MERADONG, 8 April – Pengawa jampat Tim Petugas Indu Opis Polis Pelilih (IPD) Meradong ba “Ops Tapis” mujur ngetan siku lelaki peranak menua nya dipelaba bisi kaul enggau salah guna dadah di kandang menua Bintangor, urung pukul 12.00 tengahari kemari.

Ketuai Polis Pelilih Meradong, DSP Tansli Mering madah, saspek ke beumur 34 taun nya mujur ditan sebedau dibai ngagai IPD Meradong ngambika dipansik enggau silik agi.

“Asil peresa nisih ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif amphetamine enggau methamphetamine,” ku iya.

Nitihku iya, pengawa meresa baru rikod ke udah mega tetemuka saspek nadai ngembuan sebarang rikod penyalah jenayah tauka penyalah bekaul enggau dadah.

Kes tu dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Berebak enggau nya, DSP Tansli nyemetak madahka polis enda belembut enggau sebarang penyalah bekaul enggau dadah lalu deka terus chakah agi bejalaika operasyen dikena nagang pengawa ke bansa nya.

Mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis, nyengkaum betanya ngagai Balai Polis Bintangor nengah lumur 084-693222. -RBI

ASAJAYA, 8 April – Sapit Menteri Pengerai Malaysia, Dato Hajjah Hanifah Hajar Taib bejalaika Penemuai Gawa ngagai Klinik Pengerai (KK) Asajaya, Kota Samarahan ngabas diri empu perengkaguna enggau servis ke bisi disediaka ngagai peranak menua nya.

Penemuai nya sebagi ari Jelajah Rangkaian Kesihatan Borneo (JKB) Siri I ti ngembuan tuju ngenyemakka diri sereta meretika gaya ke bendar servis pengerai di Sarawak.

Maya penemuai nya, Hanifah dulu nerima penerang dikena ngulihka peragam keterubah pasal operasyen, guna enggau pemar ke ditapi perengka guna pengerai di KK Asajaya.

Iya mega bisi ngabas perengka guna enggau servis ke bisi disedia dikena nentuka pengawa meri servis pengerai seruran ba tikas ke pemadu manah, seriris enggau komitmen perintah ngenegapka sistem pengerai menua.

Sapit Menteri mega mai enggau iya seraban ari Opis Menteri Pengerai Malaysia (KKM) enggau Opis Pengerai Nengeri Sarawak (JKNS) dikena nentuka pengawa ti lebih komprehensif sereta betul beratika gaya ke bendar di ‘lapangan’, kelimpah ari ngenegapka kaul entara opis.

Iya nyemetak madahka semua penemu ari penemuai JKB deka diberi perati ke patut dikena ngangkatka servis pengerai, kelebih agi di menua pesisir, dikena nentuka pengelantang pendiau rayat terus dijaga.

Sama bisi datai Sapit Ketuai Direktor Pengerai (Pengerai Mensia Mayuh) enggau Direktor Pengerai Nengeri Sarawak, Dr.Veronica Lugah. -RBI

KUCHING, 8 April — Siku lelaki bebadi nyawa pengudah mutosikal ke ditepan iya aksiden enggau lori semin ba lampu trafik Jalai Pelabuhan, ditu, malam kena Hari Satu.

Ba penusah ke nyadi urung pukul 9.50 malam nya, tudah ke 26 tau dientaska bebadi nyawa ba palan penusah nyadi ketegal balat bakal.

Pengari Palan Operasyen Opis Bomba enggau Penyah Penusah Malaysia (JBPM) Sarawak, madahka seraban raban ari Balai Bomba enggau Penyah Penusah Tabuan Jaya dianjung ngagai endur nya pengudah nerima kangau ngenyit.

“Lebuh datai ba palan nya, raban bomba tetemuka tudah enda ngeleda ba baruh lori semin nya.

“Peresa silik ari pemesai perubat udah nya ngentaska tudah udah lesi,” ku iya ba sebengkah penerang.

Tubuh tudah udah diserah ngagai polis ngambika atur silik agi dipejalaika sereta bejalaika pengawa buntas tasat.

Kelimpah ari mantu mindahka mansa, raban bomba mega bisi bejalaika pengawa meresi teda minyak ba jalai dikena nyaga pengelikun penguna jalai alun ke bukai sebedau operasyen tembu enggau penuh urung pukul 11.10 malam. — RBI

SRI AMAN, 8 April — Kaban Parlimen Sri Aman, YB Dato’ Sri Doris Sophia Brodie nemuai seraya gawa, ngabas kereja ngagai palan projek parit ke udah tembu di Rumah Jampang, Munggo Sawa Ulu, pagi kemari.

Projek parit nya dipejalaika ngena ungkus sepenyampau RM285,000 nengah agih belanja Program Transformasyen Menua Pesisir (RTP) 2025, nyadi siti ari pengawa ti seruran dipejalai dalam ngenegapka perengka guna infrastruktur asas di menua pesisir.

Pengawa bejalaika projek tu ngembuan tuju deka nambahka pemanah sistem parit ke udah bisi, lalu ari nya ulih ngurangka risiko ai ampuh enggau penusah ampuh bah ke tau ngeruga pengidup besehari-sehari peranak menua nya.

Rambau penemuai nya, YB Dato’ Sri Doris Sophia Brodie mega bisi ngabas gaya fizikal projek sereta ninga timbal ari peranak senentang pemanah pengawa bejalaika fasiliti nya.

Iya nyemetak madahka pengawa nyendiaka infrastruktur asas ti bekualiti deka terus dikemerat dikena nentuka pengelantang pendiau rayat seruran dijaga, seriris enggau komitmen perintah meransang pemansang menua pesisir ti inklusif sereta meruan. — RBI

MANCHESTER, 08 April – Harry Maguire udah nyain kontrak baru enggau Manchester United nyentuk bulan Jun 2027, nyengkaum pilih ngelanjarka timpuh setaun agi.

Kenyau nyereta kelab nya ba taun 2019, pemain beretan tengah England nya udah bemain 266 kali lalu mantu tim nya ngangkatka trofi Piala Carabao enggau Piala FA.

Maguire nerangka peluang ngarika Manchester United nyadi basa ke pemadu tinggi, kelimpah ari mantaika temegah ati enggau sida sebilik ninting hari.

Iya mega mantaika pengagit ati deka neruska pejalai iya enggau kelab nya enda kurang ari lapan musin sereta terus bemain ba mua bala peminat ke taluk.

Nitih ku iya, tim ke diatu ngembuan potensial enggau juluk ati ke besai deka besemekih ba gelar champion besai, seraya ngemeratka pengarap iya ke alai maya pemadu manah tim nya bedau datai.

Berebak enggau nya, Direktor Main Bol kelab nya, Jason Wilcox, muji Maguire nyadi pemain ti ngembuan mentaliti enggau semengat pengetan ti tinggi, kelimpah ari siku profesyenal ke bendar ti mai peneleba enggau nyadi ketuai ti beguna ngagai skuad biak Manchester United.

Iya nyemetak madahka semua orang ba kelab nya nyengkaum Maguire bebendar deka nentuka pemujur ke konsisten sereta terus ungkup tim nya. -RBI

SRI AMAN, 8 April — Jematan pemanjai 51 meter ke digaga nengah agih belanja Program Transformasyen Menua Pesisir (RTP) 2025 udah dipenyadi Kaban Parlimen Sri Aman, YB Dato’ Sri Doris Sophia Brodie di Kampung Munggo Sawa, kemari.

Projek ke beungkus RM220,000 ke udah tembu penuh ujung taun nyin tadi, diatu meri penguntung ke besai ngagai peranak menua nya, kelebih agi ba pengawa ngemudahka pemindah ninting hari sereta nambahka tikas pengelikun maya meraka sungai, kelebih agi maya musin ampuh bah.

Dalam jaku dipansutka iya, iya nyemetak madahka pengawa nyendiaka infrastruktur pemun baka jematan entara pekara ti dikemerat dalam nentuka pengelantang pendiau komuniti menua pesisir terus ditegapka.

“Pengawa ngaga jematan tu ukai semina ngemudahka akses ungkup peranak, tang mega nyadi penyungkak ngangkatka kualiti pengidup komuniti lokal,” ku iya.

Tekala nya pengudah pengawa bejadika pengerami nya, iya mega bisi ngelimpangka awak begulai sereta ngaul peranak dalam gaya ti lantang ba Rumah Panjai Dennis Unup, Munggo Sawa Ili.

Pengerami nya mega digulu 19 iku Tuai Rumah ari kandang menua Engkeranji, Keranggas, Semulong, Ipoh enggau Muding.

Sama bisi datai Penghulu Angin ari Keranggas, SAO Lingga Tuan James, Dr. Victor Luna enggau sekeda kaban kunsil kandang menua.

Inisiatif tu mandangka komitmen perintah ti terus ngenegapka pemansang menua pesisir, setipak enggau aspirasyen Maju Makmur Sarawak. — RBI

KANOWIT, 7 April – Siku lelaki ke diripotka lenyau kenyau ari kemari ditemu sida sebilik enda benyawa urung pukul 3.28 lemai ba jalai kebun ke bebida ari kandang kebun iya, sehari tu tadi.

Pengari Palan Operasyen Bomba enggau Penyah Penusah (PGO) Sarawak madah, sida nerima kangau ngenyit bekaul enggau penusah nya urung pukul 11.27 pagi sebedau tim ari Balai Bomba enggau Penyah Penusah (BBP) Kanowit dianjung ngagai siti endur ke bepalan urung 45 kilometer ari balai nya.

“Tudah dikelala enggau nama Alam anak Entri, 51, diripotka pansut ari rumah iya nuju ngagai kebun belakang rumah panjai urung dua kilometer penyauh kena pagi 6 April tu tadi, tang nadai pulai baru,” ku penerang bomba.

Nitihku penerang nya mega, pengawa ngiga keterubah dipejalaika peranak rumah panjai pengudah dua iku ukui enggi iya pulai ke rumah lalu tubuh iya nadai enggau urung pukul 11.00 pagi hari ke sama.

Raban ngiga enggau nyelamat (SAR) ti mungkur raban bomba, polis, Raban Penyaga Orang Periman Malaysia (APM) enggau peranak rumah panjai udah nya dibagi ngagai tiga raban bejalaika operasyen ngiga ba kandang kebun buah enggau radius urung empat kilometer.

Pengawa meresa keterubah tetemuka iya nadai agi benyawa lebuh ditemu ba endur nya.

Ku iya, tubuh tudah enda ditegu nganti penerang rasmi ari staf Klinik Pengerai Nanga Tada nitihka atur polis.

Ku iya, urung pukul 5.00 lemai, klinik ngentaska iya udah midang ba palan penusah ke nyadi sebedau tubuh iya diserah ngagai polis ngambika atur nangkanka nya dipejalaika. -RBI

KUCHING, 7 April — Aum Keterubah Penggal Kelima Aum Kunsil Nengeri (DUN) Sarawak deka diatur pengelama lapan hari berengkah 11 ngagai 20 Mei tu.

Nitihka ripot TVS, notis rasmi ti dipansutka Sekretari Kunsil Nengeri Sarawak, Nur Azhar Bujang, madahka sesi nya deka diatur ba Begunan Kunsil Nengeri Sarawak baka ti udah ditetapka.

Nitihka Perintah Tetap DUN, tetiap Kaban Kunsil Nengeri (ADUN) dikemendar nganjung nyentuk 10 iti tanya ngambika disaut ngena chara lisan sepemanjai aum nya.

Berebak enggau nya, ripot ke sama mega bisi nyebut haribulan kepenudi nganjung tanya ngagai Sekretari DUN ditetapka kena tauka sebedau 27 April, maya jam opis.

Sesi tu dikearapka nyadi pelasar ke beguna endur berandauka bemacham isu ti beguna ungkup rayat sereta mega agenda pemansang nengeri Sarawak. — RBI

KUCHING, 7 April — Opis Imigresen Malaysia (JIM) Sarawak udah ngetanka 31 iku peranak menua luar dalam operasyen neritka adat bersepadu ti dipejalaika pengelama dua hari berengkah 6 ngagai 7 April 2026 ngelingi mengeri Kuching enggau kandang menua Sebuyau.

Operasyen ti mungkur 23 iku pemesai imigresen nya ngemeratka pengawa meresa sekeda premis pemakai ngelingi mengeri Kuching.

Asil ari pengawa meresa nya, bisi 21 iku peranak menua luar ditan ketegal dipelabaka ngelanggar atur undang-undang imigresen.

Maya malam hari, operasyen nya diteruska enggau pengawa nyerungkai palan endur pekereja diau ba sebuah kebun sawit peribit di kandang menua Sebuyau.

Pengawa nyerungkai nya mujur nangkap tambah orang ari menua luar, lalu ngujungka penyampau semua ke ditangkap manggai 31 iku individu.

Semua sida ke ditan nya dibai ngagai Depot Tahanan Imigresen ngambika dipansik enggau silik agi sereta dipejalaika nitihka atur undang-undang ke udah bisi.

Opis Imigresen Malaysia Sarawak nandu baru komitmen sida ti terus chakah agi bejalaika operasyen neritka atur dikena ngelaban pengawa ngelanggar undang-undang imigresen.

Berebak enggau nya, pengaji enggau individu dikeingat ngambika seruran nitihka atur ke udah ditetapka dikena nyeliahka atur ke terit diambi. — RBI

KUCHING, 7 April – Palan buding indu misi ke suba di Jalai Crookshank diatu udah dikemansangka baru nyadi Anjung Kasih II, palan endur diau khas ungkup pesakit kurang penatai pemisi enggau ruang bilik ti deka berubat ba Sepital Besai Sarawak (HUS).

Sapit Menteri Pengerai Malaysia, Dato Hajjah Hanifah Hajar Taib madah pekara nya rambau nemuai ngagai palan projek ti bepalan betunga mua enggau HUS, ditu.

Rambau penemuai nya, iya mega bisi nerima penerang silik bekaul enggau gaya kediatu sereta pejalai pengawa ngaga palan nya.

Nitihku iya, Anjung Kasih II ditumbuhka dikena mantu pesakit enggau ruang bilik kelebih agi ari luar pelilih Kuching bulih endur diau ke lantang sepemanjai timpuh berubat.

Pengawa ngaga projek tu nyadi inisiatif Opis Menteri Pemansang Orang Indu, Ruang Bilik enggau Komuniti (KPWKM) nengah ejensi iya, Yayasan Kebajikan Kebangsaan (YKN), dalam pengawa ngerembaika akses ngagai sukung pengelantang enggau pengerai ngagai orang ti begunaka bantu.

Iya nerangka pengawa bejalaika projek nya siti singkang ke besai dalam ngelempungka tating pesakit enggau ruang bilik, kelimpah nentuka sida bisi akses ke manah agi ngagai servis pengerai ke bekualiti ba HUS. – RBI