BETONG, 6 April – Pengawa bejalai beserimbai enggau pengerami Gawai Dayak Bagi Menua Betong 2026 deka diatur enggau richah ba Kompleks Lumba enggau Main Betong kena 6 Jun enggau perais nyengkaum RM10,000 ungkup champion ba selampur.

Program ti berambaika leka jaku “Mujur Mansang Segulai Sejalai” dibuka ngagai mayuh macham penyereta ti ngaul opis perintah, ‘badan bekanun’, sektor peribit, ketuai raban bansa, rumah panjai, genturung pendiau, gerempung ukai dikuasa perintah (NGO) enggau institusyen pelajar berengkah ari tadika nyentuk ngagai palan pelajar tinggi.

Pengatur pengawa madahka, tetiap tim ke ngambi bagi mesti bisi pengabis kurang 30 iku penyereta dikena nentuka pemujur pengerami.

Ungkup kategori pekit, champion deka mai pulai perais mata duit RM3,000, ditangkan lumur dua RM2,000 enggau lumur tiga RM1,000.

Kelimpah ari nya, anugerah champion ba selampur mega bisi nyediaka perais besai RM10,000 disempulang trofi.

Bela bisi disediaka sekeda anugerah khas nyengkaum Prestasi Pemadu Manah, Kontinjen Pemadu Manah Ngepan, Pemadu Mayuh Penyereta Rumah Panjai enggau Pemadu Mayuh Penyereta ungkup NGO, ke alai setiap kategori bisi nyendiaka perais RM500.

Pengawa ngambi bagi enggau bejalai bebala mayuh tu enda bebayar lalu haribulan penutup ngerejista diri ditetapka kena 22 Mei 2026 sebedau pukul 5 lemai.

Mensia mayuh ke bisi ati tau ngerejista diri nengah chara ‘scan’ kod QR ba poster rasmi tauka betanya ngagai Cik Nurshafiqah nengah WhatsApp ba lumur 013-8620761.

Pengawa tu dikearapka ulih nyadi pelasar ti beguna dalam mandangka pengaya budaya sereta ngenegapka semengat beserakup entara komuniti pupu bansa di Sarawak, kelebih agi di Bagi Menua Betong. -RBI

LUNDU, 6 April — Kaban Kunsil Nengeri (ADUN) Tanjong Datu, YB Azizul Annuar Adenan, bejalaika pengawa ngabas sekeda palan projek ari baruh Ejensi Pemansang Wilayah Besai Kuching (GKCDA) ngelingi Pelilih Lundu, sehari tu tadi.

Penemuai nya mega disempulang Sapit Menteri ba Opis Premier Sarawak (Koordinator Projek Ejensi Pemansang Wilayah, DBKU enggau Hal Ehwal Islam), YB Datuk Dr. Haji Abdul Rahman bin Haji Junaidi, sereta pengari ari Unit Pemantauan Pelaksanaan Sarawak (UPP), Opis Premier Sarawak.

Entara batang projek ke diserenih iya nya Projek Masang Lampu Jalai Menua Pesisir (N.3 Tanjong Datu) ari baruh kemata Opis Kereja Raya (JKR) Bagi Menua Kuching.

Projek tu beungkus lebih RM3 juta ngembuan juluk deka ngangkatka tikas pengelikun penguna jalai alun di semanjai pantai.

Skop pengawa bejalaika projek tu nyengkaum pengawa masang 2,250 tiang lampu sepemanjai 101.25 kilometer, nyengkaum kereja nyambung kabel, tali atas Voltan Tinggi (HT), tali Voltan Rendah (LT) enggau masang transformer ngagih.

Projek tu berengkah digaga kena 27 Mac 2025 lalu dipelaba tembu penuh kena 26 Mac 2027.

Entara palan kluster ke dipasuk iya nya Jalai Sematan–Telok Melano, Jalai Pekan Lundu–Kampung Pugu, Jalai Rabungan–Kampung Temelan enggau Pekan Sematan–Kampung Pueh Kenek.

Kelimpah ari nya, penemuai nya mega nyengkaum Projek Ngangkatmanah Dataran Bandar Lundu, iya nya inisiatif dikena ngenegapka perengkaguna mensia mayuh sereta meransang aktiviti sosio-ekonomi peranak menua nya di tengah bandar Lundu.

Projek tu tembu penuh kena 30 April 2026 enggau ungkus ke diungkupka RM629,784.00 sereta timpuh bejalaika iya dalam timpuh 12 bulan.

Ba penemuai ti sama, YB Azizul Annuar mega bisi ngabas palan ti diperambu endur ngaga Projek Ngaga Padang Futsal Tertutup di Kampung Sampadi. ​​

Projek tu diperambu dikena nyendiaka perengka guna lumba enggau main sereta rekreasyen ungkup raban nembiak, kelimpah ari meransang komuniti ngaul diri dalam aktiviti ti bepengerai.

Sama bisi datai ba siri penemuai nya, Pemesai Pentadbiran Khas GKCDA, Datu Ik Pahon anak Joyik; Pemesai Pelilih Menua Lundu, Tuan Zulkarnain bin Ismail; Pemesai Khas ADUN Tanjong Datu, Tuan Haji Khairul bin Datuk Sapuan; Pemanca Jumahdi Sabian sereta mega Ketuai Komuniti enggau Ketuai Kaum (KMKK) Pelilih Lundu, Zon Sampadi enggau Lundu. — RBI

KUALA LUMPUR, 6 April – Gerempung Parasitologi enggau Perubat Tropika Malaysia (MSPTM) nengah penerang berita madahka pengawa milih Adela Ida Jiram endang engkeman enggau maya iya, setipak enggau pengawa Malaysia ngenegapka penau mansik, nyikap diri ba pengerai mensia mayuh enggau pengangkun saintifik global.

Saintis Biomedikal ba Institut Pemansik Perubat, Institut Pengerai Nasional nya udah dichiri nyadi presiden baru MSPTM, nyadi indu peranak Sarawak enggau Iban keterubah mangku pengawa nya.

Iya dipilih maya Aum Besai Ninting Taun gerempung nya ke-62 apin lama ke udah.

Nitihka penerang nya, Adela Ida dikearapka ulih ngenegapka agi pengawa gerempung dalam pemansang profesyenal, besilih penemu enggau pengawa ngaul diri ba renggat nasional bekaul enggau isu parasitologi enggau perubat tropika.

“Ba MSPTM, pengawa milih iya ukai semina besejarah tang mega bekaul enggau tuju gerempung jemah ila sereta baka ni iya ulih mantu ngasuh bidang tu tampak agi, engkeman sereta relevan enggau mensia mayuh,” ku penerang nya.

Adela Ida dalam penerang ke sama madahka entara pekara ti dikemeratka iya iya nya ngembing saintis biak, ngenegapka kerejasama entara pemansik enggau institusyen, sereta nambahka penyedar mensia mayuh ba bidang nya kelimpah ari ngangkatka profil MSPTM ba renggat menua.

“Aku mega ngarapka ulih mandangka parasitologi enggau perubat tropika agi relevan ba dunya moden, kelimpah ari nempa penyedar mensia mayuh ke tinggi agi sereta nempa mayuh agi peluang dikena mantaika pansik Malaysia ba renggat global,” ku iya.

Iya mega bisi ati deka nyukung pengawa ngatur mayuh agi aum besai entarabansa enggau gempuru saintifik di Malaysia dikena mantaika asil pansik menua tu sereta ngenegapka MSPTM nyadi pelasar ngagai saintis Malaysia meri bantu ngagai randau global dalam bidang parasitologi enggau perubat tropika. -RBI

SIBU: Asil ari pengawa pemansik enggau matau enggau silik, raban penerit adat ari KPDN Sarawak enggau IPD Sibu udah ngetanka sebuah kapal lalu tetemuka minyak diesel dalam semilan tangki kediri dipelabaka disimpan enggau nadai sebarang pemendar undang-undang.

Ketuai Opis Menteri Dagang Dalam Nengeri enggau Kos Pengidup (KPDN) Bralin Malee (KPDN) Sibu madahka, sepenyampau 132,000 liter minyak diesel dirampas.

Iya madah munyi nya ba aum pengarang berita begulai enggau Ketuai Polis Pelilih Sibu, Azari Miskon ba Jelatung Kimia Sarawak, Ulu Lanang, sehari tu tadi.

Nitihku iya, pengawa ngerampas minyak nya dipelabaka berega RM283,800 digaga maya Op Tiris 4.0 ti dipejalaika KPDN Sarawak begulai enggau Indu Opis Polis Pelilih Sibu kena Hari Enam nyin tadi.

Pengawa meresa keterubah tetemuka kapal nya enda mantaika dokumen undang-undang bekaul enggau pengempu pengangkut minyak.

Berindik enggau nya, siti kes udah dibuka ari baruh Ops 555 enggau Ops Jeriji nitihka Seksyen 21 ari baruh Akta Kawalan Perbekalan 1961.

Ku iya, kes nya deka dipansik ari baruh akta nya lalu enti dikenuku salah, individu ulih diukum enda ngelui ari RM1 juta tauka dijil enda ngelui ari tiga taun tauka kededua nya sekali.

Ku iya nambah, ungkup penyalah kedua enggau ke nangkanka nya, ukum tau ditambah ngagai ukum mata duit enda ngelui RM3 juta tauka jil enda ngelui lima taun tauka kededua ukum nya.

Seraya ungkup kompeni, ukum mata duit enda ngelui ari RM2 juta lalu ungkup penyalah ti ngulang, ukum mata duit tau nambah ngagai RM5 juta.

JULAU, 5 Mac 2026 — Kaban Kunsil Nengeri (ADUN) Meluan, Dato Rolland Duat Jubin ngemeratka pemesai guna Program Outreach Komuniti Betanam Betupi (Agricop) nyadi pelasar dikena ngenegapka penemu enggau pengelandik orang bumai menua pesisir.

Iya madah munyi nya lebuh ngulu Pengerami Nangguhka Agricop ke diatur ba Rumah Minggang, Sungai Ijit, Julau, pengudah program nya mujur dipejalaika pengelama dua hari ti disereta 150 iku pesereta.

Sepemanjai program nya, bemacham aktiviti meri penguntung bisi diatur nyengkaum randau bekaul enggau pengawa betanam betupi enggau berikan, bekunsika teknologi nanam lada, sereta ngena rachun indu utai enggau baja enggau lebih efektif dikena nambahka asil utai tanam.

Nitihku Rolland, program baka tu beguna amat dalam mantu orang bumai nambahka produktiviti sereta nelebaka diri enggau chara betanam betupi moden.

Iya mega minta komuniti beambi ulih ari perengkaguna infrastruktur ti majak manah, nyengkaum peluang ngelakuka produk betanam betupi nengah pelasar ekonomi digital.

Kelimpah ari nya, akses ke muntang sereta lantang agi ngemendarka pemindah produk betanam betupi enggau pengawa ninting hari peranak bejalai enggau lanchar agi.

Berebak enggau nya, iya meransang peranak ngereja tanah enggau optimum sereta ngemeranka mayuh bansa utai tanam nyadika chara nambahka penatai pemisi sida, enda bepanggai ba siti bansa utai tanam aja.

Rolland meri besai terima kasih ngagai Opis Betanam Betupi Pelilih Julau enggau Bagi Menua Sarikei ti udah ngatur program tu, lalu ngarapka mayuh agi penerang enggau teknologi baru ulih dikunsi jemah ila dikena terus ngenegapka status sosio-ekonomi peranak rumah panjai.

Sama bisi enggau iya Sekretari Politik Premier Sarawak, Paulus Dandee Banyang; Direktor Betanam Betupi Sarawak, Dominic Chunggat; Pemesai Opis Betanam Betupi Bagi Menua Sarikei, Jessyca Andrew Mujah; pengari jabatan enggau Ketuai Raban Bansa enggau Komuniti lokal. — RBI

KUCHING, 6 April — Sapit Premier Sarawak, Yang Berhormat Datuk Amar Douglas Uggah Embas ngulu Pengerami Nerima Pengabang Hari Raya Aidilfitri 2026 ti diatur Opis Kereja Raya (JKR) Sarawak dalam gaya ti penuh enggau pengerichah sereta semengat bepangan.

Dalam jaku dipansutka iya, iya nyemetak madahka kerejasama rat entara Opis Menteri Infrastruktur enggau Pemansang Palan Penyangkai Kapal (MIPD) enggau staf JKR Sarawak nyadi penyungkak besai dalam nentuka pengawa bejalaika pemansang infrastruktur nengeri tu bejalai enggau lanchar, efisyen sereta meri empas ke tinggi ngagai rayat.

Kenu ku iya, pengawa baka tu ukai semina nyadika pelasar dikena ngerapitka kaul, tang mega muka ruang endur bekunsika penemu, besilih penemu sereta ngenegapka semengat kereja beraban entara staf ejensi.

Iya mega meri besai terima kasih ngagai Direktor Kereja Sarawak enggau komiti pengatur laban udah mujur ngatur ‘Program Engagement Infrastructure Sarawak’ ti udah mujur dipejalaika minggu nyin tadi.

Penatai Kaban Kunsil Nengeri (DUN) Sarawak enggau Kaban Parlimen mandangka tikas sukung enggau komitmen ti tinggi ngagai agenda pemansang nengeri tu.

Ku iya nambah, timbal ke diterima ari pengari rayat chukup positif, kelebih agi bekaul enggau pengawa bejalaika projek JKR ba kandang menua diri empu ti digambarka bejalai enggau lanchar sereta meri empas ke besai ngagai pengelantang pendiau rayat.

Ba pemansang bukai, iya madahka ari semilan (9) buah jematan besai ti diperambu deka tembu taun tu di serata Sarawak, dua (2) buah nya udah mujur tembu naka ke diatu.

Pemujur tu nyata ngayanka komitmen Perintah Sarawak ti terus ngenegapka rentayan infrastruktur nengeri tu.

Kelimpah ari nya, Perintah Sarawak mega udah ngambi inisiatif ngambi semua jalai batang ke suba dikena ngangkatka tikas pengelikun enggau pengelantang penguna jalai alun, kelebih agi di menua pesisir.

Pengerami tu ukai semina ngerapitka kaul entara ejensi, tang mega mandangka komitmen JKR Sarawak ti terus meri servis ti bekualiti, efisyen sereta beorientasyenka rayat. — RBI

SPAOH, 6 April — Sesi nyerahka palan ngagai kunteriktor ungkup Projek Mesra Rakyat ti ngaul pengawa ngaga selapat tanah tusur enggau parit konkrit di Krangan Pinggai, Paku udah dipejalaika enggau lanchar sehari tu.

Sama bisi ngulu sesi nya, ejensi ti bejalaika pengawa, Opis Entali Ai enggau Parit (DID) Bagi Menua Betong dikena nentuka pengelanchar bejalaika projek nitihka pelin ti udah ditetapka.

Pengawa ngaga selapat tanah tu dikearapka ulih ngangkatka tikas pengelikun peranak rumah panjai ba kandang menua nya, kelebih agi dalam napi penanggul tanah tusur ti tau ngeruga struktur endur diau enggau rampa menua.

Berebak enggau nya, pengawa ngaga parit konkrit deka mantu ngemanahka sistem parit ngambika lebih teratur, likun sereta efektif, lalu ari nya ulih ngurangka risiko ampuh bah ngenyit enggau ai ngelumpa maya ujan bangat.

Pemesai ari Palan Servis Rayat Parlimen P.204 Betong mega bisi datai nyadi pengari ba sesi nyerahka palan nya, mandangka komitmen ti seruran dipejalai dikena nentuka pengelantang pendiau rayat seruran dikemeratka.

Kaban Parlimen Betong, Dato Dr Richard Rapu, dalam penerang iya ngarapka projek tu ulih dipejalaika enggau lanchar sereta meri penguntung timpuh panjai ngagai komuniti menua nya. — RBI

KUALA LUMPUR, 6 April – Ex-Menteri Perengka Pengangkut ke mega Presiden Dipebasa Seumur Idup MCA Tun Dr Ling Liong Sik ke udah nadai kena Hari Enam tu tadi diberi basa kepenudi ba Palan Xiao En, ditu sehari tu.

Pengawa meri basa nya ke berengkah urung pukul 12 tengahari diatur enggau penyinu sereta teratur enggau mensia mayuh meri basa baka ngengkahka bungai sereta besampika niang.

Sama bisi datai sekeda ketuai MCA nyengkaum Presiden Datuk Seri Dr Wee Ka Siong, Sapit Presiden Datuk Dr Mah Hang Soon, Sekretari Besai Datuk Chong Sin Woon enggau sapit presiden Datuk Seri Dr Wee Jeck Seng, Datuk Lim Ban Hong, Datuk Lawrence Low Datuk Ah Keong, Datuk Lawrence Low Tan Ah Keong, Datuk Lawrence Datuk Ah Keong.

Sepemanjai timpuh nya, bala temuai mega dipandangka enggau ‘montaj’ ti mandangka pejalai pengidup niang enggau pemeri iya ngagai menua.

Dr Ling udah nadai kena Hari Enam tu tadi ba umur 82 taun lalu ninggalka bini iya Toh Puan Ong Ee Nah enggau dua iku anak lelaki iya nya Ling Hee Leong enggau Ling Hee Keat.

Presiden MCA ke dulu suba nya entara kaban Kabinet ke pemadu lama mangku pengawa lebuh iya ngiring Opis Menteri Perengka Pengangkut pengelama 17 taun ari taun 1986 nyentuk ke iya ngelengka pangku pengawa dalam taun 2003.

Berebak enggau nya, Wee lebuh dikerandau pengarang berita pengudah tembu pengerami nya madahka pengerami khas nutup ‘perau’ niang Dr Ling deka diatur pukul 4 lemai pagila, ti deka meda perau niang dibungkur enggau tambai MCA kelai basa ke pemadu tinggi ngagai jasa enggau pemeri iya ngagai menua enggau parti.

Berebak enggau nya, iya nerangka niang menteri nya siku orang ti bisi visyen ti udah mayuh meri pangka ngagai pemansang menua, kelebih agi dalam sektor pengangkut enggau pelajar.

Ku iya, Dr Ling ti ngiring MCA pengelama 17 taun megai pangku pengawa nyadi Menteri Perengka Pengangkut pemadu lama, enggau nya megai tanggungpengawa ti beguna dalam merambu pemansang infrastruktur menua ba selampur.

“Iya (Dr Ling) diaku siku ketuai ti bisi visyen sereta udah merambu mayuh pemansang besai nyengkaum dalam sektor palan penyangkai kapal, penerebai bilun enggau kereta api.

“Iya nyadi batang pengerembai ngaga palan penyangkai kapal nya, ke alai Westport nyadi siti ari palan penyangkai kapal ke kala digaga iya, nyentukka palan penyangkai kapal tu dianggap entara ke pemadu kiruh di dunya.

“Dalam bidang pengangkut, iya mih ke nguluka sereta mega ngemansangka pengawa ngemesaika tauka ‘double tracking’ ungkup sistem kereta api kitai,” ku iya.

Ku Wee, pemeri Dr Ling dalam bidang pelajar mega chukup besai nengah penumbuh enggau pemansang institusyen baka Kolej Universiti Tunku Abdul Rahman, ke diatu dikelala enggau nama Universiti Pengurusan dan Teknologi Tunku Abdul Rahman (TAR UMT) enggau Universiti Tunku Abdul Rahman (UTAR).

Ku iya, falsafah niang ti ngemeratka pemesai guna pelajar udah mujur ngadaka bepuluh ribu iku graduet, kelimpah muka peluang ngagai nembiak ari bemacham penatai, nyengkaum menua pesisir.

Tubuh niang Dr Ling deka dibai ngagai Krematorium Xiao En di Nilai, Negeri Sembilan ngambika dikubur nengah jalai pengarap sida iya.

MIRI, 6 April – Pelajar nyadi kunchi besai dalam meri kuasa ngagai komuniti Orang Ulu ngambika terus maju sereta ulih besemekih, ku Datuk Gerawat Gala.

Iya ke mega Sapit Menteri ba Opis Premier Sarawak (Pengereja Pengawa, Imigresyen enggau Pematau Projek) enggau Kaban Kunsil Nengeri (ADUN) ungkup Mulu, nyemetak madah munyi nya lebuh ngulu sesi meri penerang ti dibantaika Kolej Antarabansa Fajar ngagai Kaban Komiti Gerempung Orang Ulu Malaysia (FORUM), ti ngemeratka pemesai guna pelajar dalam ngemansangka komuniti.

Kenu ku iya, pelajar muka mayuh agi peluang ngagai rebak baru ngemeranka bidang profesyenal, pengawa dagang enggau nyadi ketuai, lalu enggau nya ulih ngenegapka pengidup komuniti Orang Ulu jemah ila.

Berebak enggau nya, iya mega muji pengawa Kolej Antarabansa Fajar ti bepalan di Miri nyadi sebuah palan pelajar tinggi peribit ti konsisten nyendiaka pelajar bekualiti enggau latih profesyenal.

Kolej tu nyendiaka mayuh macham program dalam bidang dagang, ngatur pengawa, akauntan enggau pengelikun enggau pengerai kereja ti nangkup guna industri ke diatu.

“Pengawa baka tu beguna amat dalam nentuka nembiak Orang Ulu ngembuan akses ke lebih besai ngagai pelajar enggau peluang dikena ngangkatka pengelandik sida,” ku iya nambah.

Berebak enggau nya, FORUM mega ngemeratka komitmen terus ngerembaika inisiatif pelajar dikena nentuka mayuh agi nembiak Orang Ulu bepeluang nampung pelajar tinggi.

Sama bisi datai Datuk Nyurak Keti, Residen Bagi Menua Bintulu ke mega Presiden FORUM, Dato Dennis Ngau, ADUN Telang Usan ke mega Sapit Presiden FORUM, ADUN Belaga Kennedy Cukpai Ugon enggau kaban Komiti FORUM ke bukai.

Iya nyemetak madahka pengawa beranakka puku ba pekara pelajar nyadi singkang ke pemadu beguna dikena nentuka komuniti Orang Ulu terus maju sereta ulih meri pangka ngagai semua pemansang Sarawak. – RBI

PAKAN, 6 April — Pengawa jampat Skuad Bravo Angkatan Pertahanan Awam Malaysia (APM) Pakan mujur napi penusah pun kayu tumbang nyekat jalai trafik apin lama ke udah.

Nitihka ripot, raban APM digerakka ngagai endur nya lebuh nerima penerang bekaul enggau penusah nya.

Lebuh datai ba palan penusah nyadi, raban nya terus bejalaika pengawa netak, ngupas enggau meresi ngena ‘chainsaw’ dikena nentuka jalai nya ulih dibuka baru enggau jampat sereta likun.

Asil ari pengawa ti efisyen nya, jalai ti kena empas nya mujur diberesi enggau penuh lalu diatu udah likun dikena penguna.

Operasyen nya mega nerima kerejasama ari kaban ejensi bukai ba endur nya, lalu enggau nya ngepunka pengawa trafik likun baru.

Nadai sebarang bakal diripotka nyadi sepemanjai operasyen nya.

APM Sarawak meri besai terima kasih ngagai semua kaban ti ngaul diri ketegal komitmen enggau dedikasyen sida dalam nentuka pengelikun enggau pengelantang komuniti seruran dijaga.