MUKAH, 3 April —Hari kedua operasyen nganjung bantu ai beresi enggau ai irup ngagai kandang endur ke dituntung kemarau di Pelilih Mukah bejalai enggau lanchar nengah kerejasama mayuh bengkah ejensi ari baruh Komiti Mutarka Penusah Ngenyit Pelilih Mukah.

Operasyen tu ngembuan tuju deka nentuka utai ke diguna peranak ba kandang endur ke kena empas terus dijamin sepemanjai musim kemarau.

Nitihka penerang ari Unit Perhubungan Awam enggau Dokumentasi Angkatan Pertahanan Awam Malaysia (APM) Mukah, pengawa bejalaika bantu nya ngaul pengawa ngagihka ai beresi enggau sistematik dikena nangkup guna peranak ba kandang endur ti ngasaika penanggul suntuk ai.

Komuniti diperansang betanya ngagai APM Mukah nyema bisi sebarang penusah ngenyit nyadi nengah talian 084-872814 ti beoperasyen 24 jam sehari. — RBI

KUCHING, 3 April — Ngagai nembiak SPM 2025 ke udah nerima pemutus peresa tang enda bulih kredit dalam subjek Matematik, pelajar kita jemah ila agi tebuka besai ba Politeknik Kuching Sarawak (PKS). Anang muai peluang dalam pengawa belajar.

SEBUYAU, 3 April — Raban Penyaga Mensia Mayuh Malaysia (APM) Pelilih Menua Sebuyau udah nerima kangau ngenyit bekaul enggau bisi ular sawa ba Kampung Arus Melayu, sehari tu.

Nitihka penerang, kangau nya digaga siku orang ke ngaga sebana ti ngemeratka pengelikun peranak ba kandang menua nya.

Berindik ari nya, seraban raban APM Sebuyau udah dianjung ngagai endur nya bejalaika operasyen nangkap jelu reptilia nya.

Asil ari pengawa enggau operasyen ti jampat dipejalaika, ular sawa nya mujur ditangkap enggau likun ngena teknik nyepit enggau sintak ari raban ti bejalaika pengawa.

Nadai sebarang bakal diripotka nyadi ba penusah nya lalu gaya ba palan nya ulih dijaga baru pengudah operasyen tembu.

Mensia mayuh dilalau ngambika seruran bejejaga sereta anang ngambi atur kediri enti sema betapi enggau situasyen ti bekaul enggau jelu siga, tang lebih agi jampat betanya ngagai piak bekuasa minta bantu.

Sebarang penusah ngenyit tau ditanya ngagai APM Sebuyau ba lumur 013-9113937 tauka talipaun penusah ngenyit 999. — RBI

KUCHING, 3 April — Pengeransing ngenegapka kerejasama strategik dalam pemansang infrastruktur nengeri tu majak ditegapka lebuh Kaban Kunsil Nengeri (ADUN) Katibas, Lidam Anak Assan, nemuai rasmi ngagai Opis Direktor Kereja Raya Sarawak kena Hari Empat tu tadi.

Penemuai tu ngembuan tuju deka ngenegapka kaul kerejasama sereta berandauka isu pemansang infrastruktur enggau utai ke diguna, kelebih agi ba kandang menua Katibas.

Nitihka penerang, sesi randau nya mega ngemeratka status projek pemansang ke diatu enggau perambu dudi hari, dikena nentuka pengawa ngenataika projek dipejalaika enggau efisyen agi sereta meri empas ke tinggi ngagai rayat.

“Penemuai tu mega ngayanka komitmen ti seruran dipejalaika dikena nentuka guna infrastruktur ba kandang menua Katibas diberi perati ti patut,” ku penerang nya nerang.

Berebak enggau nya, JKR Sarawak nandu baru komitmen deka terus nyukung agenda pemansang nengeri nengah chara kolaboratif enggau semua raban, setipak enggau pengawa ngangkatka pengelantang pendiau rayat. — RBI

DARO, 3 April — Raban Penyaga Mensia Mayuh Malaysia (APM) Pelilih Daro mujur nagang penusah angus tanah ke nyadi semak jalai besai entara Kampung Kut enggau Kampung Saai, sehari tu.

Nitihka penerang ari Palan Kawalan Operasyen (PKOD) Pelilih Daro, sida nerima kangau ngenyit madahka penusah nya sebedau raban APM terus dipindah ngagai endur nya enggau perengka operasyen.

“Lebuh datai ba endur nya, ditemu api nya ngaul kandang endur ke bisi tanah kerapa. Atur madamka api tekala nya dipejalai lalu api mujur dirara,” ku penerang nya.

Penerang nya nambah, semua kaban enggau perengka operasyen dalam gaya ke manah sepemanjai operasyen nya dipejalaika.

“Gaya ba palan penusah nyadi diatu udah ulih dijaga,” ku penerang nya.

Berindik enggau nya, mensia mayuh diingat ngambika seruran bejejaga sereta lengkas betanya ngagai talipaun penusah ngenyit 999 tauka hotline APM Daro ba lumur 084-823911 ti beoperasyen 24 jam nyema bisi sebarang penusah ngenyit nyadi. — RBI

KUCHING, 3 April — “Arapka pemaik bepun ari tiap iku kitai,” ku Uskup Agung Gereja Roman Katolik Kuching Dato Dr Simon Poh beserimbai enggau pengerami ngintu ‘Good Friday’ enggau Easter 2026, sehari tu.

Iya madahka hari besai ke diintu raban Kristian serata dunya kelebih agi di Sarawak chukup besai reti, sebuah nengeri ti dikelala enggau mayuh bengkah jalai pengarap, budaya enggau penegap penyerakup.

‘Good Friday’ ku iya, dikena ngingatka pemerinsa, regang enggau pemati Jesus Kristus ke nyadi lambang pengerindu enggau pengasih Tuhan ke pemadu tinggi ngagai mensia.

“‘Good Friday’ mai kitai belematika chara kitai ngidupka pengidup kitai, sekalika nya enggau pengasih, pengibuh enggau pemanah ati ngagai orang bukai sereta pengeran berambun nyawa ke kitai sama mensia,” ku iya dalam jaku pesan beserimbai enggau pengerami ngintu ‘Good Friday’.

Iya nyemetak madahka, nilai pengampun ti dipandangka ba jaku kepenudi Jesus ba regang nyadi chunto ti beguna dalam nempa raban bansa ti dalam pemaik sereta bebasa, kelebih agi dalam pupu raban bansa di Sarawak.

Iya mega nerangka regang ti ngayanka gamal Kristus nyadi kelai ti beguna dalam pengarap Kristian, kelai ngingatka pemerinsa Jesus laban deka nebus dosa tauka penyalah mensia.

“Regang ukai semina nyadika lambang tauka pengias aja, tang nyadika pengingat ngagai kitai ngambika idup enggau pengasih, pengampun sereta berambun nyawa baka ti dipandangka Kristus,” ku iya.

Berebak enggau nya, iya nesau raban Katolik di serata dunya ngambika begempung dalam sampi begulai enggau Paus Leo XIV ke pemaik dunya, kelebih agi sida ti tekeruga ketegal perang enggau penyarut.

Dipelabaka kurang lebih 1.4 bilion raban Kristian Katolik ngambi bagi ba pengawa besampi khas ‘Good Friday’, nyengkaum besampika ketuai Gerija, penyerakup raban Kristain sereta ti benung pedis merinsa.

Di Sarawak, pengerami ‘Good Friday’ dikelai enggau hari besai ti meri awak ngagai raban Kristian ngelu pengawa besembiang, besampi begulai enggau diri sebilik sereta beratika reti berambun nyawa enggau pengasih.

Pengerami tu mega disempulang enggau jaku pesan ari bala ketuai nengeri ti minta rayat terus nyaga pemaik enggau pengelantang, ulih nerima penemu pangan diri sereta bebasaka pangan diri kelebih agi nengeri tu diuan pupu raban bansa enggau jalai pengarap.

Kelimpah ari nya, beserimbai enggau ‘Good Friday’ pengawa bepuasa mega enda tau enda ti nyadika tanda nesal ati sereta beserakup enggau Kristus.

KUALA LUMPUR, 3 April — Graduet Setipikit Pelajar Malaysia (SPM) ti bisi ati deka nempa karier dalam sektor betanam betupi moden dilalau minta masuk program Pelajar enggau Latih Teknikal enggau Vokasional (TVET) ti bisi disediaka perintah.

Opis menteri bekaul udah madahka peminta program Sijil Pengelandik Malaysia (SKM) enggau Diploma Pengelandik Malaysia (DKM) dalam sektor betanam betupi udah dibuka berengkah 1 April 2026 ungkup sesi ngambi nembiak bulan Julai/Ogos taun tu.

Program tu ngembuan tuju deka ngasilka pengereja pengawa ti bepengelandik sereta kompetitif dalam sektor agro-pemakai nengah latih bepelasarka pengelandik ti diaku ba renggat menua, setipak enggau guna industri ke diatu.

Nitihka penerang nya, entara syarat ke patut ditetap iya nya peminta meseti peranak menua Malaysia, beumur entara 17 ngagai 30 taun, bepengerai batang tubuh sereta ngembuan pengelandik asas macha, nulis enggau ngira (3M).

“Ungkup peminta ti deka nampung pelajar ngagai tikas ke tinggi agi, sida enda tau enda bisi Setipikit Pengelandik Malaysia ba renggat sebedau tu dalam bidang ke sama.”

“Kelimpah ari nya, graduet Kolej Vokasional ti ngembuan setipikit SKM ti bekaul mega layak minta,” ku penerang nya.

Pesereta ke dipilih deka ngasaika bemacham perengkaguna nyengkaum bayar tuisyen enda bebayar, elawin ninting bulan entara RM200 ngagai RM300, endur diau sereta perengka guna pemakai enggau ai irup ke disedia sepemanjai timpuh latih.

Bemacham bidang latih dalam sektor betanam betupi mega bisi disediaka dikena napi peminta industri, nyengkaum pengelandik teknikal enggau praktikal ti relevan enggau pemansang teknologi betanam betupi ke diatu.

Peminta tau digaga nengah online .
nengah portal rasmi TVET website ba baruh nya.

Mensia mayuh ti begunaka penerang silik tau betelefon ngagai lumur 03-8870 1702 tauka ngelawa laman rasmi www.kpkm.gov.my

Berindik enggau nya, raban graduet SPM dilalau ngerebut peluang tu dikena ngangkatka pengelandik sereta muka jalai kereja dalam sektor betanam betupi, ti majak ngerembai sereta ngembuan potensial ke tinggi. — RBI

DALAT, 3 April — Palan Kawalan Operasyen (PKOD) Pelilih Menua Dalat bejalaika pengawa enggau lengkas pengudah nerima penerang ari mensia mayuh bekaul enggau pun kayu tumbang di Kampung Bakong, Oya.

Nitihka penerang rasmi ari Dalat APM, sebuah kerita ambulans 4×4 ke bisi empat iku raban betuaika Sjn (PA) Hazli bin Rossli dianjung ngagai endur nya.

Lebuh datai ba palan penusah nyadi, ditemu bisi sekeda dan kayu nya patah sereta ngempang sebagi ari jalai.

Skuad Alpha tekala nya bejalaika pengawa netak kayu nya enggau meresi jalai nya likun sereta ulih ditengah perengka pengangkut.

Dalat APM ngemeratka pemesai guna mensia mayuh ngeripot sebarang penusah ngenyit nengah talipaun sida 24 jam ba lumur 084-867357, dikena nentuka pengawa ulih dipejalaika enggau lengkas. — RBI

KOTA SAMARAHAN, 3 April — Perintah nengeri udah ngemendarka agih belanja lebih RM300 juta dikena ngenegapka sistem bekal ai ngelingi Kota Samarahan, nyengkaum Kampung Baru, nyadi chara timpuh panjai dikena mutarka isu pejalai arus ai ke ditapi peranak menua nya.

Kaban Parlimen Samarahan, YB Datuk Hajah Rubiah Wang madah, inisiatif nya mungkur projek nukar paip lama ti enda ulih napi agi pejalai arus ai, kelimpah ari ngangkatmanah sistem ngagih dikena nentuka bekal ai lebih entap sereta komprehensif.

“Perintah meretika enggau penuh penusah ditapi peranak, kelebih agi lebuh penambah penyampau rumah enggau penyampau tubuh meri tekan ngagai sistem bekal ai ke bisi diatu,” ku iya rambau penemuai ngagai Kampung Baru pagi tadi.

Penemuai nya mega digulu Sarawak Water Sdn. Bhd ti diarika Pemangku Ketuai Pemesai Eksekutif, Puan Maselni Binti Jamal, Pemesai Pelilih Menua Samarahan, Encik Ahmad bin Abdul Razak enggau ejensi ke bekaul.

Dalam penerang ti diberi, dipadahka pengawa nyambung paip baru enggau ngangkatmanah sistem paip ngagih diatu nyau deka tembu.

Taja pia, beberapa kandang endur kelebih agi ba ujung kampung agi ngasaika tekanan ai ti baruh.

Nitih ku iya, entara kebuah ke dikelala nyengkaum pengawa ngena pam ai individu enggau enda betagang, ke tau ngeruga tekanan bekal keseluruhan.

Berindik enggau nya, Sarawak Water deka bejalaika pengawa matau enggau meresa premis ti bekaul dikena nentuka agih bekal ai lebih sebela.

Kelimpah ari nya, penanggul paip lama enggau insiden paip meletup ba sekeda endur mega nyadika kebuah bekal ai tejanggal kelebih agi ba ujung rangkaian paip pengagih.

Nerang enggau silik agi, iya madahka projek nukar paip lama dipelaba deka berengkah dalam awak ke semak lalu tembu dalam timpuh 12 bulan, lalu enggau nya meri penguntung timpuh panjai ngagai peranak ba kandang endur ke kena bungkur.

Ku iya nambah, pengawa tu deka ditegapka agi enggau projek ngangkatmanah Loji Meresi Ai Batu Kitang ti dipelaba tembu kena bulan Oktober taun tu, lalu ari nya ulih nambahka kapasiti enggau penegap bekal ai di serata kandang menua Kota Samarahan.

Iya nyemetak madahka piak iya deka terus matau pengerembai isu nya ari sesiti maya ngagai sesiti maya dikena nentuka pengelantang enggau pengelantang rayat seruran dijaga.

Berebak enggau nya, iya mega meri besai terima kasih ngagai semua piak ke bisi kaul enggau peranak Kampung Baru ke udah meri kerejasama enggau penyabar sepemanjai pengawa ngemanahka nya dipejalaika. — RBI

Taja pan dunya napi penanggul bekal kuasa global ti enda tentu, Perintah MADANI mengkang komited nentuka pengelantang rayat terus dijaga enggau nanggung urung 50% ari sabsidi ungkup tiap liter petrol RON95.

Nengah inisiatif BUDI95, rayat Malaysia agi ngasaika rega RON95 iya nya RM1.99 seliter, lalu enggau nya mantu ngurangka tating ungkus pengidup ninting hari.

Pengawa netapka takah guna 200 liter sebulan nyadi atur sementara ti dipejalaika dikena nentuka penegap bekal dalam gaya dunya ke diatu.

Berindik enggau nya, mensia mayuh diperansang beambi ulih ari perengka guna tu enggau bejimat dikena ngatur belanja sereta nyukung pemanah guna minyak menua tu. — RBI