SPAOH, 3 Jun — Pengawa jampat Raban Penyaga Pengelikun Mensia Mayuh (APM) Spaoh mujur nagang penusah pengudah siku Ular Rusuk Kerbau ditemu ba kandang Sekolah Menengah Kebangsaan (SMK) Spaoh pagi tadi.
Nitihka penerang ari APM Spaoh, jelu nya ditemu siku penyaga pengelikun sekula maya bejalaika pengawa matau rutin ba kandang endur sekula nya sebedau penusah nya diripot ngagai APM ngambika atur nangkanka nya dipejalaika.
Skuad Bravo APM Spaoh ke nerima kangau pukul 7.15 pagi, terus ngatur tim ke bisi empat iku raban ngagai palan penusah nyadi.
Lebuh datai ba endur nya, bala kaban tetemuka siku Ular Rusuk Kerbau (Coelognathus radiatus) tauka dikelala enggau nama Ular Tikus Radiated, urung tujuh kaki (2.13 meter) pemanjai, ba baruh tiang lampu ba kandang sekula nya.
Operasyen nangkap ular nya mujur dipejalaika ngena perengka khas enggau nadai sebarang penusah ke enda manah nyadi.
Jelu nya udah nya diengkah dalam kutak khas sebedau dilepaska baru ngagai endur ke likun sereta engkeman agi jauh ari palan pengentap pendiau mensia.
APM madahka, Ular Rusuk Kerbau tu spesis ke nadai bisa, tang dikelala enggau ulah iya ke agresif lebuh iya ngasaika diri dikeruga.
Berindik enggau nya, mensia mayuh dilalau ngambika seruran bejejaga nyema betemu enggau jelu babas kelebih agi ular, lalu anang ngambi sebarang atur kediri empu ti tau ngeruga pengelikun.
Sebarang penusah ke nyadi bekaul enggau jelu bisa tauka tau mai penusah patut diripot enggau lengkas ngagai ejensi ke bekaul dikena nentuka pengawa ngurus ulih dipejalaika enggau likun sereta profesional.
APM mega ngingatka mensia mayuh ngambika seruran ngemeratka sukut pengelikun lalu ngelempaika pekara nangkap tauka ngurus jelu siga ngagai orang ti udah dilatih. — RBI
#Beritalban | Ruai Berita Iban
Rinduka | Titihka | Kunsika
Sumber, photo — Apm Spaoh
