MERADONG, 6 Mac – Siku indu peranak menua tu ke beumur urung 30 taun ditan polis pengudah dipelabaka bisi kaul enggau aktiviti bejudi nadai pemendar dalam operasyen ti dipejalaika ba Jalan Wharf, Bintangor, kemari.

Ketuai Polis Pelilih Meradong, DSP Tansli Mering madah, pengawa ngetan nya dipejalaika seraban pemesai ari Bagi Tasat Jenayah (BSJ) Indu Opis Polis Pelilih (IPD) Meradong urung pukul 1.40 lemai kena 5 March tu tadi seraya bejalaika operasyen nagang penyalah ba kandang menua nya.

Nitihku iya, asil peresa saspek tetemuka sekeda barang dipelaba dikena bejalaika aktiviti bejudi.

“Entara barang ke dirampas iya nya sebuah telefon pintar Oppo, keretas chelak ke ngundan lumur ke dipelaba lumur loteri ke enda entas enggau nadai lisin sereta penyampau duit tunai,” ku iya nengah penerang berita sehari tu.

Ku iya nambah, semua barang nya dirampas ngambika dipansik enggau silik lalu saspek begulai enggau barang kes udah dibai ngagai Balai Polis Bintangor ngambika atur silik dipejalaika.

Kes tu dipansik ari baruh Seksyen 4A(a) Akta Rumah Judi Tebuka 1953, ti nyendiaka ukum mata duit enda kurang ari RM1,000 enggau enda lebih ari RM100,000 tauka dijil nyentuk lima taun, tauka kededua ukum nya, enti dikenuku salah.

Berebak enggau nya, DSP Tansli ngelalau mensia mayuh anang ngaul diri enggau sebarang aktiviti jenayah kelebih agi pengawa bejudi nadai pemendar.

Iya mega minta mensia mayuh terus meri penerang ngagai polis bekaul enggau sebarang aktiviti jenayah dikena nentuka pengelikun enggau atur mensia mayuh seruran dijaga. -RBI

PAKAN, 6 Mac — Beserimbai enggau penatai bulan Ramadan, Sekula Primari (SK) Nanga Semawang, raban pengereja pengawa bekerejasama nyendia sereta nyadung bubur lambuk ngagai komuniti lokal ba sebengkah program komuniti ke diatur ba kandang sekula nya, sehari tu.

Program ke diatur raban SK Nanga Semawang nerima timbal ke chukup meransang lebuh semua raban datai tumu pagi nyaup proses nyumai nengah proses ngerupan.

Urung 250 kontena bubur lambuk udah mujur disedia sebedau disadung ngagai komuniti lokal, pia mega kaban staf ari sekula semak SK Nanga Semawang.

Nitihku pengatur program, aktiviti baka tu ukai semina ulih ngerichahka agi gaya bulan Ramadan, tang mega ulih ngerapitka kaul entara komuniti dia.

“Program tu mega nyadi pelasar dikena nerenakka semengat kerejasama enggau penyerakup ba raban sekula,” ku iya rambau pengawa nyuaka bantu nya.

Peranak ke nerima bubur lambuk nya bela mantaika pengaga ati sereta beterima kasih ngagai pengeransing pengatur pengawa nyediaka pemakai nya.

Dikearapka program baka tu ulih dipajakka jemah ila nyadi aktiviti ninting taun ti ulih nyerakupka komuniti lokal enggau raban sekula sepemanjai bulan Ramadan. -RBI

KUCHING, 6 Mac — Insentif RM700 ti dipadahka Perintah Sarawak sebedau tu dikena nyadika formula dikena nentuka penyampau wang turu ke diagih ngagai gerempung media, ukai diberi sechara individu ngagai raban media.

Sapit Menteri ba Opis Menteri Besai Sarawak (Pekara Korporat, Pemadah enggau UKAS), Datuk Abdullah Saidol madah, penyampau nya nyadika pelasar ngira rega wang turu ngagai tetiap gerempung media bepelasarka penyampau kaban sida empu.

Nitih ku iya, chara tu diambi berindik ari raban media nadai ari baruh skim servis mensia mayuh baka orang gawa perintah ti nerima bantu khas sechara individu.

“Penyampau RM700 nya ukai bantu ngagai tetiap individu. Nya formula dikena nentuka penyampau pemeri ke diagih ngagai gerempung media bepelasarka penyampau kaban sida,” ku iya nerang.

Iya madah munyi nya lebuh dikerandau media pengudah bejadika Pengerami Nutup Program Sentuhan Prihatin: Tanggungpengawa Rama Korporat (CSR) ke diatur Unit Komunikasyen Awam Sarawak (UKAS) enggau kerejasama Bulan Sabit Merah Malaysia (BSMM) Pelilih Menua Kuching di Galeri, Pustaka Negeri Sarawak, ditu kena Hari Empat.

Datuk Abdullah nambah, pemeri nya dikena nyukung pengawa bejalaika aktiviti enggau pengelantang kaban gerempung media, nyengkaum mantu sida ti betapi enggau penusah ngenyit baka bebadi tauka diperubat ba sepital.

Dalam pemansang ke sama, iya madahka perintah nengeri mega benung mansik perambu ngaga ‘rumah kelab’ khas ungkup orang media nyadi palan endur begempuru sereta bejalaika aktiviti profesyenal.

Taja pia ku iya nerang, perambu nya agi ba renggat perambu nyengkaum ngelala endur ke engkeman sereta beratika anggar ungkus sebedau iya ulih nyadi nyata.

Iya mega ngarapka pemeri ti disalur ngagai gerempung media ulih dikena enggau manah dikena ngenegapka pengelantang pendiau kaban kelimpah nyukung pengawa bejalaika bemacham aktiviti ti meri penguntung ngagai komuniti media.

Kelimpah ari nya, iya meransang raban media ngambika terus chakah dalam gerempung sida empu ngambika pengawa ngenegapka pengelantang pendiau enggau pemansang profesyenal ulih dipejalaika enggau lebih teratur jemah ila.

Sama bisi datai Chairman Perpustakaan Negeri Sarawak, Datuk Dr.Abang Abdul Rauf Abang Zen, Direktor UKAS, Awang Putrayusrie Awang Redzuan, Direktor JKOM Zon Sarawak, Ajes Tuah enggau bala temuai bukai.

BARAM, 6 Mac — Projek ngaga Sekolah Kebangsaan (SK) Long Pelutan di Baram, Miri udah tembu penuh, lalu enggau nya nyendiaka perengka guna pelajar ti lebih lantang sereta kondusif ngagai bala nembiak enggau raban pengajar di kandang menua ulu.

Nitihka penerang ti dipansutka Opis Kereja Raya Sarawak nengah Bagi Menua Miri, projek nya nyengkaum pengawa ngaga 12 blok begunan ti mungkur blok pentadbiran empat ringkat ti endur enam buah kelas, sebuah blok dewan makai, dua blok buding nembiak enggau dua blok jamban ungkup guna nembiak.

Kelimpah ari nya, projek tu mega mungkur pengawa ngaga tiga blok kuarters pengajar jenis Semi-D Barrack, dua blok rumah pam ai enggau sebuah rumah genset dikena nyukung operasyen perengkaguna sekula nya.

Berebak enggau nya, projek tu mega nyengkaum kereja luar nyengkaum nyendiaka perabot, kereja ngeruntuhka, kereja piling enggau masang sistem mekanikal enggau elekterik dikena nentuka perengka guna sekula ulih bejalai enggau manah.

Nitihka penerang, penembu projek tu mandangka Opis Kereja Raya Sarawak terus bebendar nyendiaka infrastruktur pelajar ti bekualiti, kelebih agi dikena nambahka akses enggau rampa belajar ke manah agi ungkup komuniti di menua pesisir. — RBI

SEGAMAT, 6 Mac – Polis benung nyidi siku lelaki ke dipelabaka peranak menua luar pengudah iya dipelaba ngereja ulah kelalu kamah ba sebuah masjid di Bukit Siput, ditu, kilah ensanus.

Ketuai Polis Pelilih Segamat, Supt Mohd Jumazanzahir Chek Ismail madah, piak iya nerima ripot bekaul enggau penusah nya urung pukul 6.29 lemai ari siku indu peranak menua nya ke beumur urung 40 taun.

Nitihku iya, penusah nya dipelabaka nyadi urung pukul 11.15 pagi lebuh mansa benung besembiang dhuha ba masjid nya.

“Lebuh mansa benung besembiang, siku lelaki enda dikelala enda mukai-mukai tama dalam gaya setengah telanjai sebedau ngereja pengawa kamah seraya merening mansa.”

“Irauka pengelikun diri, mansa ngelarika diri ari palan penusah nyadi,” ku iya ba sebengkah penerang.

Pansik keterubah tetemuka rikod televisyen litar betutup (CCTV) ba kandang endur masjid nya mujur ngambi gambar pengawa saspek.

Saspek dipelabaka lelaki peranak menua luar beumur urung 30 taun, kurus sereta bekulit burak.

Kes nya diatu benung dipansik ari baruh Seksyen 377D Kanun Keseksaan ketegal ngereja pengawa enda menuku ke balat ti nyendiaka ukum jil nyentuk dua taun enti dikenuku salah.

Berindik enggau nya, raban polis minta mensia mayuh ke bisi penerang bekaul enggau penusah nya datai ke mua mantu tasat nengah chara betanya ngagai Indu Opis Polis Pelilih Segamat ba lumur hotline 07-9324222 tauka sebarang balai polis ke besemak. — RBI

SERDANG, 6 Mac – Universiti Putra Malaysia (UPM) diatu benung muka peminta masuk ‘dalaman’ ungkup nembiak ti deka nampung pelajar tinggi ungkup sesi akademik ti deka datai.

Peminta nya mungkur Program Nyediaka Setipikit tauka ngagai renggat Diploma, sereta mega Diploma ngagai renggat Bacelor, ti disediaka khas ungkup nembiak ke nitihka syarat ke patut ditetapka universiti.

Nitihka penerang rasmi UPM, timpuh peminta dibuka berengkah ari 3 Mac 2026 ngagai 23 Mac 2026, ari pukul 12.00 tengahari nyentuk 12.00 tengahari nengah portal rasmi universiti.

Peminta tu dibuka ngagai beberapa kategori chalun, nyengkaum nembiak taun kepenudi Diploma UPM, nembiak Program Nyediaka Diploma Sains UPM, kelimpah ari pemegai setipikit bekaul baka Setipikit Veterinar Malaysia ari Institut Veterinar Malaysia, Setipikit Ranger Hutan ari FORTRASUIN Opis

Perhutanan Semenanjung Malaysia enggau Jabatan Perhutanan Negeri, enggau Setipikit Betanam Betupi Malaysia ari Opis Betanam Betupi Malaysia.

Inisiatif tu mandangka komitmen Universiti Putra Malaysia ti deka nyendiaka jalai pelajar ke lebih luas ngagai bala nembiak dikena ngangkatka tikas akademik sida sereta ngenegapka pemansang modal mensia ti bepenemu setipak enggau aspirasyen universiti.

Chalun ke bisi ati dilalau nganjung peminta dalam timpuh ke udah ditetapka sereta ngulihka penerang silik pasal peminta masuk enggau program belajar nengah laman web rasmi universiti ba study.upm.edu.my.

MIRI, 5 Mac — Pengawa nyendiaka diri ngatur Bazar Gawai Dayak 2026 diserenih dalam Aum Komiti Mit Bazar Gawai Dayak (GDB) 2026 ke diatur kena Hari Tiga tu tadi, pukul 7.00 lemai ba Opis Gagasan Anak Dayak Sarawak (GADS) Bandar Baru Permyjaya, Miri.

Aum nya dipunka enggau jaku pengelalu ari Chairman GADS, Jimmy Ak Lawie ditangkan enggau jaku ari Penyanding Penemu Pentadbiran enggau Pengurusan GADS ti ngemeratka pemesai guna kerejasama rat enggau komitmen ari semua piak dalam nentuka pengawa ngatur bazar nya lanchar.

Dalam aum nya, dipadahka GADS diberi tanggungpengawa ngatur Bazar Gawai Dayak 2026 ari baruh Pengerami Gawai Dayak Renggat Sarawak taun tu.

Entara batang pekara ke dikerandau iya nya pengawa mantaika pelin langkar palan bazar, perambu bajet ngatur, penetap rega suwa ungkup langkau bejual, enggau pengawa ngemaru struktur komiti GDB 2026.

Aum nya mega mansik sekeda isu ti nyadi sereta perambu tambah dikena nentuka pengawa ngatur bazar tu ulih dipejalaika enggau teratur, sistematik sereta meri empas positif ngagai komuniti enggau pedagang menua tu. — RBI

MIRI, 5 Mac — Siku lelaki peranak menua tu beumur urung 50 taun bebadi nyawa pengudah kerita ke ditepan iya tepawah sebedau ngelantak tiang lampu ba penusah bebadi di Jalai Kuala Baram Bypass besemak enggau Palan Pematih Industri (ILP) Miri, lemai kemari.

Ba penusah ke nyadi urung pukul 5.50 lemai nya, mansa ke deriba ari tunga Senadin nuju Permyjaya dipelabaka lenyau pengering sebedau entukar iya tepawah ke sepiak kanan jalai lalu ngelantak tiang lampu.

Berindik ari penusah belantak nya, mansa dientaska bebadi nyawa ba palan penusah ke nyadi.

Ketuai Polis Pelilih Miri, ACP Mohd Farhan Lee Abdullah madah, kes nya diatu benung dipansik ari baruh Seksyen 41(1) Akta Perengka Pengangkut Jalan 1987 ketegal deriba enda beradat tauka enda likun ngujungka bebadi nyawa.

Iya mega minta mensia mayuh ke bisi penerang bekaul enggau penusah nya datai ke mua mantu tasat nengah chara ngaga kaul enggau pemesai pansik trafik, Inspektor Mohd Faizul Ab. Rahim nengah lumur 014-8582582 tauka 085-430479, tauka sebarang balai polis ke besemak.

Berebak enggau nya, penguna jalai alun dikeingat ngambika seruran deriba enggau bejimat sereta ngasika atur jalai alun dikena nyeliahka penusah ke enda dikedekaka nyadi. — RBI

MIRI, 5 Mac — Kaban Kunsil Nengeri (ADUN) sitak N.78 Mulu, Datuk Gerawat Gala sehari tu nerima penemuai ari sekeda serakup enggau gerempung komuniti di kandang menua Miri dalam aum ke diatur ba Palan Servis ADUN N.78 Mulu ditu.

Nitih ku iya, penemuai nya mandangka penegap semengat kerejasama enggau begulai entara ketuai komuniti enggau mayuh bengkah gerempung ba pengawa ngenegapka pemansang komuniti.

Pengerami nya dipunka enggau pengawa nyuaka plak projek ari baruh Program Projek Mit Menua Pesisir (PPRMS) ADUN N.78 Mulu ti mungkur projek nukar atap ti udah mujur ditembuka ba sekeda kandang endur.

Entara kandang endur ke bisi kaul iya nya Kampung Ulung Palang di Bario, Kampung Pa Remapuh A, Rumah Mullin di Padang Kerbau, Marudi enggau Long Lobang.

Projek tu dikearapka ulih meri pengelantang sereta ngangkatka pengelantang pendiau peranak menua nya.

Ba pengawa ke sama, bisi mega pengawa nyuaka chek penyampau RM90,000 ari Unit Jalai Pengarap Bukai (UNIFOR) ngagai BEM Long Balong dikena nyukung pemansang enggau utai ke diguna komuniti gerija ba kandang menua nya.

Kelimpah ari nya, Gerawat mega bisi ngatur sesi randau mesra begulai enggau pengari Kelab Rotary Miri Oil Town enggau Gerempung Kayan Sarawak (Miri).

Aum nya ngembuan tuju deka berandauka sekeda program komuniti sereta nerima kangau ngulu aktiviti ti diperambu gerempung ti bekaul bulan tu enggau bulan baru.

Iya mega meri pengaga ati ngagai penemuai enggau komitmen semua piak ti seruran chakah ngenegapka penyerakup, pengelantang enggau pemansang komuniti di Miri enggau kandang menua ngelingi.

Kenu ku iya, kerejasama baka nya beguna dikena nentuka pemansang komuniti terus ditegapka ungkup pengelantang rayat enggau pengidup dudi hari ke menyana ungkup semua. — RBI

LIMBANG, 5 Mac – Klinik Ngetu Nginsap nyadi palan intervensyen pengerai ti komprehensif dalam mantu individu ngetu nginsap enggau likun, sistematik sereta ngasi.

Nitihka penerang ari Promosyen Pengerai Opis Pengerai Bagi Menua Limbang, servis ke bisi disediaka ba klinik nya ukai semina dalam tukuh kimpin penyedar aja, tang mega meri sukung profesional nyengkaum sesi kaunseling individu, pansik gian nikotin, pengawa matau enggau tetap sereta chara berubat ke engkeman baka terapi farmakologi.

“Chara komprehensif tu mantu ‘klien’ ngatur simptom narit diri ari nikotin, nagang pengingin deka nginsap sereta nempa pengering dikena ngetanka gaya pengidup nadai nginsap,” ku penerang nya.

Penerang nya mega ngemeratka pemisi Klinik Ngetu nginsap nyata ngayanka orang ke nginsap enda ibuh beperang kediri dalam pengawa sida ngetu ulah nya, laban mayuh individu kebendar bisi pengingin deka ngetu nginsap tang napi mayuh macham pemar baka gian fizikal, tusut runding enggau teparuk rampa ngelingi.

“Nengah iring pengereja pengawa pengerai ke udah dilatih, tetiap klien deka diberi pelin ngetu nginsap ti disesuai nitihka guna individu sida, lalu enggau nya nambahka peluang pemujur dalam timpuh ke panjai,” ku penerang nya nerang.

Dulu agi ari nya, pengawa nemuai ngagai Klinik Ngetu nginsap udah diatur dikena beratika baru chara bejalaika servis nya.

Penemuai nya mega ditangkanka enggau pengawa nyuaka plak ari Pemesai Pengerai Bagi Menua Limbang, Dr.Norliza Jusoh, ngagai Ketuai Klinik Pengerai Batu Danau, Dr. Magdelene Sonnia Ranyui, ti nyadi pengeran ngelakuka pemisi klinik nya ngagai komuniti menua nya.

Pengawa tu mega ngembuan tuju deka nentuka komuniti lebih sedarka bantu enggau sukung ngetu nginsap seruran bisi nengah perengka guna servis pengerai mensia mayuh.

Ungkup rikod, sepenyampau lima klinik pengerai di pelilih Limbang enggau semilan klinik pengerai di pelilih Lawas diatu benung nyendiaka servis Klinik Ngetu Nginsap ngagai mensia mayuh. — RBI