MERADONG, 26 Feb – Tiga iku indu enda sempat ngelarika diri lebuh ditan Tim Task Force Indu Opis Polis Pelilih (IPD) Meradong dalam pengawa ngenyit nengah Ops Tapis Khas Sarawak ngelingi pelilih menua Bintangor.

Ketuai Polis Pelilih Meradong, DSP Tansli Mering madah, pengawa ngetan nya digaga kena 26 Februari 2026 urung pukul 9.25 pagi lebuh tim khas benung bejalaika operasyen nagang dadah enggau pemansik ba kandang menua nya.

“Ketiga-tiga saspek indu beumur 42, 26 enggau 37 taun nya ditan ketegal dipelabaka salah guna dadah sebedau dibai ngagai IPD Meradong ngambika atur silik agi dipejalaika.

“Asil peresa tisih ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka semua sida nya positif Amphetamine enggau Methamphetamine,” ku iya nengah sebengkah penerang sehari tu.

Nitihku iya, pengawa meresa baru rikod ke udah tetemuka dua iku saspek ngembuan rikod penyalah bekaul enggau dadah, lalu siku agi nadai rikod jenayah tauka penyalah narkotik sebedau tu.

Kes tu dipansik ari baruh Seksyen 15(1)(a) Akta Dadah Berbahaya 1952 ti netapka ukum mata duit nyentuk RM5,000 tauka jil enda ngelui dua taun nyema dikenuku salah.

DSP Tansli nyemetak madahka sida iya enda belembut ba sebarang bansa pengawa salah guna dadah lalu deka terus chakah agi bejalaika operasyen dikena ngelaban pengawa baka nya di pelilih Meradong.

Iya mega nesau komuniti datai ke mua lalu nyalurka penerang bekaul enggau aktiviti dadah ngagai Balai Polis Bintangor nengah lumur 084-693222 dikena mantu pengawa ngelaban penyalah nya. -RBI

SARATOK, 26 Feb — Raban Penyaga Pengelikun Mensia Mayuh Malaysia (APM) Pelilih Saratok udah nerima kangau ngenyit bekaul enggau penusah pun kayu tumbang ti ngempang jalai besai ba Jalai Nanga Batang Ulu Krian, Saratok.

Tekala nya pengudah nerima penerang nya, empat (4) iku raban Skuad Alpha dianjung ngagai endur ke bepalan urung 50 kilometer ari palan operasyen.

Nengah kerejasama ari Sarawak Energy Berhad (SESCO), pengawa ngupas enggau netak pun kayu nya mujur dipejalaika dalam timpuh 13 minit.

Asil ari pengawa jampat nya, jalai nya mujur dibuka baru sereta dientaska likun dikena mensia mayuh.

Nadai penusah bakal tauka bebadi nyawa diripotka nyadi ba penusah nya.

APM Saratok ngemeratka komitmen seruran besedia napi sebarang penusah ngenyit ungkup pengelikun enggau pengelantang komuniti setempat, seriris enggau rambai jaku, “Sedia Jampat Integriti.”

Mensia mayuh ti begunaka bantu ngenyit tau betanya ngagai APM Saratok ba lumur 083-436094 tauka talipaun penusah ngenyit 999. — RBI

KUCHING, 26 Feb — Sepenyampau 80 iku nembiak Kolej Komuniti Kuching (KKKG) diatu udah nyikap diri enggau manah agi napi pemar dunya maya pengudah nyereta Program Kimpin Internet Likun (KIS) ke diatur Suruhanjaya Komunikasyen enggau Multimedia Malaysia (MCMC) ke nyadi ba Dewan Serbaguna KKKG.

Program tu ngembuan tuju deka ngenegapka literasi digital ba raban nembiak, kelebih agi bekaul enggau pengawa nyaga data diri sereta nagang penyalah siber ti majak kompleks, seriris enggau komitmen perintah ngaga rampa siber ti likun ungkup semua.

Penulung Direktor MCMC Pampang Kuching, Ahmad Saufi Jemat nyemetak madahka penyedar pengelikun digital ukai siti opsyen, tang nyadi tanggungpengawa tetiap renggat mensia mayuh.

“Aku ngelalau bala nembiak ngambika seruran ngena internet enggau etika sereta bejimat.

“Pengawa nagang diri nyadi garis pertahanan keterubah dikena nentuka pengelikun diri ba dunya siber,” ku iya lebuh ngenataika licha ba program nya.

Iya mega ngelalau bala pesereta ngambika enda mudah dikemelika orang ke dikelala nengah online sereta nyeliahka diri ari kelalu bekunsika penerang diri ba media rama.

Prinsip “peresa sebedau bekunsi” mega diperansang dikena nentuka pengamat penerang sebedau iya dikerembaika.

Kelimpah ari eksposur ngagai etika media rama, program tu mega nyadi pelasar kerejasama strategik entara KKKG enggau MCMC dalam nempa komuniti nembiak literasi digital.

Sesi kuiz interaktif mega bisi diatur dikena nguji pemereti ati pesereta pasal risiko nipu enggau modus operandi pemadu baru jenayah siber.

Inisiatif baka tu dikearap ulih nyadi lalau ngagai nembiak rebak baru ngambika lebih bejejaga lebuh beinteraksyen nengah ‘online’, setipak enggau pengawa perintah ngurangka statistik mansa jenayah siber ba renggat baruh.

Program tu udah digulu Direktor KKKG, Sumbang Mandaw; Sapit Direktor Pengatur Pengawa, Elfy Fariza Sharkawi; Sapit Direktor Akademik, Nurul Hidayah Yussof; enggau Pemesai Pemansang Nembiak, Jefferyson Adam Henry Adam. — RBI

MIRI, 26 Feb — Sebuah gudang lama ke enda dikena agi ba Jalai Hj Lampam angus ba penusah ke nyadi tumu pagi tadi.

Nitihka ripot ari Balai Bomba enggau Penyah Penusah (BBP) Sentral Miri, kangau ngenyit bisi diterima lalu raban nya datai ba endur nya urung pukul 7.28 pagi.

Lebuh datai ba palan penusah nyadi, ditemu premis nya ke dipelabaka nyadi palan pengenduh orang ke nadai endur diau, urung 30 peratus udah angus.

Raban bomba terus bejalaika pengawa madamka api ngambika enda nyerarai ngagai kandang endur ke besemak.

Nadai penusah bakal tauka bebadi nyawa diripotka nyadi ba penusah nya.

Operasyen nya mujur dijaga lalu tembu urung pukul 8.22 pagi. Kebuah penusah angus nyadi agi benung dipansik. — RBI

PAKAN, 26 Feb — Tim Skuad Charlie ari Raban Penyaga Pengelikun Mensia Mayuh Malaysia (APM) Pelilih Pakan bejalaika pengawa enggau lengkas dikena muai sereta meresi penekul pun kayu ke tumbang ke benung nekul jalai alun dalam operasyen lemai kemari.

Nitihka penerang rasmi ari Unit Perhubungan Awam dan Dokumentasi APM Pakan, empat iku kaban dianjung berindik ari kangau ke diterima pukul 11.00 malam (25 Feb) ngambika bejalaika pengawa meresi.

Operasyen nya mujur tembu urung pukul 1.14 pagi lalu jalai nya diatu udah likun ditengah baru.

Berindik enggau nya, mensia mayuh dilalau ngambika seruran bejejimat maya deriba, kelebih agi ba gaya hari ti enda tentu ke bisi potensial ngasuh insiden tauka nekul ba jalai alun.

APM ngemeratka komitmen sida ti seruran nentuka tikas nyikap diri napi penusah ngenyit seruran ba tikas pemadu tinggi ungkup pengelikun enggau pengelantang komuniti. — RBI

SIBU, 26 Feb — Mensia mayuh diperansang merambu meri darah sepemanjai bulan Mac 2026 dikena nentuka bekal darah seruran chukup, kelebih agi nyerumba musin pengerami ti deka datai.

Nitihka penerang ari Tabung Darah Sepital Sibu, tetiap pengawa meri darah endang besai amat reti laban ulih nyelamatka nyawa pesakit ti begunaka perubat lengkas ba sepital.

Berindik enggau nya, mensia mayuh dilalau datai ke mua meri sukung ngagai kimpin meri darah ti nyadi pengawa ti mulia sereta kelai pengibuh ngagai sida ti begunaka bantu.

Bank darah mega ngingatka pengawa meri darah nya likun sereta meri penguntung ke besai ngagai penerima.

Mensia mayuh ulih ngulihka penerang silik pasal jadual enggau endur kimpin meri darah sepemanjai taun 2026 nengah chara nitihka saluran media rama rasmi bank darah ba Facebook, Instagram enggau TikTok. — RBI

KUCHING, 26 Feb – Isu hak petroleum Sarawak diatu udah masuk ngagai renggat ke berat lebuh perintah nengeri ngaga pemutus minta penetap undang-undang ba Kort Perintah Besai Malaysia.

Pengawa nya udah nerima sukung tebuka ari Parti Pribumi Bersatu Malaysia (BERSATU) Sarawak ti nerangka nya sebengkah pengawa dikena nerangka penetap konstitusyen, ukai dikena ngepunka penyarut politik.

Nitihka penerang ari parti nya, pengawa mai pekara nya bekaul enggau pengamat sereta guna undang-undang petroleum Perintah Besai ngagai Sarawak setipak enggau semengat Konstitusyen Perintah Besai Malaysia sereta semengat Sempekat Malaysia 1963 (MA63).

BERSATU Sarawak nyemetak madahka hak nengeri tu ba pengeraja asal nyengkaum minyak enggau gis dalam garis entara menua asal sebedau numbuhka Malaysia nyadi pelasar ti beguna dalam struktur Perintah Besai ti patut diterang sereta ditemu enggau nyemetak sereta konklusif.

Parti nya bepenemu, pengawa ti enda tentu lama ba bidang kuasa enggau undang-undang tau ngeruga pengawa pentadbiran, penegap polisi enggau pengarap pemeranak puku ba sektor kuasa iya nya sektor strategik ungkup ekonomi nengeri enggau menua.

“Pengawa ngulihka penerang undang-undang ukai chara mantah Perintah Besai.Tang kebendar, iya ngenegapka sistem Perintah Besai nengah chara nentuka tetiap atur konstitusyen dipebasa sereta dipejalaika enggau lurus,” ku penerang nya.

BERSATU Sarawak mega ngingatka pemutus Kort Perintah Besai deka meri pangka besai ukai semina ngagai Sarawak aja, tang mega ngagai selampur landskap ngatur pengeraja asal kuasa menua.

Berindik enggau nya, parti BERSATU Sarawak minta semua piak bebasaka proses akim lalu enda bepolitikka isu ti mai empas timpuh panjai ngagai penegap menua.

Ba pekara ti lebih besai, BERSATU Sarawak nyemetak madahka penetap konstitusyen ti terang deka nambahka penerang ba pengawa ngatur asil pengeraja asal, ngenegapka pengandal pemeranak puku, sereta nentuka pemansang ti lebih seimbang sereta inklusif ungkup rebak dudi hari.

Nyadi kaban pemungkal Malaysia, parti nya ngemeratka hak konstitusyen Sarawak meseti dipebasa dalam langkar pemerat menua ke besai agi, ngelui ari pemerat politik timpuh pandak. -RBI

BINTANGOR, 26 Feb – Pengawa ngangkatka pengelikun jalai alun di Sarawak majak ditegapka lebuh Opis Kereja Raya (JKR) Sarawak ngelancharka Papan Pal Tatak Pengelaju Jalai Bekuasa Solar di Jalai Tg. Genting kemari.

Inisiatif teknologi gadung nya dipenyadika Direktor Kereja Raya Sarawak, Datu Dr. Cassidy anak Morris, ti nyemetak madahka pengawa ngena teknologi pintar nyadi singkang proaktif dalam nerenakka chara deriba enggau likun sereta ngurangka risiko penusah aksiden ba kandang endur ti berisiko.

Nitih ku iya, papan tanda radar ti bekuasa solar nya ulih mandangka bacha pengelaju perengka pengangkut dalam timpuh nyata, lalu enggau nya meri jaku tangkan terus ngagai deriba enti sida ngelui ari tikas pengelaju ti udah ditetapka.

“Chara tu ukai semina neritka atur enda terus aja, tang lebih agi meri pelajar ti terus ngagai penguna jalai alun ngambi lebih beratika pengelikun,” ku iya.

Pengawa ngena kuasa solar mega ngasuh sistem tu meruan agi sereta enda ngerusak rampa menua, kelimpah ari ulih beoperasyen enggau enda bepanggai ba bekal kuasa karan konvensional.

Pengawa bejalaika projek tu mandangka komitmen Opis Kereja Raya Sarawak ti terus ngenegapka sukut pengelikun infrastruktur nengeri tu, seriris enggau aspirasyen pemansang nuju sistem pengangkut ti lebih likun, efisyen sereta tan.

Sama bisi datai iya nya Injinir Bagi Menua Sarikei Ir. Ts. Kennedy anak Kedo, ADE (Operasyen) Ir Frasser anak George Micheal, raban JKR Sarikei, Penyedia Servis (SP) enggau temuai ke bukai. -RBI

BINTANGOR, 25 Feb – Balai Bomba enggau Penyah Penusah (BBP) Bintangor terus komited ngenegapka pengelikun komuniti nengah pengawa bejalaika Program Penyedar Mensia Mayuh ke diatur pukul 10.00 pagi, Hari Tiga tu tadi.

Program tu mungkur penemuai betemu enggau peranak rumah panjai di Rh Jonathon Ugek, Sungai Janting dalam meri penerang ngagai peranak rumah panjai nya pengawa beguna maya napi penusah ngenyit.

Nitih ku PPgB Mahmudin Narudin, Ketuai Balai Bomba enggau Penyah Penusah Bintangor, chara bakatu beguna dikena nambahka tikas penyedar komuniti, kelebih agi ba kandang rumah panjai, bekaul enggau risiko penusah angus.

“Program tu ngembuan tuju deka meri penerang tumu ngagai peranak bekaul enggau atur nagang penusah angus sereta atur lengkas ti patut dipejalaika enti sema bisi penusah ngenyit nyadi,” ku iya.

Entara isi program nya nyengkaum meri penerang pandak senentang chara nyeliah penusah angus ba premis genturung pendiau sereta mega penerang bekaul enggau pengawa meri kelala sereta ngena perengka pengerara api enggau betul.

Bomba tetap komited bejalaika inisiatif ti seruran dipejalaika setipak enggau rambai jaku Prestasi Tinggi, Cepat enggau Mesra dalam nentuka pengelikun komuniti seruran dijaga. -RBI

MIRI, 25 Feb – Sebuah rumah pekereja empat pintu ba Miri Concrete Sdn Bhd, Jalai Kuala Baram nyau deka lengis angus ba penusah ke nyadi tengahari tu tadi.

Ketuai Balai Bomba enggau Penyah Penusah (BBP) Lutong, PBT II Henry Jugah, madahka piak iya nerima kangau ngenyit urung pukul 4.58 lemai sebedau seraban bomba ngesah ngagai endur nya ke bepalan urung enam kilometer ari balai nya.

“Lebuh datai ba endur nya urung pukul 5.05 lemai, ditemu penusah angus nya ngaul sebuah rumah pengereja pengawa enggau struktur ukai tetap ti ngembuan pemesai urung 50×30 kaki persegi,” ku iya.

Nitihku Henry, rumah nya bisi empat pintu ti mungkur siti unit diuan, siti unit puang enggau dua unit dikena nyadi palan nyimpan barang.

Ku iya nambah, sebuah mutosikal Modenas Kriss 110 mega rusak urung 40 peratus dalam penusah nya.

“Raban bomba bejalaika operasyen madamka api nengah chara nguna hos sepemanjai 400 kaki ngena dua jet ai ari pun penatai tebuka.

Ba penusah nya, sepenyampau lapan iku orang ke nguan rumah nya nyengkaum lima iku lelaki besai tuai, siku indu besai tuai enggau dua iku nembiak mit diripotka selamat enggau nadai sebarang bakal.

Operasyen nya mungkur enam iku raban BBP Lutong enggau bantu tiga iku raban Opis Bomba Komuniti Kampung Muhibbah. Sama bisi ba endur nya raban polis enggau Sarawak Energy Berhad (SEB).

Pun penusah angus enggau anggar pengerugi agi dipansik piak bomba. -RBI