ASAJAYA, 6 Mac — Pengelantang peranak di Kampung Tambirat, Jalai Asajaya tejanggal enda lama lebuh endur nyimpan perengka pengangkut ke udah ditinggal dia diripotka angus, urung pukul 12.50 tengah hari.

Penusah ke nyadi ba gaya hari ke balat angat nya ngepunka sebun asap burak ke ulih dipeda ari jauh, tang pengawa jampat raban bomba mujur nagang api ari nyerarai ngagai genturung pendiau ke besemak.

Komander Operasyen ari Balai Bomba enggau Penyah Penusah (BBP) Asajaya, Rosli Muhi, madahka piak iya nerima kangau ngenyit urung pukul 12.52 tengah hari.

Sepenyampau enam iku kaban begulai enggau jentera Light Fire Rescue Tender (LFRT) dianjung ngagai endur nya dikena ngawal penusah nya.

“Lebuh datai ba endur nya, raban bomba tetemuka penusah angus ti ngaul setumpuk perengka pengangkut ke udah dikena ti ditinggalka.

Bala kaban ngena hos bantu tumu ngerara api terus,” ku iya nengah siti penerang sehari tu.

Nasit amat kandang endur nya endur nyimpan barang ke udah dikena lalu nadai orang nguan, lalu enggau nya ulih nyeliahka sebarang penusah bakal tauka bebadi nyawa.

Raban bomba nentuka tinggal api nya dipadamka enggau penuh sebedau mutuska operasyen dikena nyeliahka penusah angus nya nyadi baru (overhaul).

Pun ke bendar penusah angus kerita ke ditinggalka nya agi benung dipansik. — RBI

SERIAN, 6 Mac — Perintah Sarawak deka terus chakah agi bejalaika pengawa nambahka kapasiti enggau penau pengemeran industri dikena ngenegapka pengawa ngatur sektor berikan tasik dalam di nengeri tu.

Menteri Industri Pemakai, Komoditi enggau Pemansang Kandang Menua, Dato Sri Stephen Rundi Utom madah, taja pan Sarawak bisi kuasa ngeluarka lisin berikan tasik dalam dalam kategori C2 tang sukut operasyen enggau penau ngatur pengawa ba raban pengemeran industri agi patut ditegapka agi.

Nitih ku iya, diatu semina ‘Perbadanan Pembangunan Ekonomi Sarawak’ (SEDC) aja dipeda bisi kapasiti bejalaika operasyen nya enggau komprehensif.

Ku iya nerang, sebedau tu perintah nengeri tetemuka ukai semua asil ikan tasik dalam dianjung ngagai Palan Penyangkai Kapal Tanjung Manis laban pemain industri ke bisi diatu agi bedau ngembuan kapasiti operasyen ke chukup.

“Kelimpah ari nya, bisi mega piak di Bintulu bisi nanya sekalika sida begunaka awak ngambi kru ari Vietnam ngatur operasyen nya.

Nya alai, kitai patut bejimat agi ba pekara tu,” ku iya.

Iya madah munyi nya lebuh dikerandau raban media pengudah nemuai ngagai Ecofarm Solutions, sehari tu tadi.

Ngenang silik agi, iya madahka entara penanggul ke ditapi pemain industri iya nya tagang meli kapal ari sekeda menua baka Vietnam, Thailand enggau China ketegal faktor pengelikun.

Berindik ari pekara tu, kompeni ti bisi kaul patut berunding ngaga kapal kediri empu tauka ngulihka kapal ari menua bukai ti dikemendarka.

Berebak enggau nya, iya mega ngarapka penumbuh Opis Berikan Sarawak deka ngenegapka sukut pengatur dalam ngatur sektor berikan tasik dalam, kelimpah ari nyendiaka mekanisme sukung ti lebih efektif ngagai industri nya.

“Aku ngarapka enggau opis berikan ke baru tu, kitai ulih ngaga langkar atur ke tegap agi sereta nyukung pemain industri ke bisi kaul.

“Naka ke diatu, komuniti berikan bedau bejalaika operasyen penuh,” ku iya nerang. — RBI

MIRI, 6 Mac — Sepenyampau 39 iku orang ke gawa ba Ladang Primaluck lenyau endur diau pengudah sebuah blok kuarter genturung pendiau ke alai sida diau abis angus ba penusah angus ke nyadi tengah hari kemari.

Ba penusah ke nyadi urung pukul 1.15 lemai nya, blok kuarter ke bisi 18 pintu nya diripotka udah angus ngujungka semua peranak enda mujur nyelamatka keresa sida.

Komander Operasyen, PBK I Ladi Eni madah, enggau naka pengelengkas raban bomba datai ba palan penusah nyadi, api ditemu benung mau lalu udah nganguska semua struktur begunan nya.

Nitihku iya, api dipelabaka nyerarai enggau jampat berindik ari pengawa ngaga kuarters ti nyangka ngena utai ti mudah angus.

“Raban bomba udah nya bejalaika operasyen ‘overhaul’ ti komprehensif dikena nentuka nadai agi tinggal api ti tau ngepunka api baru,” ku iya nengah penerang berita sehari tu tadi.

Dulu agi ari nya, piak bomba nerima kangau ngenyit urung pukul 1.15 lemai sebedau sebuah mesin ari Balai Bomba enggau Penyah Penusah (BBP) Lopeng dianjung ngagai endur nya bejalaika operasyen madamka api.

Taja pan penusah angus nya balat ngerusak reta tengkira, tang piak bomba ngentaska nadai penusah bebadi nyawa tauka bakal diripotka dalam penusah nya.

Semua peranak diripotka mujur ngelarika diri sebedau api nyerarai ngagai selampur blok kuarters nya. — RBI

BINTULU, 6 Mac – Sepenyampau 158 iku nembiak ari Unit Sains Sosial dan Pengurusan (JSSP), Fakulti Kemanusiaan, Pengurusan dan Sains (FKPS), Universiti Putra Malaysia Sarawak (UPMS) mantaika kreativiti, daya pengetan enggau semengat dagang sida.

Pengawa tu diatur ba Projek Pedagang enggau kus Pemansang Pedagang FEM2204, semester 2, sesi 2025/2026.

Karnival nya bisi ngayanka lebih 20 buah bansal bejual ti diatur raban nembiak, ti ​​bisi nyendiaka bemacham produk inovatif baka pemakai enggau ai irup, asil pengelandik jari, aksesori enggau barang kreatif ari penemu enggau pengepuh nembiak empu.

Program tu meri awak ngagai nembiak ngasaika peneleba ke bendar bejalaika pengawa dagang, nyengkaum aspek pemansang produk, strategi makit, kaul enggau orang meli sereta ngatur belanja.

Taja pan diatur sepemanjai bulan Ramadan tu, bala nembiak tetap mandangka komitmen tinggi, pengeran enggau semengat kerejasama dalam nentuka tetiap bansal ulih beoperasyen enggau manah sepemanjai program nya.

Nitihka penerang ari koordinator program, Dr.Sharon Ong Yong Yee ari JSSP, FKPS, karnival tu nyadi pelasar belajar peneleba ti beguna amat dalam nempa pengarap diri, pengelandik mutarka penanggul enggau runding dagang ba nembiak.

“Nengah program tu, nembiak ukai semina belajarka teori dalam kelas aja, tang mega bisi peluang napi pemar ke nyata dalam dunya dagang.Peneleba tu mantu sida nempa daya pengetan, kreativiti enggau semengat kerejasama,” ku iya.

Raban pengatur mega meri besai terima kasih ngagai raban akim ti dikangau ti mungkur pengelicha kanan enggau pengajar ari UPMS sereta mega pengari ari Kelab Nembiak Taman Marina Perkasa, ketegal pengeran sida meri awak beratika penemu dagang nembiak sereta meri sukung ngagai bala penyereta sepemanjai karnival nya.

Iya mega meri besai terima kasih ngagai semua nembiak enggau piak ti udah mantu ngemujurka program tu, lalu enggau nya ngayanka komitmen UPMS dalam ngadaka graduet ti kompetitif sereta bisi potensial nyadi orang dagang jemah ila nengah chara belajar peneleba. -RBI

BINTULU, 6 Mac – Pengawa jampat ti dipejalaika Bagi Tasat Jenayah (BSJ) Indu Opis Polis Pelilih (IPD) Bintulu mujur ngemuntanka pengawa enchuri lebuh siku lelaki peranak menua nya ditan ketegal dipelabaka bisi kaul enggau pengawa enchuri tinsaw.

Ketuai Polis Pelilih Bintulu, Supt Nixon Joshua Ali madah, pengawa ngetan nya digaga nengah operasyen Op Pintu pengudah polis bejalaika pengawa pemansik bekaul enggau pengawa enchuri nya.

Nitihku iya, saspek ke beumur 31 taun nya mujur ditan kena 5 Mac 2026 urung pukul 4.40 lemai ba premis Jalai Abang Galau, Bintulu.

“Pansik tumu tetemuka saspek dipelabaka nagit perengka nyadi batang tagit enchuri.Asil ari tasat, lelaki nya ngaku bisi kaul enggau pengawa enchuri tinsaw bansa Stihl TS 410,” ku iya nengah penerang media.

Ku iya nambah, raban polis mega mujur tetemuka tinsaw nya ba sebengkah endur di Taman Permaisuri, kelimpah ari ngerampas gari ke dipelabaka dikena saspek lebuh ngereja penyalah nya ngambika nyadika bukti.

Kes tu dipansik ari baruh Seksyen 379 Kanun Keseksaan ketegal penyalah enchuri, ti nyendiaka ukum jil nyentuk tujuh taun tauka ukum mata duit tauka kededua ukum enti dikenuku salah.

Diatu saspek benung ditan ngambika ulih mantu tasat lalu peminta riman deka digaga ba Kort Bintulu ngambika atur nangkanka nya dipejalaika.

Berebak enggau nya, Supt Nixon Joshua Ali madah, piak polis benung bejalaika pansik ke silik dikena ngelala saspek nyangka bisi kaul enggau sekeda kes enchuri ke bukai ngelingi pelilih menua Bintulu.

Iya mega minta mensia mayuh ngambika seruran nambahka atur pengelikun reta tengkira sereta mgenataika sebarang penerang bekaul enggau penyalah ngagai polis dikena nentuka pengelikun enggau pengelantang komuniti dijaga. -RBI

MUKAH, 6 Mac — Raban Penyaga Pengelikun Mensia Mayuh Malaysia (APM) Mukah udah mujur nangkap siku ular sawa batik pemanjai urung tiga meter pengudah nerima kangau ngenyit ari mensia mayuh bekaul enggau ular tama ngagai kandang manuk ba kandang menua nya.

Nitihka penerang berita ari APM Mukah, piak nya nerima ripot bekaul enggau kes nangkap ular (KMU) sebedau raban petugas nya terus dianjung ngagai endur nya bejalaika operasyen nya.

“Ular ti dikelala nya ular sawa batik pemanjai tiga meter ditemu dalam kandang manuk.

“Raban petugas mujur nangkap ular nya ngena teknik sintak’,” ku penerang nya.

Penerang nya nambah, gaya ba palan penusah nyadi ditemu ulih dijaga sereta likun, lalu nadai penusah ke enda manah diripotka maya operasyen nya dipejalaika.

APM Mukah mega ngenataika pengaga ati ngagai mensia mayuh ti ngaga kaul enggau sida dikena nentuka atur lengkas ulih dipejalai dikena mutarka penusah nya.

Mensia mayuh ke betapi enggau penusah ngenyit tau betanya ngagai APM Mukah nengah talipaun 24 jam 084-872814. — RBI

PAKAN, 6 Mac – Perintah benung beratika pengawa ngena sistem alternatif baka sistem graviti enggau beberapa teknologi bukai ke engkeman dikena ba kandang endur ke bebukit.

Kaban Kunsil Nengeri (ADUN) Pakan, Tan Sri William Mawan anak Ikom madahka, batang pemar ngagai menua pesisir kelebih agi ba kandang menua bebukit iya nya pengawa ngaga rentayan paip ngagih ti begunaka kereja infrastruktur ti kompleks agi.

“Sistem tu ulih bejalaika pengawa nyadi chara mutarka sementara pengelama empat ngagai lima taun nyentukka sistem bekal ai ke meruan agi ulih digaga,” ku iya nerang ngagai raban media pengudah ngulu Aum Ketuai Begulai Enggau Rayat di Rumah Seliang Kunjan, Sungai Marau ditu, sehari tu tadi.

Berebak enggau nya, iya madahka perintah mega benung beratika sekeda penanggul teknikal ke bukai ti bisi potensial ngeruga bekal ai baka paip pechah, pengerusak infrastruktur sereta mega pengawa ngulihka tanah ti tau ngeruga rentayan paip lama.

Nitih ku iya, sekeda ari paip ke dikena diatu udah lama dipasang sereta begunaka pengawa ngintu sereta ngangkatmanah dikena nentuka pengawa nyadung ai ulih dipejalaika enggau efisyen agi.

Iya mega nerangka pengawa ngaga bekal aip paip iya nya tanggungpengawa Perintah Besai seraya paip ngagih ari baruh tanggungpengawa perintah nengeri.

Ku iya, perintah nengeri taja pia sedia ngambi alih pengawa bejalaika sekeda projek dikena ngenyampatka pengawa mutarka penanggul bekal ai ba kandang endur ke kena empas.

“Perintah udah ngungkupka urung RM154 juta dikena nentuka pengawa bejalaika projek tu enda tejanggal.

“Aku andal enggau komitmen perintah sereta pengawa bejalaika projek loji meresi ai baru enggau pengawa ngemanahka sistem ke udah bisi diatu, penanggul bekal ai ba sitak tu deka diputarka dalam timpuh ke udah ditetapka,” ku iya.

Iya mega madahka, perintah meri jamin penanggul bekal ai ke udah lama nuntung peranak menua pesisir di pelilih tu, deka diputarka berenggat nengah mayuh macham chara nyengkaum ngaga palan meresi ai baru, masang paip ngagih enggau ngena sistem alternatif.

Mawan ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) madahka, perintah udah ngelangkar sekeda pelin timpuh pandak enggau timpuh panjai dikena nentuka peranak enda terus napi penanggul bekal ai beresi.

Nitihku iya, entara atur ti benung diperunding iya nya masang sistem ‘water pressure booster’ dikena nambahka penguat bekal ai ba sekeda kandang endur ti suah ngasaika penanggul.

“Ungkup kandang endur ke agi bedau bisi paip ngagih, peranak deka nganti pejalai projek bekal ai renggat ke nangkanka nya ti diperambu perintah.

“Taja pia, aku andal enda siku orang tinggal laban palan meresi ai Bayong ke diatu deka dikemesaika agi kelimpah ari pemansang palan meresi ai baru di Gerugu,” ku iya.

Nitihku iya, lebuh pengawa ngemesai enggau operasyen kededua loji nya udah tembu penuh ila, bekal ai dipelaba deka disadung ngagai semua peranak ti bekaul nyengkaum sida di kandang menua Buku. -RBI

LIMBANG, 6 Mac — Direktor Opis Logistik enggau Teknologi Bukit Aman, Pesuruhjaya Polis YDH Datuk Gilberd AK Philip Layang ngaga penemuai kereja rasmi ngagai Pelilih Menua Limbang begulai enggau bini iya, YBhg Datin Siti anak Manau sereta seraban delegasyen ngabas perengka guna logistik enggau operasyen Polis Diraja Malaysia (PDRM) di kandang menua nya, ditu kemari.

Penatai raban nya disambut Ketuai Polis Pelilih Menua Limbang, Parum anak Niot begulai enggau pemesai kanan sereta kaban Indu Opis Polis Pelilih Menua (IPD) Limbang enggau Chairman PERKEP IPD Limbang, Ann Minah anak Giyang ba Kompleks Imigresen, Kastam, Kuarantin enggau Pengelikun (ICQS) Tedungan.

Rambau penemuai nya, raban nya mega dibai nemuai ngagai Pondok Polis Pendam sebedau nampung pengawa nemuai ngagai IPD Limbang.

Ba IPD Limbang, raban nya nerima penerang pandak bekaul enggau perengka guna operasyen enggau logistik ti dibantaika Parum dalam sesi ti bela digulu pemesai kanan enggau kaban Bagi Logistik.

Nengah awak nya, Datuk Gilberd mega bisi nyuaka Setipikit ‘Penghargaan Kecemerlangan Tugas’ ngagai sekeda pemesai kanan enggau kaban ke dipilih nyadika kelai basa ketegal dedikasyen enggau komitmen sida bejalaika tanggungpengawa.

Ngalih hari, raban nya terus ngabas Markas Taktikal Polis Marin Wilayah 5 sebedau ngabas kandang tasik garis entara menua Limbang-Brunei nyengkaum projek jematan ti nyambung kededua menua ngena bot Marin.

Penemuai rasmi nya mega dikemerat enggau pengerami Bebuka Puasa begulai enggau staf IPD Limbang, PERKEP enggau Raban Polis Marin ke diatur ba sebuah hotel di Limbang.

Ba pengerami nya, Datuk Gilberd enggau bini iya bisi nyuaka pemeri pengelantang pendiau ngagai tiga iku kaban ke enda gerai iya nya Sjn Dara anak Chuat, Kpl Liew Huat Song enggau Kpl Staniskalaus Paiwa kelai pengibuh ngagai pengelantang pendiau kaban tim nya.

Penemuai kereja rasmi nya tembu enggau raban nya bekejang pulai ke Miri pagi tadi pengudah semua program ti diperambu bejalai enggau lanchar. — RBI

KUCHING, 6 Mac — Premier Sarawak, Datuk Patinggi Tan Sri Abang Johari Tun Openg madahka Sumbangan Keperluan Asas (SKAS) Sarawak taun tu deka dikredit ngagai penerima ke patut nerima sebedau pengerami Hari Raya Aidilfitri.

Ku iya, pengawa bejalaika bantu nya betuju mantu peranak Sarawak nyikap diri, kelebih agi ba pengawa ngulihka barang ke diguna ninting hari sebedau musin pengerami.

“Aku deka ngelancharka SKAS dalam bulan Ramadan tu. Bayar deka dipasukka ngagai akaun Sarawak Pay (SPay Global).

“Kita tau meresa akaun diri empu meda berapa penyampau duit ke udah dipasukka.

“Tu dikena mantu rayat ngambika dapur sida seruran bisi ‘asap’,” ku iya.

Iya madah munyi nya lebuh bejaku ba ‘Majlis Penyampaian Simbolik Sumbangan Raya’ di Kompleks Satria Pertiwi kena Hari Lima.

Nitihku iya, SKAS mandangka komitmen perintah nengeri nentuka pengelantang pendiau rayat terus diberi perati nengah pengawa bejalaika polisi ti meri penguntung terus ngagai sida.

“Tu meh chara kami mantu rayat nengah polisi ke udah dipejalaika kami.

“Tu deka ngemuntangka pengidup ninting hari,” ku iya nambah.

Taun tu mega, Perintah Sarawak udah nikika tikas bantu SKAS ti nyadi singkang dikena ngenegapka jalai pengelikun rama nengeri tu.

Ruang bilik ke bepenatai pemisi RM5,000 ke baruh deka nerima penambah ari RM800 ngagai RM950 setaun, lalu orang tuai ke nadai laki tauka anak dalam kategori ke sama deka nerima penambah ari RM400 ngagai RM500 setaun.

Individu bujang ti begaji RM2,500 ke baruh deka ngasaika penambah ari RM250 ngagai RM300 setaun. — RBI

KAPIT, 6 Mac — Pengawa ngaga palan feri di Nanga Tulie, Batang Rajang dipelaba deka meri empas besai ngagai pengidup komuniti menua pesisir di Bagi Menua Kapit enti udah tembu ila.

Kaban Parlimen Kapit, YB Dato Sri Alexander Nanta Linggi madah, ungkup komuniti di kandang menua nya, sungai nya ukai semina pemandang asal aja tang nyadi batang jalai ti nyambung peranak enggau bemacham utai ke diguna ninting hari.

Nitih ku iya, ngelama tu peranak ngelingi Batang Rajang meraka sungai lebuh gawa, nganjung anak besekula, mai asil betanam betupi enggau ngulihka bekal ninting hari.

“Nyadi peranak asal Kapit ti udah dikeandalka ngarika sitak tu kenyau ari taun 1999, tu meh pekara ti seruran ba runding aku.

“Baka ni kitai ulih ngemuntangka pejalai ninting hari rayat di menua pesisir ngambika pengidup sida nyadi lantang agi,” ku iya.

Iya madah munyi nya lebuh ngenang pasal pengawa bejalaika projek servis feri di Nanga Tulie ke diatu nyadi nyata nengah inisiatif Perintah Nengeri Sarawak.

Enti udah tembu ila, perengka guna feri nya deka ulih ngundan nyentuk 24 buah perengka pengangkut dalam seiti maya, lalu enggau nya ulih ngasuh pejalai meraka sungai likun agi, teratur sereta efisyen agi ungkup peranak ngelingi Bagi Menua Kapit.

Projek ke beungkus RM23.5 juta nya disadang meri penguntung ngagai 33 buah rumah panjai ari Nanga Tulie ngagai Pekan Merit, kelimpah ari ngemuntangka pemindah nembiak ari dua buah sekula iya nya SK Nanga Encheremin enggau SK Ulu Pelagus.

Kenu ku Nanta, palan nya ukai semina deka nyendiaka servis perengka pengangkut aja, tang mega ulih mantu ngenyampatka pengawa ninting hari komuniti nyengkaum mai asil betanam betupi, nganjung barang ke diguna sereta ngemudahka pejalai ngagai sekula, palan gawa enggau palan servis.

“Enggau jaku bukai, perengka guna tu mega deka muka mayuh agi peluang ekonomi ngagai peranak menua tu,” ku iya.

Iya mega meri besai terima kasih ngagai Perintah Nengeri Sarawak ti udah ngemendarka agih belanja ungkup projek nya sereta kerejasama rat entara Opis Menteri Infrastruktur enggau Pemansang Palan Penyangkai Kapal (MIPD) Sarawak enggau Opis Kereja Raya Sarawak, kelebih agi Opis Kereja Raya Kapit nyadi ejensi ti bejalaika projek nya.

Projek nya deka dipejalaika Rambungan Maju Sdn. Bhd nengah chara ngelangkar enggau ngaga.

Ku iya nambah, servis feri semina deka minta bayar tambang RM1 ungkup tetiap pejalai dalam pengawa nentuka perengka guna ke disedia nya amat deka mantu ngurangka ungkus pengidup komuniti menua pesisir.

Iya ngarapka projek nya ulih dipejalaika enggau lanchar sereta tembu nitihka timpuh ngambika penguntung iya ulih diasaika enggau lengkas rayat Kapit.

“Aku mega meri besai terima kasih ngagai semua piak nyengkaum ejensi perintah, kunteriktor enggau komuniti setempat ti besaup ngemujurka pengawa tu,” ku iya.

Sama bisi nyempulang Dato Sri Alexandaer iya nya Kaban Kunsil Nengeri (ADUN) Bukit Goram Datuk Jefferson Jamit Unyat, ADUN Pelagus Wilson Nyabong Ijang ADUN Balleh Nicholas Kudi Jantai sereta tetemuai dipebasa bukai. — RBI