PAKAN, 6 April – Perintah dipinta terus ngetanka subsidi diesel di Sarawak laban nya beguna amat ngagai peranak menua pesisir ti bepanggai ba minyak nya ungkup pengidup sida ninting hari.

Penyanding Penemu ba Opis Premier Sarawak (Industri Pemakai, Komoditi enggau Pemansang Wilayah) ke mega Kaban Kunsil Nengeri (ADUN) ungkup Pakan, Tan Sri William Mawan anak Ikom madah, peranak Sarawak balat bepanggai ba minyak diesel, kelebih agi ungkup perengka pengangkut pikap berindik ari gaya bungkur menua ke besai sereta mayuh pemar.

Berindik enggau nya, iya ngarapka subsidi diesel terus dijaga dikena nentuka pengelantang enggau pengelantang pengidup rayat, kelebih agi ba kandang menua ulu Sarawak.

Iya nibarka jaku tu beserimbai enggau pengawa bejadika Projek Transformasyen Menua Pesisir RTP (Rumah Baru) di Rumah Selia Micheal, Sungai Besai Wak Pakan kemari.

Berebak enggau nya, Mawan mega madahka inisiatif ngemansangka genturung pendiau baru mega ditegapka agi lebuh sebuah rumah panjai baru berengkah digaga nengah pengawa nasih tanah ke diatur kemari.

Ku iya, projek nya muka peluang ngagai rayat nempa pengidup ti lebih betukuh nengah chara beambi ulih ari perengkaguna ti disediaka perintah baka RTP enggau duit jali berumah.

Ku iya nerang, kandang menua nya sebedau tu bedau dikemansangka penuh ketegal gaya menua ke bebukit sereta besemak enggau sungai, tang diatu benung chakah disediaka nyadi palan pemansang ke baru.

Ku iya nambah, chara tu ukai semina meransang pengawa ngaga mayuh agi palan pengentap pendiau ti diperambu, tang mega ulih ngenegapka penyerakup komuniti sereta ngemudahka akses ngagai perengka guna pemun baka jalai alun, komunikasyen enggau perengka guna.

Berebak enggau nya, kereja nyendiaka palan nyengkaum ngerataka tanah dipelabaka begunaka ungkus urung RM100,000 lalu dipelaba jampat tembu tang bepanggai ba gaya hari.

“Enti kereja tu tembu tumu agi, agih belanja lebih nya deka dikena ngangkatmanah sistem parit dikena nentuka kandang endur tu lantang agi sereta ‘mesra’ peranak,” ku iya nerang.

Iya mega nyemetak madahka pengudah struktur ketuai komuniti baka Ketua Kaum (KK) ditumbuhka enggau rasmi, peminta deka dikenataika ngagai Kaunsil Pengawa Berumah enggau Pemansang Kandang Mengeri (HDC) enggau sukung ke penuh. -RBI

PAKAN, 6 April – Pengawa ngidupka baru Gerempung Hock Ching San Pakan-Wak majak ditegapka laban pemerat diberi ngagai pemesai guna ngasika atur Opis Pengerejista Gerempung Malaysia (ROS).

Dalam program Nemuai Begulai enggau Kaban gerempung nya ke diatur kemari, Kaban Parlimen Julau, Datuk Larry Sng Wei Shien nerangka tetiap gerempung enda tau enda direjista ari baruh ROS dikena nentuka operasyen gerempung nya teratur agi sereta entas ari sukut undang-undang.

Ku iya, Gerempung Hock Ching San Pakan-Wak sebedau tu diripotka dikinsil ROS berindik ari enda nganjung ripot enggau minit aum baka ke udah ditetapka.

Nitihku iya, pengawa numbuhka gerempung bejalaika tanggungpengawa besai dalam pemansang komuniti, kelebih agi ngambi chunto komuniti Cina ti udah mujur ngemansangka institusyen baka sekula enggau rumah sembiang nengah kerejasama dalam serakup.

“Di Pakan, gerempung baka tu beguna amat lalu patut diidupka baru ungkup pemaik begulai,” ku iya ke mega Chairman Kunsil Industri Kayu Ramu Malaysia (MTIB).

Ungkup tuju ngidupka baru gerempung tu, pengabis kurang siku ari kaban komiti lama mesti bisi kaul enggau pengawa numbuhka komiti baru.

Kelimpah ari nya, semua syarat enggau garis lalau ke udah ditetapka ROS mesti dititihka enggau penuh.

Kelai sukung enggau peransang ngagai pengawa nya, sepenyampau RM10,000 udah diberi dikena mantu ngidupka baru aktiviti gerempung, kelimpah ari bantu sebedau tu ke udah dikenataika.

Singkang tu dikearap ulih ngeringka baru pangku pengawa raban nya nyadi pelasar penyerakup enggau pemansang komuniti lokal. -RBI

MATU, 6 April — Palan Kawalan Operasi Daerah (PKOD) Angkatan Pertahanan Awam Malaysia (APM) Pelilih Matu udah nerima kangau ngenyit bekaul enggau penusah angus semak ba tisi jalai di Kampung Hilir Kuala Matu, lemai kena Hari Minggu.

Lebuh datai ba endur nya, raban APM tetemuka penusah angus nya ngaul kandang babas besemak enggau pendam nya.

Atur jampat dipejalai dikena nagang sereta madamka api dikena nyeliahka api nya nyerarai ngagai kandang endur ke besemak.

Operasyen madamka api mujur dipejalaika enggau lanchar lalu api ulih dijaga penuh dalam timpuh ke pandak. Nadai mansa diripotka bisi kaul enggau penusah nya.

APM mega ngentaska gaya ba endur nya likun sereta ulih dijaga pengudah operasyen tembu.

Mensia mayuh dilalau ngambika seruran beratika risiko angus kelebih agi maya hari angat enggau kemarau, lalu lengkas ngeripot sebarang penusah ngenyit nyadi ngagai piak bekuasa. — RBI

KUALA LUMPUR, 6 April – Pengarang berita rampa menua ke tebilang, Datuk Karam Singh Walia udah nadai tumu pagi tadi.

Pekara nya dientaska menyadi biak niang ke mega nyadi Pengarang Pengatur Kumpulan (GME), Berita enggau Pekara Semasa Media Prima Berhad, Jasbant Singh.

Karam Singh Walia kala nyadi pengarang berita ba stesyen televisyen peribit nasional, TV3 ke alai iya kala mangku pengawa ari taun 1990 ngagai 2014.

Karam Singh Walia mega dikelala enggau gaya mantaika jaku iya ti terang, nyengkaum ngena jaku ikonik baka ‘Tu ukai cherita baru’, ti suah dikena lebuh mantaika isu pengamah enggau salah ngurus rampa menua.

PALOH, 6 April – Penyerakup enggau kerejasama komuniti nyadi batang kunchi pemujur pemansang ba kandang menua Semop, kelebih agi dalam nentuka projek ti udah diperambu ulih dipejalaika enggau lanchar ungkup pengelantang begulai.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyemetak madahka enti nadai sukung tegap ari rayat, semua pengawa pemansang nyengkaum projek besai bisi potensial kena tekeruga.

Berindik enggau nya, iya ke mega Kaban Kunsil Nengeri (ADUN) Semop ngelalau komuniti pupu bansa ngambika terus ngetanka pengelantang sereta nyeliahka sebarang bansa provokasyen ti tau ngenataika saru penemu enggau asai ati ti enda lantang ba rayat.

Berebak enggau nya, iya madahka projek Jematan Batang Paloh ke benung digaga diatu dikearapka nyadi pematak besai pemansang ba kandang menua nya.

Nitihku iya, projek nya deka meri penguntung ngagai abis nadai 13 buah genturung pendiau nyengkaum palan pengentap pendiau baru Pusat Pertumbuhan Desa (RGC) Semop sereta mega rumah panjai, kelebih agi ari sukut rama enggau ekonomi.

“Jematan tu deka nyadi batang penyambung darat enti udah tembu ila, lalu enggau nya nambahka akses ngagai peranak, kelebih agi ba kandang menua Pulau Bruit,” ku iya.

Ku iya nambah, bemacham projek pemansang ke bukai mega benung dipejalai lalu pengawa ngaga jematan nya dipelaba ulih nyungkak penumbuh sereta ngangkatka tikas pengidup peranak menua nya.

Iya madah munyi nya ba Pengerami Nerima Pengabang Aidilfitri DUN Semop ke diatur ba Kampung Sebako enggau Kampung Sedi, ditu sehari tu tadi.

Sama bisi datai Kaban Parlimen Tanjong Manis, Dato Ir Yusuf Abd Wahab.

Berebak enggau nya, Abdullah mega bisi bekunsika jaku pesan ari siku tuai rumah panjai ke suba maya keterubah ngaul diri nyadi pengari rayat ti ngemeratka pekara ke diguna pemun baka bekal ai, jalai alun enggau telekomunikasyen nyadi pelasar beguna ngagai pemansang.

Ku iya, pesan nya udah nyadi peransang ti enda ngetu dalam pengawa iya meri servis ti pemadu manah ngagai rayat ba kandang menua DUN Semop. – RBI

SIMANGGANG, 6 April – Datuk Francis Harden Hollis, Sapit Menteri Pemansang Bakat enggau Kaban Kunsil Nengeri (ADUN) Simanggang ngemendarka agih belanja MRP sepenyampau RM10,000 ngagai PIBG Sekula Primari (SK) Paku Undop sereta mega RM5,000 dikena melanja program robotik enggau nya ngenegapka pengawa belajar bepelasarka teknologi.

Agih belanja nya dipadah lebuh iya bejadi Pengerami Merarau Segulai Sejalai ke diatur PIBG sekula nya ke digulu urung 700 iku temuai.

Dalam jaku dipansutka iya, Harden ngenataika jaku puji enggau pengaga ati ngagai PIBG SK Paku Undop laban udah mujur ngatur pengerami nya enggau sambut ti chukup meransang, kelebih agi ari komuniti Iban di kandang menua Ulu Undop enggau Batu Lintang.

Nitih ku iya, pemayuh penatai komuniti mandangka kerejasama rat entara PIBG, staf sekula enggau komuniti lokal, lalu enggau nya mandangka sukung tegap ngagai pengawa ngumpul belanja dikena melanja aktiviti ungkup pemansang nembiak.

Dulu agi ari nya, Kepala Pengajar, Kanang Impin ba jaku pengelalu madahka pengeran sekula nya deka nimbal jaku tangkan perintah ngenegapka program digitalisasyen sereta nambahka pengerindu nembiak dalam bidang STEM.

Ku iya, pemerat ba STEM beguna amat setipak enggau pengerembai teknologi ti jampat ti begunaka pengereja pengawa ti landik dalam bidang teknikal nyadi pematak pemansang menua.

Sama bisi ngulu atur pengawa nya, Chairman MDSA, Anthony Abell Chendan, Presiden PIBG SK Paku Undop, Jinson Restigis, Chairman Kaunsil Kepala Pengajar Malaysia Pelilih Sri Aman, Alfred Kendim enggau sekeda ketuai raban bansa nyengkaum Temenggong Leonard Libau Anol, Pemancha Denneil Saweng enggau Penghulu Mingging Sigan. – RBI

KUCHING, 5 April – Dewan Bandaraya Kuching Utara (DBKU) mansutka jaku tangkan terit ngagai mensia mayuh ngambika enda ngaul diri enggau sebarang pengawa betunu chara tebuka berindik ari gaya hari ti angat sereta kemarau ke nyadi diatu, lalu enggau nya nambahka risiko penusah angus enggau pengamah angin.

Jaku tangkan nya dipansutka berindik ari penusah angus ti mungkur kandang endur urung tiga hektar ba Jalai Sultan Tengah semak Bangunan Sumber Alam, Petra Jaya, lemai kemari, ti dipelabaka ketegal siku individu ti nadai tanggungjawab nunu getah tali karan.

Datuk Bandar DBKU dalam penerang iya nyemetak madahka, sebarang aktiviti betunu chara tebuka ditagang enggau terit lalu tau kena atur undang-undang.

Aktiviti baka nunu uras, uras kebun tauka kandang endur tebuka ukai semina ngeruga pengelikun, tang mega ngeruga pengerai mensia mayuh ketegal sebun asap.

Nitih ku iya, gaya hari ke diatu angat sereta kemarau ngujungka api jampat nyerarai sereta tusah deka ditagang, lalu enggau nya bisi potensial ngujungka penusah angus besai nyadi enti enda ditagang tumu.

Berindik enggau nya, mensia mayuh dilalau ngambika enda ngaul diri ba pengawa betunu chara tebuka enggau sebarang tuju, kelimpah ari seruran beratika gaya ngelingi, kelebih agi ba kandang endur ke mudah angus baka rumput enggau babas.

Kelimpah ari nya, komuniti dilalau ngena chara muai uras ke betul nyengkaum beambi nguna ari servis ngumpul uras ke bisi disediaka DBKU, pia mega ngurangka aktiviti ba luar enti gaya hari kelalu angat sereta kualiti angin enda manah ke pengerai.

Mensia mayuh mega dipinta lengkas ngeripot sebarang penusah angus ngagai piak bekuasa ngambika atur lengkas ulih dipejalaika.

DBKU mega madahka deka chakah agi bejalaika pengawa matau enggau neritka atur ari setiap, kelimpah ari enda kakang ati ngambi atur ke terit ngagai sebarang piak ti ngelanggar atur ari baruh Seksyen 113 Ordinan PBT 1996.

Kerejasama semua piak beguna amat dalam nentuka pengelikun komuniti enggau pengelantang rampa menua terus dijaga. -RBI

BAU, 5 April — Siku lelaki peranak menua luar ke beumur urung 30 taun ditan Polis DiRaja Malaysia (PDRM) pengudah iya dipechayaka ngereja ulah agresif maya mabuk ti meri pengirau ati ngagai peranak ba kandang menua SALCRA, Kampung Opar, Bau, kemari.

Ketuai Polis Pelilih Bau, P/SUPT Mohd. Haide Bin A. Rahman, madahka saspek mujur ditan enggau bantu mensia mayuh ke bisi pengirau ati sebedau polis dikangau ngambika ulih bejalaika atur ke bukai.

Nitihku iya, pansik tumu tetemuka lelaki nya madahka diri peranak menua Indonesia tang enda ngayanka sebarang dokumen pejalai ke entas.

“Saspek udah nya ditan polis ngambika atur nangkanka nya dipejalaika ari baruh Seksyen 6(1)(c) Akta Imigresen 1959/63,” ku iya nengah penerang media sehari tu tadi.

Ku iya nambah, saspek mega udah dibai berubat ngagai Sepital Bau berindik ari bakal mimit ba mua iya ke dipelabaka nyadi maya orang nguji ngetanka iya.

Kes tu agi dipansik, lalu polis deka bejalaika atur ti nangkanka nya nyengkaum ngulihka penerang ari Opis Imigresen Malaysia sereta madah ngagai piak ti bekaul.

Berindik enggau nya, mensia mayuh dilalau ngambika enda ngambi sebarang atur kediri empu ti tau mai risiko pengelikun, tang nganti ngeripot sebarang penerang tauka penusah ti dipelabaka nyadi ngagai polis.

PDRM nandu baru komitmen sida ti seruran deka nentuka pengelikun enggau atur mensia mayuh seruran dijaga. – RBI

DARO, 5 April — Penusah angus tanah kerapa ke nyadi semak jalai batang di Kampung Saai mujur dirara berindik ari pengawa jampat raban penyelamat, sehari tu tadi.

Palan Penyaga Operasyen Pelilih Menua (PKOD) Raban Penyaga Orang Periman Malaysia (APM) Daro nerima kangau ngenyit madahka penusah nya sebedau sida ngesah enggau lengkas ngagai endur nya.

Lebuh datai ba endur nya, raban APM ngaga penyikap keterubah nyengkaum ngena kereban pengelikun diri (PPE) sebedau ngepunka operasyen madamka api.

Tim APM mega bisi mantu raban bomba ba pengawa nagang api ari majak nyerarai.

Api mujur dirara ngena pam ai, lalu enggau nya api ulih ditagang nyerarai ngagai kandang endur ke besemak.

Nadai bakal diripotka nyadi, seraya semua kaban enggau perengka operasyen dalam gaya ke manah.

Gaya ba endur nya diatu diripotka ulih dijaga.

Mensia mayuh dilalau seruran bejejaga sereta lengkas ngeripot sebarang penusah ngenyit nyadi ngagai piak bekuasa.

Sebarang penusah ngenyit tau disalur nengah lumur 999 tauka betanya ngagai talipaun APM Daro ba lumur 084-823911 ti beoperasyen 24 jam. -RBI

SIBU, 5 April — Pemujur Sekula Sekondari (SMK) Katibas ngerikodka tikas penyulut 100 peratus ba peresa Sijil Pelajaran Malaysia (SPM) 2025, nyata ngayanka puku ti diperanakka sepenyampau RM84.9 juta dalam sektor pelajar ba sitak Kunsil Nengeri (DUN) Katibas kenyau 2022 ngembuahka asil ti meransang.

Kaban Kunsil Nengeri (ADUN) Katibas, Lidam Asan madah, pemujur tu mandangka pemanah pengawa ti enda ngetu dalam pengawa ngenegapka pemansang pelajar, kelebih agi di menua pesisir.

“Pemujur tu ngayanka sekula menua pesisir mega bisi penau nyapai tikas penyulut ke tinggi, lalu patut diberi kelala ke lebih besai agi,” ku iya lebuh dikerandau ditu, kemari.

Iya nyemetak madahka pemujur SMK Katibas asil ari komitmen tinggi raban pengajar, pengeran nembiak enggau sukung tegap ari komuniti menua nya dalam negika pelajar.

Pemujur tu mega muai penemu ti madahka sekula menua pesisir napi penanggul besai ari sukut geografi, infrastruktur enggau akses ngagai perengka guna pelajar.

Nitih ku Lidam, nengah chara ngajar ti ngasi sereta kerejasama rat entara sekula, pengari rayat enggau komuniti, palan pelajar di kandang menua ulu ukai semina ulih nangkup peminta pelajar, tang mega ngelui ari nya.

Iya minta semua piak nyengkaum pengaga polisi enggau piak bekuasa pelajar ngambika terus beratika enggau berat pengawa ngenegapka pelajar menua pesisir nengah pengawa beranakka puku ti enda ngetu, ngagihka perengka guna enggau lurus, sereta sukung ti ditagit.

Lidam mega meri besai terima kasih ngagai Opis Pelajar Nengeri (JPN), Opis Pelajar Pelilih Menua (PPD), raban pengajar enggau pentadbiran tiga buah sekula sekondari di pelilih Song ketegal komitmen sida ngangkatka modal mensia enggau penyulut nembiak bansa.

Iya nyemetak madahka kenyau ari taun 2022 nyentuk ke diatu, JPN udah melanja RM84.9 juta ba pengawa ngemansangka sekula di pelilih Song, ti nyata meri empas positif ngagai penyulut akademik nembiak.

“Pemujur tu enda tau enda nyadika pelasar dikena neruska momentum penyulut pelajar ngambika genap iku nembiak di Sarawak enda ngira endur bepeluang ngasaika pelajar ti bekualiti,” ku Lidam.

Iya mega ngarapka pemujur SMK Katibas ulih nyadika peransang ngagai sekula menua pesisir ke bukai ngambika terus nyapai pemujur ke nyulut. -RBI