MIRI, 7 April – Pejalai siku lelaki tejanggal enggau penusah lebuh kerita pikap ke deriba iya aksiden pengudah betempuh enggau sebuah lori ke benung bejalaika pengawa melakin jalai di Jematan Lutong, tumu pagi tadi.

Ketuai Balai Bomba enggau Penyah Penusah (BBP) Lutong, PBT II Henry Jugah madahka, sida nerima kangau ngenyit urung pukul 12.08 tengah malam sebedau seraban bomba dianjung ngagai palan penusah nyadi.

Lebuh datai ba endur nya, Palan Penyaga Operasyen (PKO) ngentaska eksiden nya ngaul sebuah kerita Toyota Hilux.

Tudah ke ngena Hilux ditemu tepekul ba penuduk deriba, lalu raban bomba ngena perengka khas ke dikumbai ‘rescue tool’ netak pintu kerita dikena ngemansutka iya.

Tudah udah mujur dipansutka tang dientaska Opis Menteri Pengerai Malaysia (KKM) bebadi ba palan penusah ke nyadi sebedau diserah ngagai polis ngambika atur nangkanka nya dipejalaika.

Operasyen ti ngaul lima iku raban enggau sebuah entukar FRT nya tembu abis pukul 1.10 pagi pengudah gaya dientaska likun.

Sama bisi datai ba endur nya, Polis DiRaja Malaysia (PDRM) enggau Opis Menteri Pengerai mantu ngatur penusah. -RBI

LUNDU, 7 April – Siku lelaki beumur 27 taun balat bakal pengudah kerita Proton Saga FLX ke dipasang iya ensayar lalu tepawah ke tisi jalai ba penusah ke nyadi ba Jalai Senibong, Jalai Besai Pan Borneo, tengahari tu tadi.

Nitihka ripot ari Balai Bomba enggau Penyah Penusah (BBP) Lundu, kangau ngenyit bisi diterima urung pukul 4.45 lemai sebedau seraban bomba enggau dua injin dianjung ngagai endur penusah nyadi, iya nya urung 19 kilometer penyauh ari balai nya.

Lebuh datai ba endur nya urung pukul 5.05 lemai, raban bomba tetemuka tudah balat bakal ba pala enggau tubuh.

Komander operasyen udah nya terus bejalaika pengawa beratika gaya penusah nya sebedau ngasuh tim Servis Penyelamat Perubat Ngenyit (EMRS) meri perubat keterubah nyengkaum masang kolar serviks.

Udah nya tudah dibai ngena ngena juli sebedau diserah ngagai pemesai perubat Sepital Lundu ngambika atur silik agi dipejalaika.

Operasyen nya mujur dijaga dalam timpuh ke pandak lalu tembu abis pukul 5.15 lemai enggau nadai sebarang komplikasyen bukai.

Sama bisi ba endur nya dua iku kaban Polis Trafik IPD Lundu enggau empat iku pemesai perubat ari Sepital Lundu mantu pengawa ngatur tudah. – RBI

BATU KAWA, 7 April – Tabung Ekonomi Gagasan Anak Sarawak (TEGAS) madahka Hab Inovasyen Batu Kawa (BKIH) diatu udah beoperasyen penuh sereta dibuka ungkup buking mensia mayuh ba An Cheng Ho Sports enggau Community Hall.

Hab inovasyen nya asil runding Sapit Premier Sarawak ke mega Kaban Kunsil Nengeri ( ADUN) Batu Kawah, Datuk Amar Prof Dr. Sim Kui Hian, lalu nyadi nyata nengah sukung penuh Premier Sarawak ke nyadi sebagi ari pengawa ngubah Batu Kawa nyadi palan penyulut digital.

BKIH nyendiaka palan endur gawa moden sereta ulih diguna ti digaga khas dikena nyukung orang dagang, pemungkal, nembiak enggau komuniti dalam ngenegapka ekonomi digital di nengeri tu.

Entara batang perengka guna ke bisi disediaka iya nya bilik aum ke ulih muat 10 iku orang disikap enggau internet laju, Smart TV enggau dapur, ruang mija tebuka ti ulih nampung nyentuk 30 iku penguna enggau akses ngagai program dagang TEGAS enggau palan endur ngatur pengawa ti ulih endur entara 30 ngagai 80 iku penyereta ungkup ngatur woksyop enggau aktiviti komuniti.

Mensia mayuh kelebih agi orang dagang enggau raban nembiak ke bisi ati ulih ngaga buking nengah online nengah pelasar rasmi TEGAS nengah chara milih “Batu Kawa Innovation Hub” lalu nekan ba “Get a Quote” dikena meresa buking. -RBI

SIBU, 7 April – Siku lelaki peranak menua tu ke beumur urung 60 taun ditan pengudah dipechayaka bisi kaul enggau sindiket mai diesel subsidi belalai ba pengawa nyerungkai bot tunda di Ulu Lanang, ditu.

Ketuai Polis Pelilih Sibu, ACP Azari bin Miskon madah, pengawa ngenyit nya dipejalaika kena 3 April 2026 entara pukul 9.30 pagi nyentuk 7.50 lemai ari tim polis Divisyen E8 Indu Opis Polis Pampang Khas Sarawak (IPCK) begulai enggau Pampang Khas IPD Sibu enggau Opis Menteri Dagang Dalam Menua enggau Belanja Idup (KPDN) Pampang Sibu.

Nitihku iya, operasyen nya mungkur pengawa meresa bot tunda Sinar Pelutan 1 ti sangkai ba Pengkalan Sarawak Chemical Industries, Ulu Lanang.

“Asil peresa nya tetemuka bisi 132,000 liter minyak diesel ke disimpan dalam semilan tangki ba kapal nya enggau anggar rega RM283,800,” ku iya ba sebengkah penerang.

Ku iya nambah, penyampau semua rega barang ke dirampas nya nyengkaum kapal dipelabaka manggai RM773,600.

Pansik keterubah tetemuka bot tunda nya udah sangkai ba pengkalan nya urung sebulan enggau dalih iya bisi pengerusak injin sereta benung dikemanah sebedau iya diperambu deka belayar ngagai Kepulauan Solomon.

Diatu kes nya benung dipansik ari baruh Seksyen 21 Akta Kawalan Perbekalan 1961 lalu semua pengawa ngetan enggau ngerampas udah diserah ngagai KPDN Sibu ngambika atur nangkanka nya dipejalaika.

Berebak enggau nya, iya nyemetak madahka Polis Diraja Malaysia kelebih agi IPD Sibu deka terus chakah agi bejalaika pengawa pemansik dikena ngelaban pengawa mai barang subsidi belalai.

Mensia mayuh ke bisi penerang bekaul enggau sebarang pengawa ti dipelabaka dipinta datai ke mua lalu ngenataika penerang nya ngagai piak bekuasa. – RBI

KUCHING, 7 April – Opis Bomba enggau Penyah Penusah (JBPM) Sarawak benung muka peminta ngambi Pemesai Bomba Volunteer (PBB) ti mungkur 18 balai bomba di serata nengeri ungkup taun 2026.

Entara stesyen ke dipasuk iya nya Siburan, Serian, Asajaya, Sri Aman, Saratok, Betong, Selangau, Mukah, Bintangor, Daro, Song, Kapit, Sibujaya, Tatau, Kidurong, Lutong, Marudi enggau Lawas.

Peminta dibuka ngagai peranak menua Malaysia ke lelaki ke beumur entara 18 ngagai 35 taun ke ngembuan ambis nadai Setipikit Pelajaran Malaysia (SPM).

Chalun mega mesti regas batang tubuh, enda ngena cheremin mata, ngembuan Indeks Jisim Tubuh (BMI) entara 18 ngagai 26 sereta bisi lisin deriba enggau perengka pengangkut kediri empu.

Kelimpah ari nya, peminta meseti diau dalam kena bungkur enda lebih ari 25 kilometer ari balai bomba ke dipinta.

Orang ke bisi ati diperansang minta enggau lengkas sebedau haribulan penutup 21 April 2026.

Pengawa ngambi bomba volunteer tu nyadi peluang ngagai peranak Sarawak nyereta raban pengelikun dalam mantu dalam operasyen nyelamat enggau meri servis ngagai komuniti, nengeri enggau menua.

Dalam pekara ke sama mega, Ketuai BBP Lutong, PBT II Henry Jugah madahka peminta tau diambi ba balai bomba ke besemak.

“Ungkup sida ke bisi ati minta pengawa tu ba Miri, taun ngambi pom ba BBP Lutong tauka betelefon ngagai ketuai balai,” ku iya lebuh dipinta nandu penerang nya. -RBI

KUCHING, 7 April – Opis Kereja Raya (JKR) Sarawak bejalaika tanggungpengawa ke beguna amat nyadi ejensi rintai mua bejalaika pemansang nengeri, lalu udah mai ubah ke besai ngagai rampa infrastruktur Sarawak.

Sapit Premier Sarawak, Datuk Amar Douglas Uggah Embas madah, iya ngarika rayat meri pengaga ati ngagai komitmen enggau penyakah JKR ti udah nempa pemansang infrastruktur nengeri tu.

Ba pemansang ke sebaka, iya madahka RM3 bilion wang turu tambah udah dikemendarka Premier Sarawak dikena melanja projek ke enda ulih dipasuk dalam Atur Pemansang Malaysia Lumpar Ke-13 (RMK-13).

Nitih ku iya, pemendar nya mandangka pengandal penuh ketuai nengeri ngagai pengulih JKR Sarawak bejalaika projek pemansang enggau engkeman ke pemaik rayat di serata nengeri.

Ku iya, sukung nya beguna amat laban Sarawak chakah ngenegapka penyambung enggau infrastruktur pemun, nyengkaum inisiatif besai ngambi jalai batang ungkup dikemansang ke udah bisi enggau ke udah ditinggalka ti dikumbai iya “game changer”, kelebih agi di menua pesisir.

Iya madah munyi nya lebuh bejaku ba Pengerami Nerima Pengabang Aidilfitri Opis Kereja Raya Sarawak ba Dewan UNIFOR kena Hari Satu tu tadi.

Ku iya nambah, entara pemerat udah tu iya nya ngamatka pengawa ngambi jalai batang lalu dikemansang ti udah ditinggal enggau ke udah bisi, ti dipelabaka meri empas besai ngagai rentayan jalai alun nengeri tu, kelebih agi di Miri enggau Kapit.

Uggah ke mega Menteri Infrastruktur enggau Pemansang Palan Penyangkai Kapal madah, inisiatif nya begunaka komitmen ke tinggi ari semua staf JKR, berindik ari skop ke besai sereta pemar logistik ba kandang menua ulu.

Taja pia, iya nyemetak madahka pengawa nya beguna amat dikena ngangkatka akses ungkup komuniti menua pesisir kelimpah ari meransang penumbuh ekonomi kandang menua.

Iya mega madahka pengulih JKR Sarawak bejalaika pengawa nya nyadi siti ari batang pekara dalam perintah nengeri, terus ngenataika sukung belanja ke besai, nyengkaum ungkup projek ke di luar agih belanja perintah besai.

Berebak enggau nya, iya nesau semua pengereja pengawa Opis Kereja Raya Sarawak ngambika terus bekerejasama nyadi siti tim nentuka juluk pemansang nengeri tu nyengkaum juluk deka nempa Sarawak nyadi pelilih menua bepenatai pemisi tinggi manggai ba taun 2030 ulih nyadi nyata. -RBI

SPAOH, 7 April — Karnival Futsal N.37 Bukit Saban deka diatur baru kena 16 enggau 17 Mei 2026 ba Gelanggang Futsal, Spaoh, lalu dikearap ulih ngerichahka arena lumba enggau main komuniti di kandang menua nya.

Edisyen tu meri peluang ngagai tim menua tu bepekit ngulihka Trofi Datuk Amar Douglas Uggah Embas enggau Datin Amar Dato Doreen Mayang 2026 ti beprestij.

Karnival tu bisi kategori lelaki enggau indu, tang penyereta ditatak ngagai tim ari kandang menua Betong, Debak enggau Spaoh aja. Bayar penyereta ditetapka RM200 ungkup tetiap tim.

Dikena nambahka semengat bepekit, piak pengatur mega bisi meri perais mata duit ti narit ati ngagai pemenang.

Ungkup kategori lelaki, champion deka mai pulai perais trofi mata duit RM5,000 enggau midul, lumur dua RM2,500 enggau midul seraya lumur tiga deka nerima perais mata duit RM1,000 enggau midul.

Berebak enggau nya, ungkup kategori indu, champian deka nerima perais trofi, mata duit RM3,000 enggau midul, lumur dua RM1,500 enggau midul lalu lumur tiga deka mai pulai perais mata duit RM500 enggau midul mega.

Nitihka penerang ari piak pengatur, timbal ti meransang dikearapka bepelasarka pengawa ke udah nyadi sebedau tu, nya alai tim ke bisi ati dilalau ngerejista diri tumu laban penyampau penyereta bisi tatak.

Pengawa ngatur karnival tu ukai semina ngembuan tuju deka ngangkatka gaya pengidup bepengerai nengah aktiviti lumba enggau main, tang mega nyadi pelasar ngerapitka kaul pangan diri sereta nerenakka semengat lumba enggau main ba komuniti lokal. — RBI

Sumber, grafik — Kelab Anak Bukit Saban

BERUAS, 7 April — Sebuah kerita utiliti lumba enggau main (SUV) Chery Tiggo diripotka nyauka 60 peratus rusak pengudah dituntung penusah aksiden ti mungkur lima buah kerita ba Changkat Cermin, Ayer Tawar, lemai Hari Satu tu tadi.

Penusah ke nyadi urung pukul 4.55 lemai nya mega ngujungka siku deriba indu bakal, seraya empat individu ke bukai selamat enggau nadai bakal ba tubuh.

Opis Bomba enggau Penyah Penusah (JBPM) Perak nerima kangau ngenyit urung pukul 4.55 lemai sebedau nganjung tujuh iku raban ari Balai Bomba enggau Penyah Penusah (BBP) Ayer Tawar ngagai palan penusah nyadi.

Penulung Direktor Operasyen JBPM Perak, Sabarodzi Nor Ahmad madah, penusah bebadi nya mungkur lima buah entukar iya nya, sebuah kerita Chery Tiggo ke angus 60 peratus, sebuah kerita Proton X50, sebuah kerita Proton Inspira, enggau dua buah kerita Proton Wira.

Siku indu ke deriba kerita Proton X50 diripotka bakal ba jari enggau mua ketegal empas ari kerita ba penusah belantak nya.

Tudah mujur dipansutka mensia mayuh ba palan penusah nyadi lalu terus dianjung ngagai sepital ngambika diperubat enggau silik agi sebedau raban bomba datai.

Berebak enggau nya, empat iku agi sida ke kena penusah ari perengka pengangkut bukai mujur ngelarika diri enggau nadai bakal.

Tim bomba ke datai ba palan penusah nyadi terus bejalaika pengawa madamka api ba kerita SUV Chery Tiggo ke udah angus dikena nyeliahka iya ari ngerekai ngagai perengka pengangkut bukai.

Pengawa madamka api dipejalaika ngena arus hos bantu tunggal enggau ai ari tangki jentera.

Api mujur dirara urung pukul 5.53 lemai lalu operasyen tembu abis urung pukul 6.00 lemai. — RBI

Sumber, photo — IKBM

KUCHING, 7 April — Ex-Sapit Sekretari Perintah Nengeri (Pentadbiran) Sarawak, Datu Buckland Bangik ngangkat sumpah nyadi Ombudsman Sarawak pengudah dipadu mangku pengawa nya berengkah 2 Mac 2026.

Pengawa ngangkat sumpah nya dipejalaika ba mua Akim Kort Tinggi 1, Dean Wayne Daly, nitihka penetap ari baruh Ordinan Ombudsman Sarawak 2023 ti netapka genap iku Ombudsman ke dipadu meseti ngangkat sumpah sebedau berengkah gawa enggau rasmi.

Ketuai Ombudsman Sarawak, Datu Abdul Ghafur Shariff madah, pengawa nyiri nya ngemenuhka pinta minimum nyadi raban Ombudsman Sarawak baka ti udah ditetapka dalam ordinan nya.

“Sehari tu nyadi kenang ke besai reti laban kitai udah nyapai kuota minimum lima iku kaban Ombudsman, taja pan penyampau maksimum ke dikemendar iya nya tujuh iku,” ku iya baka ke diambi dalam ripot Utusan Borneo Online.

Iya madah munyi nya lebuh dikerandau pengudah tembu pengawa angkat sumpah di Kuching.

Berebak enggau nya, iya madahka Ombudsman Sarawak deka terus bejalaika tanggungpengawa ke berat dalam nerima sebana ari mensia mayuh sereta mega matau opis menteri, opis perintah nengeri enggau kompeni ke bisi kaul enggau perintah (GLC) dikena nentuka pengawa merintah ti terang sereta bepelasarka integriti.

Sama bisi ngulu atur pengawa nya dua iku Kaban Ombudsman iya nya Albert Tang Yew Liong enggau Toieyah Tioh.

MATU, 7 April — Pengawa jampat raban Raban Penyaga Pengelikun Mensia Mayuh Malaysia (APM) Pelilih Matu mujur nagang penusah babas angus ba tisi jalai di kandang menua Tanjong Jol, ditu, kemari.

Palan Kawalan Operasi (PKOD) Pelilih Menua APM Matu nerima kangau ngenyit bekaul enggau penusah nya sebedau seraban raban dianjung ngagai endur nya ngambika atur jampat dipejalaika.

Lebuh datai ba palan penusah nyadi, penusah angus ditemu ngaul kandang endur semak ba tisi jalai.

Raban APM bejalaika pengawa enggau lengkas bejalaika pengawa nagang keterubah seraya nganti penatai raban Opis Bomba enggau Penyah Penusah Malaysia (JBPM) dikena nyeliahka api ari nyerarai ngagai kandang endur ke besemak.

Operasyen madamka api udah nya bejalai enggau lanchar lalu api udah ulih dijaga enggau penuh.

Nadai orang diripotka bisi kaul enggau penusah nya lalu kandang endur nya dientaska likun.

Mensia mayuh dilalau ngambika seruran nemu gaya ke ngelingi sereta lengkas ngeripot sebarang penusah ngenyit ngagai piak bekuasa dikena nentuka atur jampat ulih dipejalaika.

Ngagai sebarang penusah ngenyit, mensia mayuh tau betanya ngagai PKOD APM Pelilih Matu nengah lumur 084-832208. — RBI