SIMANGGANG, 25 Feb – Pengerami Chap Goh Mei diatu bisi potensial nyadi produk dagang temuai besai di Sri Aman, lalu ari nya ulih ngenegapka penyerakup komuniti pupu bansa sereta nyungkak ekonomi menua tu.

Sapit Menteri Pelajar, Inovasyen enggau Pemansang Bakat, Datuk Francis Harden Hollis, madahka pengerami nya udah mansang nyadi sebengkah pengerami komuniti ti matak penyereta ari semua serak pengidup.

Ku iya, tu ukai semina komuniti Cina aja lalu ninting taun, lebih 5,000 iku temuai ngempuru ba menua Simanggang meda pengawa bejalai bebala mayuh.

“Beribu iku temuai ari raban bansa Iban, Melayu enggau ke bukai ngayanka pengerami tu diatu diterima nyadi sebagi ari identiti komuniti lokal,” ku iya lebuh bejadika Rumah Tebuka Taun Baru Cina enggau Ngelanchar Pesta Chap Goh Mei Bagi Menua Sri Aman di Tokong Ciyun, Hari Dua tu tadi.

Ba pengerami ke sama, Datuk Francis madahka agih belanja ari baruh Projek Mit Menua Pesisir (MRP) sepenyampau RM30,000 ngagai Gerempung Soon Heng Simanggang dikena nyukung pengawa ngatur pengerami taun tu.

Ku iya nambah, Chap Goh Mei patut dipeda nyadi penambah ngagai produk dagang temuai ke udah bisi baka Pesta Benak, ke udah lama nyadi pematak besai pelilih tu.

Sama bisi datai iya nya Residen Bagi Menua Sri Aman, Mahra Salleh, Sapit Residen, Charlie Keling, Pengari Pemesai Pelilih Menua Sri Aman, Joshua Martin, Chairman Kaunsil Pelilih Sri Aman, Anthony Abell Chendan, Chairman Gerempung Soon Heng Simanggang, Tay Chiew Hua enggau Sapit Chairman Temenggong Kueh Aik Seng. -RBI

KUCHING, 25 Feb – Kort Tinggi Kuching nulak peminta Petroleum Sarawak Berhad (PETROS) ti deka nyakal pengawa ngambi pulai jamin bank sepenyampau RM7.95 juta ari Petroliam Nasional Berhad (PETRONAS).

Akim Datuk Faridz Gohim Abdullah dalam prosiding sehari tu netapka dawa nya enda entas sereta enda nitihka konstitusyen.

Iya nyemetak madahka isu ke deka diputuska nya semina bekaul enggau tanya sekalika peminta ngelaban jamin bank nya enda entas tauka enda nitihka undang-undang baka ke dipadah dalam Notis Mosyen (OS) ke difailka PETROS.

Ku iya, peminta PETRONAS ba jamin bank nya entas laban nya setipak enggau ‘terma’ jamin bank iya nya ‘on-demand’ sereta nadai betukuh sereta nadai betukuh sebarang syarat, lalu enggau nya ngemendarka nya dituntut nengah peminta betulis.

Kot mega ngambi kira duit jamin bank nya udah diterima sereta dikena, ti ngasuh peminta injunksi dikena nagang tuntut nya enda praktikal agi.

Iya nandu baru madahka PETROS nadai minta sebarang deklarasyen dikena nyakal pengamat Sempekat Jual Beli Gis (SGSA) tauka minta deklarasyen ti madahka Ordinan Penyampau Gis 2016 (DGO) dikena ba PETRONAS nyentukka iya begunaka lisin nengeri.

Iya mega netapka jamin bank ti dikerandauka nya jamin ti nadai syarat lalu tau dituntut nitihka peminta betulis, enggau enda ibuh ngayanka pengawa ngelanggar kontrak dulu.

Ba prosiding sehari tu, PETROS diarika Tan Sri Cecil Abraham, Sim Hui Chuang, Lim Lip Tze enggau Rosalie Tien lalu PETRONAS diarika Datuk Cyrus Das, Khoo Guan Huat enggau Alex Ngu Sze Sha.

Penyanding Penemu Undang-Undang Nengeri Sarawak, Datuk Seri Fong Joo Chung nyadi pemerati ngarika perintah Sarawak.

Lebuh betemu ba lobi kort, Fong madahka isu konstitusyen deka diputuska Kort Perintah Besai laban Kort Tinggi semina ngaga pemutus komersial lalu enda beratika isu konstitusyen.

Nitih ku iya, pekara nya deka dibai ngagai Kort Perintah Besai kena 16 Mac 2026 enggau peluang haribulan tambah ditetapka udah nya.

Berebak enggau nya, Cyrus madahka PETROS mega diasuh mayar kos sepenyampau RM50,000 pengudah enda mujur ngayanka bukti dawa nya enda masuk akal tauka enda nitihka undang-undang.

Ku iya, kort bepenemu isu konstitusyen nya di luar skop saman asal lalu begunaka pemutus Kort Perintah Besai.

Nya alai ku iya, tanya pasal pengamat Akta Pemansang Petroleum 1974 (PDA) enggau Ordinan Pengagihan Gis 2016 (DGO) deka dibai ngagai tikas ke tinggi agi.

“PETRONAS diperambu deka minta pemendar kena 16 Mac tu ila, seraya Perintah Sarawak mega udah ngaga petisyen sida empu,” ku iya.

SADONG JAYA, 25 Feb — Siku baya besai diripotka mujur ditangkap ba kandang menua Batang Sadong semak Sungai Bulu sehari tu, nitihka posting ti diupload Wan Zai Nal ba platform Facebook.

Pos nya madahka pasal pengawa nangkap reptilia nya ke dipadahka besai nyelai, lalu ngasuh mensia mayuh betanya sekalika baya nya jelu ke diberi nama panggil “Pak Itam” tauka ukai ke dipelabaka bisi kaul enggau penusah nyerang nya minggu nyin kemari. — RBI

SARIKEI, 25 Feb – Tiga iku lelaki bakal mimit ba penusah bebadi jalai alun ti ngaul dua buah entukar semak kandang Kort Sarikei, tengahari tu tadi.

Palan Penyaga Operasi (PKOD) APM Pelilih Sarikei nerima kangau ngenyit ari mensia mayuh urung pukul 1.00 ngalih hari ti madahka sida bisi penusah belantak entara kerita Proton X70 enggau kerita Toyota Hilux ba endur nya.

TIM MyASPA-O Bravo ke bisi tiga iku pemesai tekala nya lalu ngesah urung pukul 1.10 lemai lalu datai ba endur nya semina dua minit udah nya.

Nitihka ripot keterubah, deriba Proton X70, siku lelaki beumur 39 taun, bisi bakal ba kening lalu diberi perubat keterubah ba palan penusah nyadi sebedau dibai ngagai sepital ngambika diperubat enggau silik agi.

Dua iku agi kebukai ke nepan kerita Toyota Hilux ke beumur 34 enggau 49 taun diripotka bisi pedis ba bau enggau dada. Taja pia, kededua sida benung dalam gaya ke entap.

Semua sida tu udah nya dianjung ke sepital ngena ambulans ngambika diperesa sereta diperubat nangkan nya.

Pia mega diripotka dua iku nembiak indu ke nepan kerita Proton X70 nya dibai sida sebilik ngagai sepital. Siku ari seduai nya bakal ba dalam mulut lalu siku agi madahka pedis ba belakang.

Operasyen nya tembu enggau penuh urung pukul 1.48 lemai pengudah semua sida ke aksiden diserah ngagai sepital ngambika dipejalaika enggau silik agi. -RBI

MIRI, 25 Feb — Umur ukai nyadi siti penanggul ngagai penyanyi veteran Iban Urai Rosiana terus chakah nyadi siku pemerindang lalu iya deka datai baru enggau single pemadu baru iya ke diberi nama Dilah Tanah.

Iya madah Lagu berentak slow rock nya ti ditempa Versifier penuh enggau pesan daya pengidup mensia enggau penyedar diri, enggau nya ngingatka orang ngambika seruran ngereja pengawa ti manah enda ngira pangkat, pengaya tauka penuduk.

Ku Rosiana nerangka ngagai Ruai Berita Iban, pengawa nya amat semak ba ati iya laban mai pengingat ti madahka genap iku mensia pengujung iya deka pulai ngagai Tuhan.

“Lagu tu ngenang pasal pengidup lalu ngingatka kitai iya nya utai ke ditaburka kitai, nya meh utai ke diketau kitai, enda ngira ni naka peninggi pangkat tauka pemayuh reta tengkira kitai tetap sama ba mata Tuhan,” ku iya

Nitihku Rosiana Urai, Dilah Tanah mega mantaika pemar vokal iya empu, kelebih agi ba sada nyawa ti tinggi ti begunaka ‘voice control’ ti tegap, tang proses ngerikod bejalai enggau lanchar berindik ari peneleba penengkebang enggau penulis lagu ti meretika penegap vokal iya.

Ba pengerembai ke sebaka, peranak asal Long Pelutan, Baram ke ngepunka karier seni ba taun 1989 mega ngerikod lagu jaku Kayan enggau lagu duet jaku Iban begulai enggau penanyi baru, Mexuari Mullen.

Lagu duet ti diberi nama Maya Pengerindu Tua Ngua ti ditempa Dom Romeo dipelaba deka dikeluarka ba tengan bulan March tu ila.

Rosiana ngarapka lagu duet tu ulih narit ati bala peminat laban mantaika bida enggau gempung nyawa dua rebak ti bebida.

Iya ngarapka pengawa ti diasilka nya ukai semina ulih merindang, tang mega nyadi medium dikena ngenegapka pesaka jaku enggau budaya Iban ngambika seruran relevan sereta dikerinduka rebak dudi hari.

Single Dilah Tanah dipelaba deka dilanchar nengah pelasar media rama enda laun ari bulan Mac tu. — RBI

SIBU, 25 Feb – Opis Kereja Raya (JKR) Sarawak sehari tu ngelancharka sistem kamera litar tetutup (CCTV) enggau teknologi pemintar tiru (AI) ba kandang P-Turn Selangau, siti inisiatif baru dikena ngenegapka pengelikun jalai alun ba jalai berisiko tinggi.

Pengerami ngelancharka nya di Bagi Menua Sibu udah dipenyadika Direktor Kereja Raya Sarawak, Datu Dr.Cassidy anak Morris ti nerangka pengawa masang CCTV AI tu, ngena teknologi pintar ngemendarka pengawa matau trafik dipejalaika enggau lebih sistematik sereta responsif, kelebih agi ba endur ti dikelala ngembuan arus trafik ti tinggi sereta bisi potensial penusah bebadi.

“Pengawa masang CCTV enggau teknologi AI nyadi singkang proaktif dalam ngenegapka pengelikun jalai alun enggau pengawa matau rampa menua mensia mayuh, setipak enggau aspirasyen pemansang nengeri nuju mengeri pintar.

“Kitai dekaka teknologi tu dikena enggau penuh dikena nambahka pemanah pengawa matau lalu berebak enggau nya mantu pengawa nagang penusah aksiden,” ku iya rambau jaku iya ba pengawa nya.

Iya mega ngingatka penguna jalai alun ngambika seruran ngasika atur jalai alun sereta ngemeratka pengelikun ungkup pengelantang begulai.

Sistem CCTV AI dikearapka ulih matau pejalai trafik dalam timpuh ke bendar, lalu enggau nya ulih nyukung pengawa ngemanahka agi pengawa ngatur trafik ngelingi Selangau enggau Bagi Menua Sibu.

JKR Sarawak ngemeratka komitmen terus ngenegapka infrastruktur pengelikun jalai alun nengah chara inovatif enggau beteknologi tinggi setipak enggau agenda pemansang nengeri. RBI

KUCHING, 25 Feb – Pengawa bejalai mayuh beserimbai enggau Hari Gawai Dayak begunaka penegap nyadi sebengkah pengerami budaya betikas antarabansa nengah penambah agih belanja enggau penegap elemen adat, pia ku Pemungkal Gerempung Bansa Asal Sarawak (GOAS), Peter John Jaban.

Kenu ku iya, pengawa nya beguna dikena nentuka pengerami ninting taun nya terus ngerembai ukai semina ari sukut penyampau tubuh, tang mega ari sukut kualiti organisasyen enggau isi budaya.

“Pengawa Bejalai Bebala Mayuh Gawai Dayak ukai semina diatur ninting taun aja, iya kelai terima kasih, identiti enggau penyerakup komuniti Dayak enggau rayat Sarawak selampur.

“Nengah penambah sukung belanja, kitai ulih ngerembaika penyereta nyengkaum ngangauka mayuh agi kontinjen ari serata Sarawak sereta mega komuniti Dayak ari Sabah enggau Kalimantan, Indonesia,” ku iya ba sebengkah penerang.

Ku iya, kenyau ari beberapa taun ke udah, pengawa nya udah mansang nyadi siti ari pengawa budaya ke pemadu besai reti di nengeri tu, ti ngempuruka lebih 3,000 iku penyereta ari lebih 100 kontinjen ari mayuh bengkah komuniti.

Nya alai ku iya, udah datai maya iya pengawa tu diangkatka ngagai tikas ke tinggi agi nyadi produk dagang temuai budaya besai nengeri tu enggau kerejasama Opis Menteri Dagang Temuai, Industri Kreatif enggau Seni Pemerindang Sarawak sereta Kaunsil Dagang Temuai Sarawak.

Berebak enggau nya, Peter mega meri langgur penemu ngambika jalai bebala mayuh di Kuching patut berengkah ari kandang menua ulu lalu mindah nitihka arus asal sungai nyadi kelai pengelantang enggau adat sereta pengarap komuniti Iban.

“Dalam penemu dunya Iban, sungai nya kelai arus pengidup enggau timbang. Rambai jaku ‘mali nanjak ai’ ngingatka kitai ngambika enda ngelaban pengelantang menua.

“Enti pengawa bejalai bebala mayuh nya mindah sebaka enggau arus sungai, nya kelai penerus, pengelantang enggau basa ngagai pesaka asal aki ini kitai kelia,” ku iya nerang.

Kelimpah ari nya, iya merambu ngambika pengawa bejalai bebala mayuh nya diujungka enggau Pengerami Pemakai Gawai di Padungan dikena ngerami pengeraja pesaka pemakai peranak asal Borneo dalam gaya ke manah begulai enggau diri sebilik.

“Meri pengaga ati ngagai komiti baru.Tanggungpengawa tu nyadi pengandal ke besai dikena nentuka Gawai Dayak meruan bepun ari adat, tang taja pia mansang enggau progresif sereta inklusif,” ku iya.

Iya ngarapka Gawai Dayak 2026 tu amat ngemeranka semengat “Segulai Sejalai” dalam ngenegapka penyerakup enggau temegah budaya Sarawak. -RBI

BINTULU, 25 Feb — Projek ngaga dua jalai kerita sepemanjai 4.1 kilometer nuju Padang Bilun Bintulu ti digaga nitihka standard JKR U5 diatu udah ngerikod penyulut fizikal 9.82 peratus lalu dipelaba tembu penuh dalam bulan Oktober 2027.

Direktor Kereja Raya Sarawak, Datu Dr Cassidy anak Morris madah, projek nya dipejalaika dikena ngangkatka tikas pengelikun, pengelantang enggau penyikar pejalai trafik, kelebih agi ba jalai besai ngagai padang bilun.

Iya madah munyi nya rambau penemuai ngagai palan Projek Jalai Begembar Padang Bilun Bintulu dikena beratika baru pejalai ke diatu sereta nentuka pengawa bejalaika projek nitihka pelin enggau spesifikasyen ke udah ditetapka.

Nitih ku iya, penemuai nya mega mungkur sesi meri penerang teknikal sereta randau enggau tim projek nyadi singkang ngenegapka koordinasyen ngaga, kelimpah ari ngenyampatka pengawa ngenataika asil pemansang infrastruktur ngagai rayat. -RBI

BUKIT KAYU HITAM, 25 Feb – Urung tumu pagi ke patut lantang bebali nyadi pengirau ati lebuh entukar ke ditepan Panglima Ejensi Kawalan enggau Nyaga Sempadan Malaysia (AKPS) Bukit Kayu Hitam kena timbak ba penusah ke nyadi urung satu kilometer ari garis entara menua Malaysia-Thailand, sehari tu tadi.

Ba penusah ke nyadi urung pukul 5.40 pagi nya, SAC Mohd Nasaruddin Mohd Nasir diperetika benung dalam pejalai nuju Masjid Al Muhajirin Bukit Kayu Hitam deka besembiang pagi sebedau dilawa dua iku lelaki ke ngena mutosikal.

Ketuai Polis Pelilih Kedah, Datuk Adzli Abu Shah madah, kededua saspek begari chelum sereta ngena topi keledar penuh.

“Siku ari saspek nimbak dua kali ti nimbak pintu belakang kanan enggau pintu penumpang mua entukar mansa.Taja pia, mansa nadai bakal,” ku iya dalam aum pengarang berita sehari tu tadi.

Penusah ti berani nya ngasuh orang betanya pasal motif saspek ti bendar, kelebih agi laban iya ngaul siku pemesai kanan ejensi penerit atur ba kandang endur ti strategik ba garis entara menua nya.

Diatu polis benung bebendar agi nyidi saspek lalu enda nulak sebarang peluang nyengkaum elemen ngenakut tauka ngemba ke diperambu. -RBI

KUCHING, 25 Feb – Sinergi enggau kerejasama rat entara semua ejensi bekaul enggau betanam betupi di Sarawak nyadi batang pengawa ngenegapka pengelikun pemakai nengeri tu.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, kerejasama rat entara Sarawak enggau ejensi Perintah Besai beguna amat dikena ngamatka aspirasyen perintah nengeri deka ngemansangka sektor betanam betupi ti meruan sereta diiri ngena teknologi.

Iya madah munyi nya lebuh ngenataika pesan ba sebengkah pengerami ke diatur ba hotel tebilang di Kuching, ditu kemari.

Nitihku iya, juluk nya ukai semina deka nentuka pengelikun pemakai aja, tang mega deka ngangkatka tikas pengidup komuniti betanam betupi sereta nempa Sarawak nyadi pengeksport beresi pemakai manggai ba taun 2030 ila.

“Pejalai tu endang amat mar sereta mayuh pemar. Nya kebuah semua piak patut ngembuan runding ti kreatif, proaktif sereta tan. Aku pechaya enggau chara tu sereta kerejasama ke manah agi, kitai ulih nyapai juluk tu,” ku iya.

Iya mega nerangka pengawa ngenegapka pengelikun pemakai enggau betanam betupi moden deka dipejalai nengah chara nambahka produktiviti nyengkaum ngena teknologi, bejalaika pengawa betanam betupi ti meruan, ngemansangka taman betanam betupi ti begempung sereta ngerapitka kaul entara orang betanam betupi enggau makit.

Pengawa nya dipechaya ulih nyungkak penatai pemisi, nambahka rega ngagai produk betanam betupi sereta ngurangka pengelemi rentayan bekal, lalu enggau nya nempa sistem agro-pemakai ti lebih tegap sereta meruan di Sarawak.

Sama bisi datai iya nya Sapit Menteri Industri Pemakai, Komoditi enggau Pemansang Kandang Menua Sarawak (Industri Pemakai) Datuk Dr Haji Abdul Rahman Ismail, Sapit Menteri (Komoditi enggau Pemansang Kandang Menua) Datuk Martin Ben, Penyanding Penemu Pansik Saintifik Sarawak Datuk Patinggi Tan Sri (Dr) Alfred Jabu Numpang enggau Penyanding Penemu ba Opis Premier Sarawak (M-FICORD) Tan Sri William Mawan Ikom enggau Sekretari Tetap M-FICORD Datu Sirai Anak Daha. -RBI