SARIKEI, 7 Jun – Siku indu bakal mimit pengudah kerita ke ditepan iya aksiden ba Jalai Pan Borneo, Jakar, Bayong, tengahari tu tadi.
Nitihka ripot ari Balai Bomba enggau Penyah Penusah (BBP) Sarikei, kangau ngenyit bekaul enggau penusah nya diterima urung pukul 12.01 tengah hari sebedau sebuah entukar LFRT Atego enggau Servis Penyelamat Perubat Emejinsi (EMRS) enggau lapan iku raban bomba ngesah ngagai palan penusah nyadi, iya nya ari penyauh kira-kira 15 kilometer.
Raban bomba betuaika Komander Operasyen, PBK II TBBK I Ahmad Tamizi Abdul Karim datai ba endur nya urung pukul 12.17 tengah hari lalu tetemuka sebuah kerita Perodua Kancil ke udah tepawah ba tengah jalai dalam penusah aksiden nya.
Asil peresa tetemuka dua iku mansa dalam entukar nya mujur dipansutka mensia mayuh sebedau penatai raban bomba.
Siku mansa lelaki dikelala beumur, 18 taun nadai bakal lalu diatu dalam gaya ke likun.
Berebak enggau nya, siku mansa indu beumur 59 taun, sebana pedis ba punggung lalu dianjung ke sepital ngena perengka pengangkut EMRS ngambika diperubat enggau silik agi.
Raban bomba udah nya bejalaika pengawa meresi bekau minyak siuh ba palan nya dikena nentuka pengelikun penguna jalai alun sereta nyeliahka risiko penusah aksiden udah nya.
Operasyen nya mujur tembu abis pukul 1.10 tengah hari pengudah gaya ba palan nya dientaska likun.
Raban bomba ngelalau penguna jalai alun ngambika seruran deriba enggau bejimat sereta ngasika atur jalai alun, kelebih agi maya nengah jalai ti mayuh sekut dikena nyeliahka penusah ke enda dikedekaka nyadi. – RBI
#ruaiberitaiban#newsiban#beritaiban
Rindu | Titih | Kunsika
