MIRI, 25 Mei – Organisasyen media enggau pelasar media rama dikeingat ngambika lebih betanggungjawap lalu anang nyadi jalai ngerembaika penerang pelesu ti tau ngelimpangka runding rayat ketegal deka ngulihka penguntung politik tauka dikena ngulihka trafik online.
Sekretari Besai Parti Sa’ati Rayat Sarawak (SUPP) ke mega Sapit Menteri Dagang Temuai Sarawak, Datuk Sebastian Ting Chiew Yew madah, tetiap piak ti ngaul diri ba pengawa nyadung penerang mensia mayuh enda tau enda nentuka pengamat sesebengkah berita sebedau iya dipansutka ngambika mensia mayuh enda tepejuh enggau fakta ti diputarka.
Nitihku iya, pengawa sekeda pelasar media rama ti ngerembaika isi ti enda betul enggau nadai meresa ukai semina nempa saru penemu, tang mega ulih ngeruga pengarap rayat ngagai institusyen media.
“Rayat bisi hak nemu pekara ke amat. Sebarang pengawa nguji mutarka fakta, ngenyarutka runding rayat tauka ngemaruhka pemeri perintah Sarawak enda tau enda dikutuk,” ku iya nengah sebengkah penerang sehari tu.
Iya madah munyi nya lebuh ngenang pengawa laman Facebook ‘ASM Network’ ke dituduh nyadung penerang ke enda betul nengah chara ngaitka projek Jematan Batang Lupar nyadi projek “Perintah MADANI”.
Ting nyemetak madahka projek Jematan Batang Lupar nya kebendar inisiatif pemansang perintah Sarawak lalu ukai projek Perintah Besai ari baruh Perintah MADANI baka ke disebut.
Ku iya, projek nya dikemendarka maya pentadbiran Menteri Besai ke dulu suba Dato Seri Najib Tun Razak sebedau dikinsil pengudah Perintah Besai betukar dalam taun 2018 ari baruh pentadbiran Pakatan Harapan maya nya.
“Taja pan projek nya dikinsil, perintah Sarawak netapka deka terus meri belanja sereta bejalaika projek tu dikena nentuka rayat Sarawak kelebih agi ke diau di menua pesisir bulih penguntung ari nya,” ku iya.
Nitihku iya, Jematan Batang Lupar ke ngembuan pemanjai urung 4.8 kilometer enggau ungkus urung RM848 juta dikena ngaga nya entara jematan sungai ke pemadu panjai di menua tu lalu baru dibuka dikena mensia mayuh.
Ku iya nambah, jematan nya beguna dalam projek Rentayan Jalai Tebing Pantai Sarawak enggau Jalai Besai Kedua ti nyadi pematak pemansang ekonomi sereta ngemanahka rentayan komunikasyen di menua pesisir enggau menua ulu sungai nengeri tu.
Iya mega nyemetak madahka ketuai Sarawak nyengkaum Premier Sarawak Datuk Patinggi Tan Sri Dr Abang Johari Tun Openg seruran ngemeratka pemansang infrastruktur baka jalai alun, jematan, palan penyangkai kapal enggau perengkaguna mensia mayuh ungkup pengelantang rayat.
Berebak enggau nya, Ting ngelalau mensia mayuh ngambika seruran bejaga-jaga sereta anang mudah bekunsika penerang ke enda dientaska dikena nagang pengerembai berita pelesu ba media rama. – RBI
