

Mensia mayuh ti bisi penerang bekaul enggau aktiviti jenayah maritim, sebana tauka penusah ngenyit di tasik dipinta ngenataika penerang nya nengah lumur penusah ngenyit 999 tauka betanya ngagai Palan Operasyen Zon Maritim Miri ba lumur 085-649111, tauka Palan Operasyen Maritim Nengeri Sarawak ba lumur 082-432851464. — RBI

BELAGA, 25 Feb — Program Opis Mindah kin kitu Unit Pekara Jalai Pengarap Bukai (UNIFOR) Zon Utara ti ngaul kandang menua Belaga enggau Bintulu mujur dipejalaika ba Dewan Uma Baha, Apau Koyan, Sungai Asap, enggau penyereta ti chukup meransang ari komuniti menua nya.

Kenyau ari pukul 7.30 pagi, pengari rumah sembiang ngelingi kandang menua nya bisi datai ngulihka penerang sereta nganjung peminta belanja nengah ‘online’ nengah Other Religions Services Management System (ORSEM) enggau iring pemesai ke bejalaika pengawa.

Penatai tumu tu ngayanka komitmen ti tinggi dalam nentuka tetiap peminta dianjung enggau penuh, enggau chara ti teratur sereta nitihka garis lalau ke udah ditetapka.

Sepemanjai program nya, raban pengatur mega nerima timbal positif enggau puji ari rumah sembiang ti kala nerima bantu sebedau tu.

Ke bendar iya, bisi pengari komuniti ti sanggup bejalai nyentuk lima ngagai enam jam ngulu sesi betunga mua, lalu enggau nya ngayanka pengarap ati ti tinggi ngagai chara lapangan ti dipejalaika.

Sesi ba palan nya ngemeratka rumah sembiang ari baruh kemata Datuk Liwan Lagang, Kaban Kunsil Nengeri (ADUN) N.65 Belaga, enggau Kennedy Chukpai Ugon, Kaban Kunsil Nengeri (ADUN) N.66 Murum.

Pengerami nya mega diintu enggau jaku pengelalu ari Direktor UNIFOR Dato Georgina Apphia Ngau ti ngemeratka komitmen ejensi ti terus nentuka pengawa ngatur bantu dipejalaika enggau sistematik, terang sereta bisi integriti.

Iya mega ngemeratka pemesai guna nitihka prosedur peminta projek sereta ngena sistem ORSEM nyadi pelasar rasmi dikena ngemudahka proses peminta, matau enggau rikod servis rumah sembiang di Sarawak.

Program nya tembu enggau sesi nyuaka tanda pengingat ari pengari Gerija BEM Uma Baha ngagai delegasyen UNIFOR nyadika kelai terima kasih, lalu enggau nya ngayanka kaul rat entara ejensi enggau komuniti setempat.

Berebak enggau nya, hari kedua program nya diperambu deka diatur kena 25 Februari 2026, ari pukul 2.00 ngagai 5.00 lemai ba Hotel ParkCity Everly.

Rumah sembiang ngelingi Bintulu dilalau datai ngambika nemu penerang silik sereta nganjung peminta nengah chara ‘online’ mai dokumen ke bekaul dikena nentuka proses bejalai enggau lanchar.

UNIFOR nandu baru komitmen sida deka terus ngelawa komuniti nengah chara renggat baruh dalam pengawa ngenegapka pengawa merintah enggau pengelantang rumah sembiang di serata Sarawak. — RBI

BETONG, 25 Feb – Palan Aktiviti Orang Tuai (PAWE) Betong nyuaka 300 bungkus bubur lambuk ngagai komuniti menua nya, Hari Dua nyin tadi.

Bebida ari semina program bebuka puasa tradisional, inisiatif tu mandangka pengawa chakah orang tuai nyadi penyaup rama ti mengkang relevan sereta kompetitif dalam pemansang komuniti.

Pengawa ngagih nya dipejalaika nengah chara ‘drive-through’ dikena nentuka proses bejalai enggau lanchar, teratur sereta ‘mesra’ penerima.

Chara nya ukai semina ngemuntangka orang ngulihka pemakai jampat sida enggau enda ibuh pansut ari entukar sida, tang mega ngayanka sukut sistematik sereta efisyen ngatur program.

Program tu mega nerima sukung ketuai lebuh Sapit Menteri Pemansang Nembiak, Lumba enggau Orang Dagang Sarawak ke mega Kaban Kunsil Nengeri (ADUN) Layar, Dato Gerald Rentap Jabu, bisi datai lalu sama mantu dalam pengawa nya.

Iya nyemetak madahka pengawa ke baka nya ngayanka institusyen orang tuai ukai semina nyadi palan aktiviti rama aja, tang lebih agi nyadi pelasar dikena ngenegapka kaul komuniti, nerenakka budaya volunteer sereta nanam semengat begulai sepemanjai bulan Ramadan.

Enggau nya program tu mandangka baka ni solidariti entara rebak ulih disalin nyadi pengawa ke nyata ti meri penguntung terus ngagai komuniti lokal. -RBI

JULAU, 25 Feb – Siku lelaki bebadi pengudah ditimbak ngena senapang patah SBBL 12 lubang ba penusah ke nyadi ba kaki lima sebuah rumah panjai di Entabai, ditu kemari.

Tudah ke beumur 69 taun, siku orang pekebun dientaska bebadi urung pukul 11.49 pagi ba Klinik Pengerai Nanga Entaih ketegal balat bakal ba bau kanan laban kena timbak.

Ketuai Polis Pelilih Julau DSP Alif Haiqal Ramesh bin Abdullah, nengah penerang berita madahka, raban polis nerima penerang keterubah senentang penusah nya urung pukul 12.20 tengah hari sebedau pansik lengkas dipejalaika ba palan penusah ke nyadi.

Nitihka pansik tumu, penusah nya dipelabaka nyadi urung pukul 11 ​​pagi lebuh tudah benung deka masu kaki ba kaki lima sebuah bilik lumur lapan rumah panjai nya pengudah pulai ari kebun sawit.

Saspek, siku lelaki beumur 43 taun ke mega siku orang bekebun belanda ari pintu penama bilik lumur 10 sebedau nimbak ngagai tudah.

Siku saksi ngeripotka bisi ninga munyi senapang lebuh iya benung manggang ba kaki lima bilik lumur enam meda saspek belanda ngagai ruai lalu nimbak tunga ngagai tong ai sebedau meda bisi orang rebah. Laban ke takut, saksi lalu ngelarika diri ke dalam bilik.

Saksi ke mega anak tudah ke bebadi nya mega ke ba bilik lumur lapan, udah nya pansut lalu tetemuka apai iya dibalut darah.

Saksi lalu nyerauh meda apai iya kena timbak di kaki lima lalu ngemai apai iya ke benung di balut darah.

Saspek mega didawa nunjukka senyata ngagai saksi sereta ngemba deka munuh iya, tang mansa dibai ngagai klinik ngambika diperubat sebedau ditukuka bebadi ulih pemesai perubat ke bejalaika pengawa.

Polis mujur ngetan saspek urung pukul 1.35 lemai ba hari ke sama ba bilik iya lalu ngerampas senapang patah SBBL 12 lubang begulai enggau sekeda peluru idup enggau sarung peluru bemacham chap.

Kes tu dipansik ari baruh Seksyen 302 Kanun Keseksaan ketegal penyalah bunuh.

Pansik tumu tetemuka penusah nya dipelabaka bepun ari saspek ti enda puas ati pengudah mansa ngelara saspek tumu pagi urung jam 5 pagi ngambika enda bemain senyata api ba kandang rumah panjai sereta ngemba deka ngeripot ngagai polis.

Tubuh mansa udah dianjung ngagai Opis Forensik Sepital Sibu kena bejalaika pengawa beputung tasat. -RBI

KUCHING, 24 Feb — Opis Bekal Ai Menua Pesisir (JBALB) Sarawak bebendar nyangkal tuduh pesan viral dalam tukuh ‘screenshot’ ti madahka bekal ai ke udah diperubat di Sri Aman udah kamah lalu nyadi pun pengelekai penyakit chirit enggau mutah.

Dalam penerang rasmi, piak nya nyemetak madahka bedau bisi penerang dikeluarka Opis Pengerai Sri Aman bekaul enggau dawa ke bisi dalam pesan nya.

Kelimpah ari nya, nadai bukti rasmi ti ngaitka kes pengerai ti diripotka nya enggau bekal ai berubat ti disadung JBALB Sarawak.

Nitihka penerang nya, dawa ti ngait penanggul pengerai mensia mayuh enggau bekal ai jabatan nya nadai pelasar, saru sereta spekulatif.

JBALB Sarawak mega nyemetak madahka bekal ai beresi ba semua palan beresi seruran dipatau nitihka standard pengelikun enggau kualiti ai ti udah ditetapka piak bekuasa.

Enti bisi isu bekaul enggau kualiti ai, pemadah rasmi semina deka disalur nengah jalai komunikasyen rasmi JBALB Sarawak enggau ejensi ke bekaul.

Berindik enggau nya, mensia mayuh dilalau anang ngerembaika mesej viral ti bedau disahka tulin laban pengawa ke baka nya tau ngasuh mensia mayuh ringat sereta ngeruga pengandal ngagai servis bekal ai.

JBALB Sarawak nyemetak madahka sida beratika pengawa nyadung penerang pelesu enggau berat lalu enda kakang ati ngambi atur ke patut ngagai sebarang piak ke ditemu nyadung berita pelesu. — RBI