KUCHING, 10 Jun – Premier Sarawak, Datuk Patinggi Tan Sri Abang Johari Tun Openg nyemetak madahka Sarawak mengkang komited negapka kapasiti kuasa ulih dikemaru enggau taga ngeluarka kuasa nyentuk 10 gigawatt manggai taun 2030.
Abang Johari ke mega Menteri Kuasa enggau Pemeruan Rampa Menua Sarawak, nerangka Sarawak diatu benung ngambi inisiatif ti proaktif nengah kerejasama dua raban enggau menua berimbai dalam ngerembaika dagang kuasa meraka garis entara menua.
Insiatif nya ku iya madah bisi potensyel nyadi sebagi ari rentayan grid kuasa ASEAN pengudah langkar serantau dikemujurka.
Iya madah munyi nya rambau ngulu sesyen “Dialog Berwawasan Bersama Premier Sarawak” nyerumba Asia Pacific Green Hydrogen Conference and Exhibition (APGH) 2026 ba Palan Konvensyen Borneo Kuching (BCCK), kemari.
“Nya mih kebuah kitai di Sarawak, kitai bisi bilateral, kerejasama entara Indonesia enggau ke alai kitai mekalka kuasa ngagai Kalimantan Barat enggau ngambi ekuiti di Kalimantan Timur nengah SEB lalu kitai ngerembaika bekal ngagai sabah.
“Udah nya ari Sabah engka ngagai Filipina tauka bisi jalai bukai ngagai Filipina. Taja pia, kitai endang bisi berunding enggau Brunei dikena kitai mekalka kuasa ngagai Brunei.
“Pengawa berunding benung dipejalaika, mekalka kuasa ngagai Singapore, semina nganti pemutus ungkup koridor kabel,” terang iya.
Bekaul enggau insiatif jemah, Abang Johari madahka pekara nya deka dibai ngagai renggat perintah besai ungkup aksyen ke patut nengah Sapit Menteri Besai, Datuk Amar Fadillah Yusof, ungkup tuju kerejasama menua ASEAN ke bekaul.
Iya mega nerangka menua ASEAN diperansang nempa siti polisi enggau urus perintah ti komprehensif dikena ngemudahka pengawa bejalaika projek grid kuasa meraka garis entara menua ke nyadi kaban.
Tampung Abang Johari, taja perambu pemansang grid kuasa ASEAN udah lama diperundingka, tang agi bedau bisi siti pelasar serantau ke terang sereta disetuju dikena nyeraris pengawa bejalaika inisiatif nya.
Ku iya madah, sekeda perambu sambung entara kuasa udah dibantaika, nyengkaum jalai ari Laos ke Singapore kelimpah ari bungkur ti nyambung Sarawak enggau Indonesia, Filipina enggau Singapore.
“Nya alai, maya nya aku merambu deka meda model European Union, nyadi kitai enda ibuh irau agi, laban deka meda baka ni sida ngurus bekal kuasa,” ku iya madah. – RBI
Kredit TVS
#ruaiberitaiban#newsiban#beritaiban
Rindu | Titih | Kunsika
