KUALA LUMPUR, 9 April – Menteri Besai, Datuk Seri Anwar Ibrahim madah, Malaysia enda ulih terus bepanggai ba chara lama merambu pemansang menua tang patut ngalih ngagai model pemansang ti inovatif enggau dinamik agi.

Iya madah munyi nya pengudah nyadi chairman Aum Kaunsil Perambu Fizikal Menua (MPFN) Ke-50 sehari tu, ti mega mansik bemacham sukut perambu fizikal menua enggau pemerat ba penumbuh ti sebela sereta meruan.

Nitih ku iya, dalam gaya geopolitik enggau ekonomi global ti majak mayuh pemar, perambu pemansang menua enda ulih bepanggai sepenuh iya ba agih belanja perintah aja.

“Pemansang menua meseti ngalih ngagai model ti lebih inovatif, dinamik sereta enda bepanggai sepenuh iya ngagai agih belanja perintah,” ku iya.

Dalam aum nya, iya mega bisi ngenang pasal pengawa ngenegapka ekonomi menua tu sereta nentuka guna tanah lebih optimum sereta meri empas tinggi.

Ku iya nambah, Perintah MADANI mengkang komited ngangkatka kualiti pengidup rayat nengah pengawa nyendiaka rumah ke bekualiti sereta ulih dibeli enggau rega ke patut, sistem mobiliti ke lebih efisyen sereta pemansang rampa mengeri ke lantang sereta meruan.

“Endang amat, pemansang fizikal menua tu enda tau enda bepelasarka pengelantang pendiau rayat.

“Enggau perambu ti bestruktur sereta bejalaika pengawa ti efektif, insya Allah, kitai deka terus meransang Malaysia nuju jemah ila ti lebih meruan, inklusif sereta tan,” ku iya. -RBI

KUCHING, 9 April – Sapit Menteri Infrastruktur enggau Pemansang Palan Penyangkai Kapal, Datuk Len Talif Salleh madah, chara ngaga jalai beringkat betuju ngurangka empas ngagai ekosistem ke sensitif, kelebih agi palan jelu siga baka mayas ba kandang paya kerapa di Sebuyau.

Ku iya, langkar jalai nya ukai semina ngemeratka pengawa ngintu rampa menua, tang mega meri peluang ngagai penguna ngasaika pemanah asal rampa menua ti nyelai.

Nitihku iya, jalai nya dikearapka ulih meri peneleba ke nyelai ngagai penguna jalai alun, nyengkaum perambu nyendiaka palan endur ngetu dikena meri awak ngagai mensia mayuh ngasaika pemanah rampa menua ngelingi Taman Negara Ulu Sebuyau.

“Enti kitai beratika iya ari sukut rampa menua, jalai tu mega tau nyadi sebagi ari pematak temuai, alai penguna ulih ngetu sereta meda pemanah kandang taman negara,” ku iya.

Iya madah munyi nya lebuh ba Pengerami Ramah Tamah Aidilfitri ke diatur Wang Turu Gagasan Ekonomi Anak Sarawak di Tegas Digital Village, ditu sehari tu tadi.

Berebak enggau nya, iya mega ngelalau mensia mayuh ngambi ngemeranka pengawa nyaga pemeresi ba sepemanjai jalai jalai besai enti udah tembu ila.

Ku iya, penyedar mensia mayuh beguna amat dikena nentuka kandang endur asal enda kamah ketegal pengawa bebuaika uras, kelebih agi ba jalai ti bisi potensial nyadi palan dagang temuai.

“Kitai enggaika kandang endur tu kamah.Penguna jalai alun patut lebih betanggungjawap sereta nyaga pemeresi, kelimpah ari piak ke bekaul nyendiaka perengka guna endur muai uras ke chukup,” ku iya.

Ku iya nambah, chara nya mandangka komitmen perintah nengeri dalam nyemelaka pemansang infrastruktur enggau pengawa nyaga rampa menua. -RBI

KUCHING, 9 April – Tuai Pemegai Menua (TYT) Sarawak, Tun Pehin Sri Dr.Haji Wan Junaidi bin Tuanku Jaafar, sehari tu udah nerima penemuai Yayasan Perpaduan Sarawak ti nyadi ba Astana Sarawak, Petra Jaya, pukul 11.00 pagi tadi.

Penemuai nya digulu dua iku ex- Sapit Kepala Menteri Sarawak ke suba Datuk Patinggi Tan Sri (Dr.) Alfred Jabu Anak Numpang enggau Datuk Patinggi Tan Sri Dr George Chan Hong Nam, sama-sama nyadi Sapit Chairman, pia mega Dato Sri Fong Joo Chung enggau Datuk Amar Awang Tengah bin Ali Hassan nyadi Kaban Kaunsil Pemegai Amanah.

Sama bisi datai Datu Aloysius J. Dris, Ketuai Pengatur Pengawa Roslin binti Latip, Menijar enggau Benedict Anak Jimbau, Menijar Komunikasyen.

Aum nya nyendiaka ruang endur berandau pasal pangku pengawa enggau tuju gerempung nya, nyengkaum pengawa ngenegapka pesaka asal bemacham suku bansa enggau etnik, kelebih agi di Sarawak, sereta mega inisiatif ngetanka budaya asal ke nyadi identiti komuniti pupu bansa.

TYT Tun Pehin Sri mega bisi bekunsika bemacham peneleba iya nyadi lalau enggau malin nyadi pengeransing enggau komitmen dikena nentuka pemeri ti seruran diberi Yayasan Perpaduan Sarawak dalam nerenakka penyerakup lalu udah nya nyadi pelasar ngenegapka bansa ba menua ti dikesayau tu.

Penemuai tu mega mandangka kaul rat entara institusyen enggau ketuai nengeri dalam ngenegapka agenda pemansang inklusif enggau meruan ungkup pengelantang rayat. – RBI

MERADONG, 8 April – Operasyen Nagang Penyalah Begulai ti dipejalaika Indu Opis Polis Pelilih Menua (IPD) Meradong sehari tu udah ngeluarka tujuh saman ketegal mayuh macham penyalah trafik, seraya nadai kes ditangkap tauka ngerampas dirikod.

Ketuai Polis Pelilih Meradong, DSP Tansli Mering madah, operasyen ke baka nya deka terus chakah dipejalaika ari setiap maya ti nyadi chara engkeman dalam nagang pengawa salah sereta nentuka pengelikun mensia mayuh dijaga.

Iya mega ngelalau mensia mayuh ngambika seruran meri kerejasama ngagai polis sereta meri penerang nyema bisi pengawa ke dipelabaka nyadi ba kandang menua sida empu.

Operasyen pengelama semilan jam ari pukul 8.00 pagi nyentuk 5.00 lemai nya ngaul raban 15 iku pemesai enggau raban, betuaika Insp. Mohd Salman Zulfitri bin Sheekandar nyadi Pemesai Lapangan.

Fokus operasyen nya diberi ngagai kandang endur ke udah dikelala nyadi ‘hot spot’ jenayah nyengkaum Jalai Kelupu, Jalai KJD, Jalai Bakong, Jalai Kilang, Taman Bintang, Taman Alomara, Jalai Tulai, Taman Paris Height, Taman Vynyrd Residen, Kampung Melayu enggau Tanjung Genting.

Kelimpah ari nya, pengawa meresa jalai alun (SJR) enggau ‘snap check’ mega bisi dipejalaika ba simpang Jalai Kelupu/Bakong dikena matau pejalai tama enggau pansut ari Bintangor.

Rambau operasyen nya, sepenyampau 86 iku individu udah diperesa ti mungkur 50 iku lelaki enggau 32 iku indu, kelimpah ari pengawa meresa 70 buah perengka pengangkut bemacham bansa nyengkaum mutosikal, kerita, van, pacuan empat roda enggau lori. – RBI

JULAU, 9 April — Sepenyampau 37 iku prinsipal enggau kepala pengajar di Pelilih Julau udah nyereta Woksyop Pengatur Disiplin ke diatur ba Bilik Aum Opis Pelajar Pelilih (PPD) Julau, kena Hari Dua tu tadi.

Woksyop tu diatur nyadi inisiatif dikena ngenegapka pemereti ati enggau penyikar pentadbir sekula ngatur pekara disiplin enggau sistematik, nitihka prinsip pengawa ngatur ti terang, integriti enggau akauntabiliti.

Sesi bekunsi nya dikenataika Kepala Penulung Direktor, Sektor Integriti, Opis Pelajar Nengeri (JPN) Sarawak, Valentine anak Gabriel Bain, ti ngemeratka pemesai guna ngasika atur enggau prosedur dalam mutarka kes disiplin ba renggat sekula.

Nitih ku iya, pengawa ngatur disiplin ti ngasi ukai semina mantu nentuka rampa sekula ti likun, tang mega ngenegapka pengarap komuniti ngagai sistem pelajar menua.

Pengawa ngatur woksyop tu mega dipeda nyadi pelasar strategik dalam meri kuasa ngagai ketuai pelajar ngambika seruran nyikap diri napi pemar kemaya hari, kelebih agi ba sukut integriti enggau ngatur organisasyen.

Berindik enggau nya, jaku beterima kasih dirikod ngagai semua prinsipal, kepala pengajar enggau staf PPD Julau ketegal komitmen enggau kaul sida ti chakah sepemanjai program tu.

Dikearapka semua penemu enggau penerang ke diulih ba wokshop tu, ulih dikena enggau manah dalam pengawa meransang penyulut pelajar di Pelilih Julau. – RBI

MERADONG, 9 April – Siku lelaki beumur 34 taun ditan Raban Petugas IPD Meradong pengudah peresa ai kemi iya ditemu positif Amphetamine enggau Methamphetamine, ku Ketuai Polis Pelilih (KPD) Meradong, DSP Tansli Mering.

Ku iya, saspek ditang urung pukul 12.00 tengahari kemari lebuh bejalaika operasyen “Ops Tapis” ba kandang menua Bintangor lalu dibai ngagai IPD Meradong ngambika atur ke silik agi dipejalaika.

“Meresa baru rikod ke udah tetemuka saspek nadai rikod ngereja penyalah jenayah tauka dadah,” ku DSP Tansli.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit nyentuk RM5,000 tauka ukum jil maksimum dua taun enti ditemu salah.

DSP Tansli nyemetak madahka polis enda belembut ba sebarang penyalah dadah lalu beratika isu tu enggau berat ba raban bansa.

Mensia mayuh ke bisi penerang bekaul enggau aktiviti dadah di pelilih Meradong dipinta nyalur ngagai Balai Polis Bintangor nengah lumur 084-693222. -RBI

KUALA TERENGGANU, 8 April — Raban Penyaga Orang Periman Malaysia (APM) mujur nangkap siku ular tedung ke ngembuan pemanjai lebih tiga meter ke ditemu ba sebuah palan pengentap pendiau di Kampung Banggol Katong, ditu, pagi tadi.

Nitihka ripot Bernama, kes nyadi urung pukul 9.30 pagi nya nyadi lebuh siku indu benama Zaipah Kunton, 59, benung ngeredai gari ba beranda rumah iya lebuh iya tepedaka utai panjai bechura kuning ba baruh pun pisang, urung empat meter ari rumah nya.

“Keterubah iya, aku ngumbai nya tangkai pisang laban utai nya enda mindah sekali.

“Taja pia, aku berasai enda lantang ati lalu aku ngaga ngagai beberapa iku pengereja pengawa ngaga rumah ke semak ngambika meresa laban maya nya aku kediri ba rumah,” ku iya baka ke dipansutka Bernama.

Ripot ke sama madahka, peresa ke silik agi ari pengereja pengawa ke bisi kaul ngentaska utai nya ular sebedau anak iya, Aizuddin Razak, 32 taun, ke baru datai di rumah, tekala nya ngaga kangau ngagai APM minta bantu.

Tim APM ke datai ba endur nya udah nya mujur nangkap reptilia bisa nya ke ditemu belalai ba baruh perengka rumah lama ba kandang endur rumah nya.

Ngambi penerang ari Bernama, nadai orang bakal diripot nyadi lalu operasyen nangkap ular nya bejalai enggau lanchar.

Mensia mayuh dilalau ngambika seruran bejaga sereta lengkas minta bantu ngagai piak bekuasa enti sema bisi tetemuka jelu bisa, kelebih agi ba kandang endur diau besemak tauka kebun. -RBI

BAU, 8 April – Ketuai Polis Pelilih Bau, Supt Mohd Haide A. Rahman, madahka asil pansik tetemuka saspek lelaki dipelabaka nguna ngagai laman web ti ngundan video kamah orang besai tuai enggau anak mit, kelimpah ari nyual kereban nya nengah Telegram sereta ngelakuka iya ba media rama.

Berindik ari nya, siku nembiak lelaki beumur 19 taun ditan polis pengudah ditemu ngembuan 936 video kamah enggau 4,035 gambar kamah ba telefon binching iya.

Nitihka penerang ari Mohd Haide, saspek ditan di Kampung Seromah urung pukul 6.10 lemai maya pengawa ngenyit Op Siber ari unit D11 Opis Siasatan Jenayah Sarawak, ti ​​dipejalaika bepelasarka penerang pemansik.

Ku iya, saspek mega ngaku nyual kereban nya nyadika pun penatai pemisi.

Ba pengawa ngenyit nya, polis ngerampas tiga iti telefon binching, sebuah laptop enggau sekeda kad sim.

Saspek diatu ditan riman pengelama tujuh hari nyentuk 15 April dikena mantu pengawa mansik silik agi.

Kes tu dipansik ari baruh Seksyen 8 enggau Seksyen 10 Akta Penyalah Seksual Ngagai Nembiak Mit sereta mega Seksyen 292 Kanun Keseksaan.

Mohd Haide nyemetak madahka polis enda deka belembut ba sebarang pengawa ti bekaul enggau “eksploitasi” seksual kelebih agi ti ngaul nembiak mit, lalu ngelalau atur ti terit deka dipejalaika ngagai individu ti bekaul. -RBI

KUALA LUMPUR, 8 April – Opis Menteri Pelajar Malaysia (KPM) madahka sepenyampau 6,717 iku chalun ke bulih pemutus peresa nyulut iya nya 10A ke atas ba peresa Sijil Pelajaran Malaysia (SPM) 2025 deka diberi endur ba Program Matrikulasi ungkup sesi 2026/2027.

Nitihka KPM, tawaran nya automatik diberi ngagai semua chalun ke udah minta masuk Program Matrikulasi enda ngira bansa enggau penatai.

Berebak enggau nya, KPM nyemetak madahka kuota penerima ke diatu iya nya 90 peratus ungkup raban Bumiputera mengkang sereta enda dikeruga. -RBI

KUALA LUMPUR, 8 April – Kort Tinggi ditu dipadah sehari tu, dua iku raban polis bebadi nyawa ba sebengkah penusah di Balai Polis Ulu Tiram, Johor, dua taun ke udah, siku ketegal telih ba mua enggau kena timbak ba pala.

Saksi keterubah piak bedawa, Koperal Mohd Khairul Azhar Abbi Paisa, 25 taun, madahka dalam penusah nya urung pukul 2.30 pagi, 17 Mei 2024, iya enggau Koperal Mohd Hasif Roslan, 40 taun, ke benung bejalai matau nagang jenayah nengah nerima perintah ari Ketuai Balai, Inspektor Mohd Hisyam Ezahar nengah aplikasyen WhatsApp ngasuh seduai iya tekala nya pulai ngagai balai laban bisi kes penyarut nyadi.

Nitihka penerang iya, lebuh datai ba endur nya, iya meda niang Ahmad Azza Fahmi Azhar, 22 taun, gali entara berek enggau begunan stesyen dalam gaya bedarah enggau bekau abi ba mua iya ari pending nyentuk ke mulut.

“Maya nya, gaya ba stesyen nya balat petang sereta sunyi sebedau Lans Koperal Muhammad Aznel Salleh nyerauh madahka Ahmad Azza udah dipantap,” ku iya rambau peresa Sapit Pendawa Raya, Mohamad Mustaffa P Kunyalam.

Mohd Khairul Azhar madahka, lebuh datai dia, iya enggau Mohd Hasif ngiga endur belalai lebuh siku lelaki pansut ari tunga barek lalu nimbak seduai iya.

Ku iya, saspek ke ngena gari chelum, ngena topeng sereta mai beg sandik, ngereja pengawa kasar enggau nimbak beberapa kali ngagai pemesai polis ba balai nya.

Dalam gaya ke charut nya ku iya, sida nguji meresa alai saspek ba belakang balai nya, tang lelaki ke bisi kaul nya nimbak baru ngagai sida.

Iya mega madahka Koperal Mohd Hasif kena timbak dua kali ba bau kiba enggau punggung kiba lebuh iya nguji surut ngulihka alai endur belindung.

Kelimpah ari nya, siku agi kaban, Muhamad Syafiq Ahmad Said, 24 taun, ditimbak ba pala lebuh nguji ngiga endur belalai semak enggau sebuah kerita kebal.

“Aku meda saspek nguji deka ngerampas submachine gun enggi Muhamad Syafiq, tang aku mujur nimbak saspek.

“Timbak kedua aku nimbak kena ba tubuh lelaki nya sebedau iya rebah semak kerita kebal nya,” ku iya.

Ku iya nambah, bantu raban khas datai urung pukul 3.30 pagi sebedau gaya ba stesyen nya ulih dijaga, lalu iya udah nya dipinta ngelala tubuh dua iku bakih ke sama enggau iyq gawa sereta saspek.

Ba penusah nya, dua iku konstabel polis iya nya Ahmad Azza Fahmi enggau Muhamad Syafiq bebadi, lalu Mohd Hasif ditimbak lalu bakal, ngujungka saspek lesi ditimbak ba palan penusah nyadi.

Saspek dikelala enggau nama Radin Luqman Radin Imran, 21 taun, ti ngujungka lima iku sida sebilik ditangkap.

Bepelasarka dawa nya, apai iya, Radin Imran Radin Mohd Yassin, 64 taun, didawa meransang pengawa ganas nengah chara nanam ideologi Islamic State (IS) ngagai bala sida sebilik ba sebuah rumah di Jalai Rabani, Kampung Sungai Tiram, Johor Bahru entara ujung taun 2014 nyentukka 17 Mei 2024.

Iya nuduh ari baruh Seksyen 130JG(a) Kanun Keseksaan ti nyendiaka ukum jil maksimum 30 taun enggau ukum mata duit, enti ditemu salah.

Ungkup dawa bukai, lelaki nya mega didawa meri sukung ngagai aktiviti penganas nengah chara nyimpan empat iti senyata api nyengkaum senapang angin ke digaga ba endur ke sama.