PUTRAJAYA, 7 April – Malaysia nerima pemansang ke positif lebuh sebuah ari tujuh buah kapal komersial enggi menua tu ke tepekul ba Selat Hormuz berindik ari gaya ke diatu charut di Asia Barat, diberi jalai ke likun lalu diatu benung dalam pejalai nuju palan ke udah ditetapka.

Opis Menteri Luar dalam siti penerang madahka pemujur tu dijapai asil ari kaul diplomatik renggat tinggi entara ketuai Malaysia enggau Iran dalam pengawa nentuka pengelikun kapal ke bisi kaul.

Entara pengawa nya iya nya randau nengah telefon ke nyadi kena 26 Mac 2026 entara Menteri Besai Dato’ Seri Anwar Ibrahim enggau Presiden Republik Iran Masoud Pezeshkian.

Kelimpah ari nya, komunikasyen diplomatik mega ngaul Menteri Luar Dato’ Seri Utama Haji Mohamad Hasan enggau kaban iya ari Iran Abbas Araghchi kena 24 Mac 2026.

Malaysia netapka baru komitmen ngagai prinsip pengelepas belayar enggau pengelikun jalai maritim setipak enggau undang-undang entarabansa, seraya ngemeratka pemesai guna dialog enggau kaul diplomatik ti terus dikena nentuka pemaik enggau penegap serantau dijaga. – RBI

KUCHING, 7 April- Sapit Menteri Pengerai Malaysia, Dato Hajjah Hanifah Hajar Taib, ngepunka Jelajah Pengerai Borneo (JKB) Siri I nengah bejalaika Penemuai Gawa ngagai Sepital Besai Sarawak (HUS) ti nyadi pengeran deka ngenyemakka sereta meretika sistem servis pengerai enggau komprehensif, kelebih agi di kandang menua Borneo.

JKB iya nya inisiatif iya nengah Opis Menteri Pengerai Malaysia (KKM) dikena meresa diri empu nama guna, pemar enggau pengawa ngemanahka ti diguna dalam ngenataika servis pengerai dalam bidang nya.

JKB Siri I diperambu deka mungkur sekeda endur ti ngaul sepital enggau klinik pengerai di serata Sarawak.

Pagi tu tadi, Hanifah dulu nerima penerang sebedau ngepunka pejalai ngulihka perening keterubah pasal operasyen, guna enggau pemar ke ditapi fasiliti pengerai di HUS.

Rambau penemuai nya, Hanifah mega bisi mai deligit ari KKM enggau Opis Pengerai Nengeri Sarawak (JKNS) dikena nentuka tisih ti lebih engkeman sereta betul ba gaya ke bendar ba bidang nya, kelimpah ari ngenegapka kaul entara opis dalam pengawa ngangkatka kualiti servis pengerai.

Penemuai Sapit Menteri ngagai HUS deka meda kediri empu perengka guna enggau servis ti disedia dikena nentuka pengawa ngenataika servis pengerai ngagai rayat seruran ba tikas ke pemadu manah, setipak enggau komitmen perintah ngenegapka sistem pengerai menua. -RBI

MIRI, 7 April — Mensia mayuh kelebih agi sida ti rinduka seni budaya Dayak dilalau nyereta Pekit Ngajat enggau Bertabuh ti deka diatur beserimbai enggau Gawai Dayak Bazaar & Ethnocultural Festival 2026.

Pekit ti beprestij nya diperambu deka diatur kena 8 Mei 2026 di Bandar Baru Permyjaya lalu nyadi siti ari batang isi Pengerami Gawai Dayak Renggat Sarawak taun tu.

Pengawa ngatur pekit tu ngembuan tuju deka ngetan sereta negika seni pesaka komuniti Dayak, kelimpah ari nyendiaka pelasar ngagai pesereta mantaika penau, kreativiti enggau pengerindu sida ngagai main asal.

Kelimpah ari nya, pengawa tu mega dipeda ulih matak penyereta nembiak rebak baru ngambika terus ngemerat sereta ngidupka seni pemerindang asal baka Ngajat enggau bertabuh nitihka arus pemansang kemaya hari.

Pekit tu meri perais ti mai penguntung sereta peluang merindang ba panggau ti beprestij ngagai pesereta ari mayuh macham penatai.

Haribulan penutup penyereta ditetapka kena 24 April 2026 lalu pengawa ngerejista tau digaga nengah chara scan kod QR ti disediaka pengatur.

Penerang silik, mensia mayuh tau betanya ngagai Pemesai Betanggungjawap (PIC), Betty Pan.

Berindik enggau nya, mensia mayuh dilalau anang muai peluang nyereta pengawa tu lalu sama-sama ngerichahka Pengerami Gawai Dayak 2026, lalu enggau nya ulih ngangkatka maruah pesaka seni enggau main asal ngagai tikas ke tinggi agi. — RBI

MIRI, 7 April — Pekit Gendang Pampat deka nyadi siti ari batang pengerami dalam Bazar Gawai Dayak & Festival Etnobudaya beserimbai enggau Pengerami Gawai Dayak Renggat Sarawak taun tu.

Pengawa budaya tu diperambu deka diatur kena 15 Mei 2026 ba Bandar Baru Permyjaya, lalu dibuka ngagai mensia mayuh enda ngira penatai, kelebih agi sida ke rinduka seni pemerindang asal.

Pengawa ngatur pekit tu ngembuan tuju deka ngetan sereta negika pesaka asal komuniti Dayak, kelimpah ari nyendiaka pelasar ngagai pesereta mantaika penau, kreativiti enggau penyelai ba pengawa pemerindang Gendang Pampat.

Berindik enggau nya, mensia mayuh diperansang ngambi bagi sereta anang muai peluang nyereta pengerami ti beprestij nya ti dikearapka ulih ngempuruka penyereta ti bepenau ari serata nengeri tu.

Haribulan penutup penyereta ditetapka kena 24 April 2026, lalu pengawa ngerejista tau digaga nengah chara scan kod QR ke disediaka tauka betanya ngagai pengatur ngambika nemu penerang silik.

Kelimpah ari pekit, pengerami tu mega bisi mantaika bemacham aktiviti ti ngerinduka ati nyengkaum bazaar enggau pengawa mandangka main asal ti mandangka penyelai pupu raban bansa di Sarawak.

Mensia mayuh mega dipinta datai ngerichahka agi pengerami tu sereta meri sukung ngagai bala penyereta ti deka ngerichahka panggau nitihka tiun Gendang Pampat. — RBI

Kami berasai sinu, pemidang niang tu siti pengelenyau ti besai dalam industri muzik menua kitai.

Sepemanjai umur niang udah meri mayuh penau enggau pengawa ti ukai semina merindang, tang mega meri inspirasyen ngagai mayuh peminat enggau aktivis seni.

Ngarapka sida iya sebilik diberi pengering, pengeliat ati enggau pengelantang dalam napi maya ti tusah tu.

Jasa enggau pengingat niang deka seruran lekat dalam pengingat kitai.

Ngenataika penyinu ati ari kami Ruai Berita Iban.

RIP 🙏

BINTANGOR, 7 April – Operasyen ngelaban dadah ti dipejalaika tim “Task Force” Indu Opis Polis Pelilih (IPD) Meradong mujur ngujungka siku lelaki peranak menua nya ke positif dadah mujur ditan, kemari.

Ketuai Polis Pelilih Meradong, DSP Tansli Mering madah, saspek ke beumur 52 taun nya ditan urung pukul 6.05 lemai ba kandang menua Bintangor maya operasyen “Ops Tapis” dipejalaika.

Nitihku iya, saspek udah nya dibai ngagai IPD Meradong sebedau diperesa ai kemi ba opis BSJND Meradong.

“Asil peresa nya tetemuka saspek positif Amphetamine enggau Methamphetamine,” ku iya ba sebengkah penerang.

Ku iya, pengawa meresa enggau silik agi tetemuka lelaki nya nadai ngembuan sebarang rikod ke udah bekaul enggau penyalah tauka penyalah guna dadah.

Ku iya nambah, kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit nyentuk RM5,000 tauka jil enda ngelui dua taun nyema dikenuku salah.

Berebak enggau nya, DSP Tansli Mering nyemetak madahka polis enda belembut enggau sebarang aktiviti salah guna dadah lalu deka terus chakah agi bejalaika operasyen ari setiap maya.

Iya mega minta mensia mayuh meri kerejasama nengah chara meri penerang bekaul enggau aktiviti dadah ngagai polis, kelebih agi ba kandang menua Meradong. -RBI

Shalinie Agnes Anak Ali, 23, udah dipadu nyadi champion Ratu Etnik Trofi Justin Williamson Bridal’s Studio Vol. 3, ngemai pulai anugerah Gaun Pemadu Manah (Ngepan Kuas) enggau ‘Catwalk’ Pemadu Manah.

Iya ke asal ari Bintulu berengkah ngaul diri ba pekit ratu etnik ba taun 2024 enggau nyereta Pekit Kumang, Keling & Kumang Indai Orang CCF, lalu mujur bulih gelar Kumang sereta mega mai enam anugerah kebukai iya nya nyengkaum Miss Popular, Miss Congeniality, Miss Favorite, Ensumbar Pemadu Manah, Ngajat Pemadu Manah, dan Video Pemadu Manah.

Pemungkal enggau Motivasyen

Shalinie mantaika motivasyen diri ngambi bagi ba Ratu Etnik Trofi Justin Williamson Vol. 3 tu dikena ngelaban diri empu sereta nguji penau diri ba tikas ke tinggi agi.

“Utai ti meransang aku ba Pekit Ratu Etnik Piala Justin Williamson Bridal’s Studio Vol 3 tu ianya tim aku empu sereta aku pan enchabar diri empu nguji bepekit ba menua bukai ngari ke menua diri empu” ku Shalinie.

Ku Shalinie, iya deka beratika pengulih iya ba pekit ke lebih kompetitif.

“Tim aku meri penemu ngasuh aku nguji, lalu aku beterima kasih ke peluang tu.

“Sukung ari diri sebilik enggau bala bakih mega nyadi tulang belakang pemujur aku.

“Kami sebilik enggau bala bakih seruran bisi ba tisi aku, meri peransang enggau sukung ti enda ngetu sepemanjai pekit tu,” ku iya.

Pengawa Nyediaka Diri enggau Pemar

Ba pengawa nyendiaka diri enggau pekit nya, Shalinie ngemeratka penegap ati taja pan patut magi awak iya entara kereja enggau latih.

“Enti ditanya ke kenang ba pekit sekali tu, nadai entu mayuh peneleba ga laban aku patut magi masa aku enggau kereja serta belatih tiap kali pulai gawa, belatih 2-3 jam aja sepengelama seminggu sebedau datai ba malam final.

“Pemar ke pemadu besai ditapi iya iya nya nyaga pemerat enggau pengerai tubuh.

“Dalam kandang seminggu, aku mujur ngurangka lima kilogram nengah pengawa nagang pemakai ti terit,” ku iya seraya enggau tuchum nusui ngagai Ruai Berita Iban.

Ari sukut gamal enggau pengangkun diri, Shalinie ngemeratka pemesai guna disiplin, nguasa budaya, sereta meretika adat Iban enggau dalam.

“Enti ditanya ba senentang budaya, ya ba penemu aku enti kitai bisi ati ka enggau bepekit, kitai mesti semampai belajar ke adat asal kitai empu serta utai bukai” ku Shalinie.

Pemujur enggau Reti Pemenang

Shalinie nerangka maya nyadi champion nya nyadi kenang iya ke pemadu berega.

“Aku berasai tekenyit, laban enda nyangka bulih gelar Busana Pemadu Manah iya nya ngepan ari Garry Hilton tukang kebat aku empu, best catwalk aku pan enda nyangka aku bulih nya laban semina seminggu aja endur aku belatih ngelemika tubuh ti dibantu ari siku tim aku empu iya nya Brendan Louis ke nyadi PA aku” ku Shalinie.

Bekaul pengarap diri, iya nerangka pengarap ke tinggi sereta disiplin ba pengawa nyendiaka diri nyadi batang pemujur iya.

“Pemenang tu mega meri peluang ngagai aku ngangkatka budaya Iban ngagai tikas ke besai agi, setipak enggau trend globalisasyen,” terang Shalinie.

Pemujur ke udah

Sebedau tu, Shalinie udah nyapai mayuh macham penyulut ba pekit menua tu, nyengkaum Penuduk Lumur 2 Karnival Selangau 2025 enggau Penuduk Lumur 1 Ratu Etnik Boyak Fest 2025.

Peneleba sebedau tu mantu nempa pengarap ati enggau prestasi iya ba pekit ke pemadu baru.

Budaya enggau Identiti

Shalinie nyemetak madahka pemesai guna nguasa budaya kelebih agi Ngepan Iban dalam nentuka penyereta ulih mantaika diri enggau andal.

Ku iya, setiap penyereta begunaka belajar sereta meretika adat enggau budaya Iban enggau dalam dikena nentuka pengawa pemerindang ti bekualiti sereta tulin.

“Nengah awak tu aku deka madah ke nembiak rebak dudi kitai mesti deka nemu pasal utai baka tu, laban orang tuai makin ari makin nya nadai mayuh lesi, enti ukai kitai sapa agi?

“Nya alai , kitai ke nembiak rebak dudi tu patut berserakup ngenan ka adat enggau main asal kitai bansa.

“Kitai patut ngetanka adat enggau main asal ngambika identiti enggau sejarah budaya kitai ditan.” ku Shinie.

Perambu Dudi Hari

Pengudah pemujur tu, Shalinie merambu deka terus nyukung gerempung Ratu Etnik sereta meri empas positif nyadi duta ungkup pekit nya.

“Aku deka fokus enggau bala raban komiti ti ngatur pekit Ratu Etnik tu ianya Tuan Justin Williamson Ujang enggau Tuan Rimun John Marthin, berundingka nama utai ti patut digaga sereta nama utai ti deka ditambah manah ungkup pekit tu ba taun dudi.

“Laban sebedau aku nyua ke jumpang aku ngagai pemenang ti baru, aku ka meda pekit tu ba taun dudi bebida enggau taun-taun ke udah, laban aku nyadi duta iya aku ka ngemai empas ti besai sereta tu sigi tanggung pengawa ti udah dipegai aku ngambika bisi dipeda serta dikenang dudi ari” ku Shalinie.

Iya mega bisi juluk ati deka nyapai pemujur ba renggat ke tinggi agi seraya ngangkatka adat enggau main asal Iban.

Pengemeran Media

Shalinie muji pengawa media baka Ruai Berita Iban ti mantaika bakat menua tu sereta ngangkatka budaya Iban.

Iya ngarapka pelasar tu terus nyadi pelasar ke beguna dikena meri kelala budaya enggau pemujur rebak baru Iban ngagai renggat dunya.

Iya nutup randau enggau Ruai Berita Iban meri tabi puji sereta meri terima kasih ngagai semua penyukung iya

“Terima kasih ngagai semua ti seruran nyukung pemansang bakat menua tu.

“Sukung kita mai reti ke besai sereta meri inspirasyen ngagai kami ngambika terus mansang dalam arena budaya enggau pekit,” ku iya ngujungka randau. -RBI

PUTRAJAYA, 6 April — Perintah ngenegapka agi komitmen ngelaban pengawa salah enggau mai barang sechara belalai nengah chara bersepadu entara ejensi penerit atur nengah Aum Komiti ‘Jawatankuasa Tertinggi Penyelarasan Membanteras Ketirisan dan Penyeludupan’ (JTPAP) ti diatur sehari tu ba Opis Pekara Dagang Dalam Nengeri enggau Ungkus Pengidup (KPDN).

Aum nya bechairmanka Sapit Menteri Besai, YAB Datuk Amar Haji Fadillah Haji Yusof, enggau penyereta mayuh bengkah opis menteri enggau ejensi nyengkaum KPDN nyadi sekretariat, Opis Menteri Dalam Menua (KDN), Opis Menteri Pengelikun (MINDEF), Opis Menteri Perengka Pengangkut ( MOT) enggau Opis Menteri Betanam Betupi enggau Penyukup Pemakai (KPKM) nyadi pengari Perintah Nengeri Sabah enggau Sarawak.

Nengah penerang ti dipansutka, aum nya setuju netapka lima batang pemutus nyadi atur strategik dikena ngenegapka penerit atur sereta nagang aktiviti pemansut subsidi enggau mai barang sechara belalai.

Entara pemutus ke dipesetuju iya nya nyiri ejensi ke nyadi ketuai nitihka sektor darat, garis entara menua enggau ai dikena nerangka bidang kuasa enggau tanggungpengawa.

Kelimpah ari nya, atur ke terit deka dipejalaika nyengkaum ngetuka sereta nginsil pemendar ‘fleet card’ enggau subsidi diesel enti bisi ditemu salah guna tauka ngerumpak.

Aum nya mega ngemeratka pengawa ngemanahka agi atur aktiviti ‘bunkering’, kelimpah ari setuju numbuhka tim khas OPS TIRIS 4.0 dikena ngenegapka agi operasyen neritka atur di serata menua.

Dalam pengawa ngerembaika pengawa matau sabsidi, pengawa bejalaika Sistem Kawalan Diesel Bersubsidi (SKDS) deka ditegapka agi nengah chara ngena ‘fleet card’ enggau lebih luas.

Perintah nyemetak madahka pengawa tu ngayanka komitmen iya ti seruran dipejalaika dikena nentuka subsidi datai ba sida ti amat patut nerima, kelimpah ari ngelaban semua bansa pengawa mai barang ti dikuasa enggau chara belalai dikena nyaga pemerat menua enggau pengelantang rayat. — RBIKerejasama entara penegap ejensi, lima atur ti tegap diputuska dalam aum JTPAP

BAU, 6 April — Siku lelaki peranak menua tu ke beumur urung 23 taun ditangkap polis ketegal dipelaba bisi kaul enggau aktiviti salah guna dadah dalam operasyen ke dipejalaika lemai tu tadi.

Ketuai Polis Pelilih Bau, P/Supt Mohd Haide bin A. Rahman ba sebengkah penerang madahka pengawa nangkap nya digaga urung pukul 7.45 malam ari raban ari Bagi Pansik Jenayah Narkotik begulai enggau raban ari Indu Opis Polis Pelilih (IPD) Bau.

Nitihku iya, asil peresa ai kemi keterubah ba saspek tetemuka lelaki nya positif dadah.

“Saspek udah ditangkap lalu kes tu dipansik ari baruh Seksyen 15(1)(a) Akta Dadah Berbahaya 1952,” ku iya.

Iya mega nyemetak madahka Polis DiRaja Malaysia (PDRM) deka terus chakah agi bejalaika pengawa ngelaban aktiviti salah guna dadah lalu enda belemi enggau sebarang individu ke bisi kaul enggau aktiviti baka nya.

Berindik enggau nya, mensia mayuh ke bisi penerang ke bekaul dipinta datai ke mua mantu polis nengah chara nyalurka penerang nengah Talian Hotline JSJN Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211. — RBI

MIRI, 6 April — Beserimbai enggau Pengerami Gawai Dayak Sarawak 2026, Bazar Gawai Dayak enggau Festival Etnobudaya Mandangka Pemakai Asal deka diatur kena Hari Satu, 11 Mei 2026, berengkah ari pukul 6.00 lemai di Bandar Baru Permyjaya, ditu.

Pengawa tu disadang deka dipenyadika Datuk Dr Penguang Anak Manggil ti nyadi Sapit Menteri Pengerai Mensia Mayuh, Pengawa Berumah enggau Kaunsil Kandang Menua Sarawak ti mega Kaban Kunsil Nengeri (ADUN) ungkup sitak N.76 Marudi.

Pengawa ngatur pengerami tu ngembuan tuju deka ngetan sereta ngelakuka penyelai pesaka asal Dayak di Sarawak, kelebih agi nengah pengawa mandangka ngepan asal ti ngayanka identiti enggau nilai estetik setiap raban bansa.

Kelimpah ari nya, bala temuai mega deka bepeluang ngasaika bemacham pengawa bejual ba bazar budaya ti mandangka produk menua tu, asil pengelandik jari enggau pemakai asal, kelimpah ari nyereta aktiviti ti ngerinduka ati, ti disediaka ungkup semua renggat mensia mayuh.

Program tu mega nyadika pelasar dikena ngenegapka penyerakup komuniti sereta meri penyedar ngagai pemesai guna nyaga sereta nampung main asal ngambika seruran relevan ngagai rebak dudi hari.

Mensia mayuh dilalau datai ngerichahka agi pengerami sereta ngintu Gawai Dayak 2026 begulai dalam gaya ti penuh chura sereta semengat begulai. – RBI