SELANGAU, 4 Julai – Kaban Kunsil Nengeri (ADUN) sitak N.59 Tamin, Ir. Christopher Gira Sambang sehari tu udah bejadika Pengerami Nyuaka Program MyLesen B2 diatur DUN N.59 Tamin ti diatur ba Dewan Serbaguna Selangau.
Dalam jaku dipansutka iya, iya ngenataika pengaga ati ke pemadu tinggi ngagai Opis Perengka Pengangkut Jalai Alun (JPJ) Nengeri Sarawak ketegal komitmen ti seruran ngemujurka program ti meri penguntung terus ngagai rayat, kelebih agi raban nembiak enggau komuniti menua pesisir.
Nitih ku iya, Program MyLesen iya nya inisiatif perintah ke beguna ti muka peluang ngagai rayat nyengkaum nembiak, raban nembiak, pekereja enggau raban kurang penatai pemisi ngambi lisin deriba mutosikal B2 nengah chara ti entas.
Pengawa tu ukai semina nambahka mobiliti rayat, tang mega ngerembaika akses ngagai peluang sosio-ekonomi ke manah agi.
“Ungkup komuniti menua pesisir baka sida di DUN Tamin, mutosikal nyadi barang ke diguna ninting hari dikena nurun sekula, gawa, aktiviti dagang mit, ngiga perubat pengerai enggau bemacham pekara ninting hari,” ku iya.
Iya mega nyemetak madahka ngembuan lisin deriba ukai semina nangkup pinta undang-undang aja, tang mega nyadi aspek ti beguna dalam nentuka pengelikun diri enggau penguna jalai alun ke bukai nengah chara deriba ti bejimat sereta betanggungjawap.
Berindik enggau nya, iya meri pengaga ati ngagai semua pesereta ti mujur nembuka latih sereta bulih lisin deriba B2 ti entas.
Berebak enggau nya, iya ngingatka semua penerima lisin ngambika terus ngemeranka budaya deriba bedisiplin sereta ngasika atur jalai alun, kelimpah ari nyeliahka diri ari aktiviti berisiko baka lumba nadai pemendar, ngena telefon binching maya nepan kerita, sereta deriba maya mabuk tauka dadah.
Iya mega madahka YAB Premier Sarawak seruran ngemeratka pemansang modal mensia, lalu pengawa bejalaika Program MyLesen nyata ngayanka komitmen perintah ti terus nentuka nadai raban ti ditinggal ari arus pemansang, enda ngira penatai tauka endur.
Nyadi Kaban Kunsil Nengeri (ADUN) N.59 Tamin, iya ngemeratka komitmen iya deka terus mai mayuh agi inisiatif ti meri empas ke besai ungkup pengelantang rayat, lalu andal amat kerejasama rat entara perintah, ejensi bejalaika pengawa enggau komuniti deka terus ngenegapka agenda pemansang nengeri.
Sama bisi ngulu pengerami nya Sapit Direktor JPJ Sarawak, Tuan Mohamad Faizal David bin Jemat; Pemesai Pelilih Menua Selangau, Encik Yalin Anak Asan; bala ketuai sitak DUN Tamin; bala kaunselor; enggau pesereta Program MyLesen B2. — RBI
#Beritalban | Ruai Berita Iban
Rinduka | Titihka | Kunsika
