MUKAH, 12 Mac — Siku lelaki peranak menua nya ditangkap polis pengudah ditemu ngembuan dadah sereta dipelaba bisi kaul enggau kes enchuri kabel telekomunikasyen ba kandang menara kompeni telekomunikasyen besemak enggau sebuah palan ngelantangka ati di Jalai Mukah–Balingian, kemari.

Ketuai Polis Pelilih Mukah DSP Muhamad Rizal Alias ​​madah, saspek ditangkap urung pukul 1.45 lemai kena 11 Mac tu tadi ulih tim polis ari Bagi Pansik Jenayah Narkotik Indu Opis Polis Pelilih (IPD) Mukah ke benung bejalaika operasyen ba kandang endur nya.

Ku iya, lelaki nya ngelarika diri ngagai kandang kampung ke besemak enggau naka pengelengkas lebuh iya sedarka penatai polis, tang mujur ditangkap pengudah tim polis ngena kuasa minimum maya pengawa nangkap nya.

“Asil peresa tubuh saspek tetemuka sebilah tiub lutsinar ti terang ti ngundan gumpal kristal ti dipelabaka dadah bansa methamphetamine enggau pemerat kasar dipelabaka 0.34 gram,” ku iya nengah penerang berita sehari tu.

Muhamad Rizal madah, pengawa meresa enggau silik agi sebuah kerita Perodua Kancil enggi saspek ke paking ba kandang menara telekomunikasyen nya mega bisi tetemuka tiga gulung dawai temaga enggau sekeda perengka ke dipelabaka dikena enchuri kabel nya.

Ku iya, semua barang nya nyengkaum entukar saspek dirampas lalu dibai ngagai IPD Mukah ngambika atur nangkanka nya dipejalaika.

Ku iya, asil peresa ai kemi ba saspek tetemuka lelaki nya positif amphetamine enggau methamphetamine.

Berebak enggau nya, urung pukul 5 lemai ba hari ke sama, seiku lelaki beumur 44 taun ke nyadi juruteknik kompeni telekomunikasyen mansang ke mua ngaga ripot polis bekaul enggau pengelenyau kabel tembaga kompeni nya ba menara nya.

Kes tu dipansik ari baruh Seksyen 12(2) Akta Dadah Berbahaya 1952 enggau Seksyen 15(1)(a) akta ke sama ketegal salah guna dadah, kelimpah ari Seksyen 379 Kanun Keseksaan enggau Seksyen 431A Kanun Keseksaan ketegal pengawa enchuri enggau pengawa jai ngelaban telekomunikasyen.

Muhamad Rizal madah, pansik mega tetemuka saspek udah lima kali diukum jenayah enggau bekaul enggau dadah sebedau tu.

Saspek diatu ditan riman dua hari nyentuk 14 Mac kena mantu tasat kes nya. — RBI

PETRA JAYA, 12 Mac — Perintah Sarawak majak ngenegapka agenda pemansang di Bagi Menua Betong nengah pengawa bejalaika 108 projek pemansang ari baruh inisiatif Ejensi Pemansang Bagi Menua Betong (BDDA) khas ungkup sitak Kunsil Nengeri (DUN) Kabong.

Kaban Kunsil Nengeri (ADUN) Kabong, Dato Mohd Chee Kadir madah, pengawa bejalaika projek nya mandangka komitmen perintah nengeri ti terus nentuka pemansang infrastruktur enggau sosioekonomi di menua pesisir terus ditegapka.

Nitih ku iya, ari penyampau semua projek ti udah diperambu, bisi 37 projek udah mujur ditembuka lalu diatu berengkah meri pemaik ngagai komuniti ngelingi.

“Lalu 62 projek ke bukai diatu benung ba renggat perambu dikena nentuka tetiap pengawa bejalaika nya nitihka spesifikasyen enggau peminta teknikal sebedau kereja ngaga berengkah,” ku iya.

Iya mega madahka lima projek benung dipejalaika nitihka timpuh ke udah ditetapka, lalu tiga projek ngerikod prestasi ke chukup manah lebuh dulu ari timpuh dipejalaika.

Taja pia, iya ngaku bisi siti projek ke diatu ba status laun kritikal lalu benung dipatau enggau silik dikena mutarka isu teknikal ke bisi nyadi.

Iya madah munyi nya pengudah ngulu Aum Penyelarasan Komiti Pemandu BDDA ke diatur ba Wisma Bapa Malaysia, Petra Jaya, ensanus.

Aum nya bechairmanka Sapit Premier Sarawak, Datuk Amar Douglas Uggah Embas ke mega Chairman Komiti Pemandu BDDA.

Ba pemansang ke bekaul, aum nya mega bisi bejuraika status tinda ungkup taun 2026, ke alai 58 projek di DUN Kabong dipelaba deka ditinda taun tu, ti mungkur 93.55 peratus ari kesemua pelin projek.

Semua iya, BDDA udah ngemendarka 473 projek pemansang di serata Bagi Menua Betong enggau penyampau agih belanja sepenyampau RM1.46 bilion naka bulan Februari 2026 dikena ngenyampatka penumbuh enggau pemansang ba kandang menua nya.

Sama bisi datai Sapit Menteri Nembiak, Lumba enggau Pemansang Orang Dagang, Datuk Gerald Rentap Jabu, Kaban Parlimen Betong, Dato Dr Richard Rapu, Kaban Parlimen Batang Lupar, Mohamad Shafizan Kepli, ADUN Beting Maro, Razaili Gapor, ADUN Kalaka, Mohamad Duri, ADUN Krian, Friday Belik sereta mega bala ketuai opis ti bekaul. — RBI

BETONG, 12 Mac — Projek ngemanahka jalai ladang ari baruh Ejensi Pemansang Bagi Menua Betong (BDDA) ba sitak Dewan Undangan Negeri (DUN) N.37 Bukit Saban udah dipunka enggau rasmi nengah sesi nyerahka palan ke diatur kena Hari Dua tu tadi.

Sesi nya diatur Opis Kereja Raya (JKR) Bagi Menua Betong begulai enggau pengari Palan Servis DUN Bukit Saban, ti mungkur enam lokasi projek ba kandang menua nya.

Entara palan ke bisi kaul iya nya Rumah Jabin di Tembawai Tinting, Ulu Layar; Rumah Jimmy di Ulu Bayor; Rumah Rayong di Nanga Lop; Rumah Lembang di Inar; Rumah Unjie di Nanga Pek, Debak enggau Rumah Evelyn Inja di Lempaong Anyut, Paku, Spaoh.

Nyerumba sesi nya mega, bala kunteriktor ti udah dipadu mega diberi penerang ari Opis Kereja Raya Betong bekaul enggau pengawa bejalaika projek nya, nyengkaum ngasika spesifikasyen teknikal enggau jadual kereja ti udah ditetapka dikena nentuka projek nya ulih dipejalaika enggau teratur sereta nitihka perambu.

Beberapa iku tuai rumah ari kandang menua ke kena bungkur penusah ke bisi datai ngulu sesi nya mega meri pengaga ati ngagai pengawa bejalaika projek nya, ti dikearap ulih meri penguntung ke besai ngagai peranak menua nya.

Projek ngangkatmanah jalai ladang tu dikearapka ulih ngemanahka agi perengka guna komunikasyen di menua pesisir, kelimpah ari ngemuntangka pemindah peranak enggau perengka pengangkut asil betanam betupi, lalu enggau nya ulih nyukung pemansang ekonomi komuniti di kandang DUN Bukit Saban. — RBI

LUBOK ANTU, 12 Mac – Dua iku indu ke beumur urung 30-an enggau pun 50-an ditan polis ari Bagi Pansik Jenayah Narkotik (BSJN), IPD Lubok Antu dalam Op Saringan Khas ti dipejalaika ba kandang menua Engkelili.

Asil peresa nisih ai kemi keterubah ti dipejalaika, tetemuka kedua-dua saspek positif Methamphetamine enggau Amphetamine.

Kes tu dipansik ari baruh Seksyen 15(1)(a) Akta Dadah Berbahaya 1952.

Mensia mayuh ke bisi sebarang penerang bekaul enggau aktiviti dadah ba kandang menua sida empu diperansang ngenataika penerang nengah talipaun JSJN Bukit Aman ba lumur 012-208 7222 tauka talipaun JSJN IPK Sarawak ba lumur 017-592 9211.

IPD Lubok Antu deka terus bebendar ngelaban kes dadah dikena nentuka pengelikun enggau pengelantang komuniti di pelilih Lubok Antu mengkang dijamin. -RBI

KOTA KINABALU, 12 Mac — United Malaysia, kelab rasmi penyukung Manchester United di Malaysia, gaga ati madahka Pengerami Makai Lemai Ninting Taun United Malaysia Ke-8 di Kota Kinabalu.

Pengawa ke beprestij nya ti ngempuruka bala peminat Manchester United ari serata menua, diperambu deka diatur kena 27 Jun 2026 ba Dewan Hakka enggau rambai jaku “United Unite! The Next Chapter.”

Presiden United Malaysia, Bartholomew Jingulam mantaika pengandal ati iya ngagai sambut ke manah ke deka diterima ari komuniti peminat kelab nya di Kota Kinabalu.

Iya mantaika pengarap ati iya, penyampau orang ke datai taun tu deka sebaka tauka ngelui ari 1,000 iku ke bisi datai ba edisyen ke dulu ari tu di mengeri tu.

“Kota Kinabalu deka seruran megai penuduk ke meruan ba ati bala peminat Manchester United Malaysia laban ditu meh endur pengerami makai lemai United Malaysia keterubah iya diatur ba taun 2016,” ku Chairman pengatur, Bryan Faurillo

Bala ke datai deka bisi bepeluang menang perais besai, pejalai ke dibayar penuh meda main Manchester United terus ba Old Trafford, nengah chabut tikit benasit.

Penerang silik bekaul pengawa nyual tikit enggau program pengawa tu deka dipadah nengah akaun media rama United Malaysia dalam timpuh ke semak tu. -RBI

BAU, 11 Mac — Bagi Pansik Jenayah, Indu Opis Polis Pelilih (IPD) Bau enggau kerejasama Sarawak Energy Berhad (SEB) udah bejalaika pengawa mutuska bekal kuasa karan ngagai lima buah premis ti dipelaba bejalaika aktiviti judi online ngelingi pelilih menua Bau.

Ketuai Polis Pelilih Bau, P/SUPT. Mohd. Haide bin A. Rahman, dalam siti penerang madahka pengawa nya dipejalaika nyadi atur penerit adat dikena nagang aktiviti judi nadai pemendar ti beoperasyen ba kandang menua nya.

Nitihku iya, kereja mutuska bekal kuasa karan ngagai semua premis ti bekaul dipejalaika berengkah pukul 10.10 pagi lalu tembu pukul 10.55 pagi.

“Pengawa mutuska bekal kuasa karan tu dipejalaika ari baruh atur Seksyen 21A(1), Akta Rumah Judi Tebuka 1953,” ku iya.

Iya mega nyemetak madahka polis deka terus chakah agi bejalaika operasyen enggau pengawa matau ari setiap maya dikena ngelaban aktiviti judi ti enda beradat, kelebih agi ti dipejalaika nengah ‘online’ di pelilih tu. — RBI

KUCHING, 11 Mac – Status enggau pengawa bejalaika projek bekal kuasa karan menua pesisir ba sitak Meluan udah dikerandau dalam sesi aum begulai enggau Unit Bekal Kuasa Karan Menua Pesisir ba Opis Menteri Utiliti enggau Telekomunikasyen Sarawak, pagi tadi.

Kaban Kunsil Nengeri (ADUN) Meluan, Datuk Rolland Duat Jubin mega bisi ngulu lalu mendingka penerang bekaul status enggau pengawa bejalaika Projek Bekal Kuasa Karan Menua Pesisir (RES) ungkup kandang menua Meluan.

Nitihku iya, entara batang pekara ti dikerandau iya nya status pengawa bejalaika Projek RES Last Miles Fasa 2 di Julau ungkup kandang menua Ulu Mujok ti agi tejanggal.

“Nitihka penerang opis menteri, sebengkah kunteriktor baru deka dichiri lalu kunterik dipelaba deka diberi ba pun bulan Jun 2026.

“Aku ngansak opis menteri nentuka pengawa bejalaika RES ungkup kandang menua Ulu Mujok ulih dipejalaika nitihka perambu,” ku iya.

Kelimpah ari nya, iya mega diberi penerang bekaul enggau pengawa bejalaika Additional Late Applicant Fund (ALAF) ungkup kandang menua Meluan.

“Aku ngarapka pengawa bejalaika RES enggau ALAF ba kandang menua Meluan ulih dilengkas ngambika peranak ulih ngasaika perengka guna kuasa karan ti entap sereta pengidup ninting hari ti menyana agi,” ku iya.

Iya mega meri besai terima kasih ngagai Opis Menteri Perengka Guna enggau Telekomunikasyen Sarawak sereta Sarawak Energy Berhad (SEB) ti seruran bebendar bejalaika projek RES enggau ALAF di kandang menua Meluan taja betapi enggau bemacham pemar. -RBI

Dunya muzik lokal Sarawak diatu semakin ranchak enggau lagu Ensinat ti disadaka Clement Sarawak ke datai enggau rentak ti richah, jenaka sereta penuh enggau ajar.

Kenu ku Clement lebuh dirandau Ruai Berita Iban, lagu tu nusui pasal siku lelaki ti nguji nguntik siku indu, tang indu nya nulak iya laban semina ngakim ari luar aja.

“Nengah jalai cherita dalam lagu tu, bisi pesan ti beguna ngagai peninga ngambika enda ngakim setiap iku orang, anang semina ngakim ari gamal tauka chara luar iya aja.

“Baka sempama jaku Ribai, “Don’t judge a book by its cover.” Lagu tu mega ngajar enti kitai deka negur tauka nulak orang, iya patut dikereja enggau chara ti manah, bebasa sereta enda ngemediska orang bukai,” ku iya nusi cherita dalam lagu Ensinat.

Lagu Ensinat ditempa komposer asal Maxwel Franklin Saran, siku penanyi ke tebilang Sarawak.

“Kebendar iya, lagu tu ukai lagu keterubah disadaka aku. Sebedau tu, aku begulai enggau Maxwell kala ngasilka lagu “Kunchum”, lagu duet ti dirikod ba baru perabung Golden Pearl Recording Studio urung taun 2002 suba,” ku iya.

Utai ti narit ati ku terang Clement, proses ngerikod lagu tu ukai senang. Maya sesi ngerikod nya, iya benung napi penanggul pedis rekung enggau batuk, tang terus ngerikod pengudah makai ubat laban enggai ngelaunka jam studio.

“Pemar mega bisi nyadi maya ngaga video muzik lagu Ensinat tu lebuh hari ujan maya ngaga video, tang proses ngaga video terus dipejalaika enggau bala kru enggau bala ‘kameraman’ bekenaka payung.

“Taja betapi enggau bemacham penguji, lagu tu mujur ditembu semina dalam timpuh empat jam aja,” ku iya nusui.

Pemujur lagu Ensinat diatu nyata lebuh mayuh peminat bekunsi sereta ngangkatka lagu Ensinat ba sebelah media rama seraya betanda nitihka chara tanda dalam lagu nya.

Clement mega ngaku diri berasai temegah amat ati sereta teperansang enggau sambut ti manah ari bala peminat ti rindu ninga lagu nya.

Berebak enggau nya, iya ngarapka bala peminat terus nyukung industri muzik Sarawak nengah chara ngambi pekara positif nyadika chunto lalu ngena pekara negatif nyadika peransang nyingkang ke mua.

“Sukung tegap bala peminat mega nyadi inspirasyen dikena ngasilka lagi ke manah agi jemah ila,” ku iya nyemetak.

Pengudah pemujur Ensinat, Clement mega merambu deka ngasilka mayuh agi lagu enggau rentak ti richah sereta ranchak ti agi meri ajar ngagai bala peninga.

“Aku mega bisi nyangka bisi merambu belagu begulai enggau Maxwell sereta Mawat,” ku iya nerangka perambu diri.

Beberapa projek lagu baru mega diperetika benung ba renggat perambu.

Kena nutup jaku, iya meri besai terima kasih ngagai semua peminat ketegal sukung enggau sambut ti chukup manah.

“Sukung nya meh ti meransang pengeransing aku ngasilka mayuh agi asil ti bekualiti jemah ila,” ku iya ngujungkq randau enggau Ruai Berita Iban. -RBI

BINTULU, 11 Mac — Mensia mayuh enggau bala pengereja pengawa ba Sepital Bintulu dilalau beratika peluang trafik enggau operasyen tejanggal ba kandang Opis Penusah Ngenyit enggau Trauma berindik ari pengawa ngaga fasiliti baru ungkup fasiliti Pencitraan Resonans Magnetik (MRI) enggau Mamogram.

Nitihka penerang ari piak pengatur sepital, projek ngaga nya dipejalaika besemak enggau kandang endur Opis Penusah Ngenyit enggau Trauma lalu dipelaba deka meri empas sementara ngagai endur nya enggau arus trafik ba kandang endur nya.

“Pengawa ngaga tu dipelaba deka ngasuh tikas bunyi nambah kelebih agi ba kandang endur ‘triage’, kelimpah ari bisi debu tauka kamah ba kandang endur ngengkahka barang,” ku penerang nya.

Dikena nentuka pengelikun enggau pengelanchar pejalai perengka pengangkut, piak pengelikun sepital deka bejalaika pengawa nagang trafik, kelebih agi maya ‘peak hours’.

Taja pia, penanggul arus trafik tau nyadi ari sesiti maya ngagai sesiti maya ketegal pejalai injin berat baka lori semin enggau jentolak ke tama enggau pansut ari palan projek.

Nitihka penerang ari sepital nya, projek ngaga nya dipelaba deka dipejalaika pengelama setaun berengkah 2 Mac 2026 nyentuk 10 Mac 2027.

Berindik enggau nya, piak pengatur sepital minta penyabar enggau kerejasama ari semua piak sepemanjai timpuh bejalaika projek tu ngambika ulih ngemanahka agi perengka guna servis pengerai ungkup komuniti jemah ila.

“Sebarang penusah ti tau nyadi dalam timpuh tu amat dikeirauka” ku penerang nya. — RBI

KUCHING, 11 Mac — Sapit Premier Sarawak Datuk Amar Douglas Uggah Embas nemuai gawa ngagai sekeda Palan Pengenduh Sementara (PPS) dikena meresa gaya enggau pengelantang pendiau mansa ti dituntung penusah ampuh bah di nengeri tu.

Iya ke mega Chairman Komiti Mutarka Penusah Ngenyit Nengeri Sarawak (JPBNS) madah, penemuai nya ngembuan tuju deka meda kediri empu gaya ke diatu ba PPS kelimpah ari nentuka semua pemun enggau bantu ngagai sida ke tasah ampuh bah seruran bisi atur sereta chukup.

Entara endur ke bisi dilawa iya nya PPS Dewan R-Piang, Kampung Sinar Budi enggau PPS Dewan Masyarakat Stapok, ke alai endur sida ke tasah ketegal tikas ai niki kenyau beberapa hari ke udah.

Nitih ku iya, pengawa matau ti enda ngetu beguna amat dikena nentuka pengawa ngatur palan pemindah bejalai enggau lanchar, kelimpah ari nentuka pengelantang pendiau mansa seruran diberi perati ti patut.

Penemuai nya mega digulu bala ketuai enggau pengari ari mayuh bengkah ejensi ke bekaul ti bejalaika tanggungpengawa ke berat ba pengawa mutarka penusah ngenyit enggau koordinasyen bantu ngagai mansa ke tasah.

Nengah penemuai tu, dikearap pengawa ngatur pengawa meri koordinasyen bantu sereta ngatur pengelantang pendiau mansa bah ulih terus ditegapka dikena nentuka pengelikun enggau pengelantang semua mansa seruran dijaga. — RBI