PAKAN, 28 Mac – Rumah Panjai Kanyan di Pakan ngembuan potensial besai dikemansangka nyadi palan dagang temuai bepelasarka komuniti ti ulih nyungkak penumbuh ekonomi ti meruan.

Kaban Kunsil Nengeri (ADUN) Pakan, Tan Sri William Mawan Ikom madah, ngemeratka pemansang ekonomi ti meruan nengah sektor dagang temuai, enggau enda ngelengka pengawa ngintu budaya enggau pesaka komuniti, dipeda beguna, kelebih agi di menua pesisir.

Ku iya nerang, pemujur program ‘rumah temuai’ di Rumah Sibar, Lubok Lemba, Ulu Sarikei nyata ngayanka dagang temuai bepelasarka komuniti ngembuan potensial ke besai ba pengawa mansutka penatai pemisi ke meruan.

“Opis menteri meda sektor dagang temuai nyadi pun penemu baru ungkup kandang menua pesisir, ti ulih meri penguntung ngagai rampa menua sereta meri nilai rama enggau budaya.

“Adat, gaya pengidup, enggau penyelai rumah panjai kitai ulih nyadi pematak dikena narit temuai.

“Lebuh temuai datai, sida ulih ngasaika pengidup komuniti lokal diau ba rumah panjai ,” ku iya ke mega Penyanding Penemu ba Opis Premier Sarawak ( Industri Pemakai, Komoditi enggau Pemansang Kandang Menua).

Iya madah munyi nya lebuh bejaku ba pengerami bejadika Projek Program Transformasyen Menua Pesisir (RTP) ba Rumah Panjai Kanyan, Nyalak Ladong, Pakan.

Nya alai, chara tu nyata ngayanka sektor dagang temuai ulih dikena nyadi pun penatai ekonomi ti meruan enti diatur enggau manah sereta ngaul penyereta komuniti ti chakah.

Ku iya, Rumah Panjai Kanyan ukai semina palan pengentap pendiau aja, tang nyadi kelai enggau pengidup komuniti ke nyelai.

Nya alai, pengeransing meri kelala konsep rumah temuai dipeda nyadi singkang strategik dikena narit temuai, ngasaika pengidup ba rumah panjai seraya bekunsika budaya, adat enggau gaya pengidup enggau orang luar, seraya dalam timpuh ke sama ulih mansutka penatai pemisi ngagai komuniti. – RBI

SPAOH, 28 Mac – Siku orang tuai bakal pengudah mutosikal ke ditepan iya tepawah ke tisi jalai ba penusah akisden kediri besemak simpang Kampung Serembang, tengahari tu tadi.

Penusah nya diperatika siku orang periman ke benung nengah endur nya, lebuh iya pulai ke rumah lalu tekala nya ngaga betelefon ngagai Palan Kawalan Operasyen Pelilih APM Spaoh minta bantu.

Empat iku kaban Tim Bravo LLP ti betuaika Sjn (PA) Hasla Bin Deli berumban ngelawa palan penusah nyadi pengudah nerima penerang bekaul enggau penusah nya.

Lebuh datai ba palan nya, raban tetemuka tudaj napi bakal nyengkaum bakal ba mulut baruh, bakal mit sereta madahka bisi pedis ba patung kanan.

Peresa Rapid Body Survey (RBS) enggau perubat keterubah tekala nya diberi ba palan penusah nyadi.

Tudah orang tuai udah nya dianjung ngagai Klinik Pengerai Spaoh ngambika diperubat enggau silik agi.

Mensia mayuh diingat ngambika lengkas betanya ngagai lumur penusah ngenyit 083-473006 tauka 999 nyema bisi sebarang penusah ngenyit nyadi. -RBI

BINTULU, 28 Mac — Pengerami bejadika Jematan Gantung Pengkalan Selangan udah mujur tembu di Rumah Sagoh Anak Muyan, Nyalau lalu nyadika sebengkah agi pemujur beguna dalam pengawa ngenegapka pemansang infrastruktur menua pesisir ba sitak nya.

Projek ngaga jematan gantung ti beungkus lebih RM1.4 juta nya dipelanja nengah agih belanja Lembaga Wang Turu Konsesi Hutan.

Jematan nya meraka Sungai Nyalau lalu nyadi inisiatif strategik dalam ngenegapka rentayan penyambung jalai ungkup komuniti menua nya.

Nitihku Sapit Menteri Infrastruktur enggau Pemansang Palan Penyangkai Kapal Sarawak Datuk Majang Renggi ke mega Kaban Kunsil Nengeri (ADUN) Samalaju, pengawa ngaga jematan tu mai bemacham penguntung ngagai peranak, kelebih agi komuniti di Rumah Sagoh.

“Entara batang penguntung iya nya ngemudahka akses peranak ninting hari ngagai kebun, sekula enggau perengka guna asas.

“Kelimpah ari nya, iya nambahka tikas pengelikun nengah chara ngurangka bepanggai ba perau, kelebih agi maya musin ujan sereta tikas ai sungai niki,” ku iya.

Iya mega nambah, perengkaguna nya ulih ngelimatka timpuh pejalai, ngemudahka pejalai ekonomi komuniti sereta nyadi penyungkak ngagai pemansang sosio-ekonomi sereta ngangkatka kualiti pengidup peranak menua pesisir.

Berebak enggau nya, Datuk Majang Renggi ngarapka perengka guna jematan nya deka terus dikena penuh peranak menua nya sereta nyadi pemangkin ngagai pemansang ti meruan agi ba kandang menua Nyalau, Bintulu.

Pengerami bejadika pengawa nya bela digulu Pemangku Pemesai Pelilih Menua Bintulu, Puan Suzana Indiat; Injinir Opis Kereja Raya Bagi Menua Bintulu, Ir. Lau Sie Digantung; Penghulu Man Imbak; Penghulu Sulang Arah; Penghulu Raini kelimpah bala ketuai raban bansa ari kandang menua Suai enggau Bintulu-Samalaju. — RBI

KUCHING, 28 Mac – Aum Besai Ninting Taun (AGM) Ke-57 Institusyen Injinir Malaysia (IEM) Pampang Sarawak ngemataka sepenemu ari semua kaban ngetanka rintai ketuai ungkup sesi 2026/2027.

Sama bisi dibantaika iya nya pemujur enggau aktiviti maya sesi ke udah, kelimpah ari perambu program enggau inisiatif ungkup sesi ti deka datai.

Direktor Kereja Raya Sarawak, Datu Dr. Cassidy anak Morris ti mega Sapit Presiden 1, bisi ngulu aum ti diatur sehari tu.

Pengerami nya mega digulu sekeda pemesai kanan injinir ari Opis Kereja Raya (JKR) Sarawak ke mega kaban IEM, kelai sukung tegap opis nya ngagai pangku pengawa enggau pemeri IEM Sarawak dalam negika profesyen injinir.

Penyereta ti chakah JKR Sarawak dalam pelasar profesyenal baka IEM mandangka komitmen opis ti terus ngenegapka rentayan kerejasama strategik, kelimpah ari nyukung pemansang enggau penyulut profesyenal ba raban injinir di Sarawak.

Kerejasama rat entara JKR Sarawak enggau IEM Sarawak dikearapka terus ditegapka dalam pengawa begulai meransang pemansang infrastruktur ti meruan, inovatif sereta meri empas tinggi ungkup rayat. – RBI

Sarikei, 28 Mac — Raban Penyaga Pengelikun Mensia Mayuh Malaysia (APM) Pelilih Sarikei mujur nangkap siku baya pemanjai urung 6 kaki dalam operasyen ngenyit di Lorong 6, Taman Susur Jambu, lemai tu tadi.

Nitihka penerang rasmi, Palan Kawalan Operasyen (PKOD) Pelilih Sarikei nerima kangau ngenyit urung pukul 5.13 lemai ari mensia mayuh ti tepedaka siku baya dalam parit besemak enggau palan pengentap pendiau iya.

Ketegal irau ke pengelikun diri enggau sida sebilik, orang ke ngaga sebana nya terus ngaga kaul enggau APM ngambika dipejalaika operasyen enggau lengkas.

Operasyen nangkap jelu siga ti tau mai penusah tu dipejalaika enggau bejimat ngena teknik ‘snaring’ dikena nentuka pengelikun semua piak.

Buaya nya mujur ditangkap sereta dikuasa penuh enggau nadai sebarang penusah ke enda manah nyadi.

Operasyen nya tembu urung pukul 6.10 lemai sebedau tim nya mulaika diri ngagai PKOD Sarikei mai jelu nya.

Dipelabaka baya nya diatu diengkah sementara ba PKOD Sarikei seraya nganti atur bukai ari Sarawak Forestry Corporation (SFC) ungkup proses mindah kin kitu.

Mensia mayuh dilalau ngambika seruran bejejaga sereta lengkas ngeripot ngagai piak bekuasa nyema bisi tepedaka jelu siga ti tau mai penusah ba kandang endur sida diau. — RBI

KUALA LUMPUR, 28 Mac – Kaban Parlimen Muar, Syed Saddiq Syed Abdul Rahman, 34 taun, sehari tu udah betunang rasmi enggau pelakun sereta penanyi, Bella Astillah, 32 taun, ba sebengkah pengerami eksklusif ke digulu sida sebilik enggau bala bakih besemak.

Pengerami nya diatur enggau gaya richah enggau temuai ngena baju kuning lembut, seraya Bella dipeda chukup bajik ngena baju kurung moden biru ‘pastel’ penuh enggau jumpang ba pala iya.

Kenang besejarah nya lebuh indai Syed Saddiq, Sharifah Mahani Syed Abdul Aziz, ngengkahka tinchin ba jari manis Bella nyadika kelai pengawa betunang.

Dalam jaku iya, Syed Saddiq madahka diri lelaki ke pemadu betuah laban bisi peluang ngelala sapa Bella ke bendar sereta siru nyengkaum pengerindu iya ngagai dua iku anak iya, Ayden enggau Ara.

Iya mega mantaika pengarap diri kedua-dua anak Bella ulih nerima penatai iya ba ruang bilik sida.

Pengerami nya mega dirami enggau penatai bala bakih selebriti baka Nabil Ahmad enggau Zira Ayub, Nora Danish enggau Nur Fazura, kelimpah ari pengawa besilih dulang pemeri entara kededua piak.

Sepenyampau lima iti dulang pemeri ari piak lelaki nya berambaika jaku ‘the future’, lalu piak Bella nimbal enggau tujuh iti dulang berambaika jaku ‘Gunung Kinabalu’, nambahka pemanah pengerami betunang.

SEMATAN, 28 Mac – Tradisyen nemuai ukai semina adat aja, tang nyadi jematan beguna ti nyambung bala ketuai enggau rayat ba renggat pun baruh, pia ku Kaban Kunsil Nengeri (ADUN) N3 Tanjong Datu, Azizul Annuar Pehin Sri Haji Adenan.

Iya madah munyi nya lebuh ngatur Pengawa Ngabang Hari Raya Aidilfitri di Kampung Tanah Hitam 1, Sematan, sehari tu tadi.

Dalam gaya pengerami ba bulan Syawal, iya ngelimpangka diri nemuai ngagai palan pengentap pendiau Penghulu Awang Helmi Awang Panji enggau rumah menantu iya sepiak, Kaunsilor Mohamad Naieem Samsudin.

Penemuai nya ngembuan tuju deka besilih penemu enggau bala ketuai renggat baruh sereta komuniti lokal seraya ngerapitka kaul.

Kelimpah ari ngasaika pemakai Hari Raya, pengawa ngabang nya mega nyadi pelasar lantang endur besilih penemu senentang isu pengelantang pendiau enggau pemansang komuniti di kandang menua Sematan.

Sama bisi datai bala ketuai komuniti Pelilih Lundu enggau ketuai Parti Pesaka Bumiputera Bersatu (PBB) enggau Parti Sa’ati Rayat Sarawak, lalu enggau nya mandangka pengerat entara pengari rayat enggau struktur ketuai ba sitak N3 Tanjong Datu.

Pengerami nya tembu enggau sesi begambar pengingat begulai enggau bala temuai. – RBI

KUCHING, 28 Mac – Balai Dagang enggau Industri Dayak (DCCI) ngansak perintah nengeri ngungkupka sebagi ari penguntung ari projek bedagangka karbon ngagai komuniti Dayak ke diau ba kandang endur ke kena bungkur palan nya.

Presiden iya, Dato Allan Keripin Nangkai madah, resolusyen nya udah dikemendar enggau sepenemu ba Aum Besai Ninting Taun (AGM) DCCI Ke-24 ke diatur ba Menara DCCI, sehari tu tadi.

Nitihku iya, atur nya dikena nentuka komuniti Dayak ke diau besemak enggau kandang kampung mega ngasaika pengelantang ekonomi ari pemansang sektor dagang karbon di nengeri tu.

“Dalam pekara tu, kami nyukung penuh chara proaktif perintah nengeri nentuka aktiviti dagang karbon enggau pengawa nangkap, nguna enggau nyimpan karbon (CCUS) di Sarawak dipejalaika sereta diatur perintah nengeri,” ku iya.

Iya madah munyi nya lebuh ti ngenang jaku dikenataika Premier Sarawak, Datuk Patinggi Tan Sri Abang Johari Tun Openg ti meransang komuniti Dayak nguna pengeraja asal enggau meruan nyengkaum nyerungkai dagang karbon nyadi pun penatai ekonomi baru.

Ku iya nambah, DCCI mega merambu numbuhka sebuah kaunsil ti ngaul balai dagang bansa asal baka DCCI enggau Balai Dagang enggau Industri Orang Ulu (OUCCI) sereta mega pengari komuniti Dayak dikena nentuka pengawa magi asil dipejalaika enggau lurus sereta terang.

Berebak enggau nya, iya nyemetak madahka Sarawak ngembuan pengelebih ari sukut kuasa konstitusyen ba tanah enggau kampung, lalu ari nya ulih ngemuntangka nengeri tu ngemansangka langkar ekonomi gadung kediri empu nyengkaum bejalaika levi karbon.

“DCCI mega deka nulis surat ngagai Premier Sarawak minta jaku lalau enggau runding iya nuju ngamatka perambu tu,” ku iya nambah.

Berebak enggau nya, nadai pengawa bepilih diatur ba AGM tu enggau Allan mengkang ngetanka pangku pengawa nyadi Presiden DCCI ungkup timpuh 2026 ngagai 2029.

Sama ngetanka pangku pengawa iya nya Kilat Beriak nyadi Sapit Presiden, dibantu lima iku Sapit Presiden iya nya Dato Ir Winsel Ahtos, Dato Ir Janang Bunsu, Peru Balan Ding, Dr Florence Christy enggau Billy Usit. Libat Langup mengkang nyadi Sekretari seraya Ambrose Jarat nyadi Tukang Wang.

Sepuluh iku Kaban Supreme (AMT) mega bisi dibantai iya nya Cooplay Ngipa, Bujal Jantai, Ir Peter Usang, Paul Raja, Christopher Bundan Ngila, Dr Kennedy Paing, Darren Douglas Jerukan, Stephen Mau, Livan Lah enggau Sandra Usup, seraya enam iku agi deka dipadu ba aum ke deka datai. – RBI

JULAU, 28 Mac – Program pejalai ngabas rayat nyadi pelasar ke pemadu manah endur ninga penanggul rayat enggau mata diri empu kelimpah ari besilih penemu enggau bekunsika penerang terus enggau peranak menua nya, pia ku Kaban Kunsil Nengeri (ADUN) Meluan, Dato Rolland Duat anak Jubin.

Iya madah munyi nya lebuh ngulu Aum Ketuai Begulai Enggau Rayat di kandang menua Sepitoh enggau Sungai Strass ti mungkur pengawa nemuai ngagai tiga buah rumah panjai, kemari.

Penemuai nya berengkah di Rh Edward Brayun di Sepitoh Baruh sebedau diteruska ngagai Rh Jamal udah nya ngagai Rh Philip Gamu di Sungai Strass, enggau penatai iya disambut enggau manah peranak menua nya.

Rambau penemuai nya, Datuk Rolland mega bejadika projek Komiti Pemansang enggau Pengelikun Genturung Pendiau (JKKK) Ng Sepitoh Baruh ti digaga ngena agih belanja Program Transformasyen Menua Pesisir (RTP), lalu enggau nya mandangka komitmen perintah dalam meri kuasa ngagai pemansang menua pesisir.

Iya mega ngarapka peranak di kandang menua Sepitoh, Serau enggau Sungai Strass ulih nguna peluang enggau perengkaguna ti disediaka perintah enggau penuh, kelebih agi dalam ekonomi digital seriris enggau aspirasyen Strategi Pemansang Pengudah COVID-19 2030 (PCDS 2030).

Berebak enggau nya, iya minta bala ketuai komuniti enggau ketuai raban bansa (KMKK) seruran ngaga kaul rat enggau ejensi perintah ngulihka penerang pemadu baru bekaul enggau polisi, program enggau inisiatif pemansang, lalu enggau nya ngemudahka pengawa nyadung timbal rayat enggau lebih engkeman sereta nembam agi.

Lebuh nyimpul jaku iya, Datuk Rolland ngemeratka pemesai guna penyerakup, pengelantang sereta bebasaka pangan diri sereta bekerejasama dalam pengidup ninting hari ungkup pengelantang begulai.

Sama bisi datai iya nya Sekretari Politik Premier Sarawak, Paulus Dandee Banyang enggau Brian Fung, Chairman PRS Meluan Belayong Jampong, pengari ejensi perintah, NGO kandang menua sereta mega KMKK sereta peranak di kandang menua nya. – RBI

SPAOH, 28 Mac — Sapit Premier Sarawak, Datuk Amar Douglas Uggah Embas minta komuniti Spaoh terus meri sukung ke tegap ngagai perintah Gabungan Parti Sarawak (GPS) ari baruh iring Premier Sarawak, Datuk Patinggi Tan Sri Abang Johari Tun Openg, dalam pengawa sida ngetanka hak nengeri tu.

Nitihka penerang ba Facebook DUN Bukit Saban, Uggah nyemetak madahka sukung rayat ti seruran diberi beguna amat dikena nentuka agenda pemansang Sarawak enggau peminta hak nengeri tu ulih diteruska ungkup pemaik rayat.

Iya madah munyi nya lebuh bejaku ba Pengerami Nerima Pengabang Spaoh Aidilfitri ke diatur ditu, sehari tu tadi.

Ba pengawa ke sama, Uggah mega ngenataika pengaga ati iya ngagai Perintah Besai ke pemutus ngetanka subsidi diesel di Sarawak ba penyampau RM2.15 seliter, ti ku iya ulih ngelempungka tating pengidup rayat kelebih agi peranak menua pesisir.

Iya mega ngelalau mensia mayuh ngambika bejejaga sepemanjai musin kemarau dikena nyeliahka penusah angus ti tau ngeruga nyawa enggau reta tengkira.

Nambahka nya, iya madahka Ejensi Pemansang Bagi Menua Betong (BDDA) udah ngungkupka belanja sepenyampau RM3 juta dikena mantu raban ke patut ngemanahka rumah sida di Kampung Spaoh, setipak enggau komitmen perintah ngangkatka pengelantang pendiau rayat nengah pengawa nyendiaka rumah ke lebih lantang sereta likun.

Ba atur pengawa nya mega, Uggah bisi nyuaka pemeri ngagai komuniti ngelingi ti ngaul Komiti Pemansang enggau Pengelikun Genturung Pendiau (JKKK), masjid enggau surau ngelingi Spaoh.

Sama bisi datai Kaban Parlimen Betong, Dato Dr. Richard Rapu begulai enggau bini iya Datin Lucy Mary Johnson, Datin Amar Dato Doreen Mayang, Sapit Ketuai Pampang PBB Bukit Saban Abg Madehi Abg Abdul Latip, Sekretari Politik Ngagai Premier Sarawak Puan Roseline Mapong Sabai, Pemesai Pelilih Betong Laga Kueh, Injinir Bagi Menua Betong Jason Ng Boon, Ketuai Opis Tanah enggau Survei Betong TPr Moris Nayup, Sekretari Kaunsil Pelilih Betong Lister Clement Guwie enggau ketuai raban bansa ngelingi Spaoh. — RBI