KUCHING, 2 April — Opis Betanam Betupi Sarawak majak chakah agi ngemodenka sektor betanam betupi nengah pengawa ngatur Agrofest renggat pelilih menua enggau bejalaika sistem e-Tani nyadi inisiatif dikena ngerembaika guna teknologi baru ba raban komuniti betanam betupi.

Pekara tu dipadahka Direktor Opis Betanam Betupi Sarawak, Mr. Dominic Anak Chunggat, dalam sesi interbiu enggau Radio Televisyen Malaysia (RTM) nengah segmen Randau Pemansang ba Wai FM Iban ti udah mujur diatur.

Nitihku iya, Agrofest ke diatur ba renggat pelilih menua nyadi pelasar strategik dikena ngerapitka agi orang bumai enggau inovasyen sereta teknologi pemadu baru dalam bidang betanam betupi, kelimpah ari muka ruang endur bekunsika penemu, nengkebang sereta ngelala ngagai peluang ekonomi dalam sektor agro.

“Pengawa bejalaika sistem e-Tani tu siti singkang ke mua ba pengawa digitalisasyen sektor betanam betupi ti ngemendarka pekara orang bumai baka ngerejista, minta bantu enggau akses ngagai penerang dipejalaika enggau lebih efisyen, terang sereta sistematik,” ku iya.

Iya mega nyemetak madahka inisiatif tu seriris enggau juluk perintah Sarawak ti deka ngenegapka sektor betanam betupi nyadi pemansut besai pemansang ekonomi menua pesisir ti meruan sereta kompetitif.

Berebak enggau nya, sesi bekunsi tu dikearap ulih nambahka penyedar mensia mayuh sereta matak mayuh agi orang kelebih agi raban nembiak ngemeranka pengawa dalam sektor betanam betupi ke diatu majak ngerembai setipak enggau pemansang teknologi digital.

Sama bisi datai Kepala Penulung Direktor Bagi Pemansang, Encik Freddy Paul Giang; Pengatur Bagi Iban Wai FM, Cik Monica Midi; Penyampai radio segmen Randau Pemansang, Encik Jimbu Giman; enggau staf RTM Sarawak ti bisi enggau ngemujurka sesi interbiu nya. — RBI

PUTRAJAYA, 2 April – Opis Menteri Pengerai Malaysia (KKM) nagang pengawa nyual dua bengkah produk kosmetik iya nya Glowing Night Treatment enggau Glowing Herbal Treatment pengudah ditemu ngundan utai ti tau ngeruga pengerai penguna.

Nengah penerang berita sehari tu, KKM madahka kedua-dua produk nya ditemu ngundan rachun ti udah ditetapka baka merkuri, hidrokinon, tretinoin enggau betamethasone 17-valerate ti enda dikemendarka dalam produk kosmetik.

Berindik ari nya, notifikasyen kosmetik ke bisi kaul udah dikinsil Direktor Servis Farmasi, lalu enggau nya ngasuh produk nya enda entas agi dijual ba makit Malaysia.

Nitihka KKM, pengawa ngena merkuri dalam kosmetik ditagang laban utai nya ulih neresap ngagai tubuh lalu tau ngerusak buah pinggang enggau sistem saraf.

Ke bendar iya mega, bisi potensial ngachau pemansang untak nembiak mit nyengkaum anak mit ke bedau ada kelimpah ari penanggul ba kulit.

KKM mega nerangka baka betamethasone 17-valerate, hydroquinone enggau tretinoin iya nya ubat ke enda tau enda direjista lalu semina tau dikena ari baruh kemata profesyenal pengerai.

Enti enda ditagang tau ngujungka empas ngagai baka kulit mua nipis, semua, ringat, ubah pigmentasyen sereta risiko nyerap utai ke dalam sistem darah nambah.

Berindik ari nya, orang ke bejual enggau ‘pengedar’ diasuh ngetu bejual enggau lengkas laban nya ngelanggar Atur Kawalan Dadah enggau Kosmetik 1984.

Individu ke ditemu salah ulih diukum mata duit nyentuk RM25,000 tauka dijil nyentuk tiga taun tauka kedua-dua nya ungkup penyalah keterubah, lalu penyalah udah nya ulih diukum nyentuk RM50,000 tauka dijil nyentuk lima taun tauka kededua nya.

Ungkup kompeni, ukum mata duit nyentuk RM50,000 ungkup penyalah keterubah lalu niki ngagai RM100,000 ungkup penyalah nangkanka nya.

SAMARAHAN, 2 April — Raban Pengelikun Mensia Mayuh Malaysia (APM) Pelilih Samarahan udah nerima kangau ngenyit ari Sepital Besai Sarawak bekaul enggau penusah aksiden ba jalai alun ti nyadi ba Jalai Bukit Berangan, Kota Samarahan, sehari tu tadi.

Nitihka penerang, tim kaban Skuad Bravo udah digerakka ngagai palan penusah nyadi lebuh nerima penerang.

Lebuh datai ba endur nya, raban nya nemu penusah aksiden nya ngaul dua buah entukar ke belantak.

Peresa tumu tetemuka dua iku ke kena penusah bisi kaul enggau penusah aksiden nya.

Siku indu diripotka pedis ba dada enggau perut, lalu siku agi lelaki bisi sekeda bakal nyengkaum bakal ba mua, jari enggau kaki.

Tim APM meri perubat keterubah ba palan nya sebedau mai kededua seduai ngagai Pusat Jantung, Sepital Besai Sarawak ngambika diperubat enggau silik agi.

Lebuh datai ba sepital, tudah udah diserah ngagai piak perubat ngambika ulih dipejalaika enggau diperubat.

Mensia mayuh dilalau ngambika seruran bejejimat maya deriba sereta ngasika atur jalai alun dikena nyeliahka penusah ke enda dikedekaka nyadi.

Ba penusah ngenyit, mensia mayuh tau betanya ngagai APM Samarahan nengah lumur 082-672999 tauka talipaun penusah ngenyit 999. — RBI

KOTA SAMARAHAN, 2 April – Berindik ari penerang enggau sebana mensia mayuh, tim Bagi Pansik enggau Penerit Adat Trafik (BSPTD) IPD Kota Samarahan bejalaika pengawa pemansik sebedau mujur ngelala identiti siku lelaki ke bisi kaul enggau akta nepan mutosikal ke tau mai penusah.

Saspek siku lelaki peranak menua tu beumur 28 taun datai ngagai Indu Opis Polis Pelilih (IPD) Kota Samarahan kemari sebedau ditan dikena mantu tasat ke silik agi.

Kes tu berengkah bulih perati pengudah viral ba media rama kena 29 Mac 2026, lebuh rekoding video ‘diupload’ ngagai Facebook ti ngayanka lelaki ke bisi kaul nepan mutosikal Yamaha LC135 nunda gaya ‘Superman’ ba Jalai Kota Samarahan–Sadong Jaya.

Sapit Ketuai Polis Pelilih Kota Samarahan, Deputi Superintendan Barry William madahka, pengawa berisiko tinggi nya ukai semina ngeruga pengelikun orang ke deriba nya, tang mega ngeruga penguna jalai alun bukai.

Nitihku iya, saspek diatu benung dipansik ari baruh Seksyen 42(1) Akta Pengangkutan Jalan 1987 ketegal deriba enda beradat sereta ngeruga pengelikun orang bukai.

Iya nyemetak madahka polis enda deka belembut ba sebarang pengawa ngelanggar undang-undang jalai alun, kelebih agi ti bekaul enggau pengawa ti tau mai penusah ti tau ngeruga nyawa penguna bukai. – RBI

SARATOK, 2 April — Raban Pengelikun Mensia Mayuh Malaysia (APM) begulai enggau Opis Bomba enggau Penyah Penusah Malaysia (JBPM) chakah bejalaika operasyen madamka penusah angus tanah kerapa ke nyadi ba Simpang 4 Skim C, Kampung Kupang kenyau ari ensanus.

Nitihka penerang ari APM Pelilih Saratok, sepenyampau enam iku raban udah dianjung ngagai endur nya mantu operasyen madamka api enggau kerejasama JBPM Saratok sereta peranak menua nya.

Penusah angus nya mungkur tanah gambut enggau kandang endur semak ke mar dijaga, enggau api diripotka majak nyerarai ngagai kandang kampung ke besemak ketegal ribut ke balat.

Beberapa endur dikelala agi balat angus sereta mansutka asap tebal ti tau ngeruga kualiti angin ba kandang endur ke ngelingi.

Operasyen madamka api nya ditangguh lemai ketegal faktor pengelikun enggau gaya hari, lalu deka ditampung baru ba hari siti dikena nentuka api ulih dijaga enggau penuh.

Naka ke diatu, nadai penusah bebadi nyawa diripotka lalu semua raban ke bisi kaul enggau penusah nya selamat.

Berindik enggau nya, mensia mayuh dilalau ngambika enda ngaul diri enggau pengawa betunu chara tebuka sereta seruran bejejaga enggau gaya rampa menua dikena nyeliahka penusah ke enda dikedekaka nyadi.

Enti bisi penusah ngenyit nyadi, mensia mayuh tau betanya ngagai APM Saratok ba lumur 083-436094 tauka talipaun penusah ngenyit 999 minta bantu lengkas. — RBI

MIRI, 2 April — Polis udah mujur nangkap siku lelaki menua tu ke dipelabaka bisi kaul enggau kes enchuri mutosikal di pelilih menua tu, berindik ari pengawa ke jampat berindik ari ripot ke diterima kena 30 Mac tu tadi.

Nitihka penerang polis, ripot motosikal nya lenyau diterima urung pukul 6.00 pagi ba kandang Komersial Mosjaya, Miri.

Berindik ari penerang enggau pemansik, tim kaban ari Pampang Nagang Penyalah Balai Polis Sentral Miri betuaika Ketuai Balai Polis Sentral, ASP Goldy Anak Jangan, bejalaika operasyen lalu mujur nangkap saspek kena kemari urung pukul 4.30 lemai ba Jalai Garnia.

Rambau operasyen nya, polis mega bisi tetemuka sebuah mutosikal Honda Wave ke dipelabaka dichuri saspek ngambika nyadika bukti.

Saspek diatu benung ditan ba ‘Lockup’ Balai Polis Sentral Miri dikena mantu tasat silik ke benung dipejalaika ari baruh Seksyen 379A Kanun Keseksaan.

Berindik enggau nya, piak polis nesau mensia mayuh ngambika terus ngenataika penerang bekaul ngagai piak bekuasa dikena mantu pengawa ngelaban pengawa salah sereta nentuka pengelikun komuniti terus dijaga. — RBI

SERIAN, 2 April — Siku orang tuai ke diripotka lenyau ba kandang kampung semak Sungai Kedup, Siniawan, pagi kemari ditemu peranak genturung pendiau nya enggau selamat.

Pengawa jampat komuniti kandang menua nya mantu piak bekuasa nembuka operasyen ngiga enggau nyelamat (SAR) dalam timpuh kurang ari sejam pengudah ripot nya digaga.

Opis Bomba enggau Penyah Penusah Malaysia (JBPM) Sarawak madahka sida nerima kangau ngenyit bekaul enggau pengelenyau tudah ke beumur 72 taun urung pukul 10.59 pagi kemari.

Tekala nya pengudah nerima penerang nya, seraban ari Balai Bomba enggau Penyah Penusah (BBP) Serian udah dianjung ngelawa endur penusah nyadi dikena ngepunka misi ngiga.

“Operasyen SAR diuluka Pemesai Bomba Kanan I Rosnani Malong begulai enggau empat iku raban ari BBP Serian ti berumban ngelawa kandang kampung nya enggau naka pengelengkas pengudah nerima kangau nya,” ku penerang nya.

Asil ari kerejasama rat entara raban penyelamat enggau komuniti ngelingi, pengujung iya tudah ditemu peranak genturung nya urung pukul 11.52 pagi, urung 53 minit pengudah ripot diterima opis bomba.

Opis Bomba enggau Penyah Penusah Sarawak ngenukuka operasyen rasmi diketuka tekala nya pengudah tudah ditemu lalu dientaska nadai bakal balat.

Piak bekuasa muji pengirau ati peranak rumah panjai ke jampat bejalaika pengawa mantu pengawa ngiga.

Mensia mayuh kelebih agi orang tuai dilalau ngambika seruran madah ngagai diri sebilik tauka bala bakih nyema bisi ati deka tama ngagai kandang kampung nya dikena nyeliahka sebarang penusah ke enda dikedekaka nyadi baru. — RBI

BETONG, 2 April – Karnival Gawai Renggat Bagi Menua di Betong sekali agi diatur nengah Bazaar Gawai Dayak Betong 2026 ti deka berengkah 2 ngagai 16 Mei tu ba Dataran Tasik Medan.

Sepemanjai timpuh ngatur, bemacham aktiviti ti ngerinduka ati deka diatur dikena ngerichahka pengerami Gawai Dayak nyengkaum pemerindang ari artis tebilang, chabut tikit benasit enggau pekit ti ngaul penyereta komuniti menua nya.

Entara batang pengerami iya nya Pekit Nginti kena 9 Mei, Pekit Karaoke Gawai Dayak ti berengkah 10 ngagai 12 Mei enggau Pekit Engkeratong Cilik kena 8 Mei.

Kelimpah ari nya, bala temuai mega deka dipandangka enggau pemerindang pesaka sereta main asal nyengkaum Main Asal Iban ti mandangka penyereta kelab menua tu baka Kelab Kuntau Spring Betawie, SIDS Pampang Betong enggau Kelab Ngepan Betong.

Dikena nambahka pengagit ati, rintai artis tebilang menua tu deka merindang bala temuai sepemanjai karnival nya, nyengkaum Rofina Salang (3 Mei), Swaylin (4 Mei), Pretty Nina (5 Mei), Akus enggau Indai Panda (6 Mei), Pemerindang Band (7 Mei), Richard Lee (9 Mei), Margaret MJ (10 Mei), Rickie Andrewson (14 Mei) enggau Timoty (16 Mei).

Berebak enggau nya, bazaar nya mega bisi nyediaka bemacham bansal nyual pemakai asal, asil pengelandik jari, pekayan enggau produk menua tu empu, lalu enggau nya meri awak ngagai pedagang mit ngulihka penatai pemisi.

Pengawa ngatur karnival tu dikearap ulih nyadi pelasar ke beguna dalam nerenakka penyerakup komuniti sereta ngelakuka budaya Dayak ngagai rebak baru enggau temuai ari menua luar. -RBI

KOTA SAMARAHAN, 2 April — Ketuai Pampang Parti Keadilan Rakyat (PKR) Kota Samarahan madahka diri deka badu mangku pengawa enggau pansut ari parti enggau bebala mayuh berengkah tekala nya.

Ketuai Pampang iya, Nazirol Bin Samaa’ail madahka pemutus nya digaga enggau chara ti berat sereta sepenemu ti ngaul ketuai besai pampang nya nyengkaum sapit chairman, sekretari pampang, sekretari pengatur, ketuai penerang, tukang wang, chairman tetap, auditor, kaban komiti lebih ari 50 iku raban renggat baruh.

Nitihku iya, pekara nya dipejalaika berindik ari pemuntan Kaunsil Ketuai Nengeri (MPN) Sarawak enggau ketuai ‘pusat’ meri timbal bekaul enggau isu sereta enda puas ati ti udah dibantaika nengah jalai rasmi sebedau tu.

“Surat rasmi udah dianjung ngagai MPN lalu pia mega ngagai PKR Pusat, tang bedau bisi timbal diterima.

“Gaya tu ngasuh asa sereta mandangka penemu enggau sada nyawa renggat baruh enda diberi perati ke patut,” ku iya nengah penerang media, kemari.

Iya madah, surat rasmi badu mangku pengawa udah dikenataika ngagai MPN nyadi singkang kepenudi dikena mutuska kaul sida dalam pengawa nyadi ketuai pampang.

Berebak enggau nya, Nazirol madahka pengawa ngelengka pangku pengawa nya mega dikena ngerandang jalai ngagai ketuai baru ti dipeda setipak agi enggau ketuai ba renggat nengeri.

“Kitai nadai ati deka nyadi penekul ngagai sebarang piak. Nya alai, ruang tu dilengka dikena meri awak ngagai ketuai baru mangku pengawa seriris enggau peneka ketuai ke tinggi agi,” ku iya.

Ku iya nambah, pemutus nya digaga dikena nentuka pengelantang pendiau kaban renggat baruh di Kota Samarahan terus dijaga, kelimpah ari nyeliahka sida ari kena pangka agi ketegal enda sepenemu entara pampang enggau ketuai nengeri.

“Singkang tu penegap runding iya nya prinsip pengawa enda ulih diambi mudah.

“Kitai ngarapka ubah tu ulih muka ruang ngagai pengawa ngatur ti lebih menyana ungkup pemaik kaban ba renggat baruh,” ku iya.

Ngenang silik agi, iya madahka fokus sida berengkah ari diatu iya nya terus meri bantu ngagai pemansang komuniti setempat enggau nadai diikat sebarang sekat politik. — RBI

BETONG, 1 April – Pengerami Bejadika Karnival Gawai Renggat Bagi Menua Betong 2026 udah ditetapka kena 2 Mei 2026 (Hari Enam) lalu deka diatur ba palan Bazar Gawai Dayak Betong, lalu enggau nya ngelai pengawa ngepun rasmi pengerami ti dianti-anti komuniti menua nya.

Pia mega, nampung penerang Betong Xcess, Karnival Gawai Bagi Menua Betong 2026 disadang nyadi pengerami ti chukup ngerinduka ati enggau bemacham program ti diperambu dikena ngerichahka agi pengerami Gawai Dayak taun tu.

Karnival taun tu betuaika chairman pengatur, Leo Toni ari Opis Betanam Betupi Bagi Menua Betong.

Berebak enggau nya, Aum Komiti Besai Pengerami Gawai Renggat Bagi Menua Betong bechairmanka ADUN Layar, Datuk Gerald Rentap Jabu ke mega Sapit Menteri Pemansang Nembiak, Lumba enggau Orang Dagang Sarawak dikena ngatur program ti udah diatur.

Entara batang pengerami karnival tu iya nya Bazaar Gawai Dayak Betong ti deka diatur kena 2 Mei nyentuk 16 Mei 2026 di Dataran Tasik Medan, Betong.

Bazar tu dikearapka nyadi pematak temuai enggau pengawa pemerindang ari artis ke dikangau, bemacham pengawa bejualka pemakai asal, ai irup, asil pengelandik jari enggau produk ari orang dagang menua tu.

Sama bisi diatur iya nya Gawai Fun Run kena 9 Mei 2026 ti ngembuan tuju deka ngelakuka gaya pengidup bepengerai ba komuniti lokal.

Kelimpah ari nya, pekit Pekit Kumang Gawai Betong deka diatur kena 23 Mei 2026 ba Dewan TSDA Stephen Kalong Ningkan dikena mantaika pemanah pekayan asal enggau penyelai budaya komuniti Dayak.

Ba haribulan ke sama, Malam Mantar Gawai mega deka diatur ba palan ke sama nyadi pelasar mandangka main asal enggau pemerindang.

Siti agi program ke bisi dirintai iya nya aktiviti Nguji Tuak kena 16 Mei 2026 ti meri awak ngagai temuai ngelala ai irup asal komuniti Dayak.

Pekara ti pemadu dikerinduka pengerami tu iya nya Pengawa Bejalai Bebala Gawai Bagi Menua Betong 2026 ti diperambu kena 6 Jun 2026 ti disereta mayuh bengkah ejensi perintah, gerempung enggau komuniti ti deka mantaika pesaka asal sida empu.

Nyadi pengawa nutup pengerami nya, deka diatur Ngiling Bidai kena 4 Julai 2026 ba Dewan SJK(C) Min Syn, Saratok nyadika kelai pengujung pengerami Gawai.

Dikearapka pengawa ngatur karnival tu ukai semina ulih ngerichahka agi pengerami Gawai Dayak, tang mega nyadi pelasar dikena ngangkatka budaya, ngenegapka penyerakup komuniti sereta nyungkak aktiviti ekonomi kandang menua di Bagi Menua Betong.